1. Ikwaha sintxipale Yehova onaakhula mavekelo aarumeyi awe aavarelaka muteko taani?

 NEEREKE nyuwo moosuwela weera Yehova pooti woovarihelani muteko weera aakhule nivekelo na mutthu? Ahixikhaka waari weera nyuwo mutokweene ammulokoni, murumeyi oorumeela, piyoneiru anthiti, mwa namalaleera, mwari mmiravo, owuuluvala, mwa munna naari mwa murokora. Vaavo mutthu ommusivela Yehova onvekelaawe nikhavihero wa Yehova, ikwaha sintxipale Yehova onnaavarela muteko asitokweene ammulokoni ni arumeyi akina oororomeleya weera ‘emukhavihere’ mutthu ole onvekenle nikhavihero Yehova. (Akol. 4:11) Moohihovela eparakha etokweene onvarela muteko Yehova ni asinnihu! Hiyo pooti waakhavihera ni waalipiha asinnihu wakhala weera yookhumelela, eretta yoowaakuva omwaramwareya, erisa ya ephattu naari wakhala weera wookhumelela ottharatthariwa.

2. Heeni onkhalaaya wooxupa waakhavihera atthu akina wakhala weera yookhumelela eretta yowaakuva omwaramwareya?

² Pooti okhala wooxupa waakhavihera atthu akina wakhala weera yookhumelela eretta yowaakuva omwaramwareya. Mwa ntakihero, hiyo ninnatthuna waaxekura asinna mene khonkhala wookosoopeya opaka eyo mpuwa mwa eretta yowaakuva omwaramwareya. Apaale hiyo pooti otthuna onwopa mutthu onviriha maxupo oothowa musurukhu weera ntxeno vamoha owannyihu. Hiyo tho pooti otthuna waakhavihera atthu akina mene pooti okhala wooxupa wakhala weera mutthu mmoha a emusi ahu onnaviriha maxupo. Nnaamweera sikhumelelaka itthu ntoko iyo, hiyo ninnatthuneya waakhavihera asinnihu. Yehova onnahakalala naapakaka ele ninweraahu weera naakhavihere asinna. (Mir. 3:27; 19:17) Vano ninkela opaka eheeni weera naakhavihere?

3. Ninxuttera eheeni ni ntakihero na asitokweene amuloko wa murokora Desi? (Yeremiya 23:4)

 ³ Asitokweene ammulokoni entthuneya weera epakeke eheeni. Waari weera nyuwo mutokweene ammulokoni mwiilipiheke weera mwaasuwele nnene asinna ammulokoni. (Mmusome Yeremiya 23:4.) Desi, murokora yoole ohimmwale yoosoma evinre, ohimme ha: “Asitokweene a egrupu aka yoolaleera ikwaha sintxipale yannakhuma vamoha ni miyo ni asinna akina nrowaka olaleera ni yanniivaha etempu enatthekula ni hiyo.” b Nto mwaha woopaka eyo asitokweene ale waahakweela omukhavihera murokora Desi mpuwa mwa eretta ya koronaviru ni vaavo amusi awe akina yakhwiiyaaya mwaha wa koronaviru.

4. Mwaha wa heeni asitokweene yaawenraaya omukhavihera Desi, ni asitokweene ammulokoni enxuttera eheeni?

⁴ Desi ohimme ha: “Woona weera kaakhalano onthamwene ni asitokweene ammulokoni wannakikweela waaleela sooxupa saka.” Ninxuttera eheeni? Wakhala weera nyuwo mutokweene ammulokoni, mwaasuweleke asinna ni mwaaxekureke viinaano vaava ehinaaye okhumelela maxupo. Mukhale nthamwene aasinna. Wakhala weera yookumelela eretta yowaakuva omwaramwareya ni onakhala wooxupa waaxekura aasinna ethoni ni ethoni, mwaasaasereke manera makina owuuluma ni asinna. Desi onnavirelela ohima eeraka: “Ikwaha ikina, nihiku nimoha nenno, asitokweene ammulokoni oovirikana yannakilikarela ni yannakinviyarela imensagem. Soolepa awo yakisomelaaya sannavara murima aka, nnaamweera miyo kaasuwenle soolepa iyo khalayeene.”

