1. Moovarihana ni Aheberi 12:1, nintthuneya opaka eheeni weera nivirelele otthimaka mpaka okhwipi?

 BIBLYA onnalikanxera ekumi ya makristu ni otthimaka, ale entthimaka wakhala weera enoophiya mpaka okhwipi wa ephiro, enoophwanya ekumi yoohimala. (2 Tim. 4:7, 8) Tivawonto nintthuneyaahu weera nivirelele otthimaka otepaxa wene vaavo nnaattamelaahu okhwipi wa ephiro ela. Murumwa Paulo owo oowera otthimaka mpaka okhwipi wa ephiro emphwanyiha ekumi ni owo oohima etthu enkela onikhavihera opaka eyo. Paulo enre: “Nitthimakele n’ovilela owana ekhotto ele yìyathiwe oholo wahu.” — Mmusome Aheberi 12:1.

2. ‘Oriha muritti wootheene’ ontaphulela eheeni?

² Emaara Paulo aahimaawe weera ontthuneya ‘orihaka muritti wootheene,’ neereke owo aatthuna ohima weera, mukristu ahiteexeke muritti ori poothe? Hooye. Ophwaha mwa yeeyo, owo oohima weera waatthuneya oriha miritti seiyo siri soohivareleya muteko. Miritti sene seiyo saarowa onttettheiha naari onikhulumula. Nto natthuna weera nivireleleke ontthuneya owehexexa miritti sene seiyo ni ohiya moowaakuveya. Mene sookhala miritti mikina nintthuneyaahu oteexa. Nintthuneya opaka eyo mwaha wooweera, naahiteexa nnaakhaleke ntoko noohiya otthimaka iwo. (2 Tim. 2:5) Nto miritti heeni?

3. (a) Moovarihana ni Agalata 6:5, itthu heeni nintthuneyaahu oteexa? (b) Eheeni ninrowaahu woona mwa yoosomeene yeela ni mwaha wa heeni?

³ Mmusome Agalata 6:5. Paulo oohima miritti heeni nintthuneyaahu oteexa. Owo ohimme ha: “Vekhaikhai mutthu ori othene ìreye muritti awe.” Paulo aatthuna ohima weera ootheene hiyo nookhalano miritti Yehova onwehereraawe weera nikwanihere. Mwa  yoosoma ela nnoorowa woona etthu enhela mpuwa oteexa “miritti sahu” ni moota ninteexaahu ni moota ninrowaahu ohiya oteexa miritti soohitthuneya. Ohiya oteexa miritti soohitthuneya, onoorowa onikhavihera ovirelela otthimaka ephiro emphwanyiha ekumi yoohimala.

4. Mwaha wa heeni ohikhanlaaya wooxupa, omukwanihera natiri nimmanenlaahu Yehova? (Nwehe efootu.)

⁴ Natiri nimmannaahu emaara niivahereraahu. Vaavo niivahereraahu wa Yehova naamulaihera omukokhorela yoowo paahi, opaka yootthuna awe mahiku ootheene. Nto nintthuneya omukwanihera natiri owo. Vaavo nimpakaahu sootheene iye nimulaihenraahu Yehova muritti mutokweene, mene, khoiyono woolemela. Yehova onipanke hiyo ni yootthuna ya okwanihera yootthunaawe. (Apok. 4:11) Owo oonipaka ni yootthuna ya omusuwela, ni omukokhorela. Nave oonipaka mwa enenero awe. Nto eparakha etokweene opaka yootthuna ya Yehova ni eyo ennaneeriha wiilipihera omwaattamela owo. (Nsal. 40:8) Opwaha mwa yeeyo, vaavo nimpakaahu yootthuna ya Muluku ni omwiiwelela mwanawe, ‘ninnaphwanya ohakalala.’ — Math. 11:28-30.

