1. Yehova anvarihenle moota heeni Pedru ahinaaye okhwa?

 MURUMMWA Pedru annasuwela weera moohilekela aamurowa okhwa. Mpuwa mwa iyaakha sintxipale avaraka muteko moororomeleya, owo anneetta ni Yesu, ni aapatxera muteko woolaleera mapuro oohiyana, ni owo annarumeela ntoko mmoha a Mukuttula Woolamulela. Mene muteko wa Pedru nlelo khawaamanle. Eyaakha ya 62-64 nuumala Kristu owa, owo aahuupuxeriwa olepa ikaarta piili. Iliivuru seiyo nimphwanyaahu mBiblyani, Pedru oopatxera, ni Pedru anaaveli. Pedru annaweherera weera ikaarta iye saamurowa waakhavihera akristu nnaamweera Pedru owo aarowa okhwa. — 2 Ped. 1:12-15.

2. Mwaha wa heeni ikaarta sa Pedru saalepinwaaya ehuhu yooreerela?

² Pedru aahuupuxeriwa olepa ikaarta piili etempu yeeyo asinna yaavirihaaya maxupo ‘othananihiwa mwa sooweereriwa sintxipale.’ (1 Ped. 1:6) Alopwana a murima woonanara, yanneerera onanariha muloko ni sooxuttiha soowootha ni opaka itthu soonanara. (2 Ped. 2:1, 2, 14) Noovinya vawo akristu yaarowa oviriha maxupo a “okota wa itthu sothesene” naari neere anakhotto a oRoma yaarowa opwetexa muttetthe wa oYerusalemu, ni omaliha mukhalelo wa eyuda mwa etempu ene yeele. (1 Ped. 4:7) Moohihovela, ikaarta sa Pedru saahaakhavihera akristu ale osuwela itthu yaarowaaya opaka, ni wiireherera weera evirihe maxupo yaarowaaya okumanano muhoolo. b

3. Mwaha wa heeni oraaya wootthuneya owehexexa nnene ikaarta sa Pedru?

³ Ekhaikhai weera Pedru aalepela ikaarta iye akristu yaakhala etempu ene yeele, menento Yehova oheeriha weera ikaarta iye silempwe mBiblyani. Nave tho hiyo pooti oxuttera  ni ikaarta iyo. (Arom. 15:4) Hiyo ninkhala elapo ela yootepa onanara, nave tho noorukureriwa ni atthu ehimmukokhorela Yehova. Mwaha wa yeeyo, ninnaviriha maxupo, ni ikwaha sikina onnakhala wooxupa omukokhorela Yehova. Opwaha mwa yeeyo moohipisa ninrowa oviriha maxupo matokweene opwaha ale yaavirihaaya aYuda khalayi. Mwa yeeyo, soowuupuxera iya sa ikaarta piili sa Pedru, ti sootepa otthuneya wa hiyo, iyo sinoorowa onikhavihera ovirelela oweherera nihiku na Yehova, owina owoova atthu ni wooniherana nsivelo noolipa mukina ni mukhwaawe. Nave soowuupuxera iya sinoorowa waakhavihera asitokweene a mmulokoni woona moota heeni enrowaaya okosoopaka nnenesene iputtiputthi sa Yehova.

4. Moovarihana ni 2 Pedru 3:3, 4, eheeni ekhanle yootteettheiha nroromelo nahu?

⁴ Hiyo nrukurerinwe ni atthu ehinroromela iprofesia sa mBiblyani. Atthu akina ennaanitheya mwaha wooweera awo ennalaleya omala wa elapo okhuma khalayi. Akina ennanitheya yeeraka elapo khewa emala. (Mmusome 2 Pedru 3:3, 4.) Emaara nniiwaahu itthu iya suulummwaka ni atthu a muttetthe ahu, naari makoleegaahu oomutekoni naari amusi ahu, nroromelo nahu pooti otteettheya. Menento Pedru oohima etthu enrowa onikhavihera.

