Silempwale ni Yohani 19:1-42
19 Vano, Pilatu aamukuxa Yesu anaruma weera awaxuliwe.
2 Anakhotto yaatthava ekhara ya miiwa enanwariha mmuru, ni yanwariha ekuwo yooxeera.
3 Awosa yannamwaattamela Yesu emweerelaka: “Mwiivuluxe, Mwene aayuda!”, Nave-tho yannammana owiitho.
4 Pilatu aakhuma-tho ni aaweerela atthu: “Mwiiwe! Kinoomukumihera vaate, weera musuwele weera nkimphwannyeno nthowa.”
5 Vano, Yesu aakhumela vaate, awanreene ekhara ya miiwa ni ekuwo yooxeera. Pilatu aaweerela: “Mulopwana ene tuula!”
6 Menento, vaavo asitokweene aanamakeya ni makwaarta* yaamonnaaya Yesu, yaakhuwela: “Akhomeliwe vamwirini! Akhomeliwe vamwirini!” Pilatu aaweerelasa: “Mmukuxeke nyeenyusa weera mwamwiive,* woona weera nkimphwannyeno nthowa.”
7 Nto ayuda yaamwaakhula: “Hiyo nookhalano Nlamulo, ni ti moovarihana ni Nlamulo nno owo ophwanenlaawe okhwa, mwaha wooweera ohiihima okhala Mwaana a Muluku.”
8 Pilatu iiwakaru itthu yaahimaaya, aatepa woova vantxipale;
9 aavolowa-tho mpaani ni aamukoha Yesu: “Nyuwo ta woowiini?” Mene Yesu khaamwaakhunle etthu.
10 Tivawonto Pilatu aamweerenlaawe: “Murookhootta wuuluma ni miyo? Khamusuwenle weera miyo kookhalano owera woowootaphulani, ni owera woowiivani?”
11 Yesu aamwaakhula amweerelaka: “Nyuwo mwahaakhulelinwe wiirimu, khamwaakela okhalano owera wookeeriha etthu. Tivawonto mutthu okivaherenre wa nyuwo oraaweno yoottheka etokweene.”
12 Nto mwaha wa yeeyo, Pilatu annaasaasa moota woomutaphula, menento ayuda yannakhuwela yeeraka: “Mwamutaphula vale mulopwana ola, nyuwo khaiyene nthamwene a Sesare. Ootheene ole oniihima okhala mwene, onnanvirikanyiha Sesare.”
13 Vano, iiwakaru masu ala, Pilatu aamukumihera Yesu vaate, ni aakilaathi nipuro nuulummwa milattu, nipuro nenno Noowaataleleya Maluku, va eheeberi nneeriwa Gabata.
14 Yaari ewoora ya 12, nihiku aarehereriwaawe Mpaasika.* Owo aaweerela ayuda: “Mwene anyu ola!”
15 Menento, awo yaakhuwela yeeraka: “Mmwiive! Mmwiive! Akhomeliwe vamwirini!” Pilatu aahaakohasa eeraka: “Kimwiiveke mwene anyu?” Asitokweene aanamakeya yaahaakhula yeeraka: “Hiyo khanaano* mwene, ahikhanle Sesare.”
16 Nto mwaha wa yeeyo, Pilatu aawinnyerera weera yamukhomele vamwirini.
Vano, awo yaamukuxa Yesu.
17 Ateexaka mwaneene awe mwiri wa nihaaxero,* aarowa Nipuro niitthaniwa Ekarakasa, ni eheeberi nniitthaniwa Golgota.
18 Iwo, awosa yaamukhomela Yesu variyari va alopwana eeli, mukina moono woolopwana mukina moono woothiyana.
19 Pilatu-tho aalepa yoolepa ni aahela vamwirini wa* Yesu. Yoolepa eyo yeera: “Yesu, Munazareti, Mwene aayuda.”
20 Yoolepa ele yaahooniwa* ni ayuda antxipale mwaha wooweera nipuro Yesu aakhomelinwaawe naari noowaattamela osidade. Yoolempwa eyo yaalempwale nnuulumo na eheeberi, elati ni ekereku.
21 Mene asitokweene aanamakeya ni aayuda yaamweerela Pilatu weera ahilepe: “Weera: ‘Mwene aayuda’, mene alepe weera owo enre: ‘Miyo Mwene aayuda.’”
22 Pilatu aahaakhula: “Etthu kilempaaka, koolepa.”
23 Vano, emukhomelakaru Yesu vamwirini, anakhotto yaakuxa maleya* awe ekawanya ipaarte ixexe, yoole ori nakhotto aakunxe epaarte emoha. Mene maleya awe a mpuwa khayaattotthinwe, yaarimweera otthaviwa ovinya osulu mpaka vathi.
24 Tivawonto, yaahuuluma* mukina ni mukhwaawe yeeraka: “Nihipere, neere waasaasera eparakha weera noone taani oneera ohaleno.” Eyo yeereñye weera ekwanele Yoolepa eneera: “Awo aakawana yaaworu maleya, ni ahaasaasera eparakha soowara saka.” Ni yaari ti yeeyo enexa anakhotto ale yaapankaaya.
