1. Munoona weera Yehova ari hayi?

 NYUWO mootoko wuupuwela moota Yehova oraawe? Vaavo munuulumaanyu nuuwo munivekeloni, eheeni enwa mmuupuweloni mwanyu? Ekhaikhai weera hiyo khanimmoona Yehova, mene Biblya onnuuluma woohima sa owo mwa mikhalelo soovirikana. Yehova onniitthaniwa okhala “nsuwa ni mwila” nave-tho “moró wolalihaxa”. (Nsal. 84:12 [84:11, NM]; Aheb. 12:29) Mwa yoowooniheriwaawe, mprofeti Ezekiyeli aahimuuluma Yehova okhala ntoko nluku na esafira, eyuuma yooluttuwa ni ekhwi mmahutteni. (Ez. 1:26-28) Moota Yehova onuulummwaawe mBiblyani pooti ontikhiniha, naari pooti oneeriha hiyo wiisoona ohikhala etthu.

2. Mwaha wa heeni nnoonaahu okhala wooxupa omwaattamela Yehova?

² Mwaha wooweera khanimmoona Yehova, pooti okhala wooxupa hiyo wuupuwela weera owo onnansivela. Atthu akina mwaha wooviriha maxupo mweekumini, ennuupuwela weera Yehova khonaasivela. Pooti weeraka awo khiyaarino tiithi aasivela. Yehova onnasuwela moota nniisoonelaahu nave owo oosuwela weera pooti okhala wooxupa wa hiyo omwaattamela owo. Weera anikhavihere, owo onnanoonihera mBiblyani weera owo Muluku ansivelo.

3. Mwaha wa heeni oraaya wootthuneya oxuttera vantxipale woohima sa nsivelo na Yehova?

³ Masu eniiwanyeiha woohima sa Yehova, ti nsivelo. (1 Yoh. 4:8) Biblya onhima weera Muluku ti nsivelo, nto nsivelo nno ninnavoleela itthu sootheene Yehova ompakaawe. Nsivelo na Muluku ti ntokweene ni noowera mpaka ale ehimmusivela Yehova ennattottela mureerelo. (Math. 5:44, 45) Mwa yoosoma ene yeela, nnoorowa oxuttera woohima sa Yehova ni nsivelo nawe. Vaavo ninxutteraahu vantxipale woohima sa Muluku ahu Yehova, hiyo ninnamusivela vantxipale.

 YEHOVA ONNANSIVELA VANTXIPALE

4. Munoonela hayi nsivelo na Yehova? (Nwehe efootu.)

⁴ ‘Yehova toomoriwa ikharari vantxipale.’ (Yak. 5:11) MBiblyani, owo onnalikanxeriwa ni maaye a nsivelo. (Yes. 66:12, 13) Nkamuupuwelani maaye ommukosoopa nnene mwanawe. Mwa nsivelo, maaye owo onnamuteexa mwanawe ni onnuuluma nuuwo mooreerela ni moomaaleleya. Vaavo mwaana owo oninlaawe naari woona ovoreya, owo onnapaka ele onweraawe weera ammaalihe. Vaavo ninvirihaahu maxupo, nroromeleke weera Yehova onnansivela. Nasalimu olempe ha: “Vavale sovalaveliha saka sàntxerereyaya mpuwa mwaka, vava sohakalaliha sanyu sòtthapiha munep’aka.” — Nsal. 94:19.

