Silempwale ni Yohani 3:1-36
3 Variyari va afarisi, aakhala mulopwana mmoha iitthaniwa Nikodemu, yoowo aari muhooleli aayuda.
2 Owo aarowa okumana ni Yesu ohiyu ni aamweerela: “Rabi,* noosuwela weera nwiiye wa Muluku ntoko muhusiha mwaha wooweera khaavo onwera opaka miiriira ntoko iya apwiya mumpakaanyu Muluku ahikhanle ni yoowo.”
3 Yesu aamwaakhula eeraka: “Kinnooleelani ekhaikhai weera: Mutthu aahiyariwa veeli, khanrowa woona Omwene wa Muluku.”
4 Nikodemu aamukoha eeraka: “Moota heeni mutthu onrowaawe oyariwa uuluvanleene? Neereke mutthu pooti otthikela mmirimani mwa ameyawe weera ayariwe veeli?”
5 Yesu aamwaakhula eeraka: “Kinnooleelani ekhaikhai weera: Mutthu aahiyariwa ni maahi ni munepa wootteela, khonwereya ovolowa Moomweneni wa Muluku.
6 Ole oyarinwe ni mutthu, mwaana a mutthu, ni ole oyarinwe ni munepa wootteela mwaana a Muluku.
7 Muhitikhiniheye mwaha wa miyo oweerelani: Nyuwosa muntthuneya oyariwa veeli.
8 Epheyo ennoopela nipuro nri poothe ni enniiwanyeya oruma waya, mene khensuwanyeya woowiini enkhumaayawo naari enkelaayawo. Ti etthu emoha-moharu eneereya ni ole oñyariwa ni munepa wootteela.”
9 Nto Nikodemu aamukoha: “Itthu iya sinwereya moota heeni?”
10 Vano Yesu aamwaakhula eeraka: “Nyuwo muhusiha a wIsraeli, vano, nnaamweera vareene hiiho, nyuwo khamusuwenle itthu sene seiya?
11 Kinnooleelani ekhaikhai weera: Nnuuluma itthu nisuwenlaahu ni ninhelela onamoona itthu nonnaahu. Mene nyuwosa khamunaakhulela onamoona hiyo ninvahaahu.
12 Va, miyo koolenleni itthu sa elapo ya vathi mene nnaamweera vareene hiiho, khamwaakhulenle. Vanonto munkela waakhulela moota heeni miyo kooleelani itthu sa wiirimu?
13 Opwaha mwa yeeyo, khaavo mutthu otonko* owela wiirimu ohikhanle yoole okhumme wiirimu, Mwaana a Mutthu.
14 Ni ntoko hiihaale Mose aathomeñyaawe enowa onikareni, hiiho-tho, Mwaana a Mutthu onoothomeiwa
15 weera atthu ootheene yaale eneera emuroromele, ekhaleno ekumi yoohimala.
16 Aani, Muluku ootthuna vantxipale elapo ya vathi, mpaka ophiyera onvaha Mwanawe mmoha, weera ootheene ale eneera emuroromele ehinyaanyiwe, nto ekhaleno ekumi yoohimala.
17 Tthiri Muluku khamurumihenle Mwanawe elapo ya vathi weera athorihe elapo, mene omuruminhe weera elapo evuluxiwe moorweela mwa yoowo.
18 Ole onoonihera nroromelo wa yoowo khathorihiwa. Ole ohimmuroromela oothorihiwa mwaha wooweera khoonihenre ororomela nsina na Mwaana mmoha ene a Muluku.
19 Vano, mathipelo a ethorihelo taala: muthuko wohoowa mulaponi, mene atthu esivelinwe ni epiphi ohiya muthuko, mwaha wooweera soopaka saya ti soonanara.
20 Nto ole ompaka itthu soonanara onniitta muthuko, ni khanaattamela muthuko owo, weera soopaka sawe soonanara, sihooniheriwe ni muthuko owo.
21 Mene ole ompaka itthu sooreera,* onnaattamela muthuko, weera soopaka sawe sooreera, sooneyeke weera simpakiwa moovarihana ni yootthuna ya Muluku.”
22 Noomala, Yesu vamoha ni atthareli awe, yaarowa muttetthe wa oYudeya; iwe, owo aaviriha etempu vakhaaniini areene weiwo ni atthareli awe ni annapatisa.
23 Mene Yohani eera-tho aapatisaka atthu wEnoni waattamela oSalimi, mwaha wooweera yaakhalawo maahi mantxipale ni atthu yannarowa ni owo annaapatisa.
24 Etempu ene yeeyo, Yohani eera ahinaaye otthukiwa.*
25 Vano, atthareli a Yohani yaavaanyihana ni ayuda woohima sa otteelihiwa.*
26 Ni awosa yaarowa omuleela Yohani yeeraka: “Rabi, mulopwana ole aari ni nyuwo ekhopela ekina ya mooloko Yordani, yoole mmuhelenlaanyu onamoona, onaapatisa atthu ni atthu ootheene ennarowa wa yoowo.”
27 Yohani waakhula enre: “Kheyaavo etthu mutthu onaakhelaawe ohivahinwe wiirimu.
28 Nyuwosa anamoona wa ele miyo kaahimmaaka weera: ‘Miyo, khaiyene Kristu, mene kirumihinwe ohoolo wawe.’
29 Muthiyana ottomerinwe, ta mulopwana ottomenre, mene nthamwene a mulopwana ottomenre akhala vakhiviru ni aniiwa wuuluma waya, onnahakalala vantxipale mwaha woowiiwa nsu na mulopwana ottomenre. Tivanto ohakalala waka wookwanela.
30 Mene miteko sawe owo* sintthuneya weera sivireleleke waatxeerereya, mene miteko saka sivireleleke ovukuwa.”
31 Ole onkhuma osulu ohaapwaha atthu ootheene. Ni ole ori a elapo ya vathi ta elapo ya vathi, ni onuuluma itthu sa elapo ya vathi. Ole onkhuma wiirimu, mutokweene waapwaha atthu ootheene.
32 Owo onhelela onamoona itthu onnaawe ni iiwalaawe, mene khaavo onaakhulela onamoona awe.
33 Ole onaakhulela onamoona awe, onnaroromela weera Muluku ta ekhaikhai.
34 Tthiri ole orummwale ni Muluku, onuuluma itthu sa Muluku, mwaha wooweera Muluku khanvaha munepa awe wootteela moophima.*
35 Tiithi onnamusivela Mwaana, tivanto omwinnyerenraawe itthu sootheene mmatatani mwawe.
36 Ole onoonihera nroromelo wa Mwaana, onookhalano ekumi yoohimala; mene ole oneera ahimwiiwelele Mwaana khanrowa okhalano ekumi, mene isara sa Muluku sinoovirelela okhala wa yoowo.
Footnotes
^ Naari: “Muhusiha.”
^ Naari: “intale.”
^ Naari: “seekhaikhai.”
^ Naari: “ahinaaye oroihiwa okateya.”
^ Naari: “oreerihiwa.”
^ Naari: “Kristu.”
^ Naari: “vakhaaniini.”
