1. Pedru oonenle hayi vaavo Yesu aapankaawe mwiiriira ni omukhavihera ovara ihopa sintxipale?

 PEDRU aaviriha ohiyu wootheene amiseraka, mene nto khaavanre naari ehopa emoha. Nto owo aatikhina vaavo Yesu aahimmaawe ha: “Osuserihe ni nvonyere matthavi anyu vowixa, wera nvare.” (Luka 5:4) Pedru khaaroromela weera aamuvara ihopa weiwo Yesu aamweerenlaawe weera avonyere matthavi ale. Nnaamweera vareene hiiho, owo aapaka ele aavekelinwaawe ni Yesu. Emaara owo aasuserinhaawe matthavi ale, nto aahoonelela weera aavara ihopa sintxipale mpaka ntthavi nne naapatxera opereya mwaha woolemela. Vaavo oonelenlaawe weera ole waari mwiiriira, Pedru ni asilopwana akina yaari ni yoowo ‘yaapatxera woova.’ Avinyaka Pedru aahima ha: “Pwiya, susá wa miyo, niwoko miyo kà mulipa òttheka.” (Luka 5:6-9) Vanooneya weera Pedru khiisoona weera aari mutthu oophwanelela weera amwaattameleke Yesu.

2. Mwaha wa heeni oraaya wootthuneya oxuttera ni ntakihero na murummwa Pedru?

² Pedru aahima ekhaikhai owo mweekhaikhai aari “mulipa òttheka.” Nave Biblya, onnahima weera ikwaha sikina Pedru annapaka naari wuuluma itthu seiyo muhoolo mwaya aattharunwaawe. Neereke nyuwo munniisoona ntoko Pedru? Neereke yookhala etthu muntthuneyaanyu otxentxa mweekumini mwanyu naari owina mukhalelo mmoha woonanara? Mwa yeeyo, oxuttera woohima sa murumwa Pedru onimookhaviherani nyuwo ohiyeleela yoowehereraanyu. Moota heeni? Nkuupuwelani ha: Waakhanle weera Yehova khaatthuna, owo khaarowa waakhulela weera soottheka sa murummwa Pedru silempwe mBiblyani, mene sootheka iyo soolempwa mBiblyani weera sinikhavihere olelo va. (2 Tim. 3:16, 17) Oxuttera ni mulopwana ola aarinono okhulumuwa ni miyuupuwelo ntoko sawihu enoorowa onikhavihera osuwela weera Yehova khanniweherera weera hiyo nimalele, mene etthu Yehova ontthunaawe tiyooweera nihikhulumuwe ni ovirelela opaka ele ninweraahu nnaamweera nikhulumuwaka.

3. Mwaha wa heeni nihintthuneyaahu okhulumuwa?

 ³ Mwaha wa heeni oraaya wootthuneya ohikhulumuwa? Sookhala miruku sineera: Ovirelela opaka itthu veeli-veeli, mutthu onnawera opaka nnenesene etthu eyo. Mwa ntakihero, alipa ooweepa itxipo, ennatthuneya ovarela muteko ikaruma saya soowiipano ikwaha sintxipale weera awere ovarela nnene sene ekaruma eyo. Mwa etempu ene yeeyo, envarihelaaya ikaruma iyo, nnaamweera eweraka ovarihela nnene sene, awo pooti ikwaha ikina ohirumiha nnene, nnaamweera vareene hiiho, owo khonhiya orumiha ikaruma iyo. Owo onnavirelela orumiha veeli-veeli weera axuttere nnene sene. Emoha-moharu, hiyo nnaamweera niwinneene mukhalelo mmoha woonanara, ni evinreene etempu ninnatthikela owanano mukhalelo owo, nnaamweera vareene hiiho hiyo nintthuneya wiilipihera weera niwine veeli mukhalelo owo. Ootheene hiyo, ninnuuluma naari ninnapaka itthu soohireera seiyo ninttharuwaahu evinreene etempu, menento nnaamweera vareene hiiho, khanintthuneya okhulumuwa mwaha wooweera napaka haawo Yehova oneereke onikhavihera oreherera mukhalelo ahu. (1 Ped. 5:10) Vano nrowe noone ntakihero na ohikhulumuwa wa Pedru. Opixa murima Yesu aamoonihenraawe Pedru nnaamweera aapaka soottheka, pooti onikhavihera ovirelela omukokhorela Yehova.

