1-2. Mwaha wa heeni oraaya wootthuneya osoma yooweereya ya Sansoni?

 EHEENI nyuwo munuupuwelelaanyu emaara muniiwaanyu nsina na Sansoni? Moohihovela, munnuupuwelela weera aari mulopwana a ikuru. Ni eyo ekhaikhai. Nnaamweera vareene hiiho, owo aapaka soothanla soonanara seiyo saamukumihenre maxupo. Nnaamweera vareene hiiho, Yehova annawehexexa itthu sooreera owo aapankaawe. Mwaha wa yeeyo, Muluku oohiya ntakihero na Sansoni mBiblyani weera nnikhavihere.

² Yehova anvarihela muteko Sansoni, weera apake itthu sootikhiniha ni weera aakhavihere ana Israeli. Sivinreene iyaakha sintxipale Sansoni akhwiiyeene, Yehova aamuupuxera murummwa Paulo weera ahele mpuwa nsina na Sansoni mwa eliista ya atthu yoonihenre nroromelo noolipa. (Aheb. 11:32-34) Ntakihero na Sansoni pooti onilipiha. Owo annamuroromela Yehova nnaamweera aaviriha maxupo. Vano nnoorowa woona moota heeni ntakihero na Sansoni ninrowaaya onilipiha ni itthu heeni sootthuneya nintthuneyaahu oxuttera nuuwo.

3. Sansoni aathanleliwe opaka eheeni?

³ Sansoni ayariwakaru, Afilisti yannaahasula ana Israeli. (Aph. 13:1) Awosa yaari atthu oowali nave mwaha wa yeeyo ana Israeli yannahaawa mmatatani mwaya. Menento Yehova aahimuthanla Sansoni weera ‘aavuluxe ana Israeli mmatatani mwa Afilisti.’ (Aph. 13:5) Eyo yaarowa okhala etthu yooxupa vantxipale. Sansoni annatthuneya omuroromela Yehova.

4. Yehova aamukhavihenre hayi Sansoni wiitaphula wa Afilisti? (Aphuki 15:14-16)

⁴ Ninrowa woona ntakihero na moota Sansoni oonihenraawe weera annamuroromela Yehova moomalela ni weera aalipa mwaha wa nikhavihero aakhelaawe wa Muluku. Emaara Afilisti yaaronwaaya oLehi weiwo waari oYuda, weera yanvare Sansoni,  asilopwana oYuda yannoova, nto awosa yaalakela onveleela Sansoni mmatatani mwa amwiittani aya. Asilopwana ale oYuda, yaamuvara Sansoni ni yaamutthuka ni mikhoyi inyowani ni yanveleela wa Afilisti. (Aph. 15:9-13) Menento “munepa wa Yahvéh wàmukhuruwela tho” nto Sansoni aataphula mikhoyi iye ni emaara ene yeeyo Sansoni ‘aattotta nikhuva na ebuuru’ ni avarihelaka muteko nikhuva nne, owo aawiiva asilopwana Afilisti oophiyaka miili! — Mmusome Aphuki 15:14-16.

5. Sansoni oonihenre moota heeni weera annamuroromela Yehova?

⁵ Mwaha wa heeni Sansoni aavarihenlaawe nikhuva na ebuuru? Eyo yaari etthu yoomalihera mutthu ori poothe eeraawe ovarele muteko ntoko ekaruma ya ekhotto. Nto moohihovela, Sansoni aasuwela weera owera wawe waakhuma wa Yehova ohiya nikhuva nne aavarihenlaawe muteko. Mulopwana ole oororomeleya aavarihela muteko ele yaari vakhiviru vawe weera akwanihere yootthuna ya Yehova. Mweekhaikhai, Sansoni aareelihiwa vantxipale etempu ele ni aahiwera waawina asilopwana ale mwaha woomuroromela Yehova.

6. Ntakihero na Sansoni ninniroromeliha eheeni?

⁶ Yehova pooti onivaha ikuru weera nikwanihere yoothanleliwa eri poothe nnaamweera sikina noonaka weera tisooxupa, owo pooti opaka eyo mwa mikhalelo sinkela ontikhiniha. Vanonto mmuroromeleke Yehova. Hiihaale ntoko aamuvanhaawe ikuru Sansoni, owo tho onookela wookhaviherani nyuwo opaka yootthunaawe wakhala weera nyuwo munnamuroromela ni munnaasa nikhavihero nawe. — Mir. 16:3.

