Silempwale ni Yohani 2:1-25
2 Nihiku nanaararu, yaapakiwa efeesta ya ekasamentu oKana wa oGalileya, ameyawe Yesu-tho yaari ofeestani iwo.
2 Yesu-tho ni atthareli awe yaawompwa ofeestani iwo wa ekasamentu.
3 Vaavo eviinyu yaahalelaaya omala, ameyawe Yesu yaamweerela: “Eviinyu yohaamalela.”
4 Vano Yesu aawaakhula: “Muthiyana, eheeni enaattamme miyo ni nyuwo vaavo? Ewoora aka nlelo khephiñye.”
5 Ameyawe yaaweerela arumeyi: “Mpakeke etthu owo oneeraawe oorumeeni.”
6 Saakhala vale mino 6 sa maluku seiyo saaheliwa maahi weera atthu yiitteelihekeno moovarihana ni nlamulo na ayuda; yoole ori muno, saavolowa miphimo* miili naari miraru sa maahi.
7 Yesu aaweerela: “Musarihe maahi imino.” Nto awosa yaasariha.
8 Vano, Yesu aaweerela: “Murike vakhaaniini ni mwamwinnye muhooleli a efeesta.” Ni awosa yaapaka eyo.
9 Muhooleli a efeesta alawihakaru maahi yaatatuxinwe eviinyu, ahisuwelaka woowiini yaakhummaayawo eviinyu (nnaamweera arumeyi ale yaarinke maahi yaasuwenle), muhooleli a efeesta aamwiitthana mulipa oothela
10 ni aamweerela: “Atthu ootheene empatxera toko okumiha eviinyu yoosiva, atthu yahapaliwa vale tenkumihaaya eviinyu yoohisiva. Menento nyuwo moovitha eviinyu yoosiva mpakana viinaano va.”
11 Yesu aapanke eyo oKana wa oGalileya apatxeraka miiriira sawe, ni aahoonihera ovuwa wawe, ni atthareli awe yaamuroromela.
12 Avinyakaru vaavo, Yesu, ameyawe, asinnawe ni atthareli awe, yaarowa oKafarnawu, mene khayaakhanle iwo mahiku mantxipale.
13 Vano eera aattamelaka Mpaasika aayuda, ni Yesu aarowa oYerusalemu.
14 Owo aavolowa mutemplu ni aahaaphwanya atthu yaatumiha imompe, iputtiputthi, ipompa,* ni anamatxenxiha musurukhu ekilantheene mmapuroni mwaya.
15 Vano, Yesu aapaka murepettho wa mukoyi anawoomola atthu ootheene mutemplu vamoha ni iputtiputthi, imompe, ni aamwaramwara musurukhu waatthu yaatxentxiha ni aakunttula imeesa saya.
16 Ni aaweerela atthu ale yaatumiha ipompa*: “Mukumihe itthu iya mu! Muhiye okhaliha empa ya Atiithi aka empa yoomweetta nakoso!”
17 Atthareli awe yaahuupuwela ele elempwale: “Osivela waka empa anyu, onrowa okhalaka ntoko mooro onvarela vamurimani vaka.”
18 Nto mwaha wa yeeyo, ayuda yaamukoha: “Ethoonyero heeni muneeraanyu munoonihere weera mookhalano owera woopaka itthu iya?”
19 Yesu aawaakhula: “Mpwexe etemplu ela, ni miyo kinoopaka mpuwa mwa mahiku mararu.”
20 Vanonto, ayuda yaamwaakhula emukohaka yeeraka: “Soovira iyaakha 46, etemplu ela epakiwaka, vano nyuwo muneera munoopaka mpuwa mwa mahiku mararu?”
21 Mene etemplu Yesu aahimaawe, yaari erutthu awe.
22 Yesu avinyererihiwakaru mookhwaani, atthareli awe yaahuupuwela weera owo annahima masu ala, ni awosa yaaroromela ele Yaalempwale ni ele Yesu aahimmaawe.
23 Menento emaara aaraawe oYerusalemu oFeestani ya Mpaasika, atthu antxipale yaamuroromela mwaha wooweha miiriira aapakaawe.
24 Mene Yesu khaaroromela awo moomalela, mwaha wooweera aahaasuwela ootheene
25 ni mwaha wooweera owo khaahaawela nikhavihero na mutthu mukina weera ahelele onamoona woohima sa atthu awo, woona weera owo aasuwela eheeni yaari vamurimani va atthu.
Footnotes
^ Miphimo, woonaru yaari ebatu yeeyo yaarino iliituru 22.
^ Naari: “ikhuntta.”
^ Naari: “ikhuntta.”
