Silempwale ni Yohani 20:1-31
20 Nihiku noopatxera na esemana, Maria Madalena aaphiya omahiye oxeexelo, epiphi nlelo ehimalamanle, ni aahoona weera nluku naattiyelinwaayano nihiye naavenxiwa.
2 Vano, owo aavinya atthimakaka anarowa okumana ni Simoni Pedru ni mutthareli mukina, yoowo Yesu aamusivelaawe ni aaweerela: “Aakumihiwa Apwiya mmahiye, ni khanisuwenle woowiini ehiiwalaayawo.”
3 Vano, Pedru ni mutthareli mukina ole yaavinya enarowa omahiye.
4 Ooweeli yaapatxera otthimaka vamoha, mene mutthareli ole mukina aatthimaka moowaakuveya aphiya omahiye Pedru ahinaaye.
5 Uuramaka, aaweha mmahiye ni aahoona ikuwo sa eliinyu sireene mwemmwe, menento khaavolonwe.
6 Avinyaka, Simoni Pedru aamutthara, aaphiya-tho, aavolowa mmahiye ni aahoona ikuwo sa eliinyu sihiiwaleene mmo.
7 Ekuwo yaahelinwe waamuru wawe* khayaakhanle vale vamoha ni ikuwo ikina, mene saaroopinttiwa siheliwa nipuro nikina.
8 Vano, mutthareli mukina ole aapatxenre ophiya omahiye, aavolowa-tho aahoona, ni aaroromela.
9 Mwaha wooweera awosa nlelo khayiiwexexa Yoolepa yaahima weera owo* anvinyererihiwa mookhwaani.
10 Vano atthareli yaatthikela owaani.
11 Nto, Maria aahanle vaate, inlaka waattamela vamahiye. Ariki winla hiihaale, aahuuramela mpuwa mwa mahiye weera oone mpuwa mwa mahiye mmo
12 ni aahoona malaika meeli ewanreene sootteelaru ekilantheene nipuro waahiwalaayavo murutthu wa Yesu, mukina akilantheene waamuru mukina waametto.
13 Malaika awo yaamukoha: “Muthiyana, mwaha wa heeni muninlaanyu?” Ni owo aahaakhula: “Apwiyaka erookuxiwa, ni nkisuwenle yaahiñyaayawo.”
14 Uulumakaru masu ala, owo aarukunuwa ni aamoona Yesu eemenleene vale, mene khaamusuwenle weera aari Yesu.
15 Vano, Yesu aamukoha: “Muthiyana, mwaha wa heeni muninlaanyu? Mummwaasa taani?” Maria uupuwelaka weera aari mulopwana aarehera ejardim, aamweerela: “Apwiya, mwaareene weera ti nyuwo mmukunxe, mukileele mmuhiñyaanyuwo, ni miyo kinoorowa omukuxa.”
16 Yesu aamweerela: “Maria!” Anwehaka Yesu, Maria aaheera ni eheeberi: “Rabi!” (yeeyo entaphulela: “Muhusiha!”).
17 Yesu aamweerela: “Muhikivare,* mwaha wooweera nlelo nkironwe wa Atiithi. Vano, murowe wa asinnaka ni mwaaleele weera: ‘Miyo kinrowa wa Atiithi aka ni wa Atiithi anyu, wa Muluku aka ni wa Muluku anyu.’”
18 Maria Madalena aarowa ni aahaaleela mitthenka iya atthareli: “Miyo koowoona Apwiya!” Ni aahaaleela itthu sootheene Yesu aamulenlaawe.
19 Waaxekuwa nihiku nne, nenno naari nihiku noopatxera na esemana, ni milako sa nipuro nenno atthareli yaaraayamo, saawaliwa, mwaha wooweera yanwoova ayuda. Vano, Yesu aahaakhumelela awosa variyari vaya ni aaweerela: “Murettele okhale ni nyuwo.”
20 Ahimakaru itthu iya, Yesu aawoonihera matata awe ni niparari nawe. Nto, atthareli yaahakalala mwaha woowoona Apwiya.
21 Mwa ekwaha yanaaveeli, Yesu aaweerela-tho: “Murettele okhale ni nyuwo. Hiihaale ntoko Atiithi ekiruminhaaya miyo, Miyo tho kinnoorumihani nyuwosa.”
22 Ahimakaru itthu iya, Yesu aawiiseelela eeraka: “Mwaakhele munepa wootteela.
23 Wakhala weera nyuwo munoolevelela soottheka sa mutthu, owo onooleveleliwa; wakhala weera khamunlevelela soottheka sa mutthu, owo khanleveleliwa.”
24 Mene Tome, mmoha aarummwa ale 12, iitthaniwa Maphapo, khaakhanlevo emaara Yesu aakhumelenlaawe atthareli.
25 Vano, atthareli akina yaamuleela yeeraka: “Hiyo noowoona Apwiya!” Mene owo aaweerela: “Miyo kaahoonaru mmatatani mwaya makhwatta a ipereku yaathorolinwaayamo, ni kaahihelaru ekathaaka vanikhwattani na epereku nno, ni kaahivararu ni ntata
naka niparari yaahoommwaalaaya, nkiwa kiroromela.”
26 Evinreene mahiku 8 atthareli yaathukumana-tho, ni Tome aari vamoha ni yaawo. Nnaamweera milako saari soowaliwa sene, Yesu aahaakhumelela variyari vaya ni aaweerela: “Murettele okhale ni nyuwo.”
27 Avinyaka aamweerela Tome: “Muhele ekatha anyu va, ni moone matata aka; ni muhele mpararini mwaka ntata nanyu. Muhiye ohovela ni muroromeleke.”
28 Tome aamweerela: “Apwiya aka ni Muluku aka!”
29 Yesu aamweerela: “Nyuwo muroromenle mwaha wooweera murookoona? Oohakalala taale eroromenle nnaamweera ehikonne.”
30 Yesu aapaka miiriira sintxipale ohoolo wa atthareli awe, seiyo sihilempwale eroolu ela.
31 Menento iya silempwe weera nyuwo muroromele weera Yesu Kristu Mwaana a Muluku, ni mwaha wa ororomela wanyu, mukhaleno ekumi moorweela mwa nsina nawe.
