1, 2. Taani olelo va aneera anikhavihereke?

NKUUPUWELANI mweettaka ekwaha, nto mureene mphironi mweetaka, moohilekela mahutte ennariipihana. Nave onnapatxera overunya, okukutteya ni woopa etari neepulaawe mwemmo. Etthu yoopatxera opaka ori waasaasa nipuro nootthawela, aani, nipuro noowipitheya. Khohiyono tihiiho? Vano mwaphwanya nipuro, woova onnamala.

² Emohamoharu, hiyo atthu noovalavela vantxipale ni khannoona wootthawelawo, mene nenne nxiiye, itthu sinoovira siriki onanara elapo nraahu. Mpakana ninniikoha: ‘Nnaatthawele woowini?’. Mulipa oolepa Nsalmu olempe ha: “mmuhimere Yahvéh: ‘Nyuwo mwà ntthawelo naka ni ekhwikwi aka, Muluku aka, kinatthawelaka’wo’”. (Nsalmu 91:2) Nihihovelaka tho, Yehova onookhala ntthawelo nahu, nave onoonithokorora ni maxupo a elapo ela yoosareya mahooxo. Nto, opwaha mwa yeeyo, owo onoonivaha yooweherera ya muhoolo yoolipa.

3. Nnapakeke heeni weera Yehova akhale ntthawelo nahu?

³ Yehova ananikhavihereke hayi? Mene owo toneera awere onikhavihera ni mahooxo enniphwanya. Aani, mwaha wooweera owo khampwahiwa ni mutthu mukina. Nto nroromeleke weera naamwi olelo va eniphwanyaka maxupo oohiyana-hiyana, Yehova muhoolo mmo, owo onoomaliha maxupo ootheene. Tivaavonto ontthuneyaahu weera nivireleleke okhala nthamwene a yoowo weera anikhavihereke yaniphwanya maxupo. Biblya tho onnanooperera weera hiyo “nìsunkeke mosivelani mwa Muluku.” (Yuda 21) Vano nnapake hayi eyo?

4, 5. Eheeni enoonihera weera Yehova onnanisivela?

⁴ Weera nikhale vakhiviru ni Yehova, ontthuneya nooneke moota onnisivelaawe. Nrowe nuupuwele ha, owo ohaatala etthaya ela ninkhalaahu, ennamela yootxa, onnameliha malaxi weera ntthunyeleke impa, oopattuxa miri soohiyana-hiyana, aani, miri  sammuhuruni ni sa vaate ni mittunttu sintxipale sa axinama. Weera itthu iya sootheene sikhaleke vamoha nihiyo, ontthuneya maahi. Tivaavonto, owo onnarupiha epula weera maahi ehinithoweke. Opwaha mwa yeeyo, mBiblyani, nookhalamo nsina na Muluku, aani Yehova. Maaxi etthu yootepa otthuneya ni ehiitthuneya ottiwaala tiila, oomurumiha Mwanawe Yesu mweelaponi weera anikhwele ni oniphwanyiha ovuluwa. (Yohani 3:16) Mene Yooveleela ya Yesu, eyo tiiyo, mukuttho, onnanikhavihera okhalano yoowehera yooreera ya muhoolo.

⁵ Yehova ootikithera Omwene wa oMesiya, neere ha, eguvernu eri wirimu yeeyo eneera emalihe mahooxo ootheene. Omwene wa Muluku onootatuxa elapo ela ya vathi okhala eparadiso, aani emaareene yeeyo ohakalala ni murettele onimwaataleleya elapo yootheene ni khorwa omala wa mahiku mootheene. (Nsalmu 37:29) Etthu ekina Yehova oonihenraawe weera onnanisivela, eeri yooweera owo onnanixuttiha moota woohakalala vanaano vaava. Nave onnaniwopa weera ninvekeleke etthu eri poothe, nto nihihoveleke weera owo onniiwa mavekelo ahu. Aani eyo ennoonihereya weera owo onnanisivela.

6. Munoonihere hayi weera munnavara matata meeli nsivelo na Yehova?

⁶ Munoonihere hayi weera munnavara matata meeli nsivelo na Yehova? Naamwi atthu antxipale olelo va ehooniheraka ohakalalela ni weera asantte wa etthu epakeliwaaya, mene ontthuneya weera mweereke asantte wa itthu sooreera seiyo Yehova onnipakelaawe. Khohiyono paahi mahuku ahu olelo tekhanlaaya atthu oheera asantte, nave mahiku a Yesu, yaakhala atthu a mooteene hiiha. Mene Yesu areene elapo ela ya vathi, ahaalamiha anamaretta muloko, mene mmoha paahi sika amuxukurenle. (Luka 17:12-17) Nave hiyo ontthuneya weera nimutakihe mulopwana ole aamuxukurenle Yesu. Nto ehuhu yootheene onnaphwanela onvaha asantte Yehova wa itthu sootheene onnipakelaawe.