7. Nvahe ntakihero nnoonihera mwaha wa heeni oraaya wootthuneya waasaasa nikhavihero wa Yehova.

⁷ Asinna ni asirokora ootheene yaawo envara muteko wooteka Impa sa Omwene mmarehereroni mwa Yehova, ahoonihera omuroromela Yehova. Khalayi asinna yannateka Impa sintxipale sa Omwene ni ipreediyu sikina sa mareherero a Yehova, mene noovira etempu, atthu antxipale yannabatiziwa ni mareherero a Yehova yannatthuneya opaka matxentxo. Asinna yaawo enwehaweha  muteko wooteka, yaahaasa miruku sa Yehova ni yaaheerera iphiro sikina. Mwa ntakihero othuma ipreediyu sikina sootekiwa sene. Robert, munna mmoha yoowo ovanre mwa iyaakha sintxipale atekaka Impa sa Omwene elapo yootheene, ohimme ha: “Woopatxerani khiwaari wookhweya waakhulela moota itthu seeraaya seettihiweke, mwaha wooweera opaka itthu moota ola waari woovirikana ni ele naapakaahu mwa iyaakha sa muttuli. Menento asinna yaari oolikaneene weera yiikhovelelihe ni matxentxo ale yaapakiwe ni yaahoonelela weera Yehova annareeliha matxentxo ale.” Nna ti ntakihero nnoonihera moota Yehova oneettihaawe mareherero awe weera akwanihere yootthunaawe. Ti wooreera ikwaha sikina, ootheene hiyo wiikoha ha: ‘Neereke miyo kinnaasaasa miruku sa Yehova ni kiri oolikaneene opaka matxentxo weera kikwanihere yootthunaawe?’

8. Sansoni aapanke eheeni vaavo nanvonlaaya ntthona?

⁸ Apaale nyuwo munnuupuwelela itthu sootikhiniha Sansoni aapankaawe. Mwa ntakihero, ahikunxeene nivaka naari ekatana mmatatani mwawe owo aamwiiva kharamu mmoha ni muhoolo mwaya aawiiva asilopwana Afilisti oophiyeraka 30 yaakhala muttetthe wa Askeloni. (Aph. 14:5, 6, 19) Sansoni aasuwela weera ahaakhaviheriwa ni Yehova khaarowa owera opaka itthu sootheene iye. Ni eyo yaahooneya vaavo nanvonlaaya ntthona awiivakaru Afilisti ookwana 1.000. Owo aapanke eheeni? Ohiya waasaasa maahi ni oreherera mwaha ole meekhaawe, owo aahivekela nikhavihero wa Yehova. — Aph. 15:18.

9. Yehova aapanke eheeni vaavo Sansoni aamuvekenlaawe nikhavihero? (Aphuki 15:19 ni enoota)

⁹ Yehova aahaakhula nivekelo na Sansoni ni owo mwa miiriira aahipaka nlitti na maahi. Vaavo Sansoni aawunraawe maahi ale, ‘ikuru sawe samuthikela ni ahimumula.’ (Mmusome Aphuki 15:19 ni enoota.) Ni nlitti nne na maahi, naahikhala mwa iyaakha sintxipale mpaka etempu mprofeti Samuweli aalepaawe eliivuru ya Aphuki. Vaavo ana Israeli yeeraaya eweheke nlitti nne na maahi, awo yaaheereke wuupuwelela weera yamuroromela vale Yehova, owo onookela waakhavihera wa maxupo eri poothe yeeraaya ekumanekeno.

10. Weera nikhaviheriwe ni Yehova nintthuneya opaka eheeni? (Nwehe efootu.)

¹⁰ Hiyo nintthuneya waasaasera nikhavihero na Yehova, nihipwatthaka owera nraahuno woopaka itthu naari itthu ikavi nipankaahu mpuwa mwa mareherero a Yehova, hiyo nintthuneya okhala atthu oowiiyeviha ni waakhulela weera nnoowera opaka itthu Yehova onnivekelaawe wakhala weera ninnamuroromela. Hiihaale ntoko Sansoni saamutthikenlaawe ikuru vaavo aawunraawe maahi Yehova anvanhaawe, hiyo tho nnoorowa okhalano ikuru soomunepani wakhala weera nnoovarihela nnene itthu sootheene Yehova onnivahaawe. — Math. 11:28.

