Silempwale ni Yohani 9:1-41
9 Emaara aaviraawe, aamoona mulopwana mmoha oohoona evinyero eyareliwo awe.
2 Vano, atthareli awe yaamukoha: “Rabi,* weera mulopwana ola ayariwe ahoonaka, taani otthenke, mulopwana yoola naari asipapawe?”
3 Yesu aawaakhula: “Mulopwana ola khatthenke, naari asipapa awe, mene yeereñye eyo weera sooniheriwe miteko sa Muluku.
4 Nintthuneya opaka miteko sa Ole okirumme vahinaaye wiila; mwaha wooweera oneera wiilaka, ni khaavo oneera awereke ovara muteko.
5 Vaava kiraaka elapo ya vathi, miyo muthuko wa elapo.”
6 Ahimakaru masu ala, Yesu aasenyera vathi, aneetheya etthaya ni isenye sawe ni anattikitthela matope ene mmaithoni mwa mulopwana ole;
7 ni aamweerela: “Murowe ni mwasuusule ontthiyani wa oSilowe” (entaphulela “oorumihiwa”). Owo, aarowa osuusula ni aatthika oonaka.
8 Vano, mavisiinyu* awe ni atthu yaamoona avekelaka eximola yannakoha: “Ola khaiyene mulopwana yoole aakilaathi vale avekelaka eximola?”
9 Atthu akina yanneera: “Ti yoowo.” Mene akina ohima yeera: “Khaiyene, owo onimweera olikanano paahi.” Ni mwaneene owo anneera: “Ti yoomi.”
10 Vanonto, awo yaamukoha: “Maitho anyu, ehulinwe moota heeni?”
11 Owo aahaakhula: “Mulopwana oniitthaniwa Yesu, eetheñye etthaya anakittikitthela mmaithoni mwaka ni anakeerela: ‘Murowe oSilowe, ni mwasuusule.’ Vano miyo kaarowa kinasuusula ni kinapatxera woona.”
12 Nto mwaha wa yeeyo, awosa yaamukoha: “Ori woowiini mulopwana owo?” Owo aahaakhula eeraka: “Nkisuwenle oraiyewo.”
13 Vanonto awosa yaamukuxa mulopwana ole ahoona khalayi enamuroiha wa afarisi.
14 Nihiku Yesu eetheñyaawe etthaya ni analamiha maitho a mulopwana ole, naari nihiku na esaabadu.
15 Vano, afarisi-tho yaapatxera omukoha mulopwana ole moota yaahulinwaaya maitho awe. Owo owaakhula enre: “Owo aattikitthenle etthaya mmaithoni mwaka, ni miyo kaarowa osuusula ni vano kinnawera woona.”
16 Nto, afarisi akina yaaheera: “Mulopwana owo khaiyene ta Muluku, woona weera khanttittimiha esaabadu.” Akina yaaheera: “Moota heeni mutthu ori namattheka oneeraawe apakeke miiriira ntoko iya?” Nto waakhala okawanyeya variyari vaya.
17 Ni yaamukoha-tho mulopwana ole aalamihinwe: “Munhima eheeni woohima sa yoowo, noonaka weera maitho anyu owo ohunlaawe?” Mulopwana ole aahaakhula: “Owo profeta.”
18 Vanonto, ayuda khayaakhulela weera mulopwana ole khoona, ni weera oroolamihiwa, nto mwaha wa yeeyo, yaawiitthana asipapawe mulopwana ole ahaawera woona.
19 Ni yaahaakoha: “Ola mwaninyu yoowo munhimaanyu weera oyarinwe ahoonaka? Vanonto moota heeni onweraawe woona?”
20 Asitiithi awe yaahaakhula: “Hiyo noosuwela weera ola mwanihu, ni weera aayarinwe ahoonaka.
21 Mene khanisuwenle moota owo onweraawe woona vano, naari khanisuwenle taani omuhunle maitho. Mmukoheke mwaneene. Owo ohunnuwa onoowera waakhula mwaneene awe.”