7. Mwaha wa heeni ontthuneyaawe weera noonihere nsivelo wa Yehova?

⁷ Ekina tho entthuneya weera nipake ori omusivela Yehova. Yesu ahaaxuttiha atthareli awe weera wannatthuneya omusivela  Yehova ni murima aya wootheene, munep’á wootheene [ikuru], ni muupuwelo aya wootheene. (Mmusome Matheyo 22:37.) Ela entaphulela eheeni?

8, 9. Eheeni nneeraahu nipakeke weera noonihereke weera ninnamusivela Yehova?

⁸ Neereke onnakwana waasa wuuluma weera ninnamusivela Yehova? Naari vakhaaniini? Mweekhaikhai nnimoonihera weera ninnamusivela Yehova ni murima ahu wootheene, munepa ahu wootheene [ikuru] ni muupuwelo ahu wootheene mwaha wa itthu nimpakaahu. (Matheyo 7:16-20) Biblya onnahimexexa nnenesene weera hiyo ninnamusivela Muluku, neettelaka malamulo awe. Vanonto neereke onnaxupa opaka eyo? Hooye, niwoko “malamulo awe khanalemela.” — Mmusome 1 Yohani 5:3.

⁹ Mene vaavo nnamwiiwelelaahu Yehova, hiyo ninnaphwanya ohakalala mookumini mwahu. (Yesaya 48:17, 18) Vano eheeni eneera enikhavihere omwaattamela Yehova? Nrowe noone.

10. Munrowa opaka eheeni weera nvirelelihe oxuttera sa Yehova?

¹⁰ Muwenre hayi okhala nthamwene a Yehova? Moohihovela omusoma Biblya woohihiyerera wohookhaviherani vantxi omusuwela Yehova, nto anookhaviherani vakhaani-vakhaani waataanano yoowo. Mene onthamwene owo onlikana ni mooro yoowo muntthuna anyu weera ohitxiphe. Nto weera mooro owo ohitxiphe, ontthuneya ikhuuni ni ohikhulumuwela otetheerela mawuuna awo. Emohamoharu, weera onthamwene ahu olipe, ontthuneya ohihiya oxuttera sa Yehova. — Miruku 2:1-5.

11. Eheeni eneera ekhumelele wakhala weera moovireleliha omusoma Biblya?

¹¹ Nto vaavo munvirelelihaanyu omusoma Biblya, munooxuttera itthu sintxi ni soottuttha murima. Eyo enoolikana ni ele yaapakeyale ni oohusera a Yesu vaavo owo aathokoronraawe iprofesia sa mBiblyani. Awo yeenre: “Murim’ahu khawavarela, vaavale owo ùlummaiye ni hiyo mphironi anihulelaka solempwa?.” — Luka 24:32.

12, 13. (a) Omusivela Yehova onrowa onikhavihera hayi? (b) Eheeni eneera enikhavihere ovireleleliha omusivela Yehova?

 ¹² Yesu aakhaviherakaru ooxuttera ale wiiwexexa sa mBiblyani, mene ooxuttera ale yaahakalala vantxipale, mwaha wooweera yaamwiiwexexa Biblya. Eyo ennalikana ninyuwo vaavo mwaapatxeraanyu omuxuttera Biblya, apaale woopatxerani khamwiiwexexa nnenesene, nto vaavo mwaapatxenraanyu wiiwexexa mwaahakalala vantxipale. Mene eyo yohookhaviherani omusuwela tiithinyu Yehova ni omusivela. Nto noororomela weera, khamuntthuna weera omusivela wanyu ovukuwe. — Matheyo 24:12.