11. Moota heeni ninkelaahu ottottela mureerelo ni nikhavihero na Yehova? Nvahe ntakihero.

¹¹ Moone ntakihero na munna mmoha oneeriwa Aleksey onkhala oRussia yoowo onviriha maxupo ootthara-tthariwa. Eheeni yaamukhavihenre okhala oolipa nnaamweera aaviriha maxupo ale? Owo ni amwaariye yaahimpaka prograama weera elipe moomunepani, owo onnathaliha: “Miyo kinneerera ovirelela opaka itthu soomunepani ntoko yoosoma ya omeekha, ni nihiku nri poothe oxeexelo miyo ni amwaaraka ninnatthekula woohima sa yoolepa ya nihiku ti nihiku ni ninnavekela vamoha wa Yehova.” Eheeni ninxutteraahu ni ntakihero na Aleksey? Ohiya paahi wiiroromela  meekhiinyuru, nintthuneya omuroromela Yehova, moota heeni? Nikhalanaka prograama yooreera woohima sa itthu soomunepani yoowo onkela olipiha nroromelo nahu, napaka haawo Yehova onookela oreeliha wiilipihera wahu weera nimukokhorele. Owo aamulipiha Sansoni ni moohihovela onookela onilipiha hiyo tho.

12.Yoothanla heeni yoonanara Sansoni aapankaawe, ni mwaha wa heeni Sansoni othelana ni Dalila waaraaya woovirikana ni athiyana akina?

¹² Sansoni aari mutthu oohimalela ntoko hiyo, owo aapaka soothanla soonanara. Yoothanla emoha aapankaawe yaamukumihera maxupo mantxipale, vaavo Sansoni aavaraawe ntoko mphuki mwa etempu vakhaaneene, owo “àsiveliwa ni muthiyana òxepani o Sereki, nsina nawe Dalila.” (Aph. 16:4) Mwa etempu ya muttuli Sansoni aamuthela muthiyana mmoha mufilisti. Menento aari Yehova aamuleelale weera apake eyo, mwaha wooweera eyo yaamukumihera eparakha yoowana ni Afilisti. Ni muhoolo mwaya, Sansoni aahikela owannyawe muthiyana namararuwa muttetthe wa Afilisti oGaza. Mwa etempu ele Yehova aamukhavihera Sansoni weera ateexe milako sa ecidade ele weera aalosowihe. (Aph. 14:1-4; 16:1-3) Mene wa Dalila waari woovirikana mwaha wooweera aari mwiisraeli. Nto othelana ni Dalila, khiwaarowa onvaha eparakha Sansoni weera awane ni Afilisti.

13. Dalila ampakenle eheeni Sansoni?

¹³ Afilisti yanvaha Dalila musurukhu mwiintxipale weera amuwoke Sansoni. Mwaha woomusivela vantxipale Dalila, Sansoni khaawenre woona etthu Dalila aarowaawe opaka. Dalila annamukhanyerera Sansoni weera amuleele esiiri ya olipa wawe. Ni muhoolo mwaya Sansoni aamuleela esiiri ele Dalila. Mooriipiha murima, Sansoni teerinhe weera owo avirihe maxupo ale, mwaha wooweera mwa etempu  vakhaani owo aayeleela ikuru sawe ni mahala a Yehova. — Aph. 16:16-20.

14. Maxupo heeni aavirinhaawe Sansoni mwaha woomwiiwelela Dalila?

¹⁴ Sansoni aahihaawa vantxipale mwaha woomuroromela Dalila ohiya Yehova. Afilisti yaamukuxa enamusola maitho avinyaka yaamukuruxela oGaza. Ni atthukiwakaru ni onyooro wa ekhoobiri, aalamuliwa opirikixa ixilo mukalipooso. Ekwaha ekina Sansoni aahiwuulihiha muru atthu amuttetthe ole, mene ekwaha ele owo ti uulihinwe muru apakiwaka ntoko kaporo. Ni Sansoni, aavirelela wuulihihiwa muru vaavo Afilisti yaamukunxaaya ofestani waya weiwo yaamutthapelaaya muluku aya Dagoni. Awo yuupuwela weera muluku aya taakhavihenre weera envare Sansoni. Afilisti yaapaka etthu emaara ele ni awo yaamukumiha Sansoni mukadeya, “wera emutheye oholo waya.” — Aph. 16:21-25.

15. Sansoni oonihenre moota heeni weera aatthikela omuroromela Yehova? (Aphuki 16:28-30) (Nwehe efootu ya vakaapani.)

¹⁵ Sansoni aapaka yoottheka etokweene nnaamweera vareene hiiho, owo aavirelela omukokhorela Yehova. Owo aahaasaasa eparakha weera apake yootthuna ya Yehova, naari neere, owana ni Afilisti. (Mmusome Aphuki 16:28-30.) Sansoni aamuvekela Yehova eeraka ‘mukihiye emaara ela paahi weera kiwinlele ikukuttula Afilisti.’ Yehova aahaakhula nivekelo na Sansoni ni emaara ele mwa miiriira owo anvaha ikuru Sansoni. Mwa yeeyo, Sansoni emaara ele aawiiva Afilisti antxipale opwaha ekumi awe yootheene.

