1, 2. Mwaha wa heeni Biblya oraawe ntthuvelo ntokweene na Muluku?

NKUPUWELANI, nthamwene anyu ooruhenleni nihuta nootepa oreera mootutuxera nto murima anyu, wahereke wootthimakani. Neereke mwamutteliwa murima? Mohihovela waamosivelani, niwoko nthamwene anyu onnawupuwelani. Vano nyuwo munneera asantte, nave pooti omoona opisa opwaha weera mutaphule nihuta nne moone etthu eri mpuwa.

² Nto Biblya ntthuvelo ntokweene Muluku onivanhaawe. Moota heeni? Mwaha wooweera mitthenka siri mBiblyani khaninwera ophwanya nipuro nikina. Mwa ntakihero, owo onahima weera Muluku oopaka erimu ni elapo ya vathi, nave ahaapaka atthu oopatxera, mulopwana ni muthiyana. Biblya onnanikhavihera ovilela maxupo anniphwanya mweekumini mwahu. Yootepa ovara murima, Biblya onahima weera, Muluku ontthuna weera elapo ya vathi ekhale nipuro nootepaxa oreera!

3. Eheeni munrowanyu woona mwiilipihera omusoma Biblya?

³ Nyuwo mwiilipihera omusoma Biblya, munimoona weera Muluku ontthuna weera mukhale nthamwenaawe. Mene mwamusuwela nnene Muluku, onthamwenaanyu ni yowo onoolipa.

4. Mitthenka heeni sooreera vohima sa Biblya?

⁴ Biblya oothaphuleliwa muulumo anipwaha 2.600, nave ahimprimiriwa aBiblya antxipale. Atthu antxipale a elapo yootheene, ennamusoma Biblya ni nuulumo naya. Nave  isemana sootheene atthu antxipale enniwera okhalano Biblya. Mene khaavo buukhu onlikana ni Biblya.

5. Mwaha wa heeni nneera ahu muneene Biblya Muluku?

⁵ Yolempwa eri yoothene “yòhùpuxeriwa ni Munepa wa Muluku.” (Mmusome 2 Timotheyo 3:16.) Atthu akina pooti okoha, ‘vaniwereya hayi Biblya okhala a Muluku, oriki alempweene n’atthu?’ Mene Biblya onnawera wakhula nikoho nno: “Mene atthu yale, yèttihinwe ni Munepa Wottela, yàhùluma sa Muluku.” (2 Pedru 1:21) Nkupuwelani, tiithi onanvekela mwanawe olepa ekaratta, maxi tiithi owo tonirowa othaliha ele enrowa olempwa. Vano ekaratta eyo ti ya tiithi, kapena ti yamwaana ole olempe? Mohihovela masu eri mukarattani yakhuma mmwaano mwa tiithi. Vamoharu, Biblya ta Muluku, khahiyono t’atthu ale yarumwale omulepa. Mwaha  wooweera atthu awo yalepa miruku sa Muluku. Vekhaikhai Biblya “nsu na Muluku.” — 1 Atesalonika 2:13; vano weera mwiiwexexe Nwehe Enoota 2.

6, 7. Neereke impari sa mBiblyani sinnavanyihana?

⁶ Soovira iyaakha sinipwaha 1600 alempwaka Biblya. Alipa yamulepa Biblya yaakhala ehuhu yovirikana, akina yaasuwela itthu sintxipale, akina khayasuwela. Mwa ntakihero, mulopwana mmoha aari meediku akina yaari alipa oototha ihopa, anamalima, aphuki, mamwene, maprofeti, nave akina yari alipa okukhula ipuri. Maxi naari vareene hiiho impari sootheene khasinvanyihana. Naamwi anamalepa ala a Biblya yavirikanne makhalelo, soolepa saya sinniiwanana, eyo tiyo khasinvanyihana. *

⁷ Impari soopatxera sa mBiblyani sinnihima moota elapo epatxenraya okhalano sooxupa. Nave impari soomalihera sa biblya, sinnathaliha moota Muluku onrowaawe omaliha sooxupa iyo ni moota elapo enrowaaya okhala eparadiso. Biblya onnahima itthu sintxipale siwerenle atthu, nave onnonihera weera Muluku onnapaka ele onitthuna awe.

