Silempwale ni Yohani 21:1-25
21 Noovira itthu iya, Yesu aahaakhumelela-tho atthareli awe ephareya ya oTiberiyade. Owo aakhumelenle moota ola:
2 yaari vamoha Simoni Pedru, Tome (yoowo iitthaniwa Maphapo), Nataniyeli a oKana wa oGalileya, anamwane a Zebedeyo ni atthareli awe eeli.
3 Simoni Pedru aaweerelasa: “Kinrowa omesera.” Awosa yaamwaakhula yeeraka: “Hiyo-tho nnoorowa vamoha ni nyuwo.” Nto, yaarowa ni yaavolowa mpaarkuni, mene ohiyu wootheene ole khayaaphwannye etthu.
4 Vaxaaka, Yesu aari muxerexere mwa ephareya, mene atthareli awe khayaasuwela weera aari Yesu.
5 Vano, Yesu aahaakohasa: “Anamwane aka, mookhalano etthu* yootxa?” Yaamwaakhula: “Hooye.”
6 Yesu aaweerela: “Nvonyere ntthavi moono woolopwana wa paarku, ni munoophwanya etthu.” Vano awosa yaavonyera ntthavi, mene khayaawera opurula mwaha wooweera ntthavi naasareya ihopa.
7 Vano, mutthareli Yesu aamusivelaawe vantxipale, aamweerela Pedru: “Ta Apwiya!” Vano, Simoni Pedru iiwalaawe weera yaari Apwiya, aakuxa soowara sawe anawara, woona weera khaawanre etthu* ni aahiivonyera mphareya.
8 Mene atthareli akina yaawiiye enwenleene paarku mukhaanini epurulaka ntthavi noosareya ihopa woona weera khayaarakamenle muxerexere mwa ephareya, saari imeeturu 90 paahi.
9 Ephiyakaru omokoni, yaahoona mooro opattihinweene sooxiwakavo ihopa, ni-tho yaakhala epaawu.
10 Yesu aaweerela: “Nwiihe ihopa ikina iyo mmanlaanyu ovara viinaano va.”
11 Vano, Simoni Pedru aawela mpaarkuni ni anapurula ntthavi aroihaka omokoni; nno naasareya ihopa, ihopa 153 itokotoko. Nnaamweera saakhanle ihopa sintxipale, ntthavi khanaapaseñye.
12 Yesu aaweerela: “Nweeke mutxeeke.” Mene khaavo aatthareli ale aawenre omukoha owo taani mwaha wooweera yaasuwela weera owo aari Pwiya.
13 Vano, Yesu aawaattamela ni aakuxa epaawu anaavaha ni aahaavaha ihopa.
14 Avinyererihiwakaru mookhwaani, ela yaari ekwaha yanaararu Yesu aakhumelenlaawe atthareli awe.
15 Emalihakaru otxa, Yesu aamukoha Simoni Pedru: “Simoni, mwaana a Yohani, munnakisivela opwaha itthu iya?” Simoni, aamwaakhula: “Aani Apwiya, nyuwo moosuwela weera miyo kinnoosivelani.” Yesu aamweerela: “Mutxiheke iputtiputthi saka.”
16 Vano, aamukoha-tho ekwaha yanaaveeli: “Simoni mwaana a Yohani, munnakisivela?” Simoni aahaakhula: “Aani, Apwiya, nyuwo moosuwela weera miyo kinnoosivelani.” Vano Yesu aamweerela: “Mutxiheke iputtiputthi saka.”
17 Yesu aamukoha tho ekwaha yanaararu: “Simoni mwaana a Yohani, munnakisivela?” Pedru aariipiwa murima mwaha woomukoha ekwaha yanaararu eeraaka: “Munnakisivela.” Tivawonto owo aamweerenlaawe: “Apwiya, nyuwo moosuwela itthu sootheene, nyuwo moosuwela weera miyo, kinnoosivelani.” Yesu aamuleela Pedru eeraka: “Mutxiheke iputtiputthi saka.
18 Kinnooleelani ekhaikhai weera: Emaara mwaaraanyu mmiravo, mwannawara ni mwannarowa nipuro mwaatthunaanyu. Mene muuluvala vale, munookela wookola matata anyu, nto mutthu mukina onimooroihani nipuro mwahaatthunaanyu.”
19 Yesu aahimme eyo atthunaka ohima moota okhwa wa Pedru waakelaaya onvuwiha Muluku. Amalihakaru ohima itthu iya, aamweerela: “Pedru, nvirelele okitthara.”
20 Pedru aarukunuwa ni aamoona mutthareli Yesu aamusivelaawe aattharaka, mutthareli ene ti yoole aamuhaamenle Yesu vakakasani emaara yaatxaaya yootxa ya Mpaasika,* amukohaka ha: “Apwiya, taani oneera oovariheni?”
21 Vanonto, Pedru amoonakaru aamweerela Yesu: “Apwiya, eheeni enkela omweereela mulopwana ola?”
22 Yesu aamwaakhula eeraka: “Miyo katthuna vale weera owo akhale mpaka miyo owa, eheeni enooxupani? Nyuwo nvireleleke okitthara.”
23 Nto, yaamwaramwareya variyari va asinna masu ale ooweera mutthareli ole khaakela okhwa. Menento Yesu khaahimme yeeyo weera owo khaakela okhwa, mene aahimme weera: “Miyo katthuna vale weera owo akhale mpaka miyo owa, eheeni enooxupani?”
24 Ola, mutthareli yoowo onhelela onamoona wa itthu iya ni olempe itthu iya, ni hiyo noosuwela weera onamoona awe ti weekhaikhai.
25 Mweekhaikhai, sookhala itthu ikina sintxipale Yesu aapankaawe, nto waakhanle weera itthu sootheene soolempwa kinoona weera elapo, khayaarowa okhalano nipuro noowiiyaathivo iroolu sootheene saakela olempwa.