Silempwale ni Yohani 6:1-71
6 Noomala itthu iya, Yesu aarowa* ekhopela ekina ya ephareya ya oGalileya, naari ya oTiberiyade.
2 Ni muloko mutokotoko waatthu wannamutthara, mwaha wooweera wannoona miiriira owo aapakaawe, aalamihaka aretta.
3 Vano, Yesu aawela vamwaako ni aakilaathi vaavo vamoha ni atthareli awe.
4 Annaattamela Mpaasika, efeesta ya ayuda.
5 Emaara Yesu aawelinhaawe maitho, aahoona muloko mutokotoko waatthu omwaattamelaka, ni aamukoha Filipe: “Ninkela othuma woowiini yootxa weera atthu ala etxe?”
6 Menento Yesu aamukoha hiiha, weera amweerere, mwaha wooweera aasuwela etthu aakelaawe opaka.
7 Filipe aamwaakhula: “Ipaawu sa itenaariyu 200, khasinkwana etthu, naari otxa vakhaaniini mutthu ti mutthu aatthu ala.”
8 Mmoha aatthareli awe, Andreya, yoowo aari munnawe Simoni Pedru, aamweerela:
9 “Ookhala mmiravo mmoha va orinono ipaawu 5 sa esevada ni ihopa piili. Vano, iyo sinkela okwana eheeni ni muloko ola mutokotoko waatthu?”
10 Yesu aaheera: “Nweerele atthu ekilaathi.” Nipuro nne, yaakhalavo malaxi; atthu awo yaakilaathi, ni muloko ole waatthu yaakhalavo alopwana ooweeraka 5.000.
11 Yesu aakuxa ipaawu, ni avekelakaru aahaakawela atthu ale yaakilanthi vale; ni aapaka etthu emoha-moharu ni ihopa, nto atthu, yaahootxa mpaka yaatthunaaya.
12 Nto, etxaakaru mpaka ovona, Yesu aaweerela atthareli awe: “Muttottele inyenyeeri sootheene sihanle weera sihinanare.”
13 Vanonto, yaattottela ni yaasariha mittanka 12 sa inyenyeeri sa ipaawu saahiiwale ni atthu ale yaatxa.
14 Atthu yoonakaru mwiiriira ole owo aapankaawe, yaapatxera weera: “Mweekhaikhai, ola Profeta yoole eera awe mulaponi.”
15 Vano, Yesu asuwelakaru weera atthu yaawa weera envare omwene, aakhuma nipuro nne anarowa omwaako meekhaawe.
16 Wiilakaru, atthareli awe yaarowa ophareya,
17 yanwela paarku enapatxera olapuwa ephareya erowaka oKafarnawu. Yeera epatxenreene epiphi, ni Yesu eera ahinaaye orowa okumana naawo.
18 Ni ephareya yaapatxera okhalano muteku-teku, mwaha wooweera yannoopa epheyo etokotoko.*
19 Menento yeettakaru ikilometru* 5 naari 6, yaamoona Yesu amwaattamelaka paarku eettaka vasulu va maahi, ni awo yaahoova.
20 Vano, owo aaweerela: “Muhoove; ti miyo!”
21 Ni awo yannatthuna omwaakhela mpaarkuni, mene paarku aaphiya okhopela nipuro aakelaawewo moowaakuveya.
22 Nihiku naattharelana, muloko waatthu waahanle ekhopela ekina ya ephareya waahoonelela weera ekhopela ele khaariwo paarku. Mene aahanle paarku mmoha mukhaanini, nto Yesu khanwenle paarku vamoha ni atthareli awe, mwaha wooweera atthareli awe yaapwahasa meekhaaya.
23 Vano, apaarku yaakhuma oTiberiyade, yaaphiya nipuro nne atthu yaatxiiyaayavo ipaawu, noomala Apwiya ovekela.
24 Emaara muloko mutokotoko wa atthu wonnaaya weera Yesu vamoha ni atthareli awe khayaakhanle nipuro nne, yaahaawela apaarku aya enarowa oKafarnawu, emwaasaka Yesu.
25 Emphwanyakaru Yesu ekhopela ekina ya ephareya, yaamukoha: “Rabi,* mphiñye liini nno?”
26 Yesu aawaakhula eeraka: “Kinnooleelani ekhaikhai weera: Nyuwosa khaiyene munkaasa mwaha wa miiriira monnaanyu, mene mwaha wooweera murootxa ipaawu ni munavona.
