1-2. Maxupo heeni arumeyi a Yehova envirihaaya?

 VAAVO ennikhumelelaaya maxupo nahaawehereraahu, ekumi ahu ennatxentxa moowaakuveya. Mwa ntakihero, munna mmoha oneeriwa Luis a aahooneleliwa weera aakhalano eretta ya câncer yeeyo yaari yoowoopiha. Mediku aahimuleela weera ekumi awe yaari ya miyeeri vakhaaniini. Monika ni aiyawe yannavara miteko sintxipale sa mmarehereroni. Mene nivirakaru nihiku nimoha, Monika aahoonelela weera aiyawe yaawo yaari mutokweene a mmulokoni, yannanwoka mwa iyaakha sintxipale. Murokora mmoha muttiye oneeriwa Olivia, aaleeliwa weera akhume owannyawe mwaha wa cicloni yoowo aattamela. Mene atthikakaru, owo aahoona weera empa awe yaanyaanyiwa yootheene. Mwaha wa yeeyo, ikumi sa asinna ala, saatxentxa moowaakuveya. Neereke nyuwo mootoko oviriha maxupo ntoko ala? Neereke nyuwo mootoko oviriha maxupo yaawo yaatxentxiye ekumi anyu enoohiyani muxupeñyeene?

² Nnaamweera hiyo nreene arumeyi oororomeleya a Yehova, hiyo ninnaviriha maxupo ntoko iretta yaawo atthu ootheene envirihaaya. Opwaha mwa yeeyo, hiyo ninnaviriha maxupo a ovaanyihiwa ni otthara-tthariwa ni atthu ehinsiveliwa ni atthu a Muluku. Mene Yehova khonrowa onikosoopa mwa maxupo mootheene, mene owo oonilaihera weera ikwaha sootheene oneereke onikhavihera. (Yes. 41:10) Nikhaviheriwaka ni Yehova, hiyo pooti okhala oohakalala ni opaka soothanla sooreera, nave ovirelela okhala oororomeleya wa yoowo nnaamweera nikumanakano maxupo. Mwa yoosoma ene yeela, nnoorowa woona itthu ixexe Yehova onvarihelaawe muteko weera anikhavihere vaavo ninvirihaahu maxupo. Nave-tho nnoorowa woona itthu nintthuneyaahu opaka weera naakhele nikhavihero owo onnivahaawe.

 YEHOVA ONOOROWA WOOKOSOOPANI NYUWO

3. Etthu heeni enrowa onixupa opaka vaavo ninvirihaahu maxupo a mweekumini?

³ Maxupo. Vaavo ninvirihaahu maxupo oowoopiha, pooti okhala wooxupa wuupuwelelaka nnene ni opaka yoothanla. Mwaha wa heeni? Apaale nyuwo onnoovoreyani murima mwaha wooxupeyaxa. Hiyo ninnakhalano maxupo a mmuupuweloni mwaha wa itthu ninvirihaahu. Apaale nyuwo munniisoona ntoko muneetta mmwiixini, muhisuwelaka munrowaanyuwo. Nrowe noone moota asirokora ale eeli ehimmwale woopatxerani yiisoonenlaaya. Olivia onnathaliha, “Vaavo cicloni aanyannyaawe empaaka, miyo kaaxupeya vantxipale ni kanniisoona okhala meekhaaka.” Ohimaka moota aawokinwaawe ni aiyawe, Monika onnathaliha: “Miyo kaaxupeya vantxipale ni yaakivoreya mpaka vamurimani. Nave wannakixupa ovara itthu sa vanihikuni. Itthu seiyo kuupuwelaaka weera khasaarowa weereya ni miyo, saaheereya.” Yehova onoonihera moota heeni weera onoonikhavihera emaara yeeyo ninvirihaahu maxupo?

4. Moovarihana ni Afilipi 4:6, 7, Yehova onnilaihera eheeni?

⁴ Etthu Yehova ompakaawe. Owo oolaihera weera anoonivaha ele Biblya oniitthanaawe “murettele wa Muluku.” (Mmusome Afilipi 4:6, 7.) Murettele owo nimaaliho emphwanyaaya paahi atthu ale emmukokhorela Yehova. Murettele owo ‘onnapwaha nyuupuwelo soothesene’; nave wookhalano owera opwaha ele nnuupuwelelaahu. Neereke nyuwo mootoko ophwanya omaaleleya vaavo mwaapankaanyu nivekelo moomaaleleya wa Yehova? Waari weera aani, nyuwo mwaaphwanya “murettele wa Muluku.”

