Silempwale ni Yohani 5:1-47
5 Sivirakaru itthu iya, yaakhala efeesta ya ayuda, ni Yesu aarowa oYerusalemu.
2 Vano, oYerusalemu waattamela Vamulako va Iputtiputthi, naakhala ntthiya nenno va eheberi nniitthaniwa Betezata naarino mapithela 5.
3 Nipuro nene nenne, yaakhalavo atthu antxipale yaavoreiwa, oohoona, ootuthunya ni oorakala.
4 * ——
5 Nipuro nene nenne aakhalavo mulopwana mmoha aavirinhe iyaakha 38 avoreiwaka.
6 Amoonaka mulopwana ole iisaatalenleene vale, ni asuwelaka weera aaviriha etempu yintxipale avoreiwaka, Yesu aamweerela: “Munnatthuna olama?”
7 Muretta ole waakhula enre: “Apwiya, nkaanono mutthu ookikhavihera weera kivolowe muntthiyani maahi yaatekumaka; mene etempu kineereraaka ovolowamo, mukina onnawa ovolowamo miyo kihinaaye.”
8 Yesu aamweerela: “Nvinye! Mukuxe mwinli anyu ni mweetteke.”
9 Ni moowaakuveya mulopwana ole aalama. Aakuxa mwinli awe ni aapatxera weetta.
Nihiku nne, naari nihiku na esaabadu.
10 Nto mwaha wa yeeyo, ayuda yaapatxera omweerela mulopwana ole aalamihinwe: “Olelo esaabadu; khonaakhuleliwa nyuwo oteexa mwinli anyu.”
11 Mene owo aawaakhula: “Mulopwana okilaminhe okeerenle ha: ‘Mukuxe mwinli anyu ni mweetteke.’”
12 Nto awo yaamukoha: “Mulopwana heeni oweerenleni: ‘Mukuxe mwinli anyu ni mweetteke’?”
13 Menento, mulopwana ole aalamihinwe khaamusuwenle taani aamulaminhe, mwaha wooweera Yesu aalakaseya variyari va muloko mutokotoko waatthu waari vale.
14 Avinyaka vaavo, Yesu amphwanya mutemplu ni aamweerela: “Nkoonani, moolama. Muhittheke-tho veeli weera ehiweereeleni etthu opwaha yeele yaaweerenleni.”
15 Nto mulopwana ole aapwaha ni aaweerela ayuda weera aari Yesu aamulaminhe.
16 Tivawonto, ayuda yaamuttharattharaaya Yesu mwaha wooweera aapaka itthu iya nihiku na esaabadu.
17 Mene Yesu aawaakhula: “Atiithi aka envara muteko mpaka vano, ni miyo tho kinvara muteko.”
18 Nto mwaha wa yeeyo, ayuda yannatthuna vantxipale omwiiva, khaiyene paahi mwaha wootupha nlamulo na esaabadu, mene mwaha wooweera annamwiitthana Muluku okhala Apapawe, ni anniilikanxa ni Muluku.
19 Nto mwaha wa yeeyo, Yesu aaweerela: “Kinnooleelani ekhaikhai weera: Mwaana khanwera opaka etthu meekhaawe ahiwoonelaka toko apapawe etthu empakaaya, mwaha wooweera itthu soothesene Apapawe empakaaya, mwaana onnapaka-tho etthu emoha-moharu.
20 Mweekhaikhai, Tiithi onnamusivela Mwaana, ni onnamoonihera itthu soothesene Owo ompakaawe, ni onoomoonihera itthu itokweene opwaha iya, weera nyuwo mukhale ootikhiniheya.
21 Hiihaale ntoko Atiithi enaavinyererihaaya alipa ookhwa, Mwaana-tho onnaavinyereriha ale onaatthunaawe.
22 Nto Tiithi khammuthoriha mutthu, menento omuroromenle Mwanawe weera avare muteko woothoriha,
23 weera atthu ootheene emuttittimiheke Mwaana, ntoko hiihaale enaattittimihaaya Atiithi. Ole ohimmuttittimiha Mwaana, khanaattittimiha Atiithi yaawo emurumme.
24 Kinnooleelani ekhaikhai weera: Ootheene ole oniiwa masu aka ni anamuroromela ole okirumme, onoophwanya ekumi yoohimala, ni owo khankela othorihiwa, mene owo oovira mookhwaani anaphwanya ekumi yoohimala.