4. Moovarihana ni Luka 5:5-10, Pedru iisoonela hayi, ni Yesu ammaalinhe moota heeni?

⁴ Biblya khonhima mwaha wa heeni Pedru iisoonaawe okhale “mulipa òttheka” naari yoottheka heeni Pedru aahimaawe. (Mmusome Luka 5:5-10.) Mene apaale pooti weera Pedru aahinta opaka soottheka sitokweene, Yesu aasuwela weera Pedru aamoova apaale mwaha wooweera owo khiisoona okhala oophwanelela. Mene Yesu aasuwela weera Pedru aamurowa ovirelela okhala oororomeleya, vano Yesu mwa nsivelo aamuleela Pedru weera ‘ahiye woova.’ Masu ale yannoonihera weera, Yesu annamuroromela Pedru ni eyo yaatxentxa ekumi awe. Pedru vamoha ni munna awe Andreya, noovira etempu awo yaahiya muteko yaavaraaya woototha ihopa ni yaamutthara Yesu omutekoni woolaleera, mwaha woopaka eyo awosa yaahaakhela mareeliho mantxipale a Yehova. — Mar. 1:16-18.

5. Mareeliho heeni Pedru aakhenlaawe mwaha woowina woova wawe ni waakhulela nwopelo wa Yesu?

⁵ Ntoko mutthareli a Yesu, Pedru aakhalano ekumi yootikhiniha. Owo aamoona Yesu alamihaka iretta sa atthu, waahela mpuwa ale yaahasuliwa ni minepa soonanara mpakana aamoona Yesu aavinyererihaka alipa ookhwa. b (Math. 8:14-17; Mar. 5:37, 41, 42) Pedru tho aakhalano yooloha ya omoona Yesu areene Mwene  a Omwene wa Muluku, eyo yaari etthu yanvanre murima. (Mar. 9:1-8; 2 Ped. 1:16-18) Pedru aahoona itthu ahaarowaawe owera woona ahaakhanle mutthareli a Yesu. Moohihovela, owo aaphwanya ohakalala vantxipale mwaha woomutthara Yesu ni owina mikhalelo sawe soonanara ni mwaha wookhalano eparakha yoowaakhela mareeliho mantxipale.

6. Neereke Pedru aawina okhulumuwa wawe moowaakuveya? Muthalihe.

⁶ Nnaamweera onne ni iiwaale itthu sooreeera vaavo aaraawe ni Yesu, Pedru nlelo annawanano ni mukhalelo wookhulumuwa. Moone matakihero vakhaani. Vaavo Yesu enraawe weera aatthuneya ohaawa weera sikwaniheriwe iprofesiya sa mBiblyani, Pedru aamuleela Yesu weera eyo khayaarowa weereya. (Mar. 8:31-33) Ni ikwaha sintxipale Pedru ni oohusera akina a Yesu, yannavaanyihana etthunaka osuwela weera taani aari ootthuneyaxa. (Mar. 9:33, 34) Ohiyu woomalihera wa Yesu, Pedru aapaka etthu yoohireera athikilaka naaru na mulopwana mmoha. (Yoh. 18:10) Ni ohiyu ene yoole, Pedru annoova etthu yeereya mpakana aaphiyera omukhootta Yesu ikwaha iraru weera khaari nthamwene awe. (Mar. 14:66-72) Etthu eyo yaamweeriha Pedru winla vantxipale mooriipiwa murima. — Math. 26:75.

7. Yesu avinyererakaru, anvanhe eparakha heeni Pedru?

⁷ Pedru aariipiwa murima vantxipale mwaha wa etthu aapankaawe. Nnaamweera vareene hiiho, Yesu khaamunyanyanle Pedru. Yesu vaavo aavinyererihinwaawe, owo anvaha eparakha ekina Pedru weera oonihere omusivela wawe. Yesu aamuthanlela Pedru muteko wookukhula iputtiputthi sawe. (Yoh. 21:15-17) Ni Pedru aakwanihera yoothanleliwa eyo. Pedru aarowa oYerusalemu nihiku na Pentekoste ni aahoottihiwa ni munepa wootteela.