5. Nsivelo na Yehova nintaphulela eheeni wa nyuwo?

⁵ Yehova toororomeleya. (Nsal. 103:8) Nnaamweera nimutthekelaka, owo khannihiya. Ikwaha sintxipale ana Israeli yannamutthekela Yehova. Nnaamweera oreene hiiho, vaavo yaattharuwaaya, Yehova annoonihera nsivelo nawe neekhaikhai eeraka: “Hapo weyo wà òrikaxa vamaithoni vaka, ekhitto à ti yolemela, ni miyo kinnòtthuna.” (Yes. 43:4, 5) Nsivelo na Yehova khantxentxiye. Hiyo pooti omuroromelaka owo. Nnaamweera nipankeene soottheka itokweene, Yehova khanninyanyala. Nattharuwa vale ni omutthikela Yehova, nnimoona weera owo onnavirelela onsivela. Owo oolaihera onlevelela moomalela mwaha wooweera owo ‘toowaakuva olevelela.’ (Yes. 55:7) Biblya onhima eera nlevelelo nno na Yehova ninkhala ntoko “mahiku òmumula erwe wa ekhove ya [Yehova].” — Mit 3:20, [3:19, NM]

6. Zakariya 2:8 annixuttiha eheeni woohima sa Yehova?

⁶ Mmusome Zakariya 2:8. Yehova onnanilikanxera ni erima ya niitho. Niitho etthu yootepa otthuneya veerutthuni. Nto onkhala ntoko Yehova oneera, ole onkela ompakela mutthu etthu yoonanara, ompakela etthu yootepa otthuneya wa miyo. Mwaha wa nsivelo araaweno ni hiyo, Yehova oosuwela maxupo ahu ni onnatthuna onikosoopa. Vaavo hiyo ninvirihaahu maxupo, owo-tho onnaxupeya. Mwaha wa yeeyo, hiyo pooti onvekelaka nroromelaka weera annaniiwa: “Mukisunke ntoko erima ya nitho.” — Nsal. 17:8.

7. Mwaha wa heeni nintthuneyaahu olipiha nroromelo nahu woohima sa nsivelo na Yehova ni hiyo?

⁷ Yehova ontthuna wera nyuwo muroromeleke weera annoosivelani. Mene owo oosuwela weera mwaha wa itthu ikina mpankaanyu khalayi, nyuwo pooti ohovela waari weera  annoosivelani naari hooye. Apaale nyuwo munviriha maxupo viinaano vaava yaawo enweerihani ohovela waari weera Yehova annoosivelani naari hooye. Nto eheeni enrowa olipiha nroromelo nanyu? Muupuweleke moota Yehova onooniheraawe nsivelo nawe wa Yesu, asinna oothanliwa ni atthu ootheene.

YEHOVA ANOONIHERA MOOTA HEENI NSIVELO NAWE

8. Mwaha wa heeni Yesu aaroromelaawe weera Tiithi awe annamusivela?

⁸ Mwa iyaakha ibiliyawu sintxipale, Yehova ni Yesu aakhala vamoha wiirimu ni ahunnuwihera nsivelo naya mukina ni mukhwaawe. Yehova ohoonihera weera onnamusivela Yesu ntoko ninsomaahu va Matheyo 17:5. Yehova anwera ohima paahi ha: “Mwa yowo kinnahakalala’mo.” Mene owo aatthuna woonihera moota ommusivelaawe Yesu. Ti vawonto enraawe weera Yesu ‘mwanawe oosiveleyaxa.’ Yehova annasiveliwa vantxipale ni Yesu ni wera owo aari oolikaneene ovaha ekumi awe wa atthu ootheene. (Aef. 1:7) Yesu annaroromela weera Tiithi awe annamusivela. Owo annaroromela nsivelo na Yehova mpaka aahuuluma ikwaha sintxipale weera Tiithi awe annamusivela. — Yoh. 3:35; 10:17; 17:24.

9. Masu heeni ennoonihera nsivelo na Yehova wa asinna oothanliwa? Muthalihe. (Aroma 5:5)

⁹ Yehova onnoonihera nsivelo nawe wa asinna oothanliwa. (Mmusome Aroma 5:5.) Moone masu ooweera “wòheliwa.” Dicionário a Biblya onniiwanyeiha masu ala ntoko ‘murooro wa maahi owaaka wa hiyo.’ Ntakihero nna ninnoonihera moota Yehova onaasivelaawe asinna oothanliwa! Nave awo aasuwela weera eri “òsiveleyaxa mwa Muluku.” (Yuda 1) Murummwa Yohani oohima ele uupuwelaawe alepaka ha: “Ònani otthuna wulupale anivahiyaya Atithi, wera nìtthaniwe anamwane a Muluku!” (1 Yoh. 3:1) Neereke Yehova onaasivela paahi asinna oothanliwa? Hooye, Yehova ohoonihera weera onnansivela ootheene hiyo.

