MWAHA ONTHOKORORIWA 31
“Mukhale òlipa ni òhittikinyeya”
“Asinn’aka òsivelayaxa, mukhale òlipa ni òhittikinyeya.”—1 AKOR. 15:58.
ETXIPO 122 Nikhaleke Oowiilipiha, ni Oohittikinyeya!
ELE NINKELA AHU OXUTTERA a
1-2. Wa mukhalelo heeni mukristu onlikanaawe ni epreediyu? (1 Akorinto 15:58)
OKHWIPI wa eyaakha ya 1970, yaapatxeriwa otekiwa epreediyu yoophiyaka 60 andaare oJapão, ecidade ya oTóquio. Atthu yaawehaweha yannikoha waari weera epreediyu ele yanwera ovilela erisa ya ephattu ntoko itetere seereya ikwaha sintxipale ecidade ene yeele. Esiiri aya yaari tiivi? Eri yooweera alipa yaateka epreediyu ele, yaawehaweha itthu sootthuneya saakela olipiha epreediyu ele weera ehimore. Makristu enlikana ni epreediyu ele yoorakamela osulu. Moota heeni?
2 Mukristu ori poothe ontthuneya okhalano moonelo eriyari neeriyari, woohima sa okhala oolipa ni opaka itthu moowakuveya. Wakhala mukristu onaakiha malamulo a Yehova ontthuneya akhaleke oolipa ni ohittikinyeya. (Mmusome 1 Akorinto 15:58.) Akhala haawo, ‘onookhala oolikaneene’ ni khanrowa opaka etthu eneera emuriipihe murima Yehova. Opwaha mwa yeeyo, mukristu ontthuneya okhala ‘oowiiyeviha’ naari otthuneya okhala oowiisaakuviha. (Yak. 3:17) Mukristu onxuttera okhalano moonelo ola eriyari-neeriyari khonaakhulela opaka etthu yoohireera nnaamweera anyesereriwaka. Mwa yoosoma ela, nnoorowa woona moota heeni nintthuneyaahu okhala oolipa ni oohittikinyeya. Opwaha mwa yeeyo nnoorowa woona itthu Satana onvarihelaawe muteko weera anikhulumule emaara ninvirelelaahu okhala oolipa.
NNAAKHALE HAYI OOLIPA
3. Mwa ebuukhu ya Miteko 15:28, 29 malamulo heeni nimphwanyaahu a anamalamulela mutokweene?
3 Ntoko namalamulela mutokweene, Yehova onnavirelela waavaha atthu awe malamulo ooreera. (Yes. 33:22) Mwa ntakihero, Mukuttula Woolamulela wa eseekulu yoopatxera ohoonihera mikhalelo miraru sootthuneya seiyo akristu entthuneyaaya otthara weera ekhale oolipa: (1) omukokhorela paahi Yehova ohiya amiluku eethiru, (2) ottittimiha waara wa ephome, ni (3) otthara malamulo a mBiblyani. (Musome Miteko 15:28, 29.) Makristu enrowa otthara moota heeni mikalelo iya miraru?
4. Ninrowa woonihera hayi weera nimmukokhorela Yehova paahi? (Apokalise 4:11)
4 Nimukokhoreleke Yehova paahi ohiya a miluku eethiru. Khalayi owo aahaaleela Ana Israeli weera yaatthuneya omukokhorela Yehova paahi. (Ola. 5:6-10) Ni Yesu emaara eererinwaawe ni Satana owo aahoonihera weera onnatthuneya omukokhorela Yehova paahi. (Math. 4:8-10) Mwaha wa yeeyo, hiyo khaninkokhorela ilatarathu, ahooleli a ittiini, atthu oovuwa a mulaponi ntoko atthu ooweepa, maxogadori ni anamalamulela niwoonaka ntoko amiluku. Hiyo noolakela omukokhorela paahi Yehova yoowo ori ‘mpattuxa a itthu soothesene.’—Mmusome Apokalise 4:11.
