1, 2. Eheeni atthu antthunaaya osuwela yoonaka ohaawa otepaka?

MAHIKWAANO ohaawa onootepa. Ikwaha sintxipale ninnaiwa mitthenka soonanara. Ntoko ophwatiwa wa ipooma mwaha wa osara wa maahi, wiivaniwa, ni okhwa wa asimaaye mwaha wa eretta ya kanser, yaahiyaka anamwane ikwaasuni.

² Nto atthu annatthuna osuwela mwaha wa heeni sinkhumelelaaya itthu soonanara, ni irisa sa ephattuwelo. Annikoha yeeraka, heeni wiinana ni ohaawa onitepaaya elapo yootheene? Nyuwo mwannanto wiikoha?

3, 4. (a) Yeeriwe Habakuki aamukonhe eheeni Yehova? (b) Ninkhanto Yehova aakhunle hayi?

³ Biblya onnaathaliha arumeyi a Muluku yaakonhe makoho siyaala. Mwa ntakihero, mprofeti Habakuki aamukoha Yehova weera “Niwoko na xeni onakithonyerawe emwanomwano, weyo ovilelaka sonanara? Sowiya ni sowali sinnakhala oholo waka, ovanyihana onnìwanyeya owanawana khorere.” — Habakuki 1:3.

⁴ Vano Yehova aamwaakhunle hayi? Va Habakuki 2:2, 3, Yehova amuroromeliha Habakuki weera amureherera sooxupa sootheene saamurukurera. Biblya onniwanyeiha masu ala eeraka, owo onnathanana itthu saahineettelaka nnene ahimaka, “Ti yowo onosamaryani.” (1 Pedru 5:7) Moota Muluku ommunanaraaya ohaawa, oonipwaha hiyo. (Yesaya 55:8, 9) Ninkhanto mwaha wa heeni onivirelelaaya? Nrowe niiwe moota Biblya onnakhulaawe.

5. Nahaawakavale, anamahoolela a ittini weeriwe eneera hayi? Ninkhanto Biblya oneera hayi?

⁵ Saanikhumelelaka irisa ni itthu ikina soonanara, mapastore,  mapaadere, ni anamahoolela akina a ittiini, aneera otthuna wa Muluku. Ti vaavonto, saakhumelelaka irisa sa ephattuwelo, ntoko okhumelela wanapoolu, eyo tiiyo itthu soonanara, ahooleli awo aneera, Muluku onaattaruxa atthu. Naari mutthu akhwavale, atthu akina aneera Muluku oromukuxa. Mene khahiyono ekhaikhai. Naasuwenle moota Yehova onuupuwela awe, khootheriwa moota ene hiiho. Tivaavonto Biblya onahima awe eeraka, “Mwa yeyo nyuwo, atthu a miruku, mukiwiriyane! Okhale ottai ni Muluku opanka sonanara, anyi, sonanara, okhale ottai ni Nakuru wera sohiloka!” — Yobi 34:10.

6. Mwaha wa heeni atthu antxipale anamootheraaya Muluku ni ohaawa onniphwanya?

⁶ Mwaha Muluku woowapattuxa atthu, owo oopattha mulattu woowotheriwa weera, ohaawa wootheene onniphwanya toneeriha, nave atthu akina anuupuwela weera owo onlamulela elapo ela ya vathi. Maxi muru wa 3 nohoona weera Satana sika onlamulela elapo ela ya vathi.

7, 8. Nvahe matakihero mararu aneeriha weera mulaponi osareyeke ohaawa.

⁷ Etthu yoopatxera eneeriha weera ohaawa otepeke waatxeerereya, eri yoowera, “Nòsuwela wi nri mwa Muluku, nto elapo yothene enakhala mwa sonanara.” (1 Yohani 5:19) Satana namalamulela oowuma murima. Nave “namotha a elapo yothene.” (Apokalise 12:9) Mene atthu antxipale aakhalano mikhalelo soolikana ni yoowo. Nto mwaha wookhalano mikhalelo sene seiyo, ti vaavonto wootha, woopana musonyo ni opakelana mikhalelo soonanara waattiyaaya.