8. Etthu heeni Pedru aapankaawe emaara aaraawe Wantiyokiya?

⁸ Nnaamweera aari mukristu oothanliwa, Pedru aawanano ni maxupo a okhulumuwa. Eyaakha ya 36 Kristu aawiiyeene, Muluku aamurumiha Pedru wa Korneliu yoowo ahaari muyuda. Vano Korneliu aahoottihiwa ni munepa wootteela ni waahooneya weera “Muluku khanono nthalu” ni ale yahaamuroromela Muluku, naari neere ale yahaakhanle aYuda yaakhalano eparakha yooweerela eparte muloko wa ekristu. (Mit. 10:34, 44, 45) Ni muhoolo mwaya, Pedru aapatxera otxa vamoha ni ale yaahaakhanle aYuda, etthu yeeyo ahintalaawe opaka mweekumini mwawe. (Agal. 2:12) Mene, akristu akina yuupuwela weera khiwaari wooreera otxa vamoha ni ale yahaakhanle aYuda. Ni emaara akristu awo yaaronwaaya wAntiyokiya, Pedru aahiya otxa vamoha ni ale yaahaari aYuda, vanooneya weera owo aamoova waaveehiha aYuda ale. Murummwa Paulo, aahoona weera Pedru aapatxera okhala namootha ni owo aamuttaruxa ohoola wa atthu ootheene. (Agal. 2:13, 14) Nnaamweera aapanke etthu ele, Pedru khaakhulumunwe ni owo annapaka ele aaweraawe. Mene eheeni yaamukhavihenre?

9. Yohani 6:68, 69, onoonihera moota heeni weera Pedru aari oororomeleya?

⁹ Pedru aari oororomeleya owo khaahiñye etthu naari mutthu weera emuhihe omutthara Yesu. Mwa ntakihero, ekwaha emoha aahoonihera nroromelo nno vaavo Yesu aahimmaawe etthu yeeyo atthareli akina yaahiwexenxaaya. (Mmusome Yohani 6:68, 69.) Nto mwaha wa yeeyo, atthareli antxipale yaahiya omutthara Yesu ehinvahaka ehuhu weera iiwanyeihe mwaha ole, menento Pedru khaapanke eyo. Owo aari ororomeleya ni aahima weera Yesu paahi taakhalanne ‘masu a ekumi yoohimala.’

10. Yesu oonihenre moota heeni weera annamuroromela Pedru? (Nwehe efootu.)

¹⁰ Yesu khaamunyanyanle Pedru. Ohiyu woomalihera wa ekumi ya Yesu elapo ela ya vathi, Yesu aasuwela weera Pedru ni oohusera akina yaamurowa omutthawa. Nnaamweera vareene hiiho, Yesu aamuleela Pedru weera annasuwela  weera owo anvirelela okhala oororomeleya. (Luka 22:31, 32) Yesu aasuwela weera “munepa wòlipa, nto erutthu yòlosowa”. (Mar. 14:38) Mwa yeeyo, mutthareli awe ole oosiveleya, nnaamweera ikwaha sikina aamukhontte Yesu weera khaamusuwenle, Yesu ovinyererihiwakaru, soolepa sinnahima weera Yesu aakumana ni Pedru vaavo Pedru aaraawe meekhaawe. (Mar. 16:7; Luka 24:34; 1 Akor. 15:5) Eyo ennoonihera weera yaamulipiha Pedru, yoowo aari ooxupeya mwaha wa etthu aapankaawe!