5. Mwaha wa heeni nnaakiheraahu nlamulo na Yehova woohima sa ottittimiha waara wa ekumi ni ephome?
5 Ninnaakihera nlamulo na Yehova woohima sa ottittimiha waara wa ekumi ni ephome. Mwaha wa heeni? Mwaha wooweera wa Yehova ephome entaphulela ekumi ni eyo ti yootepa otthuneya wa yoowo. (Onam. 17:14) Emaara Yehova aawaakhulenlaawe atthu okhuura inama, owo aawooperera weera ehikhureke ni ephome aya. (Eph. 9:4) Owo aavirelela ovaha nlamulo na Mose wa Ana Israeli woohima sa yeeyo. (Onam. 17:10) Ni owo aavarihela muteko Mukuttula Woolamulela wa eseekulu yoopatxera weera awooperere makristu ovirelela “ohitxa ephome.” (Mit. 15:28, 29) Moohihovela, hiyo ninniiwelela nlamulo nna vaavo ninthanlaahu moota wookosoopiwa hospitaale. b
6. Nniilipihera hayi weera nikhale moovarihana ni malamulo a Yehova?
6 Hiyo ninneettela malamulo a Yehova. (Aheb. 13:4) Nivarihelaka masu a murummwa Paulo aahimmaawe eeraka “muttaruxe” sootthuna sa weerutthuni, eyo tiiyo, okhala oolipa weera nimalamalihe sootthuna soonanara sa weerutthuni. Opwaha mwa yeeyo, hiyo ninnasepa oweha itthu saakela oneeriha okonihana woohireerela. (Akol. 3:5; Yobi 31:1) Emaara hiyo nneereriwaahu opaka itthu soonanara, moowaakuveya hiyo ninnasepa okhalano miyuupuwelo soonanara seiyo saakela onanariha onthamwene nraahuno ni Yehova.
7. Eheeni nlakenlaahu opaka, ni mwaha wa heeni?
7 Yehova ontthuna weera hiyo nimwiiweleleke ni “murima wothene.” (Arom. 6:17) Malamulo a Yehova tootthuneya wa hiyo ni ikano sawe ti sooreera. (Yes. 48:17, 18; 1 Akor. 6:9, 10) Hiyo ninniilipihera omuhakalaliha Yehova ni okhalano mukhalelo mmuha-moharu nasalimu aaraaweno, owo olempe ha: “Kòthetemaniha murim’aka, wera otthare malamul’anyu, ehuhu eri yothene, vohihiyerereya.” (Nsal. 119:112) Mwa yeeyo Satana oneereke ovirelela ontteettheiha, itthu heeni owo onvarelawe muteko?
SATANA OMPAKA EHEENI WEERA ATTHEETTHEIHE NROROMELO NAHU?
8. Satana onvarihela moota heeni ottharatthara weera antteettheihe?
8 Ottharatthariwa. Satana onnavarihela etthu eri poothe weera atteettheihe nroromelo nahu, yoolakelaawe eri otthuna ‘onikhuura’ ni omalamaliha onthamwene nraahuno ni Yehova. (1 Ped. 5:8) Eyo yaaheereya ni makristu akhalayi awo yannattharatthariwa woopopihiwa ni wiiviwa mwaha wa yoolakelaaya ya okhala oororomeleya. (Mit. 5:27, 28, 40; 7:54-60) Olelo Satana, onnavirelela waattharatthara atthu a Muluku. Eyo ennooneya emaara asinna ni asirokora oRusia ni ilapo ikina, enttharatthariwaaya ni othorihiwa moohireerela otribunaale, ni anamavaanyiha enneerera waattharatthara asinna ni asirokora.
9. Nvahe ntakihero nnoonihera otthuneya wa wiikosoopa okhanyereriwa woohireerela.
9 Okhanyereriwa woohireerela. Satana onnavarihela muteko miteko “sowarala.” (Aef. 6:11) Nrowe noone ntakihero na munna mmoha oniitthaniwa Bob, aavoreiwa ni waatthuneya weera apakiwe operasau. Owo aahaaleela ameediku weera khaarowa waakhulela ovaheriwa ephome ori wootheene, ni ameediku yaahaakhulela ottittimiha yoothanlaawe. Ohiyu mukina, meediku ole aarowa omuxekura Bob amusi awe epwanheene owannyaya, ni aamuleela Bob weera khaarowa ovaheriwa ephome, mene yaarowa ovarela mmatatani wakhala weera onnatthuneya ovarihela muteko. Owo uupuwela weera Bob aamutxentxa miruku sawe mwaha wooweera amusi awe khiyaarivo. Mene Bob aari oolipa, ni aahima weera kharowa ovaheriwa ephome eri poothe.
