Silempwale ni Yohani 15:1-27
15 “Miyo mwiri weekhaikhai wa ewuuva, ni Atiithi aka eri namalima.
2 Owo onnakakattha itamphi sootheene wa miyo sihiniimiha soowiima, ni onnareherera itamphi sootheene siniimiha weera sivireleleke wiimiha soowiima sintxipale.
3 Nyuwosa muri ootteela, mwaha wa masu koolalenraakani.
4 Mukhale vamoha ni miyo, ni miyo kinookhala vamoha ni nyuwo. Hiihaale ntoko itamphi sihiniimihaaya soowiima sihikhanleene vamwiri wa ewuuva, nyuwosa-tho khamunwera wiimiha soowiima mwaahikhala vamoha ni miyo.
5 Miyo mwiri wa ewuuva; nyuwosa itamphi. Mutthu onvirelela okhala vamoha ni miyo, ni miyo vamoha nuuwo, owo onimwiimiha soowiima sintxipale, woona weera nyuwosa mwakhala ottayi ni miyo khamunwera opaka etthu.
6 Wakhala weera mutthu khanvirelela okhala vamoha ni miyo, onnavonyeriwa vaate ntoko itamphi, ni onnuuma, itamphi iyo sinnathukumanyiwa sinavonyeriwa vamooroni ni ohisiwa.
7 Wakhala weera nyuwosa munoovirelela okhala vamoha ni miyo, ni masu aka ovirelela okhala vamurimani vanyu, nvekeleke etthu* eri yootheene munoovahiwa.
8 Eyo ennaavuwiha Atiithi aka: nvirelele wiimiha soowiima sintxipale ni moonihere weera mwa atthareli aka.
9 Hiihaale ntoko Atiithi enkisivelaaya, miyo-tho kinnoosivelani; nvirelele okhala munsiveloni mwaka.
10 Wakhala weera munniiwelela* malamulo aka munoovirelela okhala munsiveloni mwaka, hiihaale ntoko miyo kiniiwelelaaka malamulo Atiithi aka ni kinavirelela okhala munsiveloni mwaya.
11 “Koolenleni itthu iya weera muhakalaleke ntoko miyo, ni weera ohakalala wanyu okhale woomalela.
12 Nlamulo kinoovahaakani tinna: Musivelaneke mukina ni mukhwaawe, ntoko miyo kinoosivelaakani.
13 Khaavo onsivelaxa ompwaha ole onleva ekumi awe mwaha wa asinthamwene awe.
14 Nyuwosa munookhala asinthamwene aka wakhala weera munoopaka ele kinoorumaakani.
15 Vano nkiwiitthanani akaporo, mwaha wooweera kaporo khansuwela etthu apwiyawe empakaaya. Mene miyo kinnawiitthanani asinthamwene aka, mwaha wooweera kohooleelani itthu sootheene kiiwalaaka wa Atiithi aka.
16 Nyuwosa khamukithanliye miyo, mene miyo kohoothanlani, ni kohoorumani orowa ni ovirelela wiimiha soowiima, soowiima sihinthuwa, weera, etthu eri poothe muneeraanyu nvekele wa Atiithi aka mwa nsina naka, enimoovahani.*
17 Kinooleelani itthu iya, weera musivelaneke mukina ni mukhwaawe.
18 Wakhala weera elapo ennawiittani, musuwele* weera epatxenre okiitta miyo ehinaaye owiittani nyuwo.
19 Waari weera munneerela eparte elapo, elapo yaaheereke woosivelani mwaha wooweera munneerela eparte eyo. Vano, woona weera khamuneerela eparte elapo, mene miyo kohoothanlani mulaponi, tivawonto elapo enwiittaayani.
20 Muupuweleleke ele miyo koolenlaakani weera: Kaporo khaiyene mutokweene ompwaha pwiyawe. Waari weera aakittharatthara miyo, awo-tho enimoottharattharani nyuwo; ni waari weera awo ahiiwelela masu aka, awosa-tho enimwiiwelela masu anyu.
21 Mene enimoopakelani itthu sootheene iya mwaha wa nsina naka, mwaha wooweera khemusuwenle Ole okirumme.
22 Waakhanle weera miyo nkiwiiye ni waalaleera,* awo khayaakela okhalano nthowa mwaha wa yoottheka. Vano awo khayaanoono etthu yoowootherera mwaha wa yoottheka aya.
23 Ole onkiitta, onnawiitta-tho Atiithi aka.
24 Waari weera miyo nkipanke miiriira variyari vaya seiyo mutthu mukina ohitonko awe opaka, khayaakela okhalano nthowa mwaha wa yoottheka; mene, vano, awo aakoona ni aakiitta miyo ni aawiitta Atiithi.
25 Mene eyo yeereñye weera ekwanele masu elempwale mu Nlamuloni mwaya: ‘Aakiitta woohikhala nthowa.’
26 Kinimoorumihelani namakhavihera yoowo onkhuma wa Atiithi a wiirimu eyo tiiyo, munepa wootteela, yoowo onoonihera ekhaikhai ni onkhuma wa Atiithi. Namakhavihera owo awa vale, onookihelela onamoona;
27 ni nyuwo munookihelela onamoona, mwaha wooweera mwaari ni miyo ovenyera* woopatxerani.
Footnotes
^ Naari: “etthu eri yootheene muneeraanyu nvekele.”
^ Naari: “munneettela.”
^ Naari: “awo enimoovahani.”
^ Naari: “moosuwela.”
^ Naari: “wuuluma naawo.”
^ Naari: “ovinyera.”
