1. Mwaha wa heeni mababiloniyu yaaraaya ootikhiniheya ni mprofeti Daniyeli?

 MPROFETI Daniyeli emaara aakuxinwaawe wookaporoni oBabilonia owo eera areene mmiravo, ni aakuxeriwa ottayi wa elapo aayarinwaawe oYerusalemu. Nnaamweera Daniyeli aari mmiravo, owo aahaatikhiniha anamahoolela a empa ya mwene oBabilonia. Ni awosa yaahoona weera Daniyeli aari mmiravo ‘oohirakala ni a ekhove yooyareya’ ni owo aari osuulu a emusi yoottittimiheya. (1 Sam. 16:7) Nto mwaha wa yeeyo aaxuttihiwa itthu sintxipale weera avare empa ya mwene. — Dan. 1:3, 4, 6.

2. Yehova aamoonela hayi Daniyeli? (Ezekiyeli 14:14)

² Yehova annamusivela Daniyeli khaiyene mwaha wooweera owo aari a ekhove yooreera, oohirakala naari mwaha wa eparakha aaraaweno ya ovara empa ya mwene, hooye, mene mwaha wooweera Daniyeli aathanla omuroromela Yehova. Pooti weeraka etempu ele Daniyeli aarinono iyaakha 20 mwa ehuhu ene yeeyo Yehova aamulikanxenraawe ni Nowa ni Yobi. Va maithoni va Yehova Daniyeli aari oomalela ntoko Nowa ni Yobi yaawo yanvarenle Yehova mwa iyaakha sintxipale. (Eph. 5:32; 6:9, 10; Yobi 42:16, 17; mmusome Ezekiyeli 14:14.) Daniyeli aakhalano ekumi yoorakama ni yoohakalaliha anvarelaka Yehova. Ni Yehova aavirelela omusivela Daniyeli mwa ekumi awe yootheene. — Dan. 10:11, 19.

3. Eheeni ninkelaahu woona mwa yoosoma ela?

³ Mwa yoosoma ela, nnoorowa woona mikhalelo miili saamweerinhe Yehova omusivela Daniyeli. Yoopatxera, ninkela woona mikhalelo iya ni woona mwa etempu heeni Daniyeli aatthuneyaawe woonihera mikhalelo iya. Avinyaka, nnoorowa woona itthu heeni saamukhavihenre Daniyeli wunnuwihera mikhalelo iya. Ni okhwipi waya, ninkela woona moota nneeraahu nimutakiheke. Nnaamweera yoosoma ela epakinweene yuupuweleliwaka amiravo, ootheene ahu pooti ottottela mureerelo ni oxuttera ni ntakihero na Daniyeli.

4. Daniyeli oonihenre hayi olipa wawe murima? Nvahe ntakihero.

⁴ Atthu oolipa murima emaara ekina pooti okhala oowoova, menento eyo khenweeriha opaka itthu soonanara. Daniyeli aari mmiravo oolipa murima. Nrowe noone ikwaha piili oonihenraawe olipa murima. Ekwaha yoopatxera yeereñye sivinreene iyaakha piili vaavo aBabiloniyu yaamunyaanyalaaya Yerusalemu. Mwene oBabilonia Nabukhodonosori, aaloha etthu yaamuvavinhe murima, owo aalonhe sa enenero etokweene yoowoopiha. Nto Nabukhodonosori aawoopopiha owiiva asuweli eeraka wakhala weera khamukitaphulenle ele kilonhaaka miyo kinoowiivani, eyo yaamuhela mpuwa Daniyeli. (Dan. 2:3-5) Daniyeli moowaakuveya aapaka etthu mwaha wooweera atthu antxipale yaamwiiviwa. Ni owo “àhorwa wa mwene ni ànvekela ehuhu wera amutaphulele mwene oloha wawe.” (Dan. 2:16) Weera apake eyo wannatthuneya okhala oolipa murima ni nroromelo. Khiyaavo yoolepa enoonihera weera Daniyeli aahinto otaphulela sooloha. Moottharelana Daniyeli aahaavekela asinthamwene awe nikhavihero Xadraki, Mexaki ni Abedinego aavekela weera “etxondelele ikharari sa Muluku a wirimu: àtaphulele yawo exiri ele.” (Dan. 2:18) Yehova aahaakhula mavekelo aya. Ni okhaviheriwaka ni Yehova, Daniyeli aawera otaphulela yooloha ya Nabukhodonosori, nto mwaha wa yeeyo ekumi ya Daniyeli, asinthamwene awe ni asuweli akina yaavuluxiwa.