25 “Kinnooleelani ekhaikhai weera: Enoophiya ewoora, ni vano yoophiya, vaavo alipa ookhwa eneeraaya yiiwe nsu na Mwaana a Muluku, ni ale enrowa wiiwa enookhala akumi.
26 Mweekhaikhai, Tiithi ookhalano owera* woovaha ekumi ni onvaha owera iwo-tho woovaha ekumi Mwanawe.
27 Ni onvaha owera woothoriha, mwaha wooweera owo Mwaana a Mutthu.
28 Muhitikhiniheye ni etthu ela, woona weera enoophiya ewoora atthu ootheene eri mmahiye* enrowaaya wiiwa nsu nawe
29 ni eneekhume: ale epanke itthu sooreera, erowaka woovinyererihiwani wa ekumi, vaaheera ale epanke itthu soonanara, erowaka woovinyererihiwani wa othorihiwa.
30 Miyo nkinwera opaka naari etthu emoha mano muneenaakaru. Kinthoriha paahi ntoko kiiwalaaka, ni ethorihelo aka, ti yeekhaikhai,* mwaha wooweera nkinaasaasa opaka yootthunaaka, mene opaka yootthuna ya ole okirumme.
31 “Wakhala weera miyo kinimwiikhalela onamoona meekhaaka, onamoona aka owo khaiyene ti weekhaikhai.
32 Ookhala mutthu mukina onkikhalela onamoona, ni miyo koosuwela weera onamoona owo onkikhalelaawe, ti weekhaikhai.
33 Nyuwo mwaahaarumiha atthu wa Yohani, ni owo aahelela onamoona weekhaikhai.
34 Menento, nkinaakhulela onamoona wa mutthu, mene kinooleelani itthu iya weera nvuluxiwe.
35 Mulopwana owo, aari muthuko waavarela ni waara, nyuwo mwaahakalala mwa etempu vakhaaniini ni waara wawe.
36 Mene miyo kookhalano namoona mmoha mutokweene ompwaha Yohani, mwaha wooweera miteko Atiithi ekithanlenlaaya opaka, ni miteko kimpakaaka, sinnahelela onamoona weera Atiithi ekirumme.
37 Ni Atiithi ekiruminhe, ennahelela onamoona wa miyo. Nyuwosa khamwintale wiiwa nsu naya, naari khamutonko owoona moota eraaya,
38 ni masu awe khenkhala mwa nyuwosa, mwaha wooweera khammuroromenle ole awo emuruminhaaya.
39 “Nyuwosa munnatholathola Soolempwa muupuwelaka weera munoophwanya ekumi yoohimala moorweela mwa soolempwa iyo, mene soolempwa sene seiyo sinnakihelela onamoona miyo.
40 Menento nyuwo, khamuntthuna owa wa miyo weera mukhaleno ekumi yoohimala.
41 Nkinaakhulela ovuwa waatthu
42 ni miyo koosuwela weera khamwaanoono nsivelo na Muluku vamurimani vanyu.
43 Miyo kiwiiye mwa nsina na Atiithi aka, mene nyuwosa khamukaakhelenle. Waari weera mukina owiiye mwa nsina nawe, nyuwosa mwammwaakhelela.
44 Vanonto munkela ororomela moota heeni, noonaka weera munaasaasa ovuwa wa mukina ni mukhwaawe, ni khamunaasaasa ovuwa onkhuma wa Muluku mmoharu?
45 Muhuupuwele weera kinimoohimani ohoolo wa Atiithi; menento ookhala mutthu onoohimani moorweela mwa soolepa sawe: Mose, yoowo munamuroromelaanyu.
46 Mweekhaikhai, waakhanle weera munnamuroromela Mose, mwaamukiroromela miyo-tho, mwaha wooweera owo oolepa woohima sa miyo.
47 Vano, mwaahiroromelaka soolepa sawe, munkela ororomela moota heeni ele kinhimaaka?”
Footnotes
^ Eveersu ela ennaphwanyeya mwa a Biblya akina, mene khemphwanyeya mwa soolempwa sa matata sintxipale sotthuneya sa eKereku.
^ Naari: “Tiithi ookhalano ekumi mwa yoowo muneene awe.”
^ Mahiye enhimwa va atthu ale ekhwiiye enuupuweleliwa ni Muluku.
^ Naari: “ti ya exariya.”