⁸ Etthu yanaaveeli, eneeriha weera ohaawa otepeke waatxerereya elapo ela ya vathi, mwaha wa yoottheka. Atthu a mahikwaano toowikuxa ni ohahelela atthu akina, nave enniisoona awo okhala atthu oophwanela waapwaha atthu akina, mikhalelo iyo sinakhumelela mwaha wa yoottheka ya Adamu ni Heva. Nto mwaha woowikuxa, ohiwoonelamo atthu akina, onnawiihera, waakhulana, ikhotto, ni ohikosoopana. Mene itthu iya sinnatannya ohaawa. (Koheleti 4:1; 8:9) Etthu ekina eneeriha  weera nihaaweke, eri yooweera nipuro ni ehuhu ninkhalahu ti wooxupa. Ti yeeyo Biblya oneera awe, “niwoko othene aya annavariwa ni ehuhu ni erisa.” — Koheleti 9:11

9. Ninsuwela hayi weera Muluku onoorehera itthu muhoolo?

⁹ Yehova khahiyono tonkumihera ohaawa. Ni khonrerela omukhupanya mwaha wa ikhotto, ni itthu soonanara sinereya. Musuwele weera khahiyono Muluku onakumihera irisa, otetereya wa etthaya, xeiiya ni itthu soothesene soonanara. Nave pooti okhalano nikoho: ‘Yehova Muluku oweera sothene, nto heeni ohimmalihawe itthu iya soonanara?’ Yehova ookhalano mathowa anamweriha ohimaliha itthu soonanara sineereya mahikwaano. Mene ninnasuwela weera mwaha wa nsivelo na Muluku, itthu sinooreera muhoolo. — 1 Yohani 4:8.

10. Satana amoothenre eheeni Yehova?

¹⁰ Weera nisuwele nnene, nrowe nuupuwele ele yaakhumelenle oJardim. Satana aawoototha Adamu ni Heva weera ehimwiiweleleke Muluku. Owo ahimme weera, Muluku khaalamulela nnene ni khaavaha itthu soorerera yaatthunaaya. Satana aatthuna weera, Adamu ni Heva yuupuweleke weera, Satana eera alamuleleke nnene ompwaha Muluku. — Ephattuwelo 3:2-5; Nwehe Enoota 27.

11. Nikoho heeni ninrowahu waakhula?

¹¹ Adamu ni Heva emwiiwelelakaru Satana, awo yaamurukunuwela Muluku. Nave yuupuwela weera yaanwera othanla yoorera ni yoonanara meekhaaya. Opwaha mwa yeyo, Yehova tonsuwela itthu soorera wa hiyo. Vano Muluku aarowa woonihera hayi weera Adamu ni Heva yaapaka etthu yoonanara?

12, 13. (a) Mwaha wa heeni Yehova ahamwivalawe Adamu ni Heva? (b) Ni mwaha wa heeni Yehova omwihiyalawe Satana ni atthu elamulelaka?

¹² Mutthu ammana natiri ontthuneya omutaphula. Vamoharu ni Yehova, owo khaawivale Adamu ni Heva mwaha wooweera,  owo ammana natiri weera atthu eyarane ni esareye mulaponi. Tivaavonto khaavo onweera onvirikanyiha Muluku, mwaha wooweera owo aammana natiri, nto sootheene onihimaawe sinnereya. Nto Yehova ahaahiya Adamu ni Heva weera ekhaleno anamwane. Ni anamwane awo yanwera othanla omwiiwelela Muluku kapena Satana. — Ephattuwelo 1:28; Yesaya 55:10, 11.

¹³ Satana khaawotonthe Adamu ni Heva paahi, mene Satana awoka-tho malaika ohoolo wa Yehova. (Yobi 38:7; Daniyeli 7:10) Yehova oomuhiyera Satana ehuhu weera alamuleleke. Nave ohahiyera atthu weera epakeke imwene saya ni elamulelaneke yaaworu. Yehova oohiya weereya itthu sootheene, weera oonihere weera Satana namootha.

14. Eheeni enoonihereya mwa ehuhu yootheene atthu anlamulelanaaya?

¹⁴ Woohonihereya weera Satana namootha. Mwaha wooweera atthu aheerera otxentxa olamulelo wa elapo yootheene, mene khuwavo olamulelo okhumenle nnene. Ekhaikhai ti yoowera, atthu entthuneya okhaviheriwa ni Muluku. Mprofeti Yeremiya khonthe eeraka: “Kòsuwela, Yahvéh, [Yehova] wi ephiro ya mutthu khenakhala mmatatani mwawe; siso tho ole onètta, khanlamula mavalo awe”. — Yeremiya 10:23.

15, 16. (a) Mwaha wa heeni Yehova onahiyaawe ohaawa ovirelelaka? (b) Heeni ohinreheraawe itthu vaanano vaava?

¹⁵ Nipatxenre khalai ohaawa, mpaka makholo ahu akhalai yaawara isaakho akina ovoriiwa ni itthu ikina sinnikhumelela, nto itthu sinoovira seeraka onanara. Nave imwene khasireere otxentxiwa. Mene ti yeeyo entthuneya weera noone nimaitho ahu, waari weera olamulelo wa Satana ti wooreera kapena hooye. Nto, iyaakha iyaakha sene sivinre ehikhalaka niiyo ensuwanyeya, mwaha wa olamulelo wa Satana ori muumu. Iyuuma  sintxi sa ikhotto sooneleliwe, nto naamwi vareene hiiho phwéé ohaawa, onamakakattha, ikhotto ni ohixariya khommala. Tivaanto nniikohaahu, mwaha wa heeni Yehova onaasawe oweha itthu iya yelee ahimalihaka? Tivaanto nnoonaahu weera khaavo ophwanenle onikhavihera ompwaha Yehova, ohiya onweherera mutthu ontxa exima. Mwaha wa heeni Yehova ahimmalihaawe ohaawanno?