10. Mwaha wa heeni myuupuwelo sa atthu siraaya muraakho? (1 Akorinto 3:19, 20)
10 Myuupuwelo sa atthu. Wakhala weera nnoona itthu ntoko atthu enoonelaaya, hiyo pooti omuhiya Yehova vomoha ni malamulo awe. (Mmusome 1 Akorinto 3:19, 20.) “Miruku sa elapo” emaara sintxipale sinnikhanyerera opaka miteko sa erutthu. Akristu akina oPérgamo ni oTiatira yannakokhorela soolohera sa ethiru. Yesu aavaha miruku miloko seiyo sapaka itthu soonanara ntoko okonihana woohireerela. (Apok. 2:14, 20) Olelo, ninnaviriha maxupo ennikhanyerera opaka soonanara. Amusi ahu ni asinthamwene ahu akina pooti onikhanyerera opaka itthu sa weerutthuni. Mwa ntakihero, awo pooti oneerela weera ntthareke sootthuna sa murima ahu ehimaka weera malamulo a mBiblya ti akhalayi.
11. Vaavo ninvirelelaahu okhala oolipa, nintthuneya osepa heeni?
11 Imaara sikina, hiyo pooti wuupuwelaka weera moota Yehova oneettihaawe itthu khokwanenle. Hiyo pooti weereriwa “opwaha seiye silempwe.” (1 Akor. 4:6) Tiyeeyonto asitokweene a ittiini a mahiku a Yesu yaakhalano mathowa mwa soottheka saatthu. Awo yaanantxeerera malamulo ni yaanaalemeliha atthu. (Math. 23:4) Yehova onvarihela muteko mareherero awe ni masu awe weera oneettiheke. Khanaano mathowa yaawo enkela onneeriha waatxerera malamulo owo onnivahaawe. (Mir. 3:5-7) Mene nto, khanintthuneya ohiya otthariha masu elenpwale mBiblyani naari waantxeerera miruku sahu.
12. Moota heeni Satana onsarihaawe elapo ela ni “miruku ni masu a ethiru”?
12 Soonyoonyiha. Satana onnavarihela muteko “miruku ni masu a ethiru” ni “makhovelelo àtthu ni ikano sitokotoko sa velaponi” weera aawoke atthu ni waakawanya. (Akol. 2:8) Mpuwa mwa eseekulu yoopatxera, miruku sa ethiru iyo saahela mpuwa miruku sa filosofia, myuupuwelo saatthu ni sooxuttiha sa aYuda sahaavarihana ni Biblya ni yooxuttiha yooweera ettittimiheke vantxipale nlamulo na Mose. Nto iwo waari wootha mwaha wooweera yannaakhoottihera atthu oxuttera ekhaikhai ni miruku sa Yehova. Olelo tho, Satana onnavarihela muteko redes sociais weera amwaramware soowootha ntoko iyo ni mitthenka soohireerela seiyo enkumiheraaya ahooleli a ipoliitika, eyo yohooneya mpuwa mwa eretta ya COVID-19. c Anamoona a Yehova antxipale yaahaakhela miruku orweela mmarehereroni a Yehova, ni miruku iyo saahaakhavihera ohikhala ooxupeya ni itthu atthu yaahimaaya mwaha woowera etempu ele saasara sooweereya ni mitthenka soowootha.—Math. 24:45.
13. Mwaha wa heeni nintthuneyaahu owehaweha itthu seera sinthweelelihe?
13 Itthu soothweeleliha. Nihihiye owehexexa ‘itthu soophwanela.’ (Afil. 1:9, 10) Itthu soothweeleliha pooti omaliha etempu ahu yintxipale nihiyaka opaka itthu sootthuneya. Itthu sa mweekumini ntoko otxa, owura ni waasaasa yoowiikhuuriha naahelaka nipuro noopatxera itthu iyo, sinookela oothweeleliha. (Luka 21:34, 35) Opwaha mwa yeeyo, mahiku ootheene ninniiwa soopaka sa ipoliitika, nintthuneya nihiiweleleke mwaha wooweera sinonthweeleliha. Ni nnoopatxera okhalano muupuwelelo wa epartidu mmurimani mwahu ni mmuupuweloni mwahu. Satana onvarihela muteko itthu iya weera antteettheihe weera nihiye ovara itthu sooreera. Nrowe noone moota ninkelaahu olipanano Satana ni ovirelela okhala oolipa.
