Silempwale ni Yohani 4:1-54
4 Emaara Apwiya yaasuwenlaaya weera afarisi yaahiiwa itthu Yesu aapakaawe ni weera annaapatisa atthu antxipale ompwaha Yohani
2 (nnaamweera yahaapatisiwa ni Yesu, mene yaapatisiwa ni atthareli awe),
3 owo aakhuma oYudeya ni aarowa veeli oGalileya.
4 Mene owo, aatthuneya ovira oSamariya.
5 Nto aaphiya esidade ya oSamariya yeeyo eniitthaniwa Sikari waattamela ematta yeeyo Yakobe anvahaawe mwanawe Yosefe.
6 Mweekhaikhai, tiweiwo yaaraayawo epoosu ya Yakobe. Yesu akhulumunweene mwaha wa ekwaha enttaawe, aakilaathi vapoosu, ni yaari ewoora ya 12.
7 Aahoowa muthiyana mmoha a oSamariya orika maahi. Nto Yesu anvekela eeraka: “Mukivahe maahi oowura.”
8 (Atthareli awe yeera eronweene osidade othuma yootxa.)
9 Vano, muthiyana ole aamweerela: “Moota heeni nyuwo munkivekelaanyu maahi oowura noonaka weera nyuwo muyuuda, ni miyo kireene musamariya? (Mwaha wooweera ayuda ni asamariya, khayiiwanana.)
10 Yesu aamwaakhula eeraka: “Nyuwo mwaasuwenle yoovaha* ya Muluku ni taani onweerelani mukivahe maahi oowura, nyuwo mwaamunvekela ni owo aamoovahani maahi a ekumi.”
11 Muthiyana ole aamukoha eeraka: “Apwiya, epoosu ela, yohiixa ni nyuwo khamwaanoono epalte* weera murikeno maahi. Vanonto munaakumihe woowiini maahi awo a ekumi?
12 Neereke nyuwo mutokweene ompwaha muhavinre ahu Yakobe yoowo onivanhe epoosu ela owunraawe owo, anamwane awe vamoha ni mihuwo sawe?
13 Yesu amwaakhulaka, aaheera: “Ootheene ole onkela owura maahi ala onootthikela ovoliwa ntthona.
14 Ole onkela owura maahi kinkelaaka onvaha, khankela tho ovoliwa ntthona veeli, mene maahi kinrowaaka onvaha enkela okhala mwa yoowo ntoko ephattuwelo ya maahi envaha ekumi yoohimala.”
15 Muthiyana ole aamweerela: “Apwiya, mukivahe maahi awo weera kihivoliwe-tho ntthona ni weera kihitthikele-tho vaava orika maahi.”
16 Yesu aamweerela: “Murowe, mwawiitthane aiyinyu, avinyaka mutthikele wenno.”
17 Muthiyana ole aamwaakhula eeraka: “Nkithelinwe.”* Yesu aamweerela: “Munhima ekhaikhai. ‘Nyuwo khamuthelinwe.’*
18 Moohima ekhaikhai, mwaha wooweera mwaatheliwa ni alopwana sinku, ni mulopwana muraanyuno vano, khaiyene iyanyu.”
19 Muthiyana ole aamweerela: “Apwiya, kinoona weera nyuwo profeta.
20 Makholo ahu yaamukokhorela Muluku va mwaako ola, mene nyuwosa ayuda ohima muneera, atthu entthuneya omukokhorela Muluku oYerusalemu.”
21 Yesu aamweerela: “Mukiroromele miyo, muthiyana: enoophiya ewoora muhinkelaanyu omukokhorela Muluku mwaako ola naari oYerusalemu.
22 Nyuwo munkokhorela etthu muhisuwenlaanyu; menento hiyo ninkokhorela etthu nisuwenlaahu, mwaha wooweera ovuluwa onkhuma waayuda.
23 Nto enoophiya ewoora, ni ewoora eyo yoophiya, vaavo ale emmukokhorela Muluku mooreerela, enrowaaya omukokhorelaka Muluku mweekhaikhai ni munepa. Woona weera Tiithi onnawaasa atthu ene yaala weera emukokhoreleke.
24 Muluku munepa, ni ale emmukokhorela entthuneya weera emukokhoreleke yeettihiwaka ni munepa ni ekhaikhai.
25 Muthiyana ole aamweerela: “Miyo koosuwela weera onnawa Mesiya, yoowo oniitthaniwa Kristu. Menento owo awa onrowa onileela itthu sootheene.”
26 Yesu aamweerela: “Miyo, kinuuluma ni nyuwo ti Mesiya ene yoowo.”*
27 Etempu ene yeele, atthareli awe yaaphiya ni yaatikhiniheya mwaha wooweera yamphwannye uulumaka ni muthiyana. Mene khaavo aamukonhe: “Eheeni muntthunaanyu ni muthiyana ola?” Naari “mwaha wa heeni munuulumaanyu nuula?”
