1. Taani onivanhe okumi?

YEHOVA ti “Muluku mukumi.” (Yeremiya 10:10) Mene owo mpattuxa ni ti yoowo onivanhe ekumi. Biblya onahima weera: “wòpattuxa sothesene ni nthowa na osivela wá sòkhala ni sòpattuxiwa.” (Apokalise 4:11) Aani, ekumi etthu yooreera Yehova onivanhaawe mwaha wa nsivelo nawe. — Mmusome Nsalmu 36:10 [36:9 NM].

2. Ontthuneya opaka eheeni weera nikhaleno ekumi yoohakalala?

² Yehova onnanivaha itthu sootheene nintthunaahu ntoko yootxa ni maahi, weera nikhalekeno ekumi. (Miteko 17:28) Moohihovela, Muluku ontthuna weera nihakalaleke. (Miteko 14:15-17) Neereke moosuwela etthu yootthuneya weera nikhalekeno ekumi yoohakalala? Ontthuneya wiiwelela ni otthara malamulo a Muluku. — Yesaya 48:17, 18.

3. Yehova ampanke heeni Kayini amwiivakaru Habeli?

³ Biblya onnonihera weera Yehova onnahela mwiitti okumi. Mwa ntakihero, moone ele yaakhumelenle ni Kayini vamoha ni Habeli. Kayini anyonyiwa ni munnawe Habeli, nto Yehova, aherera omukurunuxa murima Kayini, mene owo akhootta miruku sa Yehova. Koma Biblya onahima weera “Kayini àmutuphela Habeli, munn’awe, amwìva.” (Ephattuwelo 4:3-8) Yehova amuttaruxa Kayini mwaha wa etthu ele apankaawe. (Ephattuwelo 4:9-11) Mutthu owattano owalí oniinana ni mukhwaawe, onoowera omwiiva mukhwaawe owo. Atthu moota owo, khanrowa ophwanya ekumi yoohimala. (Mmusome 1 Yohani 3:15.) Yehova ontthuna weera, nsivelaneke. — 1 Yohani 3:11, 12.

4. Yehova oonihenre eheeni ni malamulo ale mulokó avanhaawe ana a Israeli?

 ⁴ Evirakaru ehuhu, Yehova anvaha Mose malamulo mulokó. Nlamulo nimoha nahima weera: “Ohìve.” (Olaleya 5:17) Mwaha woovaha nlamulo nno, Yehova aahonihera weera onnahela mwiitti ekumi. Nave nloko naa Israeli, mutthu amwiva mukhwaawe, owo tho aamwiviwa.

5. Muluku onoonela hayi oyeeha erukulu?

⁵ Muluku onoonela hayi oyeeha erukulu? Nlamulo Yehova aavanhaawe ana a Israeli noonihera weera, ekumi ya mwaana ori mmirimani ti yootthuneya vantxipale. Owo enre, mutthu anvoreya muthiyana oorupala mpaka oyeeheya erukulu awe, mutthu owo iiviwe. (Mmusome Ottimula 21:22, 23; Nsalmu 127:3.) Nto eyo enoonihera weera, Muluku omunanara oyeeha erukulu. — Nwehe Enoota 28.

6, 7. Ninrowa woonihera hayi weera ninnattittimiha okumi?

⁶ Nave ekumi kheniheliwa murupa woothala. Vamoharu, hiyo ontthuneya weera nttittimiheke ekumi ntoko Muluku onhelaawe mwiitti ikumi soothesene. Ohela mwiitti ekumi, onhela mpuwa ohimutxa soona, ni ohiwura mirette sohapala. Mwaha wooweera itthu iyo sinnipahula okumi ahu, ni sinniwiiva atthu.

⁷ Okumi ahu yoovaha etokweene enkhuma wa Yehova. Nto owo ontthuna weera nthokororeke nnenesene ekumi eyo. Neera haawo, nnookhala oottela vamaithoni vawe. (Aroma 6:19; 12:1; 2 Akorinto 7:1) Hoonikhweya ohiya sookhovelela soonanara, maxi ti wootthuneya. Mene naatthunaka weera Muluku aakhuleleke omukokhorela wahu, ontthuneya ohiya sokhovelela sootheene soonanara. Nave Yehova onroromeliha weera ononikhavihera.

8. Ninrowa opaka eheeni weera noonihere weera ninnahela mwiitti ekumi?

⁸ Nnaapake heeni weera nimoonihere Yehova weera ninnahela mwiitti okumi? Naattittimihaka okumi, nnereke  okhootta otthekula woohirerela ni wowopiha. (Nsalmu 11:5) Ni nnereke weettiha nnene itxinka sahu, ikaaro sahu ni itthu ikina. Opwaha mwa yeeyo, nnereke olipiha nnene ipatho sa impa sahu weera sihinvoreye mutthu. Yehova ohoonihera weera othokorora okumi moota owo, ti wootthuneya vantxipale, vaavo avanhaawe ana a Israeli nlamulo nna: “Wateka empá enyowani, nipatho naya orukurerihe ni mukuso tho wera ohiromoliheriwe mulattu wa ephome, amorela mutthu vathi, anakhwa.” — Olaleya 22:8.