10. Etthu heeni etokweene yoonihenre nsivelo na Yehova?

¹⁰ Etthu heeni enoonihera weera Yehova onnansivela? Mukuttho etthu etokweene yoonihenre nsivelo na Yehova mwa elapo yootheene! (Yoh. 3:16; Arom. 5:8) Yehova onvaha mwanawe ootepa otthuneya weera akhwe mwaha wa hiyo, weera nleveleliwe soottheka sahu ni okhalano onthamwene nuuwo. (1 Yoh. 4:10) Vaavo nimphimelelaahu muttenko Yehova ni Yesu elinvaaya, ninnawera woonelela moota awo emmusivelaaya mutthu ti mutthu a hiyo. (Agal. 2:20) Mukuttho kholivinwe mwaha wa exariya ya Yehova. Mene mwaha wa nsivelo. Yehova ohoonihera nsivelo nawe wa hiyo avahaka etthu yootepa otthuneya wa owo, Yesu. Yehova ohaakhulela weera mwanawe ahaawe ni okhwa mwaha wa hiyo.

11. Eheeni ninxutteraahu ni Yeremiya 31:3?

¹¹ Ntoko nonnaahu, Yehova annapaka etthu weera anoonihere moota onansivelaawe. (Mmusome Yeremiya 31:3.) Owo oonithanla mwaha wa nsivelo nawe wa hiyo. (Munwehe-tho Olaleya 7:7, 8.) Khiyaavo etthu naari mutthu onrowa onimwalanyiha ni nsivelo na Yehova. (Arom. 8:38, 39) Moota heeni nsivelo nna na Yehova ninweerihaayani nyuwo wiisoonela? Nnoorowa omuthokorora Nsalmu 23. Nave nnoorowa woona moota Davidi oonelaawe nsivelo na Yehova ni moota nyuwo munrowaanyu woonelaka.

MUNOONELA HAYI NSIVELO NA YEHOVA?

12. Moota heeni munkelaanyu wiiwanyeiha Nsalmu 23?

¹² Musome Nsalmu 23:1-6. Va Nsalmu 23, Davidi aahoonihera weera annamuroromela Yehova ni weera owo annamusivela ni omukosoopa. Owo tho aahoonihera onthamwene aaraaweno ni Yehova ni aamwiitthana Yehova okhala  Mukukhuli awe. Davidi annisoona okhala oovareleleya ahiyaka ekumi awe yeettihiwaka ni Yehova ni annamuroromela moomalela. Davidi aasuwela weera Yehova ammoonihera nsivelo mahiku mootheene. Mwaha wa heeni Davidi aaraaweno nroromelo nno?

13. Mwaha wa heeni Davidi aaroromelaawe weera Yehova aamurowa Ikwaha sootheene omukosoopaka?

¹³ “Nkinrowa othoiwa etthu.” Davidi ikwaha sootheene anniisoona okosoopiwa mwa nnenesene ni Yehova. Ikwaha sootheene owo annakhalano itthu aahaawelaawe. Opwaha mwa yeeyo, Davidi aasuwela weera Yehova nthamwene awe ni annamwaakhulela. Ni Davidi aasuwela weera, ahipwatthaka ele yaarowa okhumelela muhoolo, Yehova aamurowa omukosoopa owo. Nroromelo Davidi aaraaweno woohima sa nsivelo na Yehova naari noowera opwaha soohaawela sawe, ni yaari yeeyo yaamweeriha Davidi okhala oohakalala. — Nsal. 16:11.