5. Eheeni enrowa onikhavihera ovirelela oweherera moopixa murima omala wa elapo? (2 Pedru 3:8, 9)

⁵ Atthu akina enoona weera Yehova onnapisa omaliha itthu soonanara siri elapo ela. Mene masu a murummwa Pedru ennanikhavihera osuwela weera moota Yehova onoonaawe etempu ti moovirikana ni moota atthu enoonaaya. (Mmusome 2 Pedru 3:8, 9.) Wa Yehova iyaakha miili nihiku nimoha. Yehova toopixa murima ni khantthuna weera mutthu ori ootheene anyaanyiwe. Mene yaphiya etempu yooreerela anoorowa omaliha itthu sootheene soonanara, nave hiyo nookhalano eparakha yoovarihela muteko etempu ela ehanle weera naalaleere atthu a elapo yootheene.

6. Eheeni nintthuneyaahu opaka weera nuupuweleke nnene nihiku na Yehova? (2 Pedru 3:11, 12)

⁶ Murummwa Pedru aanooperera hiyo ‘wuupuwelela’ nihiku na Yehova. (Mmusome 2 Pedru 3:11, 12.) Ninrowa opaka hayi eyo? Ti wooreera wuupuwelelaka mahiku ootheene mareeliho ninrowaahu okhalano elapo enyowani. Muupuweleleke mureene nipuro nooreera, envira epheyo yooreera, moonaka winkhela eyootxa yooreera, ni nwaakhelaka amusi anyu ni asinthamwene anyu yaakhwiiye, nave tho mwaaxuttihaka atthu ale yaakhanle khalayi moota sikwanenlaaya iprofesia sa mBiblyani. Wuupuwelela itthu iya onoorowa wookhaviherani ovirelela okhala oolipa ni ororomela weera omala wa itthu soonanara ori vakhiviru. Wakhala weera hiyo ‘ninnasuwela itthu iya’ ni osuwela sihinaaye weereya, hiyo ‘khaninrowa ohapuxiwa’ ni soowootha sa elapo ela. — 2 Ped. 3:17.

7. Moota heeni owoova atthu onrowaaya onivoleela?

⁷ Hiyo noosuwela weera nihiku na Yehova nri vakhiviru. Nto nintthuneya opaka ele ninweraahu weera naaleele atthu mitthenka sooreera. Nto ikwaha sikina mwaha wa maxupo, hiyo pooti ohikhalano olipa murima. Mwaha wa heeni? Mwaha wooweera hiyo pooti okhala oowoova ntoko yeereñyaaya ni murummwa Pedru. Ohiyu ole aathorihiwaawe Yesu, Pedru annoova vantxipale mpaka owo ohima weera khaari mutthareli a Yesu, nave ikwaha sintxipale owo annakhootta weera oomusuwela Yesu! (Math. 26:69-75) Menento Pedru aawina woova iwo ni muhoolo mwaya  aalepa masu ni murima wootheene eeraka: “Masu aya òwopopiha muhòve nari muhituthuwe.” (1 Ped. 3:14) Masu ala a murummwa Pedru ennanoonihera weera pooti owera owina owoova atthu.