5. Mwa ekwaha heeni ekina Daniyeli aatthuneyaawe woonihera olipa wawe murima?

⁵ Evinreene etempu vaavo Daniyeli aataphulenlaawe yooloha ya enenero etokweene, olipa wawe murima waaheereriwa tho veeli. Mwene Nabukhodonosori aaloha tho etthu ekina yooxupa otaphuleliwa. Mwa yooloha eyo, owo aahoona mwiri mutokweene. Moolipa murima Daniyeli aataphulela yooloha ele ohela mpuwa omuleela weera aamutthimaka anepa ni aamuhiya olamulela mwa etempu vakhaaneene. (Dan. 4:25) Waari wookhweya mwene wuupuwelela weera Daniyeli aari mwiittani awe ni oruma weera Daniyeli iiviwe. Nnaamweera waari woowoopiha, Daniyeli aahoonihera olipa wawe murima ni aataphulela yooloha ele.

6. Eheeni yaamukhavihenre Daniyeli okhale oolipa murima?

⁶ Eheeni yaamukhavihenre Daniyeli okhala oolipa murima ekumi awe yootheene? Moohihovela, vaavo Daniyeli aaraawe mmiravo, owo aaxuttera  ni ntakihero na asitiithi awe. Asitiithi ale yanniiwelela nlamulo na Yehova noowaaxuttiha anamwane aya. (Ola. 6:6-9) Daniyeli khaasuwenle paahi malamulo ale muloko, mene nto owo aasuwela itthu ikina sootthuneya saahela mpuwa eyootxa yeeraaya etxeeke mwaha wookhala mwiisraeli. b (Onam. 11:4-8; Dan. 1:8, 11-13) Daniyeli tho aaxuttera sooweereya sa atthu a Muluku ni owo aasuwela maxupo yaakhumelela vaavo yahaattharaaya malamulo a Yehova. (Dan. 9:10, 11) Daniyeli aaviriha itthu sintxipale mweekumini mwawe ni iyo saamweeriha ororomela weera sootheene seera sikhumeleleke Yehova ni malaika awe yammukhavihera. — Dan. 2:19-24; 10:12, 18, 19.

7. Etthu heeni ekina yaamukhavihenre Daniyeli okhala oolipa murima? (Nwehe efootu.)

⁷ Daniyeli annasoma iprofesiya sootheene saalepinwe ohela mpuwa iprofesiya sa Yeremiya. Mpuwa mwa yoosoma eyo, Daniyeli aawera osuwela liini aYuda yeeraaya etaphuliwe wookaporoni oBabilonia. (Dan. 9:2) Woona iprofesiya iye sikwanelaka waalipiha nroromelo Daniyeli aaraaweno ni Yehova. Ni ale emmuroromela Muluku ni murima aya wootheene, ennoonihera mukhalelo woolipa murima mootikhiniha. (Mmuwehe Aroma 8:31, 32, 37-39.) Etthu ekina yootthuneya Daniyeli aapankaawe waari onvekela Tiithi awe a wiirimu Yehova. (Dan. 6:10) Owo annavekela weera amulevelele soottheka sawe ni annamuleela moota iisoonelaawe, ni annamuvekela nikhavihero. (Dan. 9:4, 5, 19) Daniyeli aari mutthu ntoko hiyo ni khaayarinwe ni mukhalelo woolipa murima. Menento owo aawera wunnuwihera mukhalelo owo moorweela mwa yoosoma, nivekelo ni nroromelo aaraaweno ni Yehova.

8. Moota heeni nneeraahu nikhaleno mukhalelo woolipa murima?

⁸ Etthu heeni nintthuneyaahu opaka weera nikhale atthu oolipa murima? Asitiithiihu pooti onileela weera hiyo nintthuneya okhalano mukhalelo woolipa murima, menento mukhalelo owo khaninrowa ovalihiwa ni asitiithiihu, mwaha wooweera olipa murima mukhalelo onxutteriwa, ni moota wooxuttera mukhalelo owo ori omuwehexexa muhusiha okhalanne mukhalelo owo ni omutakiha. Emoha-moharu, hiyo nnooxuttera okhala oolipa murima vaavo nnaawehexexaahu atthu akina enoonihera mukhalelo owo. Opwaha mwa yeeyo, hiyo pooti oxuttera okhalano mukhalelo owo nittharaka ntakihero na Daniyeli. Mene nintthuneya osuwela nnene sene masu a Muluku ntoko Daniyeli, opwaha mwa yeeyo nintthuneya okhalano onthamwene woolipa ni Yehova ni omuleela ikwaha sootheene itthu sinnixupa niroromelaka weera owo ikwaha sootheene oneereke onikhavihera. Napaka eyo, nroromelo nahu neereriwaka hiyo nnookhala oolipa murima.

