Silempwale ni Yohani 13:1-38
13 Ehinaaye ophiya ewoora ya Efeesta ya Mpaasika, Yesu aasuwela weera yoophiya ewoora yoohiya elapo ela ni orowa wa Atiithi awe. Nto, woona weera annaasivela atthu awe yaari mulaponi, owo aahaasivela mpaka okhwipi.
2 Awosa yeera etxaaka yootxa ya Mpaasika,* ni Diabo era ahenleene mmurimani mwa Yuda Iskarioti mwaana a Simoni miruku sonvariha Yesu.
3 Yesu aasuwela weera Atiithi awe, yaamwinnyerera itthu sootheene mmatatani mwawe ni weera aakhumme wa Muluku ni aatthikela wa Muluku;
4 Vano, Yesu aavinya vameesa aakilanthaawevo ni aarula maleya awe a vasulu.* Nto, aakuxa etowaaliya anatthukela muyuununi.
5 Avinyaka, aahela maahi mpasiyani ni aapatxera orapiha manaani atthareli awe ni uumihaka ni etowaaliya iitthukenlaiye muyuununi.
6 Vano, aaphiya va Simoni Pedru. Ni Simoni Pedru aamukoha: “Apwiya, muntthuna orapiha manaani aka?”
7 Yesu aamwaakhula: “Etthu kimpakaaka khamuniiwexexa viinaano va, menento munrowa wiiwexexa muhoolo.”
8 Pedru aamweerela: “Nyuwo khamuwa murapiha manaani aka.” Yesu aamwaakhula: “Kaahirapiha vale manaani anyu, khamukhanle moono aka.”
9 Simoni Pedru aamwaakhula: “Apwiya, ohiya paahi okirapiha manaaniru, mukirapihe-tho mmatatani ni mmuruni.”
10 Yesu aamweerela: “Mutthu orampe ori ootteeleene ni khontthuneya orapiha nipuro nikina ohikhanle mmanaanini paahi. Ni nyuwosa mootteela, menento khaiyene ootheene.”
11 Aahimme eyo mwaha wooweera aasuwela taani eera anvarihe. Tivawonto aahimmaawe weera: “Menento khaiyene ootheene nyuwo muri ootteela.”
12 Amalihakaru orapiha manaani aatthareli awe ni owara maleya awe a vasulu,* aatthikela-tho okilaathi vameesa ni anaweerela: “Moowera wiiwexexa etthu koopakenlaakani*?
13 Nyuwosa munnakiitthana ‘Muhusiha’ ni ‘Apwiya’, munnapaka nnene, woona weera miyo Muhusiha ni Apwiya.
14 Vanonto, waareene weera miyo Apwiya anyu ni Muhusiha anyu, koorapiha manaani anyu, nyuwo tho murapiheke* manaani a mukina ni mukhwaawe.
15 Woona weera miyo kohoovahani ntakihero, hiiha ntoko miyo koopakenlaakani, nyuwosa tho mpakeke.
16 Kinnooleelani ekhaikhai weera: Kaporo khaiyene mutokweene ompwaha pwiya awe, naari ole orummwale khaiyene mutokweene ompwaha ole omurumme.
17 Vano, mwaasuwenleene itthu iya, munkela okhala oohakalala wakhala weera munnavarela muteko.
18 Nkinoohimani ootheene nyuwo; mwaha wooweera kohaasuwela ale kaathanliyaaka. Menento eyo yeereñye weera ekwanele Yoolepa eneera: ‘Ole aatxa ni miyo, ookirukunuwela.’
19 Kinnooleelani eyo viinaano va, ehinaaye weereya, weera yeereya vale, musuwele weera yoolepa eyo, yaakihima yoomi.
20 Kinnooleelani ekhaikhai weera: Ole ommwaakhela akhalaru mutthu miyo kimurummaaka, onnakaakhela-tho miyo, ni ole onkaakhela, onnawaakhela-tho Ale ekirumme.”
