Silempwale ni Yohani 7:1-52
7 Avinyaka vaavo, Yesu aavirelela weetta mukwaha awe arowaka oGalileya mwaha wooweera khaatthuna ovira oYudeya, woona weera ayuda yaatthuna omwiiva.
2 Nto, yeera yaattamelaka efeesta ya itenta* ya ayuda,
3 ni asinnawe yaamweerela: “Mukhume va ni murowe oYudeya, weera atthareli anyu yoone miteko mumpakaanyu.
4 Tthiri khaavo ompaka itthu wiiphiini atthunaka osuweliwa. Vanonto, mwaapakaka itthu iya, mwiisoonihereke tthiri waatthuni.”
5 Mweekhaikhai, asinnawe khayaamuroromela.
6 Vanonto, Yesu aaweerelasa: “Ewoora aka khenaaye ophiya, mene wa nyuwo ewoora yootheene ti yooreerela.
7 Mene atthu khiyaano mathowa eneera eweerihe woothanyani, mene miyo ennakithanya, mwaha wooweera kinnahelela onamoona weera miteko saya ti soonanara.
8 Murooke ofeestani iwo; miyo nkinrowawo iwo mwaha wooweera nlelo etempu aka khenaaye okwanela.”
9 Mene, amalihakaru waaleela itthu iya, owo aavirelela okhala oGalileya.
10 Mene, asinnawe epwahakaru ofeestani, owo-tho aarowa moowiipithiheya, woohooniwa.
11 Nto mwaha wa yeeyo, ayuda yaapatxera omwaasaasa ofeestani yeeraka: “Ori woowiini mulopwana ole?”
12 Ni variyari va muloko, antxipale yannaapa mwaha wa yoowo. Akina yeera: “Owo mulopwana ooreera murima. Akina yeera: Hooye. Owo onnaawoka atthu.”
13 Menento, khaavo uuluma woohima sa Yesu variyari wa atthu, mwaha woowoova ayuda.
14 Vaavo efeesta yeettelaaya variyari, Yesu aarowa otemplu anapatxera oxuttiha.
15 Ayuda yaatikhiniheya vantxipale, ni yanneera: “Moota heeni mulopwana ola osuwenlaawe vantxipale Soolepa, ahintale orowa oskola?”*
16 Vano, Yesu aawaakhula: “Itthu miyo kinxuttihaaka khasinweela wa miyo, mene wa ale ekirumme.
17 Mutthu atthuna opaka yootthuna ya Muluku, onoosuwela waari weera itthu kinxuttihaaka sinweela wa Muluku naari wa miyo.
18 Ole onuuluma miruku sawe onaasaasa ovuwa wawe; ole onaasaasa ovuwa wa ale emuruminhe teekhaikhai ni khawaavoovo ohixariya wa yoowo.
19 Menento, Mose aahoovahani Nlamulo, mene khaavo a nyuwo oniiwelela Nlamulo. Vanonto, mwaha wa heeni muntthunaanyu okiiva?”
20 Nto muloko waatthu waamwaakhula: “Nyuwo mookhalano munepa woonanara. Taani ontthuna owiivani va?”
21 Nto Yesu aawaakhula: “Miyo kipanke mwiiriira mmoha paahi, nto ootheene nyuwo muri ootikhiniheya.
22 Mose ohoovahani nlamulo noowiinela, (mene khaiyene weera nlamulo nno naapatxenre wa Mose, mene wa amuhavinre anyu), nyuwo munnawiinela anamwane anyu asilopwana nihiku na esaabadu.
23 Wakhala weera mwaana mwaamulopwana onniineliwa nihiku na esaabadu weera nihitumphwe Nlamulo na Mose, mwaha wa heeninto nyuwo munyoonyinwaanyu ni miyo mwaha woomulamiha mutthu moomalela nihiku na esaabadu?
24 Muhiye othoriha nwehaka paahi mikhalelo soowooneya, mene muthoriheke mwa exariya.”
25 Nto, atthu akina yaakhala oYerusalemu, yaapatxera ohima yeeraka: “Ola khaiyene mulopwana yoole ontthuna wiiviwa?
26 Vanonto, mulopwana ene ori vaava uulumaka ohoolo wa atthu ootheene ni khemmweerela etthu. Neereke nto ahooleli ahu enroromela weera owo Kristu?
27 Mene hiyo noosuwela woowiini okhummaawewo mulopwana ola; nto awa vale Kristu, khaavo oneera asuwele woowiini onkhumaawewo.”