9. Neereke ninnatthuniheriwa waahasula axinama?

⁹ Axinama woothe antthuneya weera naathokororeke nnene. Mwaha wooweera Yehova ontthuna weera nihaahasuleke axinama. Nave Yehova khanniphuka mulattu niivaka enama weera nikhure naari naatthunaka wiisakiha. (Ephattuwelo 3:21; 9:3; Ottimula 21:28) Maxi hontthuneya owiiva naari wahasula axinama weera naatheeliheke. — Miruku 12:10.

10. Yehova oonihenre hayi weera ephome enthonyera ekumi?

¹⁰ Ephome etthu yootepa otthuneya vamaithoni va Yehova, mwaha wooweera eyo enthonyera ekumi. Ikwaha sintxipale, Yehova ahoonihera mwaha wa heeni eraaya yootthuneya. Emaara Kayini aamwivalawe Habeli, Yehova enre: “Nlove na ephome ya munn’á ninnakikhuwelela nikhumaka mmattani.” (Ephattuwelo 4:10) Ephome ya Habeli enthonyera ekumi awe. Evirakaru epula yamirupi, Yehova aamuleela Nowa ni emusi awe weera ekhuureke enama. Mene owo aahima nlamulo nooweera ehikhuureke ephome. Yehova aahimme weera: “Ni sothene sinèteteya ni sirino ekumi, seiyo sikhale sotxa sanyu. Siso tho munyepu mukithi wothene kòhovahani. Nto muhikhuure enama vamosá ni munep’aya, eyo tiyo ephom’aya.” — Ephattuwelo 1:29; 9:3, 4.

11. Nlamulo heeni nikina Yehova aavanhaawe ana Israeli voohima sa ephome?

 ¹¹ Sivirakaru iyaakha 800 Yehova avanheene nlamulo nne, owo ahavaha ana a Israeli nlamulo nikina: “Mutthu ti mutthu ànamwane a Israeli ni àmalapo anamaka variyari vanyu, ahéé, avará vamukwahani enama nari epalame enkhuriwa, ìtthele vathi ephome ni ùhele ni etthaya.” (Onamakeya 17:13, 14) Yehova khapittikunxe mupuwelo awe vohima sa ephome. Ni antthuna weera, muloko awe osuweleke weera, ephome etthu yootthuneya vamaithoni vawe. Maxi yannemiheriwa okhuura enama ohiya ephome. Waatthuneya weera yaahitaka enama weera ekhuure, eyeeheke ephome ni yuuheeleke.

12. Yehova ontthuna weera makristu yuupuweleke eheeni yoonaka ephome?

¹² Neereke Yehova ootxentxa mupuwelo awe mahikwaano? Naari. Sivirakaru iyaakha Yesu akhwiyeene, arummwa ni asitokweene a muloko wa oYerusalemu yaathukumana weera, elaihane empari heeni ya nlamulo na ana a Israeli neera ntthikele ovara muteko variyari va makristu. (Mmusome Miteko 15:28, 29; 21:25.) Yehova ahaakhavihera wiwexexa weera ephome ti yoottela ni ti yootthuneya vantxipale. Mene arummwa ni makristu a ehuhu eene yeele, khayawura naari khayakhura ephome. Nave awo khayaakhura enama ya naamunama a mwikho. Eyo yaarowa okhala yoottheka etokotoko, yaarowa olikana ni okokhorela miluku soopatthiwa ni oraruwa. Mahikwaano tho makristu eekhaikhai khenwura ephome naari okhura. Yehova ontthuna weera nuupuweleke weera ephome ti yoottela.

13. Mwaha wa heeni makristu anikhoottaaya ovaha naari oheleliwa ephome?

¹³ Neereke mwaha wa yeeyo, makristu khanaakhulela ovaheriwa ephome? Aani, mwaha wooweera Yehova ohimme  weera nihiwureke naari nihikhuureke ephome. Mwa ntakihero, nkuupuwelani weera nyuwo munnamweesela soona, vano munnarowa otxipattaala. Nto mediku onnooleelani weera muhiye omweesela soona. Nyuwo mwaphiyaka owaani munaamweera ompaha ni omwinkha, neereke moohiya omweesela soona? Ekhaikhai ti yoowera naari. Vamoharu, ovaheriwa ephome onolikana ni okhura naari owura. — Nwehe Enoota 29.