MOOTA HEENI NINKELAAHU OVIRELELA OKHALA OOLIPA?
Ovirelela okhala oolipa, ophimelela sa wiivaherera ni obatiziwa wanyu, osoma masu a Muluku ni ophimelela ele musommaanyu, ovirelela okhalano murima woolipa ni mmuroromeleke Yehova (Nwehe iparagrafu 14-18)
14. Etthu heeni enrowa onikhavihera weera nivirelele okhala oolipa vaavo nnanvarelaahu Yehova?
14 Muupuweleleke wiivaherera ni obatiziwa wanyu. Nyuwo mwaapaka itthu piili iya mwaha wooweera mwaatthuna okhala vakhiviru ni Yehova. Nkuupuwelelani etthu yookhavihenreni waakhulela weera moophwanya ekhaikhai. Nyuwo mwaaxuttera ikhaikhai sa Yehova ni mwaapatxera omuttittimiha ni omusivela Tiithi anyu a wiirimu, opwaha mwa yeeyo nyuwo mwaahunnuwihera nroromelo nanyu nenno nookhavihenreni ottharuwa mwa itthu soonanara mwaapakaanyu khalayi. Murima anyu wooweeriha ohiya opaka itthu soonanara moowiiwana ni mukhalelo wa Muluku, ni nyuwo mwaataphuwa moonelelakaru weera Muluku wohoolevelelani. (Nsal. 32:1, 2) Nyuwo mwannoonela mitthukumano ni mwaapatxera waaxuttiha atthu akina ele mwaaxuttenraanyu. Ntoko mukristu oowiivaherera ni oobatiziwa, nyuwo vano muneetta ephiro ya ekumi, ni moolakela ohihiya weettela ephiro ela.—Math. 7:13, 14.
15. Moota heeni osoma ni ophimelela onnikhaviheraaya?
15 Musomeke ni ophimelela masu a Muluku. Hiihaale ntoko mwiri onkhalaaya woolipa wakhala ni mikakaari soowiixera, hiyo tho pooti okhalano nroromelo noolipa wakhala weera mikakaari sahu ti masu a Muluku. Emaara mwiri ununnuwaaya, mikakaari saya sinniixera sikelaka vathi. Naasomaka ni ophimelela, ninnalipiha nroromelo nahu ni ninnaroromela weera iphiro sa Muluku ti sooreera. (Akol. 2:6, 7) Mphimelele moota miruku sa Yehova, waakosoopa wawe atthu ni moota aaweettihaawe atthu awe, waakhavihenraaya arumeyi akhalayi. Mwa ntakihero, Ezekiyeli aawehexexa moota nlaika nimoha naarinkaaya etemplu. Yoowooniheriwa ela yaamulipiha Ezekiyeli, nave yoowoonihera ela enrowa onikhavihera emaara nnaakiheraahu malamulo a Yehova weera okokhorela wawe okhale woottela. d (Ez. 40:1-4; 43:10-12) Hiyo tho ninnattottela mureerelo vaavo nniivahaahu etempu weera nixuttere ni ophimelela itthu soowiixera siri mBiblyani.
16. Moota heeni okhalano murima woolipa waamukhavihenraaya Bob? (Nsalmu 112:7)
16 Nivirelele okhalano murima woolipa. Mwene Davidi aahoonihera nsivelo nawe noolipa vaavo eepale awe eeraka: “Wolipa ti murim’aka, Muluku”. (Nsal. 57:8) Naamuroromelaka Yehova nnookhalano murima woolipa. (Musome Nsalmu 112:7.) Moone moota eyo yaamukhavihenraaya Bob, yoowo ohimmwale woopatxerani. Vaavo aaleelinwaawe weera yaakela ovariheliwa ephome wakhala weera ennahaaweleya, owo aahaakhula eeraka, wakhala weera waamutthuneya ovaheriwa ephome owo anvinyawo hospitaale iwe moowaakuveya. Noovira etempu, Bob aahimme ha: “Miyo nkaakhanle ooxupeya naari oowoova.”