28 Emaara aaxuttihaawe mutemplu, Yesu aahima ha ni masu oowiiwanyeya: “Nyuwosa mookisuwela, ni moosuwela woowiini kinkhumaakawo. Miyo nkiwiiye kihirummwale, mene Ole okirumme teekhaikhai ni nyuwo khammusuwenle.
29 Miyo koomusuwela, mwaha wooweera kithanlinwe ni yoowo, ni ti yoowo okiruminhe.”
30 Tivawonto, yaaheerera onvara, mene khaavo aawenre mwaha wooweera ewoora awe yeera ehaakunve ophiya.
31 Mwa yeeyo, atthu antxipale yaapatxera omuroromela yoowo, ni yanneera: “Neereke Kristu awa vale, onoopaka miiriira sintxipale opwaha miiriira ompakaawe mulopwana ola?”
32 Afarisi yaahiiwa muloko mutokotoko waatthu wuulumaka itthu iya vathi-vathi woohima sa yoowo, ni asitokweene aanamakeya ni afarisi, yaahaarumiha makwaarta* weera yanvare.*
33 Vano, Yesu aaweerela: “Kinookhala ni nyuwo etempu vakhaaniini, kihinaaye orowa wa Ole okiruminhe.
34 Nyuwosa muni mukaase, mene khamunkela okiphwanya, ni, nipuro kinkelaakawo, nyuwo khamunkelawo.”
35 Nto ayuda yanneerelana yaaworu: “Mulopwana ola ontthuna okela woowiini, weiwo nneeraahu nihimphwanye? Neereke ontthuna orowa wa ayuda ethaamenle elapo ya akereku, ni waaxuttiha akereku?
36 Owo ontthuna ohima eheeni ni masu eneera: ‘Mene khamunkela okiphwanya, ni, nipuro kinkelaakawo nyuwo khamunkelawo’?”
37 Nihiku noomalihera noottittimiheyaxa na efeesta, Yesu aaheemela ni aahuuluma ni nsu noowiiwanyeya eeraka: “Mutthu avoliwa ntthona, awe wa miyo ni awure.
38 Ntoko hiihaale enhimaaya Yoolepa, ole onkiroromela miyo ‘vamurimani vawe enookhuma maahi envaha ekumi’.”
39 Nto ni masu ala, Yesu aahima munepa wootteela, yeeraaya yaakhele atthu ale yeera emuroromele. Woona weera, yaari ehinaayeene waakhela munepa owo, mwaha wooweera eera ahinaayeene ovuwihiwa.
40 Atthu akina yaari variyari wa muloko waatthu wiiwale masu ala, yaapatxera weera: “Mweekhaikhai, ola Profeta.”
41 Akina yeera: “Ola Kristu.” Mene akina yeera: “Neereke Kristu, anaakhume oGalileya?”
42 Soolepa sinhima weera Kristu anaakhume nloko na Davidi ni oBetelehemu, muttetthe yoowo Davidi aakhalaawewo.
43 Nto mwaha wa yeeyo, waakhumelela okawanyeya variyari wa muloko mwaha wa Yesu.
44 Akina a yaawo, yaatthuna onvara Yesu, mene khaavo aawenre onvara.*
45 Mwa yeeyo, makhwaarta yaatthikela wa asitokweene aanamakeya ni wa afarisi, awosa yaahaakoha: “Heeni muhinwiihalaanyu Yesu?”
46 Mene makwaarta ale yaahaakhula yeeraka: “Khaavo mulopwana otonko wuuluma ntoko owo!”
47 Vano, afarisi yaahaakoha: “Neereke nyuwosa-tho muroowokiwa?
48 Neereke ookhala mmoha a muhooleli ahu, naari mmoha aafarisi ommuroromela owo?
49 Mene muloko ola waatthu woohisuwela Nlamulo, atthu oowuulumeliwa.”*
50 Vano Nikodemu yoowo khalayi aaronwe okumana ni Yesu, aari mmoha a yaawo, aaweerela:
51 “Neereke Nlamulo nahu ninnamuthoriha mutthu nihinaaye toko wiiwa ni osuwela etthu ompakaawe?”
52 Yaamwaakhula yeeraka: “Neereke nyuwo-tho tooGalileya? Muthola-thole ni munimoona weera khaavo profeta aneera akhume oGalileya.”*
Footnotes
^ Naari: “mikottha.”
^ Eyo tiiyo eskola ya ayuda.
^ Naari: “makwaarta a mutemplu.”
^ Naari: “yamutthuke.”
^ Naari: “omutthuka.”
^ Naari: “oolaphiwa.”
^ Soolempwa sintxipale soororomeleya sa khalayi sinnavinxavo eversu 53 mpaka ekapiitulu 8 eversu ya 11.