22 Asitiithi ale yaakhunle hiihaale mwaha wooweera yannaawoova ayuda, woona weera ayuda yaapaka nivarihano nooweera yoole ori mutthu aneera aakhulele weera, Yesu Kristu, aamoomoliwa musinakooka.
23 Tivawonto asipapawe yaakhunlaaya weera: “Mmukoheke mwaneene. Owo ohunnuwa.”
24 Vanonto, mwa ekwaha yanaaveeli yaamwitthana mulopwana ole khalayi ahoona enamweerela: “Munvuwiheke Muluku paahi!* Hiyo noosuwela weera mulopwana owo namattheka.”
25 Owo aaweerela: “Mulopwana owo aareene namattheka, miyo nkisuwenle. Etthu kisuwenlaaka ti yooweera khalayi miyo nkoona, mene vano, kinnawera woona.”
26 Vano, awo yaamukoha: “Mulopwana owo oopankeni eheeni? Ohunle moota heeni maitho anyu?”
27 Mulopwana owo aawaakhula eeraka: “Miyo kohooleelani, mene nyuwo khamutthunne okiiwa, mwaha wa heeni munkikohaanyu-tho veeli?* Neereke nyuwosa-tho muntthuna okhala mutthareli awe?”
28 Nto mwaha wa yeeyo, yaamweerela moomuramusa: “Nyuwo muri mutthareli a mulopwana owo, mene hiyo atthareli a Mose.
29 Hiyo noosuwela weera Muluku aahuuluma ni Mose, menento woohima sa mulopwana owo, hiyo khanisuwenle naari okhummaawewo.”
30 Mulopwana ole aawaakhulasa: “Moohihovela eyo ti yootikhiniha! Nyuwosa khamusuwenle woowiini onkhumaawewo, menento owo oohula maitho aka.
31 Noosuwela weera Muluku, khanwiiwa anamattheka, mene, wakhala weera mutthu onnamoova Muluku ni onnapaka yootthunaawe, Muluku onnamwiiwa mutthu owo.
32 Ovinya khalayi, khaavo otonko wiiwa weera ookhala mutthu otonko ohula maitho a mutthu oyarinwe ahoonaka.
33 Waari weera mulopwana owo khaarummwale ni Muluku, khaakela oweraka opaka naari mwiiriira mmoha mano.”
34 Awosa yaamwaakhula: “Nyuwo muyarinwe ootthekeene, ni nnaamweera vareene hiiho nyuwo muntthuna onixuttiha hiyo?” Nto mwaha wa yeeyo yaamoomola.
35 Yesu aahiiwa weera afarisi yaamoomola mulopwana ole aamulaminhaawe, ni amphwanyakaru aamukoha: “Nyuwo munnamuroromela Mwaana a Mutthu?”
36 Mulopwana ole aahaakhula: “Apwiya, Taani yoowo? Mukileele weera miyo kimuroromele.”
37 Yesu aamweerela: “Nyuwo moomoona, ni kinnooleelani ekhaikhai weera ti yoowo munuulumaanyuno.”
38 Mulopwana ole aaheera: “Apwiya, miyo kinnamuroromela!” Ni owo aakokhora* ohoolo wawe.
39 Vano, Yesu aaheera: “Kiwiiye valaponi weera kithorihe, weera atthu oohoona yooneke ni weera atthu enoona ekhale oohoona.”
40 Afarisi akina yaari ni yoowo yaahiiwa itthu iya, ni yaamweerela: “Neereke hiyo-tho atthu oohoona?”
41 Yesu aaweerela: “Waari weera nyuwo atthu oohoona, khamwaarowa okhalano nthowa na yoottheka. Mene woona weera ohima muneera: ‘Hiyo ninnoona’, munnavirelela okhala anamattheka.”
Footnotes
^ Naari: “Muhusiha.”
^ Naari: “anamwaattamanani.”
^ Masu ala envareliwa muteko, weera mutthu ontthuneya wuuluma ekhaikhai.
^ Naari: “muntthunaanyu wiiwa.”
^ Naari: “aamuttittimiha.”