28 Vano muthiyana ole aahiya muno awe wa maahi anarowa osidade ni aaweerela atthu:
29 “Nkawani mmoone mulopwana mmoha okilenle itthu sootheene kipankaaka. Neereke owo khaiyene Kristu?”
30 Awo yaakhuma osidade enarowa okumana nuuwo.
31 Etempu ene yeele, atthareli awe yeera emunyesereraka Yesu yeeraka: “Rabi,* mutxe.”
32 Yesu aaweerela: “Kookhalano etthu yootxa nyuwosa muhisuwenlaanyu.”
33 Vano, atthareli awe yanneerelana yaaworu: “Neereke ookhala onwiihenre yootxa weera atxe?”
34 Yesu aaweerela: “Yootxaaka opaka yootthuna ya ole okirumme ni omaliha muteko awe.
35 Nyuwo khamunhima weera sihanle minyeeri mixexe weera ephiye etempu yoohepha? Mwiiwe ela kinooleelaakani: Nwehe imatta, iyo siri soolikaneene weera iso saya sihemphwe. Vano,
36 mulipa oohepha onnaliviwa ni onnathukumanya soowiima, nto soowiima sene, taale enrowa waakhela ekumi yoohimala, weera mulipa oohepha ni mulipa oowaala ehakalale vamoha.
37 Woohima sa mwaha ene yoola, ekhaikhai ti yooweera: Mmoha mulipa oowaala ni mukina mulipa oohepha.
38 Kohoorumihani weera muhephe ele muhanlaanyu,* akina aavara moowiilipihera ni nyuwo moottottela mureerelo muteko aya owo.”
39 Asamariya antxipale a esidade ele, yaamuroromela Yesu mwaha wa onamoona wa muthiyana yoowo aalenle weera: “Owo ookileela itthu sootheene kipankaaka.”
40 Nto emaara asamariya yaaronwaaya okumana ni Yesu, yanvekela weera akhale naawosa, ni aakhala weiwo mahiku meeli.
41 Vano, atthu antxipale yaamuroromela mwaha wa ele aahimmaawe,
42 ni yaamweerela muthiyana ole: “Vano hiyo khaiyene ninroromela mwaha wa masu anyu paahi, mene noomwiiwa mwaneene ahu ni noosuwela weera owo nvuluxa a elapo.”
43 Evirakaru mahiku meeli ale, owo aakhuma anarowa oGalileya.
44 Yesu mwaneene anneera,* profeta khanttittimihiwa muttetthe awe.
45 Vanonto, aphiyakaru oGalileya, atthu a oGalileya yaamwaakhela nnene mwaha wooweera yaahoona itthu sootheene aapankaawe oYerusalemu ofeestani, woona weera awo tho yaari ofeestani iwo.
46 Vano, Yesu aarowa-tho oKana wa oGalileya, weiwo aatatunxaawewo maahi okhala eviinyu. Muttetthe ene yoowo aakhala namuteko mmoha a mwene yoowo aarino mwanawe mwaamulopwana aavoreiwa oKafarnawu.
47 Mulopwana ole iiwakaru weera Yesu aavinya oYudeya ni aarowa oGalileya, aarowa okumana nuuwo ni anvekela weera arowe vamoha nuuwo amulamihe mwanawe aahanle vakhaniini okhwa.
48 Mene Yesu aamweerela: “Khamuwa mwaakhulela muhonne ethoonyero ni miiriira.”
49 Vano namuteko ole a mwene, aamweerela: “Apwiya, nwe mwanaka ahinaaye okhwa.”
50 Yesu aamweerela: “Murooke; mwaninyu oolama.”* Ni mulopwana ole, aaroromela masu Yesu aamulenlaawe ni aarowa.
51 Eettaka arooka owaani, akaporo awe yaarowa okumana nuuwo weera yamuleele weera mwaninyu oolama.*
52 Nto, owo aahaakoha ewoora heeni mwanawe aalammaawe. Awosa yaahakhula: “Efeepere emuhiñye* osilo ewoora ya 13.”
53 Tiithi ole aahoonelela weera mwanawe aalamme ewoora ene yeele Yesu aamweerenlaawe: “Mwaninyu oolama.”* Nto owo vamoha ni atthu ootheene a vaate vawe yaamuroromela Yesu.
54 Ela yaari ekwaha yanaaveeli Yesu aapankaawe miiriira emaara aakhumaawe oYudeya arowaka oGalileya.
Footnotes
^ Naari: “yoovaha yamahala ya Muluku.”
^ Naari: “kalopola, etonsa, ekontti.”
^ Naari: “nkaanoono mulopwana.”
^ Naari: “khamwaano mulopwana.”
^ Naari: “ti yoomi.”
^ Naari: “Muhusiha.”
^ Naari: “muhivanraanyu.”
^ Naari: “annahelela onamoona.”
^ Naari: “ookhala mukumi.”
^ Naari: “mukumi.”
^ Naari: “olamme.”
^ Naari: “ookhala mukumi.”