8. Eheeni enrowa onikhavihera owina owoova atthu? (1 Pedru 3:15)

⁸ Eheeni enrowa onikhavihera owina owoova atthu? Murummwa Pedru olempe ha:“ Mwàttelihe Apwiya Kristu mmurimani mwanyu.” (Mmusome 1 Pedru 3:15.) Eyo enhela mpuwa ophimelela owera Pwiyaahu Mwene Yesu Kristu araaweno. Vaavo munkhalaanyuno eparakha yoowaaleela atthu akina mitthenka sooreera neereke nyuwo munnanyoonyiwa naari munnoova? Mmuupuweleleke Mwene ahu Yesu. Vaavo enkhumelelaaya eyo, mmuupuweleleke Yesu alamulelaka wiirimu ni arukurerinweene ni malaikha mantxipale. Muupuweleke weera owo ookhalano “owerya . . . wirimu ni elapo ya vathi.” Nave tho owo onroromeliha eeraka “miyo kiri ni nyuwo mahiku othene mpaka emalihero ya olumwenku.” (Math. 28:18-20) Murummwa Pedru aanooperera ‘okhala oolikaneene’ weera nuulume woohima sa ele ninroromelaahu. Neereke nyuwo waamoosivelani omulaleera mukhwiinyu omutekoni, oxikola naari nipuro nikina? Muupuwelele emaara heeni mwaarowaanyu osiveliwa opaka eyo ni mwiireherere wa etthu munrowaanyu wuuluma. Munvekeleke Yehova weera mukhaleno olipa murima, ni muroromeleke weera Yehova  onoorowa wookhaviherani owina owoova atthu. — Mit. 4:29.

9. Moota heeni Pedru ahoonihenraawe nsivelo ehuhu yooreerela? (Nwehe efootu.)

⁹ Pedru aaxuttera moota woowoonihera nsivelo. Owo aakhalavo vaavo Yesu aahimmaawe ha: “Kinnovahani nlamulo nnyowani, wera musivelaneke mukina ni mukhw’ awe, ntoko kosivenlakani, wera nyuwo tho musivelaneke mukina ni mukhw’ awe.” (Yoh. 13:34) Nnaamweera vareene hiiho, evinreene etempu vakhaaneene Pedru aahiya mukhalelo wa nsivelo nawe oyevaka mpaka owo aakhootta otxa vamoha ni asinna ale yahaakhanle aYuda. Murummwa Paulo aahima weera mukhalelo ole wa Pedru waari woowootha. (Agal. 2:11-14) Pedru aahaakhulela nttaruxo nne ni aaxuttera etthu ni etthu ele aapankaawe, mwa ikaarta sawe piili owo aahoonihera weera hiyo khanintthuneya ohima paahi weera ninnaasivela asinna menento ontthuneya woonihera nsivelo nno mwa itthu nimpakaahu.

10. Eheeni enrowa onikhavihera woonihera nsivelo noohihiyerereya noohootha? (1 Pedru 1:22)

¹⁰ Murummwa Pedru ohimme weera “Mwàtthune akhw’inyu vohòtha.” (Mmusome 1 Pedru 1:22.) Weera nikhaleno nsivelo nno nintthuneya weettela exariya. Exariya eyo enhela mpuwa woona weera “Muluku khanono nthalu.” (Mit. 10:34, 35) Hiyo khaninrowa woonihera weera ninnatthara ntakihero na Yesu, wakhala weera ninnaasivela asinna akina akina nihinaasivela. Ekhaikhai weera hiyo pooti osiveliwaxa ni atthu akina, hiihaale ntoko Yesu. (Yoh. 13:23; 20:2) Mene murummwa Pedru onnanuupuxera weera hiyo nintthuneya wiilipihera weera noonihere ‘nsivelo noolipa wa asinna ni arokora’ ootheene ntoko ninsivelaahu imusi sahu. — 1 Ped. 2:17.

11. Osivelana mukina ni mukhwaawe ni murima wootheene, onhela mpuwa eheeni?

¹¹ Pedru ohoonihera weera ti wootthuneya “osivelana mukina ni mukhwawe vohihiyerereya.” Osivelana mukina ni mukhwaawe voohihiyerereya ontaphulela omusivela mutthu nnaamweera antthekenleene. Mwa ntakihero, Mwaarowa opaka eheeni wakhala weera munna naari murokora oopaka etthu yoonyoonyinheni? Moohihovela, etthu yoopatxera mwaakelaanyu wuupuwela waari omutthikihera isikula ohiya omoonihera nsivelo. Menento Pedru aaxuttera ni Yesu weera otthikiha isikula ori mukhalelo Yehova ohimmusivela. (Yoh. 18:10, 11) Pedru olempe hà: “Muhilivaka yonanara ni yonanara, nari oruwana ni oruwana, koma votepaxa murelihe.” (1 Ped. 3:9) Wakhala weera nyuwo munimwaasivela asinna voohihiyerereya, nyuwo muneereke okhala mutthu ooreera murima ni muneereke omulevelela ole onooveehani.