¹⁶ Muluku khantthuna omukhavihera Satana, nto tiyeeyo enamweeriha ohireherera itthu vaanano vaava. Nave tho, atthu mwaha wooweera yaarowa woonaka weera anniwera olamulelana. Yehova khantthuna omukhavihera Satana. Mene owo ontthuna weera, atthu esuwele weera Satana namootha. — Aheberi 6:18.

17, 18. Yehova onrowa omaliha hayi ohaawa?

¹⁷ Vano, neereke Yehova onoowera omaliha itthu soothesene soonanara sipakiwe ni Satana? Aani. Mwaha wooweera Muluku khiyaavo etthu onootxeelaawe. Owo oosuwela mpaka vaavi atthu eneeraya yeere, nookhulumuwa wootothiwa ni Satana. Mene okhuma vaavo, Yehova onrowa oreherera elapo ya vathi weera ekhale eparadiso. Ntoko owo atthunaawe woopatxerani. “Atthu ari mmahiyeni” anoovinyerera. (Yohani 5:28, 29) Iretta ni okhwa khasinrowa okhala, mwaha wooweera itthu soothesene sintannyeriwa ni Satana sinoomala. Koma, Yehova onrowa onvarela muteko Yesu “wera atoloxe sopanka sa Nanrima.” (1 Yohani 3:8) Ntthapeke osuwela weera Yehova toopixa murima. Mwaha wa opixawawe murima, onnanikhavihera omusuwela ni onvarela muteko. (Mmusome 2 Pedru 3:9, 10.) Ekhaikai weera ninahaawa, Yehova nave, onnanivaha ikuru weera nivileleke. — Yohani 4:23; Mmusome 1 Akorinto 10:13.

¹⁸ Yoorera osuwela tiila, Yehova khammunyeserera mutthu weera amukokhoreleke. Owo onnanihiya othanla etthu nintthunaahu opaka. Othanla etthu nintthunaahu, eparakha etokweene. Moota heeni? Nrowe niiwexexe.

19. Eparakha heeni Yehova onivanhaawe? Mwaha wa heeni ontthuneyaaya ohela mwiitti?

¹⁹ Yehova khanipanke ntoko axinama. Mwaha wooweera, axinama khenwera othaanla yoonanara ni yooreera. (Miruku 30:24) Nave hiyo, khaninlikana ni telefoni, yoowo ontthuneya omuttapunya weera nuulume ni mutthu mukina, naahera hiiho owo khaniittapunya. Yehova oonivaha eparakha ya othanla. Nto, mwaha wa heeni ontthuneyaaya ohela mwiitti othanla iwo? Onnatthuneya tthiri okhalano eparakha ela, nave hiyo onnanisivela othanla. Onnanisivela othanla itthu nintthunaahu, ntoko asinthamwene ahu. Nto mpattuxaahu Yehova, oosuwela weera, ninnahakalala ni eparakha ela.

20, 21. Yoothanla heeni ontthuneya ahu opaka mwekumini mwahu?

²⁰ Yehova ontthuna weera nimusiveleke yoowo. (Matheyo 22:37, 38) Nto owo khantthuna weera nimukokhoreleke moonyesereriwa. Owo oonivaha eparakha ya othanla. Asimaaye antxi, oonnaasivela owoona anamwanaaya ewiiwelelaka ni murima wootheene. Otepa wene vaavo mwaana oneerawe “amma kinnasiveliwa ni nyuwo”. Yehova tho, onnasiveliwa vaavo atthu anthanlaaya onvarela yoowo. Yooripiha murima ti ele yapankaaya Adamu ni Heva, awo yaakhootta omwiiwelela Muluku. Vano nyuwo munrowa othanla omwiiwelela Muluku kapena Satana?

²¹ Mwatthunaka opaka yoothanla yooreera, phatari muthanle omukokhorela Yehova. Atthu antxipale ennathanla omukokhorela Muluku ohiya Satana. (Miruku 27:11) Ntoko noonnaahu, Muluku onoomaliha ohaawa wootheene ni otxentxa elapo ela okhala eparadiso. Munrowa opaka eheeni weera mwaphiye mparadiso? Nikoho nna ninrowa wiiwa waakhuliwa waya muru ninrowelaahu.