5. Asitokweene ammulokoni enkela woonelela hayi weera asinna ennahawela nikhavihero ni enkela waakhavihera moota heeni?

⁵ Wakhala weera nyuwo muntthuna osuwela etthu heeni asinna enhawelaaya ori waapakela makoho, maxi nihipakeke makoho a otthuna osuwela isiiri saya. (Mir. 20:5) Neereke awo aakhalano eyotxa yoophiyera, murette ni itthu ikina? Neereke apaale enimwaakhumelela erisa yooyeleela muteko ni nipuru nookhala? Neereke awo ennatthuna okhaviheriwa ni mutthu weera ewere ophwanya soovaha sa guvernu? Desi ahaakhela itthu sa weerutthuni aavahiwaawe ni asinna, mene etthu yaamukhavihenre owera oviriha maxupo ale naari nikhavihero na omunepani avahinwaawe nasitokweene ammulokoni. Owo enre ha: “Asitokweene yannavekela ni miyo. Miyo nkinuupuwelela itthu yaahimaaya vaavo yavekelaaya, mene kinnuupuwelela moota miyo kisonenlaaka awo emalihakaru ovekela. Mavekelo ale waakhala ntoko Yehova aakerela ha: ‘Nyuwo khamukhanle meekhaanyu.’” — Yes. 41:10, 13.

6. Itthu heeni asinna akina ammulokoni ekhanlaaya oopaka weera yakhavihere atthu akina? (Nwehe efootu.)

⁶ Moota eneeraaya ekhavihereke atthu akina. Hiyo ninweherera weera asitokweene ammulokoni yaakosoopeke asinna. Mene Yehova onweherera  weera ootheene hiyo naakhavihereke ni naalipiheke asinna. (Agal. 6:10) Nnaamweera nipakaka etthu ekhaanene weera nimukhavihere mutthu onvoreiwa, etthu eyo nipankaahu eyenveru pooti omulipiha mutthu owo onvoreiwa. Anamwane pooti opaka edesenyu weera emuhakalalihe munna. Ni wakhala weera ookhala mutthu mmulokoni onhawela nikhavihero, asinna amiravo pooti wiivaherera weera emukhavihere ovara miteko sa vaate. Akina pooti omwaapeela yootxa mulipa oovoreiwa ni omuroihela owannyawe. Ekhaikhai weera yakhumelela vale eretta yowaakuva omwaramwareya atthu ootheene ammulokoni ennatthuneya olipihiwa. Apaale onookhala wooreera ohaakuveya okhuma samala vale mithukumano weera ntthekule ni asinna, pooti opaka eyo vaavo ninthukumanaahu vamoha Empa ya Omwene naari munternetini. Asitokweene ammulokoni tho ennatthuna olipihiwa. Asinna akina enninviyari ikaarta yaaxukurelaka asitokweene ammulokoni mwaha wa muteko anvaraaya mpuwa mwa eretta yowaakuva omwaramwareya. Ti wooreera ovirelela “olipihana ni ohakalalihana mukina ni mukhw’awe”! — 1 Ates. 5:11.

7. Irisa sa ephattu sinaavoleela hayi atthu?

⁷ Erisa ya ephattu pooti otxentxa ekumi ya mutthu moowaakuveya. Akina pooti oyeleelaka itthu saya sa weerutthuni, impa saya naari mpaka omuyeleela mutthu ole yaamusivelaaya. Mooripiha murima, irisa ntoko iya pooti waakhumelela asinnihu. Vano nto, nipakeke eheeni weera naakhavihere?