12. (a) Okhalano nsivelo noohihiyerereya mukina ni mukhwawe, ennikhavihera opaka eheeni? (b) Moovarihana ni eviidiyu Não deixe atrapalhar nossa união, nyuwo muntthuna wiilipihera weera mpake eheeni?

¹² Mwa ekaarta awe yoopatxera, Pedru aavarihela masu ooweera ‘Nsivelo noohihiyerereya.’ Nsivelo na moota ola nnoorowa onikhavihera waalevelela atthu soottheka saya, ohiya vakhaaneene mene “sottheka sintxipale.” (1 Ped. 4:8) Apaale murummwa Pedru aahuupuwelela ele aaxuttenraawe ni Yesu mwa iyaakha sa muttuli. Etempu ene yeele, Pedru uupuwela weera aari mutthu ansivelo vaavo eeraawe munna waatthuneya olevelela “mpaka imara ithanu ni pili.” Mene Yesu aamuxuttiha Pedru ni ootheene hiyo weera ontthuneya olevelela “mpaka imara milokó mithanu ni mili,” Naari neere imaara sootheene. (Math. 18:21, 22) Wakhala weera nyuwo munnoona oxupa ovarihela muteko miruku iya, muhikhulumuwe ootheene hiyo imaara ikina onnanxupa  olevelela, mene etthu yootthuneya ori opaka ele munweraanyu weera mmulevelele munninyu ni otthikihera wiiraana ni munninyu owo. c

13. Eheeni enrowa waaxupihaka asitokweene a mmulokoni okhalano etempu weera yaalipihe asinna?

¹³ Moohihovela, Pedru khaattiwanle etthu Yesu aamulenlaawe avinyererihiwakaru eeraka: “Okukhule iputtiputthi saka.” (Yoh. 21:16) Waari weera nyuwo mwa mutokweene a mmulokoni, moosuwela weera masu ala ennoohelani mpuwa. Asitokweene toowatteliwa vantxipale, mwaha wooweera entthuneya okosoopa imusi saya, itthu sa weerutthuni, soomunepani ni sa mmuupuweloni. Nave tho asitokweene entthuneya ovaha ntakihero vaavo enrehereraaya mithukumano sa assembleya naari kongresu. Akina a yaawo aakhalano muritti wookhavihera ekomisau ya eDepartamentu eneerela eparte nyaha sa hospitaale naari eDepartamentu ya sooteka. Asitokweene a mmulokoni asilopwana oowaatteliwa.

14. Eheeni enkela waakhavihera asitokweene a mmulokoni okukhula iputtiputthi? (1 Pedru 5:1-4)

¹⁴ Pedru aalempe ha wa asitokweene a mmulokoni, “kukhulani sokukhula sa Muluku.” (Mmusome 1 Pedru 5:1-4.) Waari weera nyuwo mwa mutokweene a mmulokoni, hiyo noosuwela weera munnaasivela asinna nave munnatthuna waakosoopa nnene. Mene ikwaha sikina nyuwo pooti okhala oowaatteliwa ni ookhulumuwa vantxipale mpaka okhala wooxupa okwanihera yoothanleliwa anyu. Yakhumelela eyo muntthuneya opaka eheeni? Muulume ni Yehova mmuleelaka moota muniisoonelaanyu. Pedru alempe ha: “Ole onrumela, arumele ni ikuru seiye Muluku onvahiyaiye.” (1 Ped. 4:11) Pooti weeraka asinna ennaviriha maxupo yaawo ehinrowa omala elapo ene yeela. Mene muupuweleke weera “mukukhuli ahu mutokweene,” ori Yesu Kristu, owo pooti waakhavihera asinna awo opwaha mweeraanyu mwaakhavihere, pooti opaka eyo viinaano vaava naari elapo enyowani. Etthu Yehova onwehereraawe wa asitokweene a mmulokoni, ti yooweera yaasiveleke asinna, yaakukhuleke ni ekhaleke “ntakihero wa sookukhula iyo.”