5. Eheeni enkela wookhaviherani omukwanihera natiri mummanenlaanyu Yehova? (1 Yohani 5:3)

 ⁵ Moota heeni nneeraahu nteexeke miritti? Itthu piili sinookela wookhaviherani. Yoopatxera nvirelele olipiha nsivelo nanyu ni Yehova. Nyuwo pooti opaka eyo, mphimelelaka itthu sooreera Yehova oopakenlaaweni, ni mareeliho yaawo onkelaawe woovahani muhoolo. Vaavo nsivelo nanyu ni Yehova nneeraaya ninnuweke oneereke wookhweelani omwiiwelela. (Mmusome 1 Yohani 5:3.) Yanaaveli, mmutakiheke Yesu. Yesu aawera opaka yootthuna ya Yehova mwaha wooweera annavekela nikhavihero wa Yehova nave annawehexexa ele eeraawe aakhele muhoolo. (Aheb. 5:7; 12:2) Hiihaale ntoko Yesu, nvireleleke onvekela Yehova nvekelaka ikuru, nave muhiyeleele yooweherera anyu ya ekumi yoohimala. Vaavo nyuwo munaatxereraanyu omusuwela Yehova ni omutakiha Yesu oneereke wookhweelani omukwanihera natiri mummanenlaanyu Yehova.

6. Mwaha wa heeni nintthuneyaahu okhwanihera miritti sa veemusini vahu? (Nwehe efootu)

⁶ Muritti nraahuno veemusini. Emaara hiyo ninvirelelaahu otthimaka ephiro emphwanyiha ekumi yoohimala, nintthuneya omusivela Yehova ni Yesu waapwaha amusi ahu. (Math. 10:37) Mene eyo khentaphulela weera hiyo nihikosoopeke emusi ahu, mwaha wooweera Yehova onnahakalala vaavo, ninkwaniheraahu miritti sahu sa veemusini naari emaara ninkosoopahu emusi ahu. (1 Tim. 5:4, 8) Napaka haawo, hiyo nnoohakalala vantxipale okhala weera Yehova oosuwela weera imusi sinnaphwanya ohakalala vaavo enttittimihanaaya mukina ni mukhwaawe. Naari emaara enaaxuttihaaya anamwane aya ni awo emaara enwiiwelelaaya asitithaya. — Aef. 5:33; 6:1, 4.

7. Nyuwo munkela okwanihera hayi miritti muraanyuno veemusini?

⁷ Moota heeni nneeraahu nteexeke miritti sa veemusini? Muhixikhaka mwaari weera mwa mulopwana oothela naari muthiyana ootheliwa naari mwaana, etthu yootthuneya ori otthara miruku sa mBiblyani. Muhipakeke itthu munuupuwelelaanyu meekhinyu weera ti sooreera, naari iye simpakiwa muttetthe munkhalaanyu. Muhitthareke itthu anamasoma enhimaaya otepaxa wene seiyo sinvirikanyiha miruku sa mBiblyani. (Mir. 24:3, 4) Nvariheleke nnene irevista sahu seiyo sirinono mathipelo a mBiblyani, iyo sinnanikhavihera moota woovarihelaka muteko miruku sa mBiblyani. Mwa ntakihero, mwaha oneera “Ajuda Para a Família” sookhalano soohima, sa maxupo enaakhumelela mahikwaano ale athelanne, asitiithi, amiravo naari ale oowunnuwela. Muthanleke ovarihela muteko ele Biblya onhimaawe nnaamweera atthu akina aveemusini vanyu ehitthunaka opaka eyo. b Mwapaka haawo emusi anyu enookhala yoohakalala, ni Yehova onookela wooreelihani vantxipale. — 1 Ped. 3:1, 2.