14. Yehova onnikosoopa moota heeni?

¹⁴ Yehova onnanikosoopa mwa nsivelo, otepaxa wene vaavo ninvirihaahu maxupo mweekumini mwahu. Claire, a yoowo onvara muteko oBetheli mpuwa mwa iyaakha 20, aaxupeya vaavo amusi yaavirinhaaya maxupo mantxipale mwa etempu emoharu. Apapawe yaakhalano eretta yootutuxera ni yaamuhiya ahiweraka ovara etthu, murokorawe mmoha aakumihiwa mmulokoni ni amusi awe yannaviriha maxupo a othoiwa musurukhu, ni mwaha wa yeeyo awosa yaayeleela empaaya. Yehova aakosompe moota heeni? Claire ohimme ha: “Yehova annapaka etthu eri poothe weera amusi aka ekhaleno ele yaahaawelaaya vanihikuni. Ikwaha sintxipale Yehova annanivaha itthu seiye nahaawehereraahu. Mwa ikwaha ikina miyo kinnuupuwelela moota Yehova aakikosompaawe miyo vamoha ni amusi  aka. Ni miyo nkirwa ottiwala sooweereya iye, ni eyo ennakikhavihera ovirelela omukokhorela Yehova moohakalala ntoko atthu akina nnaamweera kivirihaka maxupo.”

15. Mwaha wa heeni Davidi aakhulumunwaawe? (Nwehe efootu.)

¹⁵ “Onnakihokoloxera munep’aka.” Ikwaha ikina, Davidi annaxupeya mwaha wa maxupo mootheene aavirihaawe. (Nsal. 18:4-6) Nnaamweera vareene hiiho, mwaha wa nsivelo ni okosoopiwa ni Yehova tiwaamukhavihera. Waakhala ntoko Yehova aamukuxa Davidi weera ‘amukilaathihe va munyepu mukithi’ ni “wa mahi òrira”. Mwaha wa yeeyo, Davidi annawera okhalano ikuru weera avirelele omukokhorela Yehova moohakalala. — Nsal. 18:28-32.

16. Moota heeni nsivelo na Yehova nnoohakalalihaayani?

¹⁶ Mahikwaano tho, ninnawera oviriha ni ovilela maxupo mwaha wa nikhavihero na Yehova. Ntoko Biblya onhimaawe, “Khweli mahal’awe khanamala, tthiri khasimmala ikharari sawe.” (Wikh. 3:22; Akol. 1:11). Nrowe noone ntakihero na Rachel. Owo aaxupeya vantxipale vaavo aiyawe yaahiñyaaya omukokhorela Yehova ni omuhiya owo mpuwa mwa eretta ya COVID-19. Etthu heeni Yehova ampakenlaawe Rachel? Owo ohimme ha: “Yehova aapaka ele aaweraawe weera miyo kiisoone weera kaari oosiveleya. Owo aaheeriha weera asinthamwene aka evirihe etempu vamoha ni miyo, yannakiruhela eyootxa, yannakimandarela imensagem soolipiha, yannatheya ni miyo ni yannakuupuweleliha weera Yehova annakisivela miyo ni okikosoopa. Miyo ikwaha sootheene kinnamuxukurela Yehova mwaha wookivaha emusi ela yoosiveleyaxa.”

17. Mwaha wa heeni Davidi ‘ahoovaawe etthu’?

¹⁷ “Nkirowa woova etthu yotakhala niwoko nyuwo munakhala ni miyo.” Davidi aakhalano amwiittani antxipale oovuwa, ni ikwaha sintxipale ekumi awe yannakhala veerisani. Nnaamweera vareene hiiho, owo anniisoona okhala oovareleleya mwaha wa nsivelo na Yehova. Owo aasuwela weera Yehova annakhala nuuwo mwa etempu eri poothe ni yaari yeeyo yaamulipiha. Ni tiyeeyo yaamweerinhe wiipa eeraka: “[Yehova] àkitaphula mwa sowopiha saka sothene.” (Nsal. 34:4) Ikwaha ikina Davidi annoova vantxipale, menento annawina woova iwo mwaha wooweera annaroromela weera Yehova annamusivela.