21 Yesu amalihakaru ohima itthu iya, aariipiwa murima vantxipale, ni aaheera: “Kinnooleelani ekhaikhai weera: Mmoha a nyuwo, onookivariha.”
22 Vano, atthareli awe yaapatxera owehana mukina ni mukhwaawe, ehisuwelaka taani a yaawo owo aamuhimaawe.
23 Nto, mmoha aatthareli awe, yoowo Yesu aamusivelaawexa, taakilanthi vameesa aattamanneene ni Yesu.
24 Vano, Simoni Pedru anvaha esinaale ni muru mutthareli owo eeraka: “Taani owo ommuhimaawe.”
25 Menento owo aamuhaamela Yesu vakakasani ni anamukoha: “Apwiya, taani owo?”
26 Yesu aahaakhula eeraka: “Yoowo kineeraaka kinvahe epetaasu* ya epaawu kinkelaaka onaaniha mutixelani.” Vano, anaanihakaru epaawu anvaha Yuda, mwaana a Simoni Iskarioti.
27 Nto, Yuda akuxakaru epetaasu ya epaawu, Satana aavolowa mwa yoowo. Vano, Yesu aamweerela: “Mpake moowaakuveya etthu muntthunaanyu opaka.”
28 Mene khaavo aakilanthi vameesa iiwexenxe mwaha wa eheeni owo aamweerenlaawe hiiho.
29 Woona weera Yuda taakosoopa ekaaxa ya musurukhu, akina yuupuwela weera aamweerela weera: “Athume itthu yaahaawelaaya va feestani”. Naari aatthuneya weera aavahe atthu oohaawa itthu.
30 Vano, aakhelakaru epetaasu ya epaawu, aakhuma moowaakuveya. Waari ohiyu.
31 Yuda akhumakaru, Yesu aaheera: “Vano Mwaana a Mutthu onoovuwihiwa, ni Muluku onoovuwihiwa moorweela mwa mwaana.
32 Muluku mwaneene ononvuwiha ni onrowa onvuwiha viinaano va.*
33 Anamwane aka oosiveleya, kiri ni nyuwo mwa etempu vakhaaniini. Nyuwosa munoorowa okaasaasa, mene, ntoko kaalenlaakano ayuda, vano-tho kinnooleelani nyuwo: ‘Nipuro kinrowaaka, nyuwo khamunkela orowa.’
34 Kinnoovahani nlamulo nnyowani weera: Musivelaneke mukina ni mukhwaawe; hiiha ntoko miyo koosivenlaakani, nyuwosa-tho musivelaneke mukina ni mukhwaawe.
35 Moorweela mwa yeeyo, atthu ootheene enoosuwela weera mwa atthareli aka: wakhala weera munnasivelana mukina ni mukhwaawe.”
36 Simoni Pedru aamweerela: “Apwiya, munkela woowiini?” Yesu aamwaakhula: “Viinaano va, nipuro kinkelaaka nyuwo khamunkitthara, mene munookitthara muhoolo mwaya.”
37 Pedru aamukoha: “Apwiya, mwaha wa heeni kihinkelaaka woottharani viinaano va? Miyo kiri oolikaneene okhwa mwaha wa nyuwo.”
38 Yesu aamwakhula amukohaka: “Nyuwo muri oolikaneene okhwa mwaha wa miyo? Kinnooleelani ekhaikhai weera: muthupi khoniipa nyuwo muhinaaye okikhootta ikwaha tthaaru.”
Footnotes
^ Naari: “Yootxa ya Apwiya.”
^ Naari: “aaphitaanyalaawe.”
^ Naari: “aaphitaanyalaawe.”
^ Naari: “entaphulelaaya.”
^ Naari: “munnatthuneya orapiha.”
^ Naari: “nikapattuxa.”
^ Naari: “moowaakuveya.”