8. Moota heeni soothanla sahu sineeraaya sinivooleeleke?

⁸ Waakhulela sookhumelela sa soothanla sahu. Yehova oonivaha eparakha yoothanla ele eri yooreera naari yoonanara, ni ontthuna weera hiyo nithanleke itthu sooreera mwaha wooweera owo ontthuna weera hiyo nihakalaleke mwa itthu ninthanlaahu. Mene vaavo nimpakaahu yoothanla yoonanara, Yehova khonrowa onikosoopa yakhumelela vale maxupo. (Agal. 6:7, 8) Nto mwaha wa yeeyo, hiyo nintthuneya waakhulela maxupo enkhumelela mwaha wa yoothanla yoonanara nipankaahu, ohela mpuwa wuuluma masu oohireerela, opaka itthu nihuupuwelenleene. Nihipwatthaka itthu nipankaahu, hiyo pooti omakelaka wuupuwelela itthu iyo, menento osuwela weera nintthuneya waakhulela itthu sinkhumelela mwaha wa soothanla sahu, pooti oneeriha waaleela asitokweene soottheka sahu ni onikhavihera oreherera yoottheka eyo. Opaka itthu iya, pooti  onikhavihera ovirelela otthimaka ephiro enrowa onikhavihera ophwanya ekumi.

9. Eheeni enkela wookhaviherani owanano soothanla soonanara? (Nwehe efootu.)

⁹ Moota heeni ninrowaahu oteexa miritti sahu? Waari weera nyuwo moopaka soothanla ni muttharuwa, eheeni muntthuneyaanyu opaka? Muroromeleke weera nyuwo khamunwera otxentxa itthu mpankaanyu khalayi. Muhiyeeheke etempu anyu mweereraka oreherera itthu mpankaanyu khalayi naari muhaavaheke mathowa atthu akina mwaha wa soopaka sanyu iyo. Opwaha mwa yeeyo mwaakhuleleke weera nyuwo moottheka nave mpakeke ele munweraanyu viinaano vaava. Wakhala weera nyuwo munniivaha mathowa, mukhaleke oopixa murima ni munvekeleke Yehova mwaakhulelaka weera nyuwo moottheka mene tho munvekeleke nlevelelo. (Nsal. 25:11; 51:3, 4) Wakhala weera moomunyoonyiha mutthu, munvekeleke nlevelelo ni wakhala wootthuneya mwaase nikhavihero wa asitokweene a mmulokoni. (Yak. 5:14, 15) Muhusereke ni soottheka sanyu. Mpakeke ele munweraanyu weera muhitthikele opaka itthu iyo soonanara. Mwapaka itthu iya nyuwo muroromeleke weera Yehova, onimoomorelani ikharari nave onimoovahani nikhavihero nenno munhaawelaanyu. — Nsal. 103:8-13.

10. Mwaha wa heeni wuupuwelela weera khanimpaka etthu yookwanela oraaya muritti wooxupa oteexa? (Agalata 6:4)

¹⁰ Wuupuwelela weera khaninrowa opaka etthu yoowooneya. hiyo pooti okhala ootteettheya ni ooriipiwa murima wakhala weera ninniilikanxera ni atthu akina. (Mmusome Agalata 6:4.) Wakhala weera nnimwiilikanxera ni atthu akina nnookhala anrima. Ikwaha sintxipale niilikanxeraka ni atthu akina hiyo pooti okhalano nrima ni okhalano mukhalelo wookuphana. (Agal. 5:26) Wakhala weera ninneerera opaka itthu ikina empaka atthu akina neeraka nihiweraka, omamalihero waya hiyo pooti ohikhumela nnene. Wakhala weera “nroromelo nowotha ninnonttiha” nkuupuwelani moota weeraaya okhale wookhulumula oweherera etthu ninsuwelaahu weera khaninrowa owera okhalano! (Mir. 13:12) wakhala weera noopaka eyo ninrowa okhala ootteettheya ni ookhulumuwa. Ni omamaliheroni waya pooti hiyo, ohiya otthimaka wa ephiro ele envaha ekumi. — Mir. 24:10.