8. Asitokweene ammulokoni ni asitiithi enkela wiireherera hayi weera ewere oviriha erisa ya ephattu?

⁸ Asitokweene ammulokoni entthuneya weera epakeke eheeni. Nyuwo asitokweene ammulokoni, mwaakhavihereke asinna ammulokoni wiireherera viinaano vaava ehinaaye okhumelela erisa ya ephattu. Mwaasuwelihe asinna ammulokoni etthu entthuneyaaya opaka weera ekhale oovareleleya ni owera wuuluma ni nyuwo. Margaret, yoowo ohimmwale yoosoma evinre, ohimme ha: “Eparte ya mmuthukumanoni enhima sootthuneya sa mmulokoni, asitokweene ammulokoni yaahima weera muttetthe naakhalaahu wannoopiha okhumelela erisa ya osa ntuphi. Asitokweene yaahima weera wakhala weera anamalamulela aahima weera nikhume mmawannyihu naari wakhala weera osa wa ntuphi waphwaha medida wannatthuneya otthawa moowaakuveya.” Sootthuneya iya sa mmulokoni sahimmwale, saaphiya etempu yoophwanelela. Mwaha wooweera sivirakaru isemana ithanu, ntuphi naapatxera osa. Pooti ottottela mureerelo emaara ya okokhorela va vatthokoni ele mutthu ti mutthu ontthuneyaawe opaka wakhala weera yookhumelela erisa. Wakhala weera nyuwo ni anamwane anyu mohiireherera varaatxiru onookhala wookweya okhala oomaaleleya yakhumelela erisa ya ephattu.

9. Asitokweene ammulokoni enkela wiireherera hayi ehinaaye ni yakhumelela erisa ya ephattu?

⁹ Waari weera nyuwo muhooleli a egrupu yoolaleera, mukhaleno elista ya manummero asinna envarelaaya muteko naari neere nummero nri likatu. Nyuwo muhiweherereke okhumelela erisa weera mpatxereke nto okhalano manummero asinna a egrupu anyu. Avinyaka vaavo wakhala weera enookhumelela erisa, mmulikareleke kata namalaleera weera musuwele etthu owo onhawelaawe. Mwalokolela vale naanamalaleera ootheene mmuleeleke moowaakuveya kordenadore asitokweene amuloko itthu sootheene muleeliwaanyu ni anamalaleera a egrupu anyu. Ni moottharelana, kordenadore onoomusuweliha itthu iyo mutokweene a esirkwiitu. Ovara muteko hiiha onnakhavihera. Ovirakaru osa wa ntuphi, mutokweene a esirkiitu ya murokora Margaret, khaakonne mpuwa mwa iwoora 36, iwoora sene seiya, owo aavirinhe avaraka muteko wa asitokweene yaawo yeerera wuuluma ni waathokorora asinna 450 yaawo yaatthanwe mmawannyaya. (2 Akor. 11:27) Ni muteko ola wavarinwe, waaheeriha weera ootheene ale yaatthanwe mmawannyaya ewera okhalano nipuro noowiitthuwa.

10. Mwaha wa heeni waakosoopa asinna eraaya etthu yootepa otthuneya wa asitokweene ammulokoni? (Yohani 21:15)

¹⁰ Ovaha nikhavihero na omunepani ni nammuupuweloni onneerela eparte muteko wa sitokweene  ammulokoni. (1 Ped. 5:2) Yakhumelela vale erisa, etthu yoopatxera asitokweene ammulokoni ampakaaya, waasaasera weera yoone waari weera asinna ari oovareleleya, aakhalano yootxa, soowara ni nipuro nookhala. Nto yavira etempu asinna awo ephwanyinwe ni erisa ennatthuna nikhavihero na mmuupuweloni ni noomunepani. (Mmusome Yohani 21:15.) Harold yoowo ori mmoha a eKomisau ya eFiliyaale ni aasuwenle asinna antxipale yintale ophwanyiwa ni irisa sa ephattu ohimme ha: “Ennavira etempu weera mutthu atthikele moota aaraawe. Vakhaani-vakhaani asinna ennatthikela ekumi yaaraayano mene winkweliwa araayano ni mutthu ole okhwiiye veerisani, ni etthu ayelenlaaya mpaani mwaha wa erisa ni muupuwelo arayano mmuru weera yaahanle okhwaru veerisani vale, siri minyuupuwelo ahinweraaya okumiha mmuru mwaya. Minyuupuwelo sene tiseiya sinwiiniha murima asinna. “Okhalano muupuwelo ntoko ola, khaiyene ohikhalano nroromelo, iya minyuupuwelo paahi sinkhumelela wakhala weera mutthu ooviriha erisa ya ephattu.