11. Yesu aamuroromelinhe moota heeni Pedru weera Yehova ammukosoopa?

¹¹ Yesu aamuroromeliha Pedru weera Yehova aamurowa omukosoopa. Yesu avinyererihiwakaru, owo aakumana tho ni Pedru vamoha ni oohuseraawe akina ekwaha yanaaveeli ni ekwaha ela Yesu aaheeriha weera Pedru vamoha ni oohusera akina evare ihopa sintxipale mwa miiriira. (Yoh. 21:4-6) Mwiiriira ole, moohihovela, waamweeriha Pedru osuwela weera Yehova aamurowa waavaha itthu sootheene enhaawelaaya sa weerutthuni. Apaale Pedru aahuupuwela masu ale Yesu uulummaawe eeraka aamurowa waakosoopa ale ‘enhela nipuro noopatxera Omwene wa Muluku’. (Math. 6:33) Sootheene iya saamukhavihera Pedru ohela nipuro noopatxera muteko awe woolaleera ohiya muteko woototha. Owo aalipa murima ni aalaleya nihiku na Pentekoste a 33 noomala Kristu owa, aakhaviheraka atthu antxipale waakhulela mitthenka sooreera. (Mit. 2:14, 37-41) Ni noovira etempu, owo aahaakhavihera asamariya ni ale yahaakhanle aYuda okhala atthareli a Kristu. (Mit. 8:14-17; 10:44-48) Moohihovela, Yehova aanvarihela muteko Pedru mwa mikhalelo sootikhiniha weera aapurulele mmulokoni atthu a miloko soovirikana.

12. Ntakihero na murummwa Pedru ninrowa onikhavihera hayi vaavo ninwanaahuno maxupo mwa etempu yintxipale?

¹² Yehova pooti onikhavihera weera niwere ovilela. Ekhaikhai weera khaiyene ti wookhweya ikwaha sootheene ovilela, otepaxa wene vaavo ninwanaahuno maxupo mwa etempu yintxipale. Ikwaha sikina, maxupo ahu pooti okhala ooxupa opwaha maxupo Pedru ovirinhaawe. Mene Yehova onnanivaha ikuru ninhaawelaahu weera nihitthikele ottuli. (Nsal. 94:17-19) Mwa ntakihero, moone ntakihero na munna mmoha yoowo mukhalelo awe ahinaaye oxuttera ekhaikhai waari wookonihana alopwanaru ni aapaka eyo mwa iyaakha sintxipale. Menento, aatxentxa moomalela ekumi awe vaavo aaxuttenraawe ikhaikhai sa mBiblyani ni anapatxera okhala moovarihana ni ele aaxuttenraawe. Nnaamweera vareene hiiho, ikwaha sikina  owo annawanano miyuupuwelo soonanara. Nto etthu heeni yaamukhavihenre ovilela? Owo ohimme ha: “Yehova onnakilipiha. Ni nikhavihero na munepa wootteela . . . , Miyo kooxuttera weera tiwoowereya ovirelela weettela ephiro yeekhaikhai. Nnaamweera kireene oohimalela, Yehova onnavirelela okivarihela muteko ni okilipiha.”

13. Ninrowa otakiha hayi ntakihero na murummwa Pedru? (Miteko 4:13, 29, 31) (Nwehe efootu.)

¹³ Ntoko nonnaahu, ikwaha sikina, Pedru annapaka soottheka mwaha woowaawoova atthu. Mene Pedru annavekela avekelaka ikuru, ni owo annawera opaka itthu moolipa murima. (Musome Miteko 4:13, 29, 31.) Hiyo tho nnoowera owina mukhalelo woowaawoova atthu. Moone ele yeereñye ni munna mmoha mmiravo yoowo oniitthaniwa Horst, antale okhala wAlemanha mpuwa mwa ekhotto yanaaveeli ya elapo yootheene. Ikwaha sikina oxikola, owo aananvuwiha “Heil Hitler!”. Vaavo Horst aalenlaawe asitiithi awe, awo khaamuximwenle. Ohiya opaka eyo, awo yaavekela ootheene invekelaka Yehova weera anvahe olipa murima owo aahaawelaawe. Ni nikhavihero na asitiithi awe ni omuroromela wawe Yehova, Horst aawera okhalano ikuru aahaawelaawe weera avirelele okhala oolipa. Noovira etempu, Horst ohimme ha: “Yehova khonakinyanyale.” c