11. Munkela opaka eheeni weera muhaakhuleleke itthu munoonaanyu weera khamunkela owera opaka?

¹¹ Moota heeni munkelaanyu orula miritti iya? Nyuwo muhiweherereke paahi itthu ntoko muntthunaanyu mene nto ntoko Yehova ontthunaawe. Yehova khanweherera weeranyuwo munvahe etthu muhikhanlaanyuno. (2 Akor. 8:12) Mene muroromeleke weera Yehova, khanlikanxera ele mumpakaanyu ni iye atthu akina empakaaya. (Math. 25:20-23) Yehova onnavaha mwiitti vantxipale miteko mumpakaanyu ni ikuru sanyu sootheene, nroromelo mummooniheraanyu ni wiilipihera munooniheraanyu. Mukhaleke oowiiyeviha ni musuweleke weera emaara ekina nyuwo pooti ohiwera opaka itthu ntoko mwaatthunaanyu, mwaha wa ekumi anyu, wunnuwa wanyu naari mwaha wa itthu ikina sookhumelela. Hiihaale ntoko Barzilayi, muheemerereke opaka etthu musuwenlaanyu weera khamunkela owera opaka apaale mwaha wa ekumi anyu naari wunnuwa wanyu. (2 Sam. 19:35, 36) Ni hiihaale ntoko Mose, nvekeleke nikhavihero nave mwaahiyereke atthu akina miritti muraanyuno. (Ott. 18:21, 22) Okhala oopixa murima onookela wookhaviherani ohaakhulela itthu munoonaanyu weera khamunkela owera opaka naari seiyo seera siweeeriheni okhulumuwa emaara munttharaanyu ephiro emphwanyiha ekumi yoohimala.

12. Neereke ontthuneya wiivaha nthowa mwaha wa soothanla atthu akina empakaaya? Muthalihe.

¹² Wiivaha nthowa mwaha wa soothanla sa atthu akina. Hiyo khaninrowa waathanlelaka atthu akina etthu yoopaka naari owaakiha mwaha wa maxupo enkhumelela mwaha wa itthu enthanlaaya.  Mwa ntakihero, apaale anamwane anyu pooti ohiya omukokhorela Yehova. mene nto yoothanla eyo pooti waakumihra maxupo asitiithi. Menento wakhala weera sitiithi enniivaha nthowa mwaha wa yoothanla anamwane aya empakaaya eyo pooti waakhulumula vantxipale ni Yehova khantthuna weera asitiithi eteexeke muritti soothanla anamwane aya empakaaya. — Arom. 14:12.

13. Moota heeni asitiithi enkelaaya owanano ni soothanla soonanara sa anamwane aya?

¹³ Nyuwo munkela ohiya hayi muritti owo? Muupuweleleke weera Yehova oonivaha eparakha yoothanla. Owo onnamuhiya mutthu ori poothe othanla yoopaka. Eyo ennahela mpuwa omukokhorela naari hooye, ni Yehova oosuwela weera nyuwo ntoko tiithi naari maaye khammalenle. Owo ontthuna paahi weera mpakeke ele munweraanyu ni wakhala weera anamwane anyu ennapaka soothanla, iyo soothala saya ohiya sawinyu. (Mir. 20:11) Nnaamweera vareene hiiho, nyuwo pooti okhala ooxupeya muupuwelelaka itthu mpakaanyu khalaiyi ntoko tiithi naari maaye. Vanonto munvekeleke Yehova mmuleelaka moota muniisonelaanyu weera ooleveleleni. Yehova oosuwela weera nyuwo khamunwera otthikela ottuli weera mureherere etthu mpankaanyu. Mene Yehova tho khontthuna weera nyuwo mwaakosoopeke anamwane anyu mwaha wa soothanla soonanara empakaaya, ni wakhala weera mwaninyu onniilipihera weera atthikele wa Yehova, muroromeleke weera Yehova ori oolikaneene weera omwaakhele. — Luka 15:18-20.