¹³ Mukhanlanyu nthamwene a Muluku, onnatthuneya weera muhikottakottihe onthamwene owo, mene nvirelelihe olipiha. Tivaavo ontthuneyaawe ovireleliha oxuttera sa Yehova ni Yesu, wuupuwelela ele munxutteraanyu ni moota eneeraaya yookhavihereni mweekumini mwanyu. (Yohani 17:3) Vaavo mummusoma anyu Biblya, onnatthuneya wiikoha ha: ‘Ela kinsomaaka, enkisuweliha eheeni voohima sa Yehova? Heeni kinphwanelaaka omusivela Yehova ni murima aka wootheene ni munep’á aka wootheene?’ — 1 Timotheyo 4:15

14. Nivekelo ninkhavihera hayi olipiha onthamwene ahu?

 ¹⁴ Asinthamwene eekhaikhai ennakhala vamoha ni ennatthekula, mene eyo ennalipiha onthamwene owo. Moolikana, weera onthamwene ahu ni Yehova ovirelele okhala woolipa, ontthuneya weera ntthekulekeno yoowo moorweela munivekeloni. (Mmusome 1 Atesalonika 5:17.) Etthu etokotoko Yehova onivanhaawe nri nivekelo. Mene hiyo, pooti otthekula ni onvekela Yehova ewoora eri poothe, owo onoonaakhula, aani owo onoonaakhula nanvekelaka ni murima wootheene. (Nsalmu 62:9) Nkuupuwelani weera mookhala ni mwaana, nto mwaninyu owo nenne nxiiye onoovekelani etthu emohamoharu, nyuwo khamwaaya okhulumuwa naari onyoonyiheya? Moohihovela mwaamukhulumuwa, nto onoolikana ni Yehova, owo khannivekela weera ninvekeleke etthu emoharu nenne nxiiye, mene ninvekele itthu soohiyana-hiyana, eyo tiiyo, itthu sinkhuma vamurima ni ohima ekhaikhai. Tivaavonto ninvekeleke Yehova etthu eri poothe, naavekelakaru nimurima woothene owo onimwaakhula mavekelo ahu.

15, 16. Neereke onnoosivela muteko woolaleera?

¹⁵ Weera nivirelelihe onthamwene ahu ni Yehova, ontthuneya weera muulumeke sa yoowo ni atthu akina. Mene wuuluma naatthu akina voohima sa Yehova eri eparakha etokweene. (Luka 1:74) Nave Yesu ohaavaha Makristu ootheene muritti ola woowaaleela atthu akina. Tivaavonto ontthuneyaaya weera ootheene ahu nlaleyeke mitthenka sooreera sa Omwene wa Muluku. Neereke nyuwo moopatxeriha olaleya mitthenka sa omwene wa Muluku? — Matheyo 24:14; 28:19, 20.

¹⁶ Khiyaarivo etthu ekina yootepa otthuneya Paulo aakhanlaawe oovara, ohikhanle olaleya masu a Muluku. Owo enre weera olaleya waari muhakhu. (2 Akorinto 4:7) Wuuluma sa Yehova ni soolaaihera sawe, sikhaleke itthu sineera sikhale okhwipi wa nlumi nanyu ni etthu yootepa otthuneya mweekumini mwanyu. Tivaavonto mwaatthunaka omurumeela Yehova, ontthuneya opaka yeeyo. Mene tho, muhittiwale weera muteko owo, Yehova onnahela mwiitti. (Aheberi 6:10) Muteko woolaleera onimookhaviherani  ni waakhavihera atthu akina okhala vakhiviru ni Yehova, opwaha mwa yeeyo, okhalano ekumi yoohimala. Mwa yeeyo, ontthuneya wiilipihera olaleya. Aani ohikhulumuwela. (Mmusome 1 Akorinto 15:58.) Neereke wookhala muteko mukina weera woohakalaliheni ohikhanle muteko woolaleera?

17. Mwaha wa heeni oraaya wootthuneya olaleera moowakuveya?

¹⁷ Muteko woolaleera onnaphwanela opakiwa moowakuveya. Aani, “nlaleye masu” nlaleye “moowakuveya.” (2 Timotheyo 4:2) Mene atthu entthuneya weera yiiwe ni esuwele voohima sa Omwene wa Muluku. Biblya onahima weera, “Ninnattamela nihiku ntokotoko na Yahvéh! khweli ninnattamela ni nri vakhiviru” emalihero “khenòtxeleya.” (Zakariya 1:14; Habakuki 2:3) Aani, Yehova onoomaliha olamulelo wa elapo ela ya Satana ehikhweye osokonyera. Tivaavonto, atthu onnatthuneya weera esuwele itthu iya nave ethanle asinneene omurumeela kapena ohimurumeela Yehova, weera omaalo eheere, khanaasuwenle.