14. Moota heeni ahooleli ansivelo enrowaaya waakhavihera ale ekhulumunwe?

¹⁴ Yehova ni Yesu khenrowa oninyanyala. Noomala Pedru omukhootta Yesu, Pedru annatthuneya opaka yoothanla yootthuneya. Neereke owo aamuhiya okhala mutthareli a Yesu naari aamurowa ovirelela ovilela? Yesu aamutxondelela Yehova weera nroromelo na Pedru nivirelele okhala noolipa. Ni Yesu aamulela Pedru weera aamuvekela Tiithi awe ni aahoonihera weera annaroromela weera Pedru aamurowa waalipiha asinnawe. (Luka 22:31, 32) Moohihovela, Pedru vaavo ikwaha sootheene uupuwelaawe masu a  Yesu annakhala oolipa! Emoha-moharu, emaara nimpakaahu yoothanla yootthuneya mweekumini, Yehova pooti onikhavihera ovirelela okhala oororomeleya. (Aef. 4:8, 11) Yehova pooti opaka eyo moorweela mwa asinna oosiveleya. Munna mmoha oniitthaniwa Paul, yoowo ori mutokweene a mmulokoni mwa iyaakha sintxipale, onneerera opaka eyo. Vaavo mutthu ontthikelaawe ottuli, owo onnamukhavihera mutthu owo wuupuwelela moota Yehova ompurulenlaawe mutthu owo mweekhaikhai. Avinyaka onnamuupuxera weera nsivelo na Yehova khaninrowa omuhiya mutthu owo otthikela ottuli. Paul ohimme ha, “Miyo koowoona asinna antxipale ootteettheya ekhaviheriwaka ni Yehova yaavirelela ovilela.”

15. Ntakihero na Pedru ni Horst, nnoonihera moota heeni weera hiyo pooti ororomela ele enhimaaya yoolepa ya Matheyo 6:33?

¹⁵ Hiihaale ntoko Yehova aamukosompaawe Pedru ni atthareli akina mwa mukhalelo wa weerutthuni, onoorowa onikhavihera hiyo tho,wakhala weera nnoohela nipuro noopatxera Omwene wa Muluku. (Math. 6:33) Horst yoole ohimmwale woopatxerani, annuupuwela okhala pioneiru evirakaru ekhotto ya naaveeli ya elapo yootheene. Mene owo aari mutthu oohaawa ni uupuwela weera khaarowa owera okhala pioneiru ookilaatheya. Eheeni owo aapankaawe? Owo aalakela waasaasera osuwela wakhala weera Yehova aamurowa omukosoopa, mpuwa mwa oxekuriwa ni mutokweene a esirkwiitu, owo aavara muteko woolaleera esemana yootheene. Okhwipi wa esemana ele, owo aakhala ootikhinihiwa vaavo mutokweene a esirkwiitu aamwinnyalaawe enveloope yoosareya musurukhu wa munna mmoha ahaatthuna wiisoonihera. Mpuwa mwa envelope ele waakhalamo musurukhu waaphiyera wiitxiha vaavo eeraawe akhale pioneiru mwa myeeri sintxipale. Horst aahoona weera yoovaha ele yoonihera weera Yehova aamurowa omukosoopa. Owo ooviriha ekumi awe yootheene ahelaka nipuro noopatxera Omwene wa Yehova. — Mal. 3:10.

16. Mwaha wa heeni oraaya wooreera oxuttera woohima sa Pedru ni ele aalempaawe?

¹⁶ Pedru aahakalala vantxipale mwaha wa Yesu ohimunyanyala, ntoko Pedru aavekenlaawe! Yesu aavirelela omuxuttiha Pedru weera akhale murumeyi oororomeleya ni ntakihero nooreera wa akristu. Nave tho hiyo pooti oxuttera itthu sootthuneya owo aaxuttenraawe ni Yesu. Pedru aahaaleela atthu akina woohima sa ele aaxuttenraawe vaavo aalepenlaawe ikaarta miloko miili sa eseekulu yoopatxera, ikaarta seiyo nimphwanyaahu olelo va mBiblyani. Yoosoma enttharelana, nnoorowa woona ikaarta iyo ni moota heeni ninrowaahu ovarihela muteko olelo va.