15. Moota heeni munna mmoha onweraawe okukhula iputtiputthi sa mmulokoni? (Nwehe efootu.)

 ¹⁵ Munna mmoha oneeriwa William yoowo ori mutokweene a mmulokoni mwa iyaakha sintxipale, onnasuwela nnene sene mwaha wa heeni oraaya wootthuneya waakukhula asinna. Vaavo yaapatxenraaya eretta ya COVID-19, owo ni asinna akina yaahiireherera weera yuulumeke ni asinna a egrupu aya. Owo ohimme ha: “Asinna antxipale yaakhala meekhaaya mmawannyaya nto ti wookhweya wuupuwela itthu soohireera.” Emaara munna onvirihaawe maxupo, William onneerera omwiiwelela munna owo etthu emmuxupa ni onneerera omukhavihera. Opwaha mwa yeeyo annaasaasa iliivuru naari iviidiyu osite weera amulipihe munna owo. William onnavirelela eeraka ha: “Viinaano va ti wootthuneya waakukhula asinna, hiyo ninniilipihera vantxipale opaka ele ninweraahu weera naakhavihere atthu akina weera emusuwele Yehova. Nto nintthuneya opaka etthu emoha-moharu weera naakhavihere asinna ovirelela weetta mweekhaikhaini.”

16. Ninrowa ovarihela hayi muteko itthu nixuttenraahu ni ikaarta piili sa Pedru?

¹⁶ Mpakana va, nohoona itthu vakhaani ninxutteraahu ni ikaarta piili sa Pedru. Apaale nyuwo mohoonelela etthu muntthuneyaanyu oreherera. Mwa ntakihero, neereke nyuwo waamoosivelani wuupuwelela vantxipale mareeliho munrowaanyu waakhela elapo enyowani? Neereke nyuwo mookhalano yooluluwanya ya ovaha onamoona oxikola, omutekoni, naari nipuro nikina? Nyuwo munnawera woona mwa mukhalelo heeni munrowaanyu woonihera nsivelo noohihiyerereya wa asinna ni asirokora? Ni nyuwo asitokweene a mmulokoni, neereke muri oolikaneene weera mukukhule iputtiputthi ni murima wootheene? Apaale munnoonelela weera munnatthuneya oreherera itthu sikina, nto muhikhulumuwe. “Apwiya eri orera murima,” Awo enoorowa wookhaviherani opaka matxentxo ootthuneya. (1 Ped. 2:3) Murummwa Pedru onroromeliha ariki: “Muluku . . . onahala womalelihani nyuwo, onahala wovahani ikuru, ni owemexani.” — 1 Ped. 5:10.

17. Wakhala weera nnimwiilipihera ni omuhiya Yehova weera anxuttihe, eheeni enrowa okhumelela?

¹⁷ Woopatxerani murummwa Pedru uupuwela weera khiwaareerela okhala vamoha ni Yesu. (Luka 5:8) Akhaviheriwaka ni atthu ala eeli Yehova ni Yesu oosivela vantxipale, Pedru aavilela ni aavirelela okhala mutthareli a Kristu. Yookhumelela ti yooweera Yehova aaheeriha weera Pedru avolowe momweneni “mohimala wa Apwiy’ahu ni Nvuluxa Yesu Kristu.” (2 Ped. 1:11) Ela yaari yoovaha yootepa oreera! Hiihaale ntoko Pedru, nyuwo mwavirelela okhala oolipa ni omuhiya Yehova weera ooxuttiheni, nyuwo munoorowa waakhela ekumi yoohimala. Mweera haawo, yoophwanya ya ekumi yohimala, ti “ovuluxiwa wa munep’anyu.” — 1 Ped. 1:9.