MASU ooweera “ekaaro” va Tradução do Novo Mundo, ennahimmwa okhala ikaaro soovirikana. (Mit. 8:28, 29, 38) Menento, pooti weeraka ekaaro aavarihenlaawe muteko mutokweene mutiyope weera eetteno mukwaha, yaari ekaaro yoowunnuwa opwaha iye saavareliwa muteko okhottoni naari okoridani. Nrowe noone mathowa enneeriha ohima eyo.

Muthiyope ole aari mulopwana aarinono miritti sootepa otthuneya nave anneetta ikwaha soorakama. Owo aari “mulupale a Kandasi, pwiyamwene a w’Ethiyopia ari namasamarya a mihakhu sawe sothene.” (Mit. 8:27) Muttetthe wa w’Ethiyopia, khalayi wannahela mpuwa elapo ya oSudão yeeyo olelo eneeriwa Exipitu vanooneya weera owo annavarihela ikaaro soovirikana weera apake mukwaha. Mene owo annahaawela ekaaro etokweene yeeyo eeraawe ahelekemo miritti seiyo aakuxaawe vaavo aapakaawe mukwaha. Etempu ya arummwa saavariheliwa ikaaro sa marooda 4 nave saari sookhuneeliwa osulu weera saateexeke atthu. Ereferensiya emoha ya Biblya enhima weera, ekaaro ntoko eyo, yannakhalano nipuro ntokweene weera siheliweke miritti nave yanneetta mukwaha moovareleleya, nave onnooneya weera ekaaro ntoko eyo yannapaka mukwaha wootepa orakama.

Emaara muthiyope ole aasomaawe Filipe aamwaattamela. Eliivuru ya Miteko ennahima weera “Filipe àttamenlaiye sisale, àmwìwa ole amusomaka mprofeti Yesaya.” (Mit. 8:30) Ikaaro saapakinwe weera sipakeke ikwaha soorakama, khasaapakinwe weera seetteke moowaakuveya, nto mwaha wooweetta vakhaani-vakhaani, waari wookhweya mutokweene muthiyope owera osoma soolempwa nave yaamukhweihera Filipe waattamela ekaaro ele nnaamweera eetta vathi.

Siiso muthiyope ‘anvekela Filipe weera awelemo ni akilaathi vamoha ni yoowo.’ (Mit. 8:31) Ikaaro saavariheliwa muteko weera sitthimakeke, atthu yeettiha yeemenleene. Vano ikaaro seetteliwa mukwaha, sannakhalano nipuro weera akilaathiki mutokweene muthiyope ni Filipe.

Moovarihana ni ele ninsomaahu va Miteko ekapiitulu 8 ni sooweereya sikina, irevista sahu sa viinaano sinnoonihera ifootu sa mutokweene mutiyope akilantheene mukaaroni mwawe etokweene opwaha ikaaro iye sa ekorida naari saavareliwa muteko okhottoni.