18. Osuwela weera Yehova onnansivela, onrowa onlipiha moota heeni vaavo nnoovaahu?

¹⁸ Emaara ninvirihaahu maxupo, ninrowa osuwela hayi waari weera Yehova onnanisivela?  Pioneiru mmoha oneeriwa Susi onnathaliha moota yiisoonenlaaya owo ni aiyawe vaavo mwanaya iisinvaawe: “Emaara ennikhumelelaaya maxupo yaawo nahaawehereraahu, hiyo ninnaxupeya vantxipale ni ninnoova weera maxupo makina ekhumelele tho. Menento nsivelo na Yehova naaneeriha okhala oovareleleya ni ookosoopeya.” Rachel, ohimmwale woopatxerani onnuupuwelela: “Nihiku nimoha oreene ohiyu, miyo kaaxupeya vantxipale ni kannoova. Miyo kaahinla ni kanvekela Yehova ni kaavekela moowiiwanyeiya. Ewoora emoharu miyo kaahoona weera owo aakimaaliha mpuwa mwa murima aka, ntoko maaye vaavo onammaalihaawe mwanawe ni miyo kaawera ophwanya ikhove. Miyo nkinrowa ottiwala nihuku nne.” Mutokweene mmoha a mmulokoni oneeriwa Tasos aawaleliwa mpuwa mwa iyaakha 4 mukadeya mwaha wookhootta orowa ovara muteko wa etoropa. Oonenle hayi nsivelo ni okosoopiwa ni Yehova? Owo ohimme ha: “Yehova aakivaha itthu sintxipale opwaha iye kaahaawelaaka. Eyo yaakeeriha omuroromela Yehova nnaamweera mukadeya oreene nipuro nooriipiha murima, Yehova annakivaha ohakalala moorweela wa munepa awe wootteela. Ni eyo yaakikhavihera woona weera vaavo kaamuroromelaaka Yehova nsivelo nawe wa miyo kannawera woona. Nto miyo kaapatxera ovara muteko wa opioneiru anthiti kireene okadeya.”

MUKHALEKE VAKHIVIRU NI MULUKU ANYU A NSIVELO

19. (a) Osuwela weera Yehova onnanisivela, onvoleela moota heeni itthu nnuulumaahu ni mavekelo ahu? (b) Eversu heeni enoottutthani murima enuuluma woohima sa nsivelo na Yehova? (Nwehe ekwaadru “ Soolepa sinnikhavihera woona weera Yehova onnansivela”.)

¹⁹ itthu sootheene nonnaahu mwa yoosoma ene yeela, sohoonihera weera, “Muluku a osivela”, ari ni hiyo! (2 Akor. 13:11) Owo onnampwattha mutthu ti mutthu a hiyo. Hiyo nroromeleke weera ‘noorukureriwa ni ikharari sawe.’ (Nsal. 32:10) Vaavo nimphimelelaahu moota Yehova onnooniheraawe nsivelo nawe, nneereke omwaattamela ni omuroromela. Hiyo pooti onvekela Yehova etempu eri yootheene ni omuleela moota hiyo ninhakalalaahu mwaha wa nsivelo nawe ni hiyo. Nave-tho pooti omuleela Yehova itthu sootheene sinnixupa, nroromelaka weera onnaniiwa ni onoonikhavihera. — Nsal. 145:18, 19.

20. Moota heeni nsivelo na Yehova ninnaattamelihaaya wa yoowo?

²⁰ Hiiha ntoko hiyo onnisivelaaya woora mooro emaara yooriira, hiyo nintthuneya omwaattamelaka Yehova. Nnaamweera nsivelo na Yehova nreene noowera, nno ninnanimaaliha. Nto mmuhuleleke murima anyu Yehova weera moone nsivelo nawe mweekumini mwanyu. Vaavo nnoonaahu nsivelo nno, ootheene hiyo pooti ohima ha: “Miyo kinnatthuna”! — Nsal. 116:1.