14. Mwaha wa heeni wiivaha nthowa etempu eri yootheene oraaya muritti nintthuneyaahu ohiya?

¹⁴ Wiivaha nthowa etempu yootheene. Emaara nimpakaahu yoottheka, hiyo ninnaxupeya. Mene Yehova khantthuna weera hiyo nivireleleke wuupuwelela yoottheka eyo. nintthuneya ohiya wuupuwelala. Ninkela osuwela hayi weera ninniivahaxa mathowa? Wakhala weera noohima soottheka sahu nnattharuwa ni nniilipihera, opaka ele ninweeraahu weera nihipake yoottheka emoha-moharu, niroromeleke weera Yehova onoonilevelela. (Mit. 3:19) Napaka sootheene iya, Yehova khantthuna weera hiyo nivireleleke wiivaha nthowa. Owo oosuwela weera navirelela wiivaha nthowa,  hiyo pooti oxupeya. (Nsal. 31:10) Ni wakhala weera ninnariipiwaxa murima,hiyo pooti ohiya otthimaka ephiro emphwanyiha ekumi. — 2 Akor. 2:7.

15. Eheeni enrowa wookhaviherani weera muhiivaheke nthowa? (1 Yohani 3:19, 20) (Nwehe efootu.)

¹⁵ Moota heeni nyuwo munrowaanyu oriha muritti ola? Waari weera nyuwo ni nlelo munnavirelela wiivaha nthowa, nwehexexeke ‘nlevelelo’ na Yehova. (Nsal. 130:4) Yehova onnahima sa ale enttharuwa mweekhaikhai weera: “Nkinrowa wupuwela sopahula saya.” (Yer. 31:34) Eyo entthuna otaphulela weera Yehova khanuupuwela soottheka mpankaanyu khalayi. Nto, wakhala weera munnaviriha maxupo mwaha wa itthu mpankaanyu, muhuupuweleke weera Yehova khoolevelenleni. Wakhala weera mooyeleela miritti sikina sa mmulokoni muhiivaheke mathowa mwaha wa itthu mpankaanyu khalayi. Yehova khanuupuwelela soottheka mpankaanyu, naari nyuwo khontthuneya wuupuwelela. — Mmusome 1 Yohani 3:19, 20.

16. Ntoko atthu ootthimaka, nintthuneya wuupuwelela eheeni?

¹⁶ Okhala weera ninnatthimaka ephiro ya ekumi, nintthuneya ‘otthimaka weera naakhele nlivo’. (1 Akor. 9:24) hiyo nnoowera opaka eyo niwehexexaka miritti ninteexaahu ni nihiyaka miritti sikina soohitthuneya. Mwa yoosoma ela, nohoona miritti nintthuneyaahu oteexa ni miritti nintthuneyaahu oriha. Menento sookhala itthu ikina. Yesu aahimme weera, “mirima sanyu sihilemeliwe n’ovonaxa, n’ohapaliwa ni sovelaveliha sa ekumi.” (Luka 21:34) Itthu iya ni itthu ikina Biblya onhimaawe, pooti onikhavihera owehexexa ni opaka matxentxo apaale nintthuneyaahu opaka weera nivirelele otthimaka ephiro emphwanyiha ekumi.

17. Mwaha wa heeni nneeraahu nroromeleke weera onnawereya otthimaka mpaka ophiya okhwipi wa ephiro ela emphwanyia ekumi?

¹⁷ Hiyo nroromeleke weera nnoowera otthimaka ni owina mwaha wooweera Yehova onrowa onivaha ikuru ninhaawelaahu. (Yes. 40:29-31) Menento nihikhulumuwe! Mpakeke ntoko murummwa Paulo aapankaawe, owo aahiilipihera vantxipale weera aakhele nlivo. (Afil. 3:13, 14) Khaavo aneera atthimakeke va nyuwo, mene nnikhavihero na Yehova nyuwo munoowera. Yehova pooti wookhaviherani oteexa miritti sanyu ni oriha miritti sinookumiherani maxupo. (Nsal. 68:19) Ni nikhavihero na Yehova, nyuwo munoowera otthimaka mpakana okhwipi wa ephiro ela emphwanyiha ekumi yoohimala!