5. Murettele wa Muluku onsuka hayi murima ahu ni nyuupuwelo sahu?

⁵ Eliivuru ya Afilipi ennahima weera, murettele wa Muluku onoorowa ‘osuka mirima sahu ni nyuupuwelo sahu.’ Masu a ekereku etaphuleliwe “osuka” yaatthuna ohimmwa anakhotto yaawo yaakosoopa ecidade weera ehitupheliwe. Atthu a ecidade ele yaakosoopiwa, yannakona ni murettele mwaha wooweera yannasuwela weera anakhotto yannaweherera milako. Moolikana ni eyo, vaavo murettele wa Muluku onsukaaya mirima sahu ni nyuupuwelo, hiyo ninnakhala oomaaleleya nisuwelaka weera nri oovareleleya. (Nsal. 4:9 [4:8, NM]) Ti yeeyo yeereñye ni Hana, nnaamweera maxupo awe yaahaavinre moowaakuveya, owo aakhala ni murettele. (1 Sam. 1:16-18) Nave vaavo ninkhalaahu oomaaleleya, onnakhala wookhweya wuupuwelela nnene ni opaka soothanla sooreera.

6. Etthu heeni nintthuneyaahu opaka weera nikhaleno murettele wa Muluku? (Nwehe efootu.)

⁶ Etthu nintthuneyaahu opaka. Wakhala weera nyuwo munviriha itthu sootepa oxupa, mmwiitthane nakhotto. Moota heeni? Munvekeleke Yehova mpaka nyuwo ophwanya murettele awe. (Luka 11:9; 1 Ates. 5:17) Luis ohimmwale woopatxerani, onnahima moota owo ni  amwaarawe eneeriwa Ana, yiisoonelaaya vaavo yaasuwenlaaya weera Luis aarinono miyeeri vakhaaniini sa ekumi. Owo ohimme ha: “Okumanano maxupo ntoko ala, onnakhala wooxupa opaka yoothanla woohima sa moota wookosoopiwa ni mameediku naari itthu sikina. Mene opaka mavekelo woonikhavihera okhala oomaaleleya etempu ele ya maxupo.” Luis ni amwaarawe, enhima weera yannavekela voohihiyerereya, yaahinvekela Yehova weera aavahe murettele, omaaleleya ni miruku weera epake soothanla sooreera. Nto ti yeeyo yaakhumelenle. Wakhala weera nyuwo munviriha itthu sootepa oxupa mweekumini mwanyu, nvireleleke ovekela, nyuwo munoorowa okhalano murettele wa Yehova, nto murettele owo onoorowa osuka murima anyu ni nyuupuwelo sanyu. — Arom. 12:12.

YEHOVA ONOOVIRELELA OPAKA ITTHU SAWE ERIYARI-NEERIYARI

7. Muupuwelo heeni ninkhalaahuno emaara yeeyo ninvirihaahu maxupo?

⁷ Maxupo. Emaara hiyo ninvirihaahu maxupo, hiyo ninnapaka itthu seiyo nahaatthunaahu opaka. Hiihaale ntoko Barco onkakhiwa ni mutekuteku, hiyo pooti woonaka weera ninnakumanano maxupo oovirikana. Ana yoole ahimmwale woopatxerani, onnathaliha weera ekhwaakaru aiyawe, etempu eri yootheene owo anniisoonela moovirikana. Owo-tho ohimme ha: “Ikwaha sikina miyo kannaxupeya mmuupuweloni nave kannuupuwela weera khawaari wa xariya okikhumelela itthu iye. Ikwaha sikina miyo kannanyoonyiwa mwaha woowuupuwelela weera aiyaka ahookhwa.” Owo-tho anniisoona omeekha ni oxupeya mwaha wooweera owo khaawera opaka itthu sikina aiyawe yampakelaaya. Ikwaha sikina owo annuupuwelela weera aari variyari va ephareya ni mutekuteku. Moota heeni Yehova onrowaawe onikhavihera emaara nnoonaahu weera nri variyari va ephareya ni mutekuteku?

