Yesu muru wa muloko. (Aefeso 5:23) Vanano va, owo ori wiriimu, nave onnaavaha miruku atthareli awe eri elapo ela ya vathi, moorweela mwa “kaporo òroromeleya ni a miruku.” (Mmusome Matheyo 24:45.) Yesu omuthanlale “kaporo” ororomeleya, nave onvaha muritti woolamulela. Nto, nnaamweera avahiweene olamulela iwo, kaporo òroromeleya onnanvarela Kristu ni asinnawe. Vanonto, kaporo òroromeleya ni a miruku taani? Moota heeni owo onnikhaviheraawe?

1. “Kaporo” ororomeleya ni a miruku taani?

Yehova veeli-veeli, onnaavarihela muteko alopwana naari egrupu ya alopwana weera evahe miruku muloko awe. (Malakhiya 2:7; Aheberi 1:1) Yesu akhwaakaru, oohuserawe ni asitokweene a mmulokoni oYerusalemu, yanapaka eyo. (Miteko 15:2) Emoha-moharu enneereya olelo va. Yehova onnavarihela muteko egrupu ya asitokweene yeeyo envaha yootxa yoomunepani, nave okhavihera muteko wolaleera. Egrupu eyo, ti Mukuttula Woolamulela wa Anamoona a Yehova. Awo, empakela eparte “kaporo oororomeleya ni a miruku, yoowo oothanlinwe ni apwiya [Yesu]” nave, anthokorera miritti saya. (Matheyo 24:45a) Asinna ampakela eparte ya Mukuttula Woolamulela ari makristu oothanliwa ni munepa wootteela. Awo, enkela olamulela vamoha ni Kristu wirimu emaara awo enkhwaaya.

2. Moota heeni kaporo oororomeleya ni a miruku onvaha awe yootxa yoomunepani muloko wa Yehova?

Yesu aahima weera kaporo oororomeleya ‘aakela ovaha yootxa ehuhu yoophwanelela.’ (Matheyo 24:45b) Ntoko hiihale yootxa enivahaaya ikuru, nave enikhaviheraaya okhalano ekumi yooreera, yootxa yoomunepani (miruku sa masu a Muluku) sinnanivaha ikuru seiyo nintthunaahu weera nikhale oororomeleya ni ovara muteko Yesu oninvanhawe. (1 Timotheyo 4:6) Ninnaakhela yootxa eyo, moorwela mwa mithukumano sa mmulokoni, assembeleya, kongresu, iliivuru ni iviidiyu sinkhuma mBiblyani. Yootxa yootheene ela, ennanikhavihera opaka yootthuna ya Muluku ni olipiha onthamwene ahu ni yoowo.

 WEERA MUXUTTERE SINTXIPAL

3. Atthu a Yehova antthuneya okhala oorehereya

Ottharaka miruku sa Yesu, Mukuttula Woolamulela onnareherera muteko wa Anamoona a Yehova. Etthu emoha-moharu, yereeya ni makristu a eseekulu yoopatxera. Moone EVIIDIYU.

Mmusome 1 Akorinto 14:33, 40. Avinyaka mutthekule ni epontu enttharelana:

• Yoolepa ela enoonihera hayi weera Yehova ontthuna weera muloko awe opakeleke empari mareherero awe?

4. Kaporo oororomeleya ni a miruku onnareherera muteko wolaleera

Olaleera muteko wootepa otthuneya makristu a eseekulu yoopatxera yaavaraya. Musome Miteko 8:14, 25. Avinyaka mutthekule ni ipontu sinttharelana:

• Taani yaareherera muteko woolaleera wa makristu a eseekulu yoopatxera?

• Neereke murummwa Pedru ni Yohani yaahaakhulela miruku seiyo arummwa akina yaavanhaaya?

Muteko wootthuneya Mukuttula woolamulela ompakaaya ori oreherera muteko woolaleera. Moone EVIIDIYU.

 Yesu athaliha weera muteko wootepa otthuneya ori olaleera mitthenka sooreera. Mmusome Marko 13:10, avinyaka mutthekule ni ipontu sinttharelana:

• Mwaha wa heeni muteko woolaleera oraaya wootepa otthuneya wa Mukuttula Wolamulela?

• Mwaha wa heeni nintthunaahu okhaviheriwa ni “kaporo òroromeleya ni a miruku” yoowo onreherera muteko wa elapo yootheene?

5. Kaporo oororomeeleya onnavaha miruku

Mukuttula Woolamulela onnaavaha miruku makristu a elapo yootheene. Awo moota heeni anthanlaaya ovaha miruku? Moone moota Mukuttula Woolamulela wa khalaayi waapakaaya eyo. Musome Miteko 15:1, 2. Avinyaka mutthekule ni ipontu sinttharelana:

• Eheeni yaakumihera maxupo eriyari ya makristu a eseekulu yoopatxeera?

• Paulo, Barnabe ni makristu makina, yaamwaasa taani weera emaalihe maxupo ale?

Musome Miteko 15:12-18, 23-29. Avinyaka muttheekule ni epontu enttharelana:

• Mukuttula Woolamulela wa ehuhu ya arummwa waapaka eheeni ohinaakuve opaka yoothanla? Wannavekela miruku ohinaakuve opaka mwaha owo. Vano asinna awo a Mukuttula Woolamulela yaapaka moota heeni eyo? — Nwehe eversu 12, 15 ni 28.

Musome Miteko 15:30, 31 ni 16:4, 5. Avinyaka mutthekule ni ipontu sintthareelana:

• Neereke makristu a eseekulu yoopatxera yaahakhulela miruku yaavahinwaya ni asinna a Mukuttula Woolamuleela a ehuhu ele?

• Yehova aareelinhe hayi wiiwelela waya?

Mmusome 2 Timotheyo 3:16 ni Yakobe 1:5. Avinyaka mutthekule ni epontu entthareelana:

• Vano asinna a Mukuttula Woolamulela ampaka moota heeni soothanla saya?

 NYAHA SOOTTHUNEYA

Mukuttula Woolamulela “kaporo òroromeleya ni a miruku” asinna yaawo ethanliwe ni Yesu Kristu. Asinna awo, ennaavaha miruku ni yootxa yoomunepani makristu a elapo yootheene.

Wuuluula

• Taani amuthanliye “kaporo òroromeleya ni a miruku”?

• Moota heeni asinna a Mukuttula Woolamulela annikhaviheraaya olelo va?

• Neereke nyuwo munnakhulela weera “kaporo òroromeleya ni a miruku” ti asinna a Mukuttula Woolamuleela?