11. Emusi yaviriha vale erisa ya ephattu, nikhavihero heeni awo anhaawelaaya?

¹¹ Nyuwo asitokweene ammulokoni mutthareke miruku sa Aroma 12:15, sineera: “Mwìnle ni yawo anìnla.” Mwaalipiheke ni nwuupuxereke asinna evirinhe maxupo mweekuni mwaya weera Yehova ni asinna ennasivela. Onnatthuneya tho okhavihera imusi weera ivireleleke ovara itthu sa omunepani, ntoko ovekela, omusoma Biblya, woonela mithukumano ni olaleera. Opwaha mwa yeeyo, mwaalipiheke asitiithi weera yaalipiheke anamwene aya. Asitiithi mwaakhavihere anamwene anyu ovarexexa etthu yeele ehiñyeleeliwa yakhumelela erisa ya ephattu, aani, othamwene aya ni Yehova. Nwuupuxereke anamwene anyu weera Yehova onookhala nthamwene aya wa mahiku ootheene ni weera khawa aanyanyala. Mwaaleele anamwane anyu weera awo enookhaviheriwa ni emusi ya elapo yootheene emusi eyo enoopaka ele enweraaya weera yaakhavihere. — 1 Ped. 2:17.

12. Itthu eheeni atthu akina entthuneyaaya opaka weera ekhavihere wakhala weera yookhumelela erisa ya ephattu? (Nwehe efootu.)

¹² Moota eneeraaya ekhavihereke atthu akina. Yakhumelela vale erisa ya ephattu waattamela nipuro munkhalaanyu mwaakohe asitokweene ammulokoni moota muneeraanyu mukhavihere. Nyuwo apaale pooti owaakhela owannyinyu atthu ale ekhumme mmawannyaya naari pooti wiivaherera owaakhela asinna eniivaherera oteka impa. Nyuwo tho pooti waakawela yootxa ni itthu ikina anamalaleera etthanwe. Vano munkela okhavihera moota heeni wakhala weera erisa ekhumelenle nipuro noorakamela nnipuro munkhalaanyu? Wakhala hiiho, nyuwo pooti waavekelela asinna awo ephanyinwe ni erisa eyo. (2 Akor. 1:8-11) Nyuwo tho pooti okhavihera muteko woowaakhavihera atthu ephwanyinwe ni irisa sa ephattu nvahaka idonativu ekaaxa ya obra mundial. (2 Akor. 8:2-5) Wakhala weera mikhalelo sanyu sinnawaakhulelani orowa nipuro nikhumelenle erisa ya ephattu  mwaakohe asitokweene etthu muntthuneyaanyu opaka weera murowe. Wakhahala weera nyuwo mohaakhuleliwa orowa onootthuneya otreinariwa weera musuwele moota wookhavihera.

13. Mapuro onkhoottihiwaaya muteko ahu maxupo heeni asinna envirihaaya?

¹³ Mapuro yaawo muteko ahu onkhottihiwaaya ekumi ya asinna enkhala yooxupa. Ohiya ottharatthariwaru asinna awo ennaviriha maxupo a othoiwa musurukhu, iretta ni ennakhweliwa atthu enaasivelaaya. Ikwaha ikina mwaha wa ottharatthariwa asitokweene ammulokoni khenwera waaxekura asinna awo ni pooti okhala wooxupa wuuluma naawo weera yaalipihe. Ti yeeyo yamweerenle Andrei, ohimmwale yoosoma evinre. Murokora mmoha a egrupu awe annaviriha maxupo a othoiwa musurukhu. Ni yaatxeerereyaka malatta amurokora ola, owo ampaka acidente. Owo ahooperariwa ikwaha sintxipale ni mwaha wa yeeyo owo khaavara muteko. Nnaamweera yaaviriha maxupo a ottharatthariwa ni eretta ya koronaviru, asinna yaapaka ele yaaweraaya weera emukhavihere murokora ole. Ni etthu eyo khevinre voohooneya vamaithoni va Yehova.

14. Asitokweene ammulokoni enkela ovaha hayi ntakihero weera ennamuroromela Yehova?

¹⁴ Asitokweene ammulokoni entthuneya weera epakeke eheeni. Andrei aapaka nivekelo ni aapaka ele aaweraawe. Yehova aakhunle hayi mavekelo Andrei? Owo ahaavarihela muteko asinna ammulokoni yeera ewere omukhavihera murokora ole. Akina yannamukuxera murokora ole hospital, akina yannanvaha musurukhu weera emukhavihere. Yehova aavarenle muteko asinna weera emukhavihere murokora ole, Yehova aareeliha wiiraana wa asinna ale ni olipa waya murima. (Aheb. 13:16) Nyuwo asitokweene ammulokoni, waari weera muttetthe munkhalaanyu muteko ahu onnakhottihiwa, mwaavaheke tho miritti atthu akina. (Yer. 36:5, 6) Opwaha mwa yeeyo, mmuroromeleke Yehova. Owo onimookhaviherani nyuwo waakosoopa asinna ni asirokora.