25 Waattamela vamwirini* Yesu aakhomelinwaawevo, yaakhalavo ameyawe, munnaya-tho Maria mwaara a Kolopa, ni Maria Madalena.
26 Vano, emaara aawonnaawe ameyawe ni mutthareli awe aamusivelaawe vantxipale, weera yeemenle vakhiviru vawe, Yesu aaweerela ameyawe: “Muthiyana, mwaninyu owo!”
27 Woottharelana Yesu aamweerela mutthareli awe: “Ameyanyu awo!” Okhuma vaavale okela ohoolo, mutthareli ole aahaakuxa anaaroiha owannyawe.
28 Vahoolo vaya, Yesu onnaawe weera sootheene saaheereya, ni weera ekwanele Yoolepa Yesu aaheera: “Nookivola ntthona.”
29 Vaavale waakhala mwaapu woosareya eviinyu yoowaawa. Akina a yaawo yaakuxa exponxa* enaruweya nviinyuni ni enatthukelela vamutathini* enaroiha mmwaano mwa Yesu.
30 Aakhelakaru eviinyu, Yesu aaheera: “Itthu sootheene sookwaniheriwa!” ni uuramelaka vathi, aahookhwa.
31 Woona weera naari nihiku Naarehereriwaaya esaabadu, ehitthunaka ohiya irutthu iye vamwirini* nihiku na esaabadu (woona weera esaabadu ele yaakela okhala esaabadu yootepa otthuneya), ayuda yanvekela Pilatu weera arume wintakiwa metto sa asilopwana ale ni ovenxiwa mirutthu saya.
32 Vanonto, anakhotto yaarowa ni yahintaka metto sa mulopwana oopatxera, ni mulopwana mukina aakhomelinwe vamwirini moono mukina wa Yesu.
33 Mene, ephiyakaru ekwaha ya Yesu, yaahoona weera ohookhwa, tivawonto yahintankaaya metto sawe.
34 Vano, mmoha aanakhotto aamuhoma mpararini nnivaka, vaanaanoru, yaakhuma ephome ni maahi.
35 Itthu iya sihimmwale nnamoona onne itthu iya seereeyaka, ni onamoona awe ti weekhaikhai ni owo oosuwela weera ele ohimmaawe ekhaikhai.
36 Mweekhaikhai, itthu iya seereñye weera ekwanele Yoolepa eneera: “Khanaavo nikhuva nawe neera nintakiwe.”*
37 Nave-tho, weera ekwanele Yoolepa ekina eneera: “Enonwehexexa ole emuhommaaya.”
38 Noomala itthu iya, Yosefe yoowo aari a wArimatheya (aari mutthareli a Yesu moowiipithiheya mwaha wooweera anwoova ayuda), aamukoha Pilatu waari weera owo wanwereya okumiha murutthu wa Yesu, ni Pilatu aamwaakhulela. Nto, owo aarowa ni aakumiha murutthu wa Yesu.
39 Nikodemu, yoowo* aakumanne ni Yesu ekwaha yoopatxera ohiyu, aarowa-tho akunxeene makhura oowinkhela a emiira, makhura alowe yaalemela ikiilu* 33.
40 Awosa yaakuxa murutthu wa Yesu, enavitikelela ni ikuwo sa iliinyu vamoha ni makhura oowinkhela, moovarihana ni moota ayuda yaarehereraaya murutthu weera wavithiwe.
41 Vano, nipuro nne Yesu iivinwaawevo yaakhala ejardim ni ojardim iwo naakhala nikhuku nnyowani nihitonko ovithiwa mutthu.
42 Woona weera naari nihiku ayuda Yaarehereraaya esaabadu, ni weera nihiye nne naakhuveela, yaavitha mmo murutthu wa Yesu.
Footnotes
^ Naari: “makwaarta a mutemplu.”
^ Naari: “mwamukhomele.”
^ Va, masu ooweera “Mpaasika” enhimmwa esemana ya Mpaasika, yaahela mpuwa Efeesta ya ipaawu soohiheliwa efaramenta.
^ Naari: “khannano.”
^ Nwehe masu oowiiwanyeihiwa.
^ Naari: “aakhomelinwaawe.”
^ Naari: “yaasommwa.”
^ Naari: “soowara sawe.”
^ Naari: “yaaheerelana.”
^ Naari: “vamwirini vanihaaxero.” Nwehe masu oowiiwanyeihiwa.”
^ Naari: “nttapwatta.”
^ Nwehe masu oowiiwanyeihiwa.
^ Naari: “mwiri wa nihaaxero.” Nwehe masu oowiiwanyeihiwa.
^ Naari: “ninyaanyiwa.”
^ Naari: “mulopwana yoowo.”
^ Naari: “ilibra 100.” Eyo tiiyo, ilibra sa Oroma.