8. Ntakihero heeni nnoonihera weera Biblya khanootha uulumaka sa sieyensia?

⁸ Biblya khaiyono ebuukhu ya siyensia, naari yooxikola. Maxi owo uulumaka sa siyensia khanootha. Koma tiyeeyo yaweherereya ni ebuukhu enikhuma wa Muluku. Mwa ntakihero, ebuukhu ya Onamakeya enahima weera Muluku ahaxuttiha ana a Israeli moota yeeraya esempeke omwaramwara iretta. Empari ela ya mBiblyani elemphwale khalayi, atthu ehinakuve osuwela weera aakhala axiitthu entannyera  iretta. Ntakihero nikina nnonihera weera Biblya onniwanana uulumaka sa siensiya tinna, owo onihima weera etthaya kiyemexeriwe ni etthu. (Yobi 26:7) Mene Biblya aathaliha tho weera elapo eri yoovilikeya atthu ehinaaye osuwela. — Yesaya 40:22.

9. Ororomeleya wa alipa oomulepa Biblya onnonihera eheeni?

⁹ Biblya uulumaka soweereya sa atthu, owo onnahima ekhaikhai, khanootha. Eyo kheenereya ni sohimmwa sa mulaponi, alipa oolepa ibuukhu sa mulaponi ennivitha soonanariha s’atthu aya. Vanonto alipa oomulepa Biblya aalepa itthu sootheene, naari emaara muloko wa ana a Israeli waweriwaaya ni amwittani, awo aahima mwa exariya. Nave aalepa sopahula saya. Mwa ntakihero, Mose yowo aari namalepa a Biblya oothaliha soopahula sawe, nave moota Muluku oonenla awe soopahula iyo. (Namalepela 20:2-12) Ororomeleya wa alipa oomulepa Biblya, onnonihera weera owo ta Muluku mene hiyo pooti omuroromela.

10. Heeni olelo va miruku sa mBiblyani sineeraaya sinikhavihere?

¹⁰ Yoolempwa yoothene eri mBiblyani “yòhùpuxeriwa ni Munepa wa Muluku, ni muteko aya ti wohusiha, wovanya, wolaka ni wolela mwa exariya.” (2 Timotheyo 3:16) Olelo va, neereke miruku siri mBiblyani sinnakhavihera? Aani, mwaha wooweera miruku iyo sinkhuma wa Yehova mpattuxa ahu. Nto owo oonisuwela onipwaha asinnena ahu. Nave owo oosuwela itthu sintxipale sa hiyo, owo osuwela etthu enrowa oniphwanyiha ohakalala ni etthu enrowa oniphwanyiha soohoxa.

11, 12. (a) Miruku heeni siri ekapiitulu 5 mpaka 7 ya Matheyo, seiyo Yesu ahimmaawe? (b) MBiblyani ninrowa oxuttera eheeni?

¹¹ Ekapiitulu 5 mpaka 7 ya Matheyo, sookhalano miruku sooreera Yesu ahimmaawe. Miruku sinnikhavihera ophwanya ohakalala, moota wowiwanana ni asikhwihu, moota  woovekela ni moota woovarihela muteko musurukhu mweekumini mwahu. Ekhaikhai weera soovira iyaakha 2.000 Yesu avanhene miruku iyo, mene naari vareene hiho sinnakhavihera vantxipale olelo va.

¹² MBiblyani nave, Yehova onninxuttiha malamulo annikhavihera okhala nnene ni amusi ahu, okhala anamuteko oororomeleya ni okhala ni murettele n’atthu ootheene. Malamulo a mBiblyani ennanikhavihera ootheene a hiyo ehipwatthaka nipuro nikhummahu, na nloko heeni naari maxupo heeni anniphwanya. — Mmusome Yesaya 48:17; txonde Nwehe Enoota 3.

13. Eheeni Yesaya ahimmawe saarowa weereya ni ecidade ya oBabilonia?

¹³ Soolohera sintxipale sa mBiblyani soheereya. Mwa ntakihero, Yesaya ahimme weera ecidade ya oBabilonia yaamunyanyiwa. (Yesaya 13:19) Owo ahima moota ecidade ele yeeraya enyanyiwe. Babilonia yaari ecidade yoolipihiwa ni muuru, ni masele matokotoko ni oolipa ni mooloko waavira muxerexere. Mene Yesaya aahima weera mooloko ole wanwelela ni milako saarowa okhala kwenkwere. Amwittani yanvolowa ecidade ele ehiwanne ekhotto. Nave tho, Yesaya amuhima mulopwana era anyanye ecidade ele ya oBabilonia. Mulopwana owo eeriwa Kiro — Mmusome Yesaya 44:27–45:2; Nwehe Enoota 4.

