Silempwale ni Yohani 16:1-33
16 “Miyo kohooleelani itthu iya weera muhitthikele ottuli.
2 Atthu enookela owoomolani musinakooka. Enoophiya ewoora atthu eneeraaya ewiivekeni yuupuwelaka weera enanvarela muteko wootteela Muluku.
3 Mene awo enoopaka itthu iya mwaha wooweera khayaasuwenle Atiithi naari miyo.
4 Miyo kohooleelani itthu iya weera sapatxera weereya vale, muupuwelele weera miyo kaahooleelani.
“Kaamuhooleelaniru itthu iya woopatxerani mwaha wooweera kaari ni nyuwo.
5 Mene vano, kinrowa wa Ole okiruminhe; mene nnaamweera vareene hiiho, khaavo a nyuwo onkikoha: ‘Woowiini kinkelaakawo.’
6 Ohiya eyo, mirima sanyu sisareñye oriipiwa murima, mwaha wooweera kohooleelani itthu iya.
7 Menento, kinnooleelani ekhaikhai weera: “Kimpwaha weera nyuwo muttottele mureerelo. Woona weera kaahipwaha vale, namakhavihera khanrowa owa wookhaviherani; mene, kapwaha vale, miyo kinoomurumiha.
8 Vano, waphiya vale, onimoonihera nnene yoottheka ya elapo ela, ni onimoonihera weera kinnapaka itthu sa exariya. Ni onimoonihera elapo, atthu Muluku onaathorihaawe:
9 yoopatxera, onkela woonihera nnene yoottheka ya elapo, woona weera elapo khayoonihenre weera ennakiroromela,
10 avinyaka onimoonihera elapo weera miyo kinnapaka itthu sa exariya, mwaha wooweera kinkela wa Atiithi avinyaka vaavo khamunkela-tho okoona;
11 avinyaka onimoonihera nnene elapo, atthu Muluku onaathorihaawe, mwaha wooweera namalamulela a elapo ela oothorihiwa.
12 “Nlelo kookhalano itthu sintxipale weera kooleeleni, mene vano khamunwera wiiwexexa.
13 Vanonto, munepa wootteela wawa vale, eyo tiiyo munepa onsuweliha ekhaikhai, onimoohoolelani weera mwiiwexexe nnene ekhaikhai, mwaha wooweera khooxuttihakani itthu sinkhuma mmuruni mwawe. Mene onkela wooleelakani itthu iiwalaawe wa Muluku, ni wooleelani itthu sinkela weereya.
14 Owo onookivuwiha miyo mwaha wooweera onkela wooleelakani itthu iiwalaawe ni miyo.
15 Itthu sootheene siri sa Atiithi aka, nave-tho ti sawaka. Tivanto kinooleelaakani weera munepa owo onrowa waakhela ni wooleelani ele wiiwalaaya wa miyo.
16 Moohipisa va munoohiya okoona; ni moohipisa-tho va munookoona.”
17 Nto mwaha wa yeeyo, atthareli akina yaapatxera wuuluma yaaworu yeeraka: “Mwaha wa heeni owo onhimaawe weera: ‘Moohipisa va munoohiya okoona; ni moohipisa-tho va munookoona’ ni ahimaka weera ‘mwaha wooweera kinkela wa Atiithi’?”
18 Awo yanneera: “Hiyo khanisuwenle etthu ontthunaawe ohima ni masu oweera: ‘moohipisa va.’”
19 Yesu aasuwela weera awo yaatthuna omukoha, tivanto aakonhaawe weera: “Munkohana eyo mukina ni mukhwaawe mwaha wooweera kirimooleelani weera: ‘Moohipisa va munoohiya okoona; ni moohipisa tho va munookoona’?
20 Kinnooleelani ekhaikhai weera: Nyuwosa munrowa winla ni wiikhupanyera, mene atthu a elapo ela, enrowa ohakalala; mene oriipiwa wanyu murima onrowa okhumihera ohakalala.
21 Muthiyana aayaraka vale onnoona ovoreya mwaha wooweera yoophiya ewoora awe, mene, ayariwa vale mwaana owo onnattiwala ovoreya iwo, mwaha wonwiiha mwaana valaponi.
22 Vamoha-moharu, vano, nyuwo muri ooriipiwa murima, mene kinootthikela owoonani, ni munootteeliwa murima ni khaavo onkela owaakhani* ohakalala wanyu.
23 Nihiku nene nenno, khamunkela okikoha etthu. Kinnooleelani ekhaikhai weera: mwaavekela Atiithi aka etthu eri poothe mwa nsina naka, awo enimoovahani.
24 Mpaka viinaano va, nyuwo khanvekenle naari etthu emoha mano mwa nsina naka, nvekeleke muni mwaakhele weera ohakalala wanyu okhale woomalela.
25 “Kooleelani itthu iya kivarelaka muteko maphwanaphwaniho.* Mene enoophiya ewoora kineeraaka kihivareleke muteko maphwanaphwaniho, mene kinkela wooleelakani mooluluwanya woohima sa Atiithi.
26 Nihiku nene nenno munimwaavekela Atiithi aka mwa nsina naka. Nkintthuna ohima weera miyo kinereke woovekelelani.
27 Atiithi ennoosivelani mwaha wooweera nyuwosa munnakisivela ni munnaroromela weera kirummwale ni Muluku.
28 Kirummwale ni Tiithi ni koovolowa mulaponi. Vano, kinoohiya elapo ni kinrowa wa Tiithi.”
29 Atthareli awe yaamweerela: “Vanonto, aani, munnuuluma mooluluwanya muhivarihelaka muteko maphwanaphwaniho.
30 Vano, hiyo noosuwela weera nyuwo moosuwela itthu sootheene ni khamuntthuneya okohiwa etthu. Tivawo ninroromelaahu weera nyuwo mukhumme wa Muluku.”
31 Yesu aahaakoha: “Vano munnaroromela?
32 Mwiiwe: Ennaattamela ewoora, ni vano yoophiya ewoora eyo, ootheene nyuwo munkelaanyu omwaramwareya kata mutthu akelaka owannyawe ni munrowa okihiya meekhaaka. Mene miyo nkikhanle meekhaaka mwaha wooweera Atiithi aka eri ni miyo.
33 Koolenleni itthu iya weera moorweela mwa miyo, mukhaleno murettele. Mulaponi munookumanano maxupo, mene mulipe murima, miyo koowina elapo.”