15. Ninkela okhalano hayi murettele vaavo muteko ahu onkhoottihiwaaya?

¹⁵ Moota eneeraaya ekhavihereke atthu akina. Etempu yoottharatthariwa pooti otthuneyaka otthukumana igrupu ikhaanene. Tivanto varaaya wootthuneya okhalano ni murettele ni asinna viinaano vaava. Ekhotto nraahuno khaninwana nasinna mene ninwana ni Satana. Muhiweherereke weera asinna ekhale oomalela. Waari weera nyuwo, ookhala munna muhiniiwanananyuno, mwaasaasere okhalano murettele viinaano vaava. (Mir. 19:11; Aef. 4:26) Mpatxeriheke waakhavihera atthu akina. (Tito 3:14) Nikhavihero asinna yanvanhaaya murokora ole naakumihera itthu sooreera. Egrupu aya yaakhala yoowiiraana ntoko emusi. — Nsal. 133:1.

16. Moovarihani ni Akolosi 4:3, 18, ninkela waakhavihera moota heeni asinna enttharatthariwa?

 ¹⁶ Asinna ni asirokora antxipale ennanvarela muteko Yehova nnaamweera ettharatthariwaka ni iguvernu. Akina ennatthukiwa mwaha wa nroromelo naya. Hiyo pooti waavekelela asinna awo, imusi saya ni ninnatthuneya waavekelela asinna ale enleva ikumi saya weera yaakhavihere asinna etthukinwe moorweela mwa omunepani, weerutthuni ni suulummwaka milattu saya. c (Mmusome Akolosi 4:3, 18.) Muhittiwale weera mavekelo anyu enimwaakhavihera asinna awo! — 2 Ates. 3:1, 2; 1 Tim. 2:1, 2.

17. Munkela wiireherera hayi varaatxiru ohinaaye okhumelela ottharatthariwa?

¹⁷ Nyuwo ni amusi anyu pooti opatxera wiireherera viinaano vaava weera nwere oviriha ottharatthariwa. (Mit. 14:22) Muhimakeleke wuupuwelela itthu soonanara sikhanle sooweereya. Ohiya opaka eyo, nyuwo mulipiheke onthamwene anyu ni Yehova ni mwaakhavihereke anamwane anyu weera epakeke etthu emoharu. Wakhala weera nyuwo moovalavela mmuhulele murima anyu Yehova. (Nsal. 62:7, 8) Mwaatthekulaka ni amusi anyu muulumeke mathowa anwerihani omuroromela Yehova. d Ni wakhala weera enookhumelela erisa ya ephattu omuroromela wanyu Yehova ni wiireherera wanyu varaatxiru enooweriha anamwene anyu okhala oolipa murima ni enookhalano murettele.

18. Muhoolo ninweherera eheeni?

¹⁸ Murettele wa Muluku onnanikhavihera okhala oomaaleleya ni oovareleleya. (Afil. 4:6, 7) Murettele ene tiyoola, Yehova onnimaalihaaweno murima ahu nnaamweera nivirihaka maxupo a eretta yowaakuva omwaramwareya, irisa sa ephattu ni ottharatthariwa. Owo tho, onnaavarihela muteko sitokweene ammulokoni yaawo ennixekura. Nave tho Yehova, onnanivaha eparakha yookhaviherana mukina ni mukwaawe. Murettele nraahuno vano onoonikhvihera oviriha maxupo matokweene ohela mpuwa “yoohooxa etokotoko”. (Math. 24:21) Yeereya eyo, oneereke otthuneya okhalano ni murettele ni atthu akina ni waakhavira akina opaka etthu emoharu. Wavira yoohooxa etokotoko itthu sootheene soohooxa sinkela okhala itthu soovira, mwaha wooweera nnookhalano murettele yoowo Yehova aatthunaawe onivaha ovinyera khalayi — aani, murettele weekhaikhai ni ekumi yoohimala. —  Yes. 26:3, 4.