8. Moovarihana ni Yesaya 33:6, eheeni Yehova onilaihenraawe?

⁸ Etthu Yehova ompakaawe. Yehova onnanroromeliha weera onoonivaha nikhavihero na mmuupuweloni ni noomunepani. (Mmusome Yesaya 33:6.) Mwa ntakihero, yaaviraka epheyo mphareya, navio annakakhiwa ni epheyo eyo. Mwaha wooviriha maxupo ala, anavio antxipale aaheleliwa iyuuma mukhwipi, nave sookhala iyuuma sikina sinneela vathi va maahi. Iyuuma iyo sinnamukhavihera navio oheettihiwa vantxipale ni epheyo, mwaha wa yeeyo, atthu enanwela navio owo ennakhala oovareleleya ni enneetta nnene mukwaha aya. Yoohakalaliha ti yooweera, iyuuma iyo sinnavara muteko emaara yeeyo navio oneettihiwaawe ni epheyo. Emoha-moharu, Yehova onoorowa onivaha nikhavihero na mmuupuweloni ni noomunepani weera nivirelele onvarela owo moororomeleya vaavo ninkumanaahuno maxupo.

9. Moota heeni ikaruma sahu sa opeskisari sinrowaaya onikhavihera okhala eriyari-neeriyari? (Nwehe efootu.)

⁹ Etthu nintthuneyaahu opaka. Wakhala weera nyuwo munoona weera muri variyari va epheyo  wa mukhalelo wa mmuupuweloni, mpakeke ele munweraanyu weera mulipihe mikhalelo sanyu sa omunepani. Ekhaikhai weera, nyuwo pooti ohiwera opaka itthu ntoko mwaapakaanyu khalayi, mene musuweleke weera Yehova khanoovekelani opaka itthu ansuwelaawe weera khamunrowa owera opaka. (Munwehe tho Luka 21:1-4.) Muhittuwaleke wiihiyera etempu weera mpake yoosoma anyu ya Biblya ni ophimelela. Mwaha wa heeni? Mwaha wooweera Yehova onnanivaha nikhavihero moorweela mwa mareherero awe, akumiheraka nyaha ni iviidiyu seiyo sinnikhavihera vantxipale vaavo ninvirihaahu maxupo. Weera mphwanye soohimmwa sikina soovareleya muteko wa nyuwo, nyuwo pooti ovarihela muteko ikaruma sa ipeskisa ni nuulumo nanyu, ntoko aplikativu JW Library^®, Índice das Publicações da Torre de Vigia, ni Eliivuru Enaakhaliherya Anamoona a Yehova Otokosa Myaha Sikumiheriwe. Monika ohimmwale woopatxerani, onnahima weera ikwaha sootheene annuupuwelela ikaruma sa opeskisari vaavo sinanweelaaya nyuupuwelo soohireerela woohima sa maxupo anvirihaawe. Mwa ntakihero, owo annapeskisari alepaka ha, “onyoonyiwa.” Nave ikwaha ikina owo annapeskisari alepaka ha “owoka” naari “ororomeleya.” Avinyaka owo annasoma mpaka okhala oomaaleleya. Owo ohimme ha: “Miyo kannapeskisari kilepaka etthu kaavirihaaka avinyaka kannasoma nyaha kaaphwanyaaka ni vakhaani-vakhaani, kaahoonelela weera Yehova aari vakhiviru vaka. Emaara miyo kaasomaaka, kannoonelela weera Yehova onnasuwela maxupo aka, nave annatthuna okikhavihera.” Nikhavihero nna na Yehova nnoorowa wookhaviherani nyuwo vaavo nyuwo munrowaanyu ovirihaka maxupo mweekumini mwanyu. — Nsal. 119:143, 144.