9. Mwaha wa heeni oraaya wootthuneya okhala oolipa murima?

⁹ Okhala oolipa murima pooti onikhavihera mwa itthu sintxipale. Nkoonani ele yeereñye ni Ben. Exikola aasomaawe ya wAlemanha, antxipale yaakhulela weera itthu sinimweera othatuwa paahi ni yuupuwela weera Biblya aahimaka weera itthu siroopattuxiwa ethiru. Ekwaha emoha Ben aakhalano eparakha yoohima ele aaroromelaawe woohima sa Mpattuxa. Owo aari oolipa murima ni aathaliha ele aaroromelaawe variyari va atthu antxipale. Ni eheeni yaakhumelenle? Ben ohimme ha: “Aprusoore aka yanniiwelela moomaaleleya ele kaahimaaka ni mpaka awo yaaphiyera okuxa ibuukhu kaavarihelaaka muteko weera yapake ikoopiya ni waavaha anaxikola akina yaasoma ni miyo.” Ni makoleega a Ben yoonenle hayi mwaha ole? Ben onnavirelela ohimaka: “Antxipale a makoleegaaka yaahiiwelela mwaha ole moomaaleleya ni muhoolo mwaya yaahima  weera yannakitikhina.” Yooweereya ya Ben ennanixuttiha weera atthu ale enoonihera mukhalelo woolipa murima moohihovela ennatikhiniwa ni atthu akina. Woonihera mukhalelo woolipa murima, onnaweeriha atthu oowiiyeviha, omwaattamela Yehova. Moohihovela hiyo nookhalano mathowa mantxipale weera noonihereke mukhalelo woolipa murima.

10. Nroromelo ti heeni?

¹⁰ MBiblyani va soolepa sa eheberi woohima sa masu eneera “ororomeleya” naari “oreera murima” pooti ohimmwaka onthamwene woovareleleya onooniheraniwa mukina ni mukhwaawe, ni ikwaha sintxipale ennavariheliwa masu ala weera nooniheriwe nsivelo Yehova okhalannaawe wa atthu ale emmukokhorela. Masu ala tho ennavariheliwa muteko weera nooniheriwe nsivelo wa atthu a Muluku. (2 Sam. 9:6, 7) Noovira etempu, nroromelo nahu pooti ovirelela okhala noolipa. Ni tiyeeyo yeereñye ni Daniyeli.

11. Daniyeli oreene owunnuwela nroromelo nawe neererinwe moota heeni? (Nwehe efootu ya vakaapani.)

¹¹ Nroromelo Daniyeli aaraaweno ni Yehova, naaheereriwa mpuwa mwa ekumi awe yootheene. Weereriwa otokweene yaamukhumelene waari vaavo aaraaweno iyaakha 90, ehuhu ene yeeyo Babilonia aatuphelinwaawe ni aMedia ni aPersia, etempu aalamulelaawe mwene Dario. Anamahoolela yanvarela mwene khayaasiveliwa ni Daniyeli ni khiyaamuttittimiha Yehova. Nto awosa yampaka palano woomwiiva Daniyeli ni awosa yaamweeriha mwene olepa nlamulo naakhoottihera waavekela amiluku akina ni yootthuna weera akokhoreliweke yoowo paahi. Etthu yaatthunaayaxa yaari yooweera, Daniyeli ahiye omukokhorela Yehova mpuwa mwa mahiku 30 ni woonihera weera aari oororomeleya wa mwene. Mene nto Daniyeli moolipa murima aakhootta opaka eyo. Nto mwaha wa yeeyo, owo aavonyeriwa munlittini mwa akharamu, mene Yehova aamureeliha Daniyeli anvuluxaka mmwaano mwa akharamu mwaha wa nroromelo oonihenraawe. (Dan. 6:12-15, 20-22) Vano hiyo, ninkela wunnuwihera moota heeni nroromelo noolipa wa Yehova ntoko na Daniyeli?