14, 15. Yoolohera ya Yesaya yakwanenle moota heeni?

¹⁴ Ivinrene iyaakha 200 noomala Yesaya olepa yooloheraawe, anakhotto yarukurera ecidade ele weera ewane ekhotto. Vano taani aari muholeli aanakhotto? Ari mwene OoPersiya eeriwa Kiro moowiwanana ni ele yaahima aya yoolohera ya Yesaya. Nave saakwanela impari sootheene yaahima aya yoolohera.

 ¹⁵ Ohiyu anakhotto yaphiyalaya ecidade ele, aBabilonia yeera etxaaka esataka. Awo yuupuwela weera yaari ovareleleya mwaha wa muuru ni mooloko warukurenre. Kiro ni anakhotto awe yahapuxa mahi a mooloko ole. Ewelelakaru maahi, anakhotto yaalapuwa ni yavolowa ecidade ele ehiwanne ekhotto, okhala weera milako khasawaliwe ntoko yaahima aya yoolohera ele.

16. (a) Ti heeni yeera yeereye ni ecidade ya oBabilonia, Yesaya aathalinha awe? (b) Eheeni eniroromeliha weera yoolohera ya Yesaya yoheereya?

 ¹⁶ Yesaya aathaliha weera yamphiya ehuhu weeraya ohimakiwe oBabilonia. Owo alempe weera: “Khanrowa omakiwa tho wa mahiku othene nari okhaliwa tho erukulu ni erukulu.” (Yesaya 13:20) Neereke yoolohera eyo yohereya? Aani, mpaka olelo nipuro araawe Babilonia khomakinwewo. Nipuro nno nattamenle oBagdá osuli w’Iraki. Nave ninkhala 80 kilometru ni elapo eyo. Mene olelo va eriwowo mathala ntoko Yehova aahimalawe. Owo ahimme weera “Kini kikwese muttethe ole ni nvelo wotoloxa.” — Yesaya 14:22, 23. *

17. Mwaha wa heeni nneera ahu naaroromeleke anatiri a Muluku?

¹⁷ Neereke onnireerela ororomela soolohera sa mBiblyani? Aani, mwaha wooweera soolohera sintxipale sa mBiblyani soheereya. Eyo ennaneeriha ororomela weera anatiri ootheene yawo Yehova aamannaawe, animweereya. Nave onoomukwanihera natiri awe a elapo okhala eparadiso. (Mmusome  Namalepela 23:19) Ahéé, hiyo nookhalano yoweherera ya ekumi yoohimala, ntoko “Muluku ohinòtha alaihenraiye, olumwenku ohipatxenre okhala.” — Tito 1:2. *

18. Paulo ahimme heeni vohima sa “nsu na Muluku”?

¹⁸ Noowera woonelela weera khekhanle ebuukhu enlikana ni Biblya. Nave mitthenka sawe ti sowiwanana ni khasinootha suulumaka sa siyensiya. Opwaha mwa yeeyo, miruku siri mBiblyani ti sooreera nave soolohera sintxipale onahimaawe soheereya. Murummwa Paulo alempe weera: “nsu na Muluku ti ekumi ni owerya.” Eyo entthuna ohima eheeni? — Mmusome Aheberi 4:12.

19, 20. (a) Anookhavihereni hayi Biblya osuwela mukhalelo anyu? (b) Munoonihere hayi weera munnamuhela mwiitti Biblya?

¹⁹ Eyo entthuna ohima weera, Biblya onoowera wookhaviherani otxentxa ekuma anyu, eyo tiyo makhalelo anyu. Moota heeni? Owo onnrowa wookhaviherani osuwela nnene ele munuupuwela anyu vamurimani. Mwa ntakihero, apaale nyuwo munnera weera munnamusivela Muluku. Nto mwahipakaka ele munisoma anyu mBiblyani, neereke munnamwiiwelela Muluku? Opaka ele Muluku onahimawe tenoonihera weera munnamwiiwelela yoowo.

²⁰ Moohihovela Biblya ebuukhu ya Muluku. Mene ontthuneya weera musomeke ni muxuttereke ebuukhu ya Muluku. Neereke munnoonihera oxukurela mwaha woovahiwa ebuukhu ela? Nyuwo munimoonihera oxukurela mwiilipiheraka osoma veeli-veeli. Nave munoorowa oxuttera teevi eri yootthuna ya Muluku ni atthu. Muru onittharelana ninrowa oxuttera mwahene yoowo.