YEHOVA ONIMOOKHAVIHERANI NYUWO

10. Nniisoonela moota heeni naviriha itthu sootepa oxupa mweekumini mwahu?

¹⁰ Maxupo. Waari weera nyuwo mooviriha maxupo a mweekumini yaawo yaari ooxupa ovilela, pooti weeraka nyuwo mwaakhulumuwa mweerutthuni ni mmuupuweloni. Pooti weeraka mwanniisoona ntoko mulipa ooweraxa otthimaka menento aavoreyeñye mwetto. Pooti weeraka khalayi, owo annatthimaka vantxipale nto vano owo onimweera otuthunya. Ikwaha ikina onnaxupa opaka itthu seiyo naapakaahu mookhweya, nave-tho pooti weeraka nyuwo khonoosivelani opaka itthu seiyo soosivelani opaka. Nave pooti weeraka, hiihaale ntoko Eliya, nyuwo mookhulumuwa mpaka otthuna okhwa. (1 Mam. 19:5-7) Etthu heeni Yehova olaihenraawe onipakela emaara nniisoonaahu hiiho?

11. Mwa mukhalelo heeni mukina Yehova onnikhaviheraawe? (Nsalmu 94:18)

¹¹ Etthu Yehova ompakaawe. Owo oolaihera  weera onoorowa wookhaviherani. (Musome Nsalmu 94:18.) Hiihaale ntoko mulipa ootthimaka ovoreyeñye onhaawelaawe nikhavihero na mutthu mukina weera atthikele otthimaka, hiyo-tho ninnahaawela nikhavihero weera nivirelele onvarela muteko Yehova. Ti vawonto Yehova onanroromelihaawe ariki: “Miyo kà Yahvéh, Muluku á, yoowo onòvarela ni ntata nawe nolopwana, yoowo onòhimera: ‘Ohòve, kinimòkhavihera.’” (Yes. 41:13) Mwene Davidi aahoona nikhavihero nno na Yehova. Vaavo aavirihaawe maxupo a otthara-tthariwa ni amwiittani awe, owo aamweerenle ha Yehova: “Mono anyu wolopwana onnakilipiha.” (Nsal. 18:36 [18:35, NM]) Yehova onnivaha moota heeni nikhavihero nawe?

12. Yehova onaavarihela taani muteko weera enikhavihere vaavo ninvirihaahu maxupo?

¹² Yehova onnaavarihela muteko atthu weera enivahe nikhavihero hiyo ninhaawelaahu. Mwa ntakihero, vaavo mwene Davidi aakhulumunwaawe, nthamwene awe eeriwa Yonathani, aamuxekura weera amukhavihere. (1 Sam. 23:16, 17) Nave-tho Yehova aahinvarihela muteko Eliseyo weera amukhavihere Eliya. (1 Mam. 19:16, 21; 2 Mam. 2:2) Olelo va, Yehova pooti waavarihela muteko amusi ahu, asinthamwene ahu naari asitokweene a mmulokoni weera enikhavihere. Vaavo ninvirihaahu maxupo, yootthuna ahu ori wiirakameliha ni atthu, naari neere, okhala meekhaahu. Ni eyo enneereya. Nto ninrowa waakhela hayi nikhavihero na Yehova?

13. Eheeni nintthuneyaahu opaka weera naakhele nikhavihero na Yehova? (Nwehe efootu.)

¹³ Etthu nintthuneyaahu opaka. Nwaneno mukhalelo wootthuna okhala meekhaanyu. Vaavo ninkhalaahu meekhaahu, hiyo ninwehexexa paahi maxupo ahu ni itthu ninvirihaahu, otepaxa wene wakhala weera ninviriha itthu sootepa oxupa. Nto okhala nuupuwelelaka itthu iyo, pooti oneeriha opaka soothanla soonanara. (Mir. 18:1) Nto wakhala weera ninnakhala etempu yintxipale meekhaahu, hiyo nnoorowa orakamelana ni atthu awo, nto atthu ene ti yaawo Yehova onaavarihelaawe muteko weera anikhavihere. Nto nnaamweera ohikhweyaka opaka eyo, onnatthuneya ikwaha sootheene waakhulela nikhavihero ninvahiwaahu ni amusi ahu, asinthamwene ahu ni asitokweene a mmulokoni. Mwaha wooweera Yehova onaavarihela muteko atthu ene yaawo weera enikhavihere. — Mir. 17:17; Yes. 32:1, 2.