12. Eheeni Daniyeli aapankaawe weera akhaleno nroromelo noolipa?

¹² Ntoko nonnaahu, weera nikhale oororomeleya wa Yehova, nintthuneya okhalano nsivelo noolipa wa yoowo. Daniyeli aawera okhala oororomelaya wa Yehova mwaha wooweera owo annamusivela vantxipale Tiithaawe a wiirimu ni  murima awe wootheene. Moohihovela Daniyeli annunnuwihera nsivelo aaraaweno ni Yehova emaara uupuwelelaawe mikhalelo sooreera sa Yehova ni moota ooniheraawe. (Dan. 9:4) Daniyeli tho annihiyera etempu weera uupuwelele itthu sooreera Yehova ampakenlaawe owo ni atthu awe, mwaha wa yeeyo owo annamuxukurela vantxipale Yehova. — Dan. 2:20-23; 9:15, 16.

13. (a) Nroromelo na amiravo nneereriwa moota heeni? Nvahe ntakihero. (Nwehe efootu.) (b) Moovarihana ni eviidiyu, eheeni nyuwo mwaakelaanyu ohima wakhala weera mookohiwa moonelo wa Anamoona a Yehova woohima sa alopwana enkonihana alopwanaru naari athiyana enkonihana athiyanaru?

¹³ Hiihaale ntoko Daniyeli, amiravo emmukokhorela Yehova mahikwaano, aarukureriwa ni atthu ehimmukokherela Yehova naari mano ottittimiha malamulo awe. Pooti weeraka atthu akina khonaasivela yaaniiwaka weera ninnamusivela Yehova ni wiiwelela malamulo awe. Akina enneerera waatheya ni waaveeha amiravo ahu weera ehiye okhala oororomeleya wa Yehova. Moone ntakihero na Graeme mmiravo mmoha onkhala wAustrália. Ekwaha emoha aaraawe oxikola owo aaviriha maxupo yaawo yeerenre nroromelo nawe. Aprusoore yaahaakoha anaxikola moonelo aya woohima sa alopwana enkonihana alopwanaru naari athiyana athiyanaru, aprusoore yaahima weera ale enaakhulela mukhalelo owo yeemele moono aya woolopwana naari ale ehinaakhulela yeemele moono aya woothiyana, mene Graeme onnavirelela ahimaka ha, “Makoleegaaka ootheene yannaakhulela, mene nto miyo ni munna mmoha naaheemela moono mukina. Moottharelana etthu yaakhumelenle yaaheerera nroromelo nahu wa Yehova.” Owo tho ohimme ha, “Mpaka okhwipi wa yoosoma ele, makoleega ahu ni aprusoora ahu, yannaniveeha. Miyo kaapaka ele kaaweraaka weera kaakihe nroromelo naka moomaaleleya ni moowiiyeviha, mene awo khayiiwale naari nsu nimoha kuulummaaka.” Graeme oonenle moota heeni weereriwa iwe? Owo ohimme ha: “Khawaakisivenle weereriwa iwe. Menento kaahakalala vantxipale mwaha wooweera kaawera waakihera ele kinroromelaaka ni ovirelela okhala oororomeleya wa Yehova.” c

14. Mukhalelo heeni mmoha onrowa onikhavihera woonihera nroromelo noolipa wa Yehova?

¹⁴ Hiihaale ntoko Daniyeli, hiyo pooti okhalano nroromelo noolipa wa Yehova wakhala weera ninnamusivela. Ninnannuwihera nsivelo nno vaavo ninxutteraahu woohima sa mikhalelo sawe. Mwa ntakihero, hiyo pooti oxuttera itthu sintxipale ni soopattuxiwa sawe. (Arom. 1:20) Mwaatthunaka wunnuwihera nsivelo nanyu wa Yehova, pooti osoma ebroxura eneera “Será Que Houve Um Projeto?” naari moonele iviidiyu. Nyuwo tho pooti osoma ibroxura iya Será Que a Vida Teve Um Criador? A Origem da Vida — Cinco Perguntas Que Merecem Resposta. Nkoonani etthu aahimmawe murokora mmoha oniitthaniwa Estheri oDinamarca woohima sa iliivuru sahu: “Miruku saya ti sooreera. Ibroxura iya khasinoonyeserera otthara miruku sinhimaaya, mene sinimweera wookhaviherani opaka soothanla sooreera.” Ben ohimmwale woopatxerani ohimme ha: “Ibroxura iya sookikhavihera vantxipale olipiha nroromelo naka, saakoonihera weera Muluku tori Mpattuxa a ekumi.” Noomala osoma ibroxura iye, nyuwo pooti waakhulela ele Biblya onhimaawe eeraka: “Weyo, Pwiya ni Muluku ahu, onaphwanela wakhela ovuwa ni nttittimiho ni owerya, niwoko wòpattuxa sothesene.” — Apok. 4:11. d