Nakhalano mathipelo oolipa moomunepani, nnoovirelela okhala oolipa, nihipwatthaka maxupo heeni ninkelaahu okumanano muhoolo (Nwehe eparagrafu 17)
17. Yooweereya ya Bob ennixuttiha heeni? (Nwehe efootu.)
17 Bob aavirelela okhala oolipa mwaha wooweera owo aahithanla varaatxiru weera anvirelela okhala oolipa ahinaaye orowa hospitaale. Yoopatxera, owo aatthuna omuhakalaliha Yehova. Yanaaveeli, owo aahisoma moomaaleleya woohima sa waara wa ephome ni ekumi mBiblyani ni mu iliivuru sahu. Yanaararu, owo aahisuwela weera otthara malakihero a Yehova enrowa omphwanyiha mareeliho oohimala ni ennanikosoopa ni ennanivaha ekumi yooreera. Hiyo tho nnoowera okhalano murima woolipa, nihipwatthaka maxupo heeni ninvirihaahu.
Baraki ni anakhotto awe, moolipa murima emutuphelaka Sisara ni anakhotto awe (Mwaha eparagrafu 18)
18. Moota heeni ntakihero na Baraki ninnixuttihaaya omuroromela Yehova? (Nwehe efootu ya vakaapani.)
18 Mmuroromeleke Yehova. Moone moota Baraki itthu saamukhumenlaawe nnene mwaha woomuroromela Yehova. Nnaamweera khawaawereya wooneya espada elapo yootheene, Yehova aamuleela Baraki moota aakelaawe ovolowa ni owana ni Sisara mwene oKanani. (Aph. 5:8) Namuku mwaamuthiyana, Debora, aamuleela Baraki weera akhuruwe akumane ni Sisara vamoha ni ikaaro sawe sa eyuuma sookwana 900. Nnaamweera ikaaro iye sa eyuuma saamurowa omukhavihera Sisara owina ekhotto ele, Baraki aahiiwelela ni aarowawo. Vaavo anakhotto yaaronwaaya omwaako Tabori, Yehova aahirumiha epula ekhuruwaka wiirimu. Ikaaro sa eyuuma sa Sisara saahaankelela mmatopeni, ni Yehova aaheeriha weera Baraki awine ekhotto ele. (Aph. 4:1-7, 10, 13-16) Vamoha-moharu, Yehova onnoonikhavihera wakhala weera ninnamuroromela owo ni ororomela mareherero awe.—Ola. 31:6.
MUTHANLE OVIRELELA OKHALA OOLIPA
19. Mwaha wa heeni nyuwo muntthunaanyu ovirelela okhala oolipa?
19 Ekhotto ahu eri ovirelela okhala oolipa vaavo ninkhalaahu elapo ela ya Satana. (1 Tim. 6:11, 12; 2 Ped. 3:17) Nikhaleke oolipa weera nihihasuliwe ni ale ennittharatthara nave weera nihiwokiwe ni miruku seethiru ni othweelelihiwa. (Aef. 4:14) Ohiya eyo, nivireleleke okhala oolipa, ni nimukokhoreleke Yehova moohittikinyeya nave tho wiiwelela malamulo awe. Etempu emoharu, nintthuneya okhala oowiiyeviha. Yoosoma enttharelana, ninkela woona moota Yehova ni Yesu eraaya matakihero oomalela aatthu oowiiyeviha.
ETXIPO 129 Nimphavela Ovilela
a Ovinyera mahuku Adamu ni Heva, Satana onnavirelela waawoka atthu weera yiithanleleke meekhaaya soopaka sooreera ni soonanara. Owo onnapaka eyo olelo va, ni ontthuna weera hiyo nihiiweleleke malamulo a Yehova, naari otthara miruku ninvahiwaahu mmarehereroni. Mwaha ola onookela onikhavihera woona moota ninkelaahu wiikosoopa ni mikhalelo sa elapo ela ya Satana ni enookela onikhavihera weera nivirelele okhala oolipa ni omwaattamela Yehova.
b Weera musuwele sintxipale woohima sa makristu mwaha wa heeni anttharaaya nlamulo na Muluku woohima sa ephome, nwehe yoosoma 39 ya eliivuru Mukhaleno ekumi yoohimala!.
c Nwehe mwaha oneera “Proteja-se contra a desinformação” va jw.org.
d Weera musuwele sintxipale, nwehe ikapiitulu 13 ni 14 ya eliivuru A Adoração Pura de Jeová É Restaurada!