YEHOVA ONOOROWA WOOLIPIHANI NYUWO

14. Itthu heeni sinrowa oneerihaka woova?

¹⁴ Maxupo. Ikwaha ikina ninnaviriha maxupo yaawo ennoopopiha. Biblya onnaahima arumeyi oororomeleya a Yehova a khalayi yaawo yoova mwaha wa amwiittani aya ni maxupo makina yaavirihaaya. (Nsal. 18:5; 55:2, 6 [18:4; 55:1,  5, NM]) Emoha-moharu, hiyo-tho pooti oviriha otthara-tthariwa oxikola, omutekoni, amusi ahu naari anamalamulela. Nave-tho hiyo pooti woova okhwa mwaha wa eretta nraahuno. Mwa etempu ene yeeyo, hiyo pooti wiisoonaka okhala oohikosoopeya ntoko mwaana. Vanonto, Yehova onnikhavihera hayi mwa etempu yooxupa?

15. Nsalmu 94:19, nnaanroromeliha eheeni?

¹⁵ Etthu Yehova ompakaawe. Owo onnanlipiha ni onnanimaaliha. (Musome Nsalmu 94:19.) Nsalmu nna pooti oweerihani omuupuwelela mwaana otuthunwe ni ohinwera ophwanya ikhove mwaha wa overunya ni etari. Nave-tho pooti owuupuwelelaka apapawe emukunxeene mwaana owo ni emmaalihaka mpaka ophwanya ikhove. Nnaamweera mwaana owo iiwaaka etari, owo annakhala oomaaleleya ni apapawe ennapaka etthu weera emoonihere weera ari oovareleleya. Vaavo ninvirihaahu itthu sootepa oxupa mweekumini mwahu, ninnahaawela nikhavihero na tiithi ahu Yehova weera anivarele mpaka nyuupuwelo sahu soohireera omala. Moota heeni ninrowaahu omaalihiwa ni Yehova?

16. Eheeni nintthuneyaahu opaka weera naakhele nikhavihero na Yehova? (Nwehe efootu.)

¹⁶ Etthu nintthuneyaahu opaka. Muhihiye etempu eviraka muhuulumme ni Yehova, nvaaneleke ni Yehova ni musomeke masu awe. (Nsal. 77:2, 13-15 [77:1, 12-14, NM]) Wakhala weera nyuwo munookhovelela opaka etthu eyo, ikwaha sootheene munrowaanyu okumanakano maxupo, etthu yoopatxera munrowaanyu wuupuwelela onrowa okhala wuuluma ni tiithi anyu Yehova. Mmuleeleke Yehova itthu sootheene munvirihaanyu, ohela mpuwa moota munoovaanyu. Avinyaka nwehexexeke ele Yehova onrowaawe wooleelani anvarihelaka muteko Biblya. Mwapaka etthu eyo, nyuwo munimoona nimaaliho na Yehova. (Nsal. 119:28) Vaavo munoovaanyu, musomeke sooweereya sa mBiblyani. Mwa ntakihero, eliivuru ya Yobi, Nsalmu, Miruku ni masu a Yesu emphwanyeya va eliivuru ya Matheyo ekapiitulu ya 6. Vaavo nyuwo mumpakaanyu nivekelo ni omusoma Biblya, munimoona nimaaliho na Yehova.

17. Nroromelo heeni hiyo nraahuno?

¹⁷ Hiyo nroromeleke weera ikwaha sootheene Yehova onoorowa onikhavihera vaavo ninvirihaahu maxupo mweekumini mwahu. Hiyo khanikhanle meekhaahu. (Nsal. 23:4; 94:14) Yehova oonilaihera onikosoopa, onikhavihera ni onivaha nimaaliho. Yesaya 26:3 Yehova oneera: ‘Anoosunka nihimo nle mwa murettele woolipa, vawi nimmuroromela owo.’ Nto mmuroromele Yehova, ni muttottele mureerelo itthu sootheene owo ompakaawe weera ookhavihereni. Wakhala weera munoopaka eyo, nyuwo munookhala oolipa vaavo munrowaanyu ovirihaka maxupo.