14, 15. Neereke onnareerela ohiiwelela nlamulo na Yehova voohima sa ephome?

¹⁴ Vano ankha mediku ahima weera munimookhwa mwakhootta oheliwa ephome? Ekhaikhai weera mutthu ti mutthu a hiyo pooti othanla, omwiiwelela Muluku naari hooye. Maxi makristu eekhaikhai khenaakhulela ovahera naari oheleliwa ephome. Neereke akristu awo, anoohitthuna okhala akumi? Mene makristu eekhaikhai annattittimiha okumi. Ti yeeyo enaweriha orowa otxipattaala.

¹⁵ Hiyo atthu nintthuna ekumi yooreera. Maxi khanintthuna woopola ekumi ahu, nikhoottaka omwiiwelela Yehova. Nave mwaha wooweera Yesu ahimme ha: ‘Yowo ontthuna woopola okumi awe onomurimela, nto yowo onaamurimeela okumi awe mwaha wa miyo onophwanya.’ (Matheyo 16:25) Hiyo onisivela omwiiwelela Yehova, mwaha wooweera owo oosuwela itthu sooreera wa hiyo. Nave ale animwiiwelela ,owo onnaatthuvela. Nimutakihaka Yehova, hiyo ninnahela mwiitti ekumi ni ninnoona ephome okhala yoottela. — Aheberi 11:6.

16. Mwaha wa heeni makristu ekhaikhai enthanlaaya omwiiwelela Muluku?

¹⁶ Ntoko noonnahu woopatxerani, makristu eekhaikhai kheniwura naari khantxa ephome. Nto * makristu eekhaikhai  aathanla omwiiwelela Yehova ohela mpuwa nlamulo na ephome. Moosuwela mwaha onaweriha othanla omwiiwelela Muluku? Mwaha wooweera ennaroromela weera, mpattuxa a ekumi ni ephome oosuwela etthu yooreera wa hiyo. Nyuwo munnakhulela weera Muluku oosuwela itthu sooreera wa nyuwo?

17. Waari moota mukavi Yehova aakhulelaawe ovareliwa muteko ephome?

¹⁷ Ana a Israeli yannaakhuleliwa ovarihela muteko ephome ya axinama weera eleveleliwe soottheka saya wa Yehova. Nto owo aahimme weera: “Khweli ekumi ya enama, anyi, yeyo ene eri mwephomeni. Tivo kolamunlakani wiyathera ephome vankuwani ntoko mwirelo wolivela sottheka sa ikumi sanyu, wona wi ephome ekumí enalivela sottheka.” (Onamakeya 17:11) Emaara ana a Israeli yaatthekaaya, awo yannakhuleliwa ovekela oleveleliwa evarelaka muteko ephome. Waatthuneya weera evaheke enama, ni yaavekeleke anamakeya ohela vasulu waaltari. Khuwaavo moota mukina Yehova aakhulelawe ovarihela muteko ephome, ohikhanle yoowo.

18. Makeya a Yesu onnivaha eparakha heeni?

¹⁸ Mahikwaano khontthuneya ovaha enama weera nleveleliwe sottheka sahu. Mwaha wooweera Yesu oovaha ephome [ekumi awe] weera alivele soottheka sahu. (Matheyo 20:28; Aheberi 10:1) Opwaha mwa yeeyo, makeya a Yesu onnanivaha eparakha ya okhalano okumi woohimala. — Yohani 3:16; Aheberi 9:11, 12; 1 Pedru 1:18, 19.

19. Nnaapake eheeni weera naakhavihere atthu ophwanya okumi woohimala?

¹⁹ Ekumi yoovaha etokweene enakhuma wa Yehova! Hiyo ninnaasivela atthu ni ninnatthuna weera ekhaleno  ekumi yoohimala. Mwaha wa yeyo, ninnaaleela weera emuroromeleke Yesu weera ekhaleno ekumi eyo. Muritti owo woowalopola atthu ti wawihu. Mwaha wooweera nahaalopole atthu awo mpaka okhwa ehimusuwenleene Muluku, hiyo nnokhalano mulattu. (Ezekiyeli 3:17-21) Wakhala weera nohaalopola, nnowera ohima masu ala uulummaawe murummwa Paulo: ‘Mwa yeyo, nihiku nolelo nene nna kinnokhalelani onamona wi miyo kiri òhittheka mwaha wa ephome eyehiwe ni atthu othene. Khweli nkokhunweni etthu wera kolaleryeni otthuna wothene wa Muluku.’ (Miteko 20:26, 27) Emaara nnaalelaahu atthu akina moota Yehova onttittimihaawe okumi, ninnonihera weera, hiyo nnuupuwela ntoko Yoowo.