15. Mukhalelo heeni mukina onrowa onikhavihera olipiha onthamwene ahu ni Yehova?

¹⁵ Moota mukina woowunnuwihera nsivelo nahu wa Yehova, ori oxuttera itthu sintxipale woohima sa ekumi ya mwanawe, Yesu Kristu. Murokora mmoha oniitthaniwa Samira yoowo onkhala wAlemanha aapaka eyo. Owo ohimme ha: “Miyo koowera omusuwela nnene Yehova  mwaha woosoma sa Yesu.” Aarawe mwaana, Samira aakhalano maxupo oowiiwexexa moota Yehova onuupuwelaawe. Menento owo aaxuttera moota Yesu onuupuwelaawe. Owo ohimme ha: “Miyo kannamusivela Yesu mwaha wooweera owo aari ootthekuleya ni annaasivela anamwane.” Ikwaha sootheene Samira aaxutteraawe sa Yesu, nsivelo nawe wa Yehova nannantxeerereya. Mwaha wa heeni? Owo ohimme ha: “Noovira etempu, miyo kaapatxera wiiwexexa weera Yesu onnaatakiha atiithi awe moomalela. Awosa toolikanaxa. Ni miyo kaahoonelela nthowa nimoha naamweerinhe naamweerihe Yehova omurumiha Yesu elapo ela ya vathi, weera atthu emusuwele nnene Yehova.” (Yoh. 14:9) Waari weera munntthuna olipiha onthamwene anyu ni Yehova, munoonela hayi osoma woohima sa Yesu? Mwapaka haawo, nsivelo ni nroromelo nanyu wa Yehova ninrowa waatxeerereya.

16. Mureerelo heeni nimphwanyaahu mwaha woororomeleya? (Musome Nsalmu 18:26; Mikeya 6:8)

¹⁶ Ale enoonihera ororomeleya, moohihovela aakhalano tho asinthamwene oororomeleya. (Ru. 1:14-17) Opwaha mwa yeeyo, naakhalaka oororomeleya wa Yehova, ninnakhalano murettele wa mmuupuweloni. Mwaha wa heeni? Mwaha wooweera Yehova oolaihera weera onookhala oororomeleya wa atthu tho oororomeleya. (Musome Nsalmu 18:26 [18:25, NM]; Mikeya 6:8.) Muupuwele ha: nnamweera nreene akhaani vamaitho va Mpattuxa a ikuru sootheene, owo oolaihera ovirelela onisivela hiyo! Ni nakhalano onthamwene owo woolipa, khiyaavo enkela onimwalanyiha ni yoowo, naari maxupo, naari amwiittani ni naari okhwa khasinrowa owera. (Dan. 12:13; Luka 20:37, 38; Arom. 8:38, 39) Ti vawonto nintthuneyaahu okhala oororomeleya wa Yehova nimutakihaka Daniyeli!

17-18. Ninxuttera tho heeni ni Daniyeli?

¹⁷ Mwa yoosoma ela, hiyo nisomme woohima sa mikhalelo piili paahi sa Daniyeli. Mene sookhala itthu sikina sintxipale ninxutteraahu ni ntakihero nawe. Mwa ntakihero, Yehova aamoonihera Daniyeli sooweereya sintxipale ni sooloha sintxipale, nave tho anvaha owera wootaphulela sooloha seerela eparte iprofesiya. Iprofesiya sintxipale mwa seiyo sookwanela. Ni sikina sinnahima itthu sinkela weereya muhoolo seiyo sinrowa waatapha atthu ootheene a elapo yootheene.

¹⁸ Yoosoma enttharelana, ninrowa woona iprofesiya piili silepinwe ni Daniyeli. Wiiwexexa iprofesiya iya sinrowa onikhavihera ootheene hiyo opaka soothanla sooreera, nihipwatthaka naareene amiravo naari asitokweene. Iprofesiya iya sinkela onikhavihera tho waatxeerera olipa wahu murima ni nroromelo nahu weera nikhale oolikaneene oviriha maxupo a muhoolo.