27 Muhivareke muteko mwaha wa yootxa enuntta, mene mwaha wa yootxa enkhala ni envaha ekumi yoohimala, yeeyo Mwaana a Mutthu onkelaawe woovahani; mweekhaikhai mwaneene Muluku, Tiithi, oomuhela ethoonyero enoonihera weera onnamwaakhulela.”
28 Nto, yaamukoha: “Nintthuneya weera nipakeke eheeni weera nivareke miteko sa Muluku?”
29 Yesu aaweerela: “Muteko mukhanlaanyu onvarela Muluku tuula: mmuroromeleke ole omuruminhaawe.”
30 Nto yaamweerela: “Ethoonyero heeni munkelaanyu opaka weera hiyo noone ni weera noororomeleni nyuwo? Muteko heeni munkelaanyu opaka?
31 Amuhavinraahu yaahootxa mana onikareni ntoko hiihaale elempwalaaya weera: ‘Owo aahaavaha epaawu yaakhuma wiirimu weera ekhuure.’”
32 Vano, Yesu aaweerela: “Kinnooleelani ekhaikhai weera: Mose khoovanheni epaawu enkhuma wiirimu, mene Atiithi aka yoovanheni* epaawu ya ekhaikhai enkhuma wiirimu.
33 Nto epaawu Muluku onivanhaawe, ti yoole okhurunwe* wiirimu ni onaavaha ekumi atthu.”
34 Vanonto awo, yaamuleela: “Apwiya, munivaheke etempu yootheene* epaawu eyo.”
35 Yesu aaweerela: “Miyo epaawu ya ekumi. Ole onwa wa miyo khavoliwa-tho etala, ni ole onkiroromela miyo, khavoliwa-tho ntthona.
36 Ntoko miyo koolenlaakani, nyuwo mookoona, mene nnaamweera vareene hiiho khamukiroromenle.
37 Ootheene ale Atiithi enkivahaaya enaawe wa miyo, ni miyo nkiwa kaathanya* ale anwa wa miyo,
38 miyo nkikhurunwe* wiirimu weera kipakeke yootthuna aka, mene weera kipakeke yootthuna ya ole okirumme.
39 Yootthuna ya ole okirumme tiila: weera miyo kihimuyeleele naari mmoha aatthu ootheene ale okivanhaawe, mene kaavinyererihe nihiku noomalihera.
40 Yootthuna ya Atiithi aka tiila: ole ommwaakhulela Mwaana ni ommuroromela yoowo, akhaleno ekumi yoohimala ni miyo kinonvinyereriha nihiku noomalihera.”
41 Vano, ayuda yaapatxera omuuluma owo mwaha wooweera aaheera: “Miyo epaawu ekhurunwe* wiirimu.”
42 Ni yaapatxera weera: “Ola khaiyene Yesu, mwaana a Yosefe? Khanaasuwenle apapawe ni ameyawe? Vanonto moota heeni oneeraawe: ‘Miyo, kikhumme wiirimu’?”
43 Yesu owaakhula enre: “Muhiye waapa nyeenyurusa.
44 Khaavo onwera owa wa miyo Atiithi yaawo ekirumme ehimwiitthanne, ni miyo kinrowa onvinyereriha nihiku noomalihera.
45 Elempwale ni Maprofeta tiila: ‘Ootheene awo, enooxuttihiwa ni Yehova.’ Ni ootheene ole onwiiwa Atiithi ni anaxuttera onnawa wa miyo.
46 Kaavo mutthu otonko omoona Tiithi, otonko omoona paahi ti yoole okhumme wa Muluku. Yoowo paahi tomonne Tiithi.
47 Kinnooleelani ekhaikhai weera: Ole onroromela, onoophwanya ekumi yoohimala.
48 “Miyo epaawu ya ekumi.
49 Amuhavinre anyu yaahootxa mana onikareni, mene yaahookhwa.
50 Ela epaawu enkhuma wiirimu, weera ootheene ole oneera akhuure, ahikhwe.
51 Miyo ka epaawu ekumi ekhumme wiirimu. Ni wakhala weera mutthu onookhuura epaawu ela, onookhala mukumi wa mahiku ootheene; mweekhaikhai epaawu kinvahaaka erutthu aka, weera atthu mulaponi ekhaleno ekumi.”