18. Mwaha wa heeni oraaya wootthuneya ohitxompela omukokhorela Yehova vamoha ni asinna akina?

¹⁸ Weera nivirelele okhalano onthamwene ni Yehova ori ohitxompela mithukumano. Biblya onnanooperera eeraka: “Niwehexexaneke mukina ni mukhw’awe, nòpereranaka mwa osivelana ni mwa sopanka sorera. Nihòtxele muthukumano ahu, ntoko anakhovelelaya akina, mene nlipiheraneke, votepa tho vava munònanyu nihiku n’Apwiya nriki mwàttamela.” (Aheberi 10:24, 25) Ela entaphulela weera, hiyo nihitxompeke omithukumanoni ni eyo enimwaalipiha asinna oomunepani. Nave eyo ennupuxera weera hiyo nipakeke ele ninweraahu weera nihitxompeleke naari okhulumuwela mithukumano.

19. Eheeni eneera enikhavihere ovirelela waasivela asinna?

¹⁹ Ohitxompela mithukumano onimookhaviherani waapaka asinthamwene ooreera. Asinthamwene awo, pooti onikhavihera naari hiyo waakhavihera. Opwaha mwa yeyo, onoowereya hiyo omukokhorela Yehova ni asinna. Ntoko nisuwenlaahu, ootheenaahu nookhalano yoottheka yooyariwano, mwa yeeyo hiyo pooti waatthekela naari otthekeliwa ni asinna. Nto yapakeya eyo, ontthuneya  weera hiyo naaleveleleke asinna. (Mmusome Akolosi 3:13.) Mene ontthuneya weera, hiyo nihikhaleleke oweherera omalela wa asinna, mene niwehexexeke makhalelo ooreera aasinna ekhalannaaya.

20, 21. Entaphulela eheeni, “ekumi yeekhaikhai”?

²⁰ Yehova Muluku toohakalala, nto ontthuna weera asinthamwene awe ekhaleke oohakalala. Nave onnaroromeliha weera, muhoolo mmo, owo onoonivaha ekumi yoovirikana ni ela yoosareya mahooxo nikhalannahu olelo va.

²¹ Muhoolo mmo ninkelaahu, nnookhalano ekumi yoohimala, khohiyono olelo va anamwane envirelaaya weiwo, enkhwaaya ehitxiiyevo naari ninkhalaahu iyaakha sookontareya, 70 naari 80. Biblya, onnitthana ekumi eyo, okhala “ekumi yeekhaikhai” eyo tiiyo, “okumi wohimala” okhalano ekumi yoohimala. Ekumi yomalela, yamurettele ni yoohakalaliha, aani elapo enyowani. Yahvéh olaihera okhalano ekumi eyo, vano ontthuneya weera nipakeke ele ninweraahu, weera naakhele ekumi ela yoohimala. — 1 Timotheyo 6:12, 19.

22. (a) Ninrowa ophwanya hayi ekumi yoohimala? (b) Neereke ninrowa waakhela ekumi yoohimala mwaha wa owerawahu?

²² Nnaphwanye hayi “ekumi yeekhaikhai”? Hiyo ontthuneya weera nrettheeleleke waapakela itthu sooreera atthu akina, nave opaka itthu sinamusivela Muluku. (1 Timotheyo 6:18) Naamwi vareene hiiho, onnatthuneya weera hiyo neereke asantte, niwoko ekumi eyo Yehova ontthunaawe onivaha eri yoovaha yamahala, hiyo nihiinweraahu ophwanya meekhiihu. Mwaheene? Mwaheene ori wooweera, pooti wiilipihera khanaawera ophwanya, ohikhanle ikharari sa Yehova. Aani, onrowa onivaha ekumi eyo yoohimala mwaha wa “mahala a Muluku”. (Aroma 5:15) Tithihu a wirimu khanahovela onivaha ekumi yoohimala, owo onoonivaha.

23. Mwaha wa heeni ontthuneyaawe opaka soothanla sooreera vaanaano vaava?

²³ Omala wa elapo ela enlamuleliwa ni Satana ori vakhiviru. Ale eniilipihera omukokhorela Yehova mooreerela, enimwiipithihiwa  ni Yehova, nto neereke nyuwo munnimukokhorela Yehova mooreerela? Aani ontthuneya weera mpakeke soothanla sooreera ni mukhale oowiiwelela weera mwiipithihiwe nihuku nno ni mwaakhele ekumi yoohimala!