16. Ninxuttera eheeni ni mikhalelo Sansoni oonihenraawe atthekakaru?

¹⁶ Ekhaikhai weera Sansoni aaviriha maxupo mwaha wa soopaka sawe soonanara, mene owo khaahiñye waasaasa opaka yootthuna ya Yehova. Emoha-moharu enneereya ni hiyo, vaavo nimpakaahu yoottheka ninnatthuneya ottaruxiwa naari emaara ekina ninnayeleela eparakha naaraahuno, nto nimulikanxeraka Sansoni, hiyo tho khanintthuneya weemexera omukokhorela Yehova. Muupuweleleke weera Yehova khannihiya. (Nsal. 103:8-10) Nnaamweera nipakaka itthu soonanara, nintthuneya ovirelela okhala oororomeleya wa Yehova weera anivarihele muteko ntoko hiihaale anvarihenlaawe Sansoni.

17-18. Eheeni muxuttenraanyu ni ntakihero na Michael? (Nwehe efootu.)

¹⁷ Moone ele yeereñye ni munna mmoha oneeriwa Michael. Munna owo annaatteliwa vantxipale ni miteko sa mmulokoni, avaraka  ntoko murummwa oorumeela ni pioneiru ookilaatheya. Mene mooriipiha murima owo ahipaka yoottheka ni aahiyeleela iparakha sootheene aaraaweno mmulokoni. Owo ohimme ha: “Itthu sannakeettela nnene ni miyo kaakhalano itthu sintxipale mmutekoni mwa Yehova mene mootutuxera, waakhala ntoko miyo kaamanne exiri. Miyo kaasuwela weera Yehova khaarowa okihiya mene kannuupuwela wakhala weera kaamuwera otthikihera onthamwene kaaraakano ni Yehova naari onvarela mmulokoni naari opaka itthu sintxipale ntoko kaapakaakano khalayi.”

¹⁸ Moohakalaliha, Michael khaakhulumunwe, noovira etempu owo aatthikela miritti sootheene aaraaweno, ni olelo onnavara ntoko mutokweene a mmulokoni ni pioneiru ookilaatheya. Owo onnathaliha: “Miyo kannaasaasera otthikihera onthamwene kaaraakano ni Yehova kimuhulelaka murima aka wootheene, omusoma Biblya ni ophimelela ele khaasomaaka. Nikhavihero kaakhelaaka otepaxa wene na asitokweene a mmulokoni, naakikhavihera osuwela weera Yehova ninlelo annakikhavihera. Vano miyo kinnavara mmulokoni ni yoowuupuxera ya murima yooreera ni eyo yookixuttiha weera Yehova anookela omulevelela mutthu ori poothe anttharuwa moomalela.” Eheeni ninxutteraahu? Hiyo pooti waakhulela weera Yehova anookela onivarela muteko naari onreeliha nnaamweera nimutthekenleene, vaavo nniilipiheraahu oreherera soottheka sahu ni ovirelela omuroromela yooworu paahi. — Nsal. 86:5; Mir. 28:13.

19. Vano munoonela hayi vaavo musommaanyu yooweereya ya Sansoni?

¹⁹ Mwa yoosoma ela, nohoona sooweereya soohakalaliha sa mweekumini ya Sansoni. Owo aari mutthu oohimalela, nnaamweera vareene hiiho owo anniilipihera onvarela Yehova nnaamweera ikwaha sikina aapanke itthu soonanara ni Dalila. Nave Yehova khaamuhiñye Sansoni, Yehova aamuvarihela muteko Sansoni mwa mikhalelo sootepa otikhiniha, ni wa Yehova, nlelo annamoona Sansoni okhala mulopwana aarinono nroromelo noolipa. Mwa yeeyo, owo onnaphwanyeya mpuwa mwa eliista ya arumeyi ale oororomeleya nnaaphwanyaahu va eliivuru ya Aheberi ekapiitulu ya 11. Ti woohakalaliha osuwela weera nimmukokhorela Tiithi ansivelo yoowo ontthuna onlipiha otepaxa wene vaavo hiyo ninkhulumuwaahu, vanonto hiihaale ntoko Sansoni, hiyo ninnatthuneya onvekela Yehova neeraka: “Pwiy’aka, Yahvéh, okùpuwele miyo. Okivahe tho ikuru.” — Aph. 16:28.