52 Vano, ayuda yaapatxera onyakulihana yaaworu yeeraka: “Moota heeni mulopwana ola oneeraawe anivahe erutthu awe weera nikhuure?”
53 Nto Yesu aaweerela: “Kinnooleelani ekhaikhai: Mwaahikhuuraru erutthu ya Mwaana a Mutthu, ni mwaahiwuraru ephome awe, khamunkela ophwanya ekumi.
54 Ole onkhuura erutthu aka ni onwura ephome aka, onookhalano ekumi yoohimala, ni miyo kinoorowa onvinyereriha nihiku noomalihera,
55 mwaha wooweera erutthu aka yootxa ya ekhaikhai, ni ephome aka yoowura ya ekhaikhai.
56 Ole onkhuura erutthu aka ni onwura ephome aka, onookhala oowiiraana ni miyo, ni miyo kinookhala oowiiraana nuuwo.
57 Ntoko hiihaale Atiithi akumi ekirummaaya, miyo-tho kinnakhala mukumi mwaha wa Atiithi, ni ole onkhura erutthu aka anaakhale ni ekumi mwaha wa miyo.
58 Ela epaawu ekhumme wiirimu. Ela khenlikana ni epaawu yeele yaakhunraaya makholo anyu, mene nnaamweera vareene hiiho, ahookhwa. Ole onkhuura epaawu ela onookhalano ekumi wa mahiku ootheene.”
59 Owo aahima itthu iya emaara aaxuttihaawe musinakooka* oKafarnawu.
60 Emaara atthareli awe yiiwalaaya masu ala, yaaheera: “Masu ala tooxupa wiiwexexa. Taani anaawere wiiwa?”
61 Mene, Yesu asuwelaka weera atthareli awe yannanyakulihana woohima sa masu ale, Yesu aaheera: “Masu aka, erimookwattulani?
62 Vanonto, eheeni yaakela weereya waakhanle weera moomoona Mwaana a Mutthu awelaka nipuro aaraawe?
63 Munepa wootteela tonvaha ekumi; nto erutthu khiyaano muteko. Masu koolenlaakani enkhuma wa munepa wootteela ni ennavaha ekumi.
64 Mene aakhala a nyuwo ehinaakhulela.” Woona weera Yesu aasuwela woopatxeraniru weera aakhala yeera ehiroromele, ni taani eera anvarihe.
65 Ni Yesu aahaatxeerera eeraka: “Tivanto kinooleelaakani weera: Khaavo onwera owa wa miyo ahaakhulelinwe ni Atiithi aka.”
66 Nto mwaha wa yeeyo, atthareli awe antxipale yaapwaha enarowa ovara itthu* yaahiñyaaya ottuli, ni awo khayeetta ni yoowo.
67 Menento, Yesu aaweerela-tho arummwa awe 12: “Neereke nyuwo-tho muntthuna opwaha?”
68 Simoni Pedru aamwaakhula: “Apwiya, ninkela omutthara taani? Nyuwo mookhalano masu a ekumi yoohimala.
69 Hiyo ninnaroromela ni noosuwela weera nyuwo ootteela a Muluku.”
70 Yesu aawaakhula: “Keera ti miyo koothanliyeni nyuwosa 12? Menento, mmoha a nyuwo namoothera.”*
71 Mweekhaikhai, owo aamuhima Yuda, mwaana a Simoni Iskarioti, mwaha wooweera mulopwana owo amunvariha, nnaamweera aari mmoha aarummwa 12.
Footnotes
^ Naari: “aalapuwela.”
^ Naari: “yoowuupa.”
^ Ni eKereku: “istatiyu 25 naari 30.”
^ Naari: “Muhusiha.”
^ Naari: “tenoovahani.”
^ Naari: “okhumme.”
^ Naari: “kweekwe.”
^ Naari: “kaakhootta.”
^ Naari: “nkikhumme.”
^ Naari: “ekhumme.”
^ Apaale: “Nipuro yaaraayavo atthu antxipale.”
^ Naari: “miteko.”
^ Naari: “diabo.”
