1. Itthu heeni apaale sikhanle soonikhumelela oxikola naari omutekoni?

 NYUWO munoona hayi vaavo koleegaanyu onoopakelaaweni makoho woohima sa ele munroromelaanyu? Neereke nyuwo munnanyoonyiwa? Antxipale a hiyo ninnanyoonyiwa. Menento makoho ntoko awo pooti onikhavihera osuwela ele mutthu onuupuwelelaawe, ni ennanivaha eparakha yoomulaleera mitthenka sooreera. Menento ikwaha sikina atthu ennapaka makoho awo ni yootthuna weera naakhulaneke nto eyo ehintikhiniheke mwaha woowera atthu antxipale enniiwa itthu sintxipale soowootha woohima sa ele ninroromelaahu. (Mit. 28:22) Ntoko ninsuwelaahu, hiyo ninkhala “mahiku òmalihera” ehuhu ene yeeyo atthu yaarowaaya okhala “òwuma murima” mpaka “òtakhala.” — 2 Tim. 3:1, 3.

2. Mwaha wa heeni ontthuneyaaya okhala atthu oopixa murima?

² Apaale nyuwo munnuupuwela, kinrowa okhala hayi oomaala vaavo atthu akina eneereraaya ovaanyihanaka ni miyo woohima sa nyaha sa mBiblyani? Moosuwela etthu enrowa wookhaviherani? Opixa murima. Mutthu oopixa murima, khonnyoonyiwa moowaakuveya, opwaha mwa yeeyo, owo onnawera wiiwehexexa emaara ontannyiwaawe ni atthu akina. (Mir. 16:32) Mene ekhaikhai weera onkhweya wuuluma ohiya opaka. Nyuwo munrowa okhala hayi mutthu oopixa murima? Munrowa waakhula hayi moopixa murima vaavo mutthu mukina onookohaaweni woohima sa ele munroromelaanyu? Ni wakhala weera nyuwo tiithi naari maaye munrowa waakhavihera hayi anamwane anyu waakihera nroromelo naya moopixa murima? Ninrowa woona mpuwa mwa yoosomeene yeela.

3. Mwaha wa heeni nneeraahu okhala atthu oopixa murima, khontaphulela olosowa? (2 Timotheyo 2:24, 25)

³ Okhala oopixa murima khontaphulela olosowa. Opixa murima mukhalelo wa atthu oolipa. Nintthuneya okhala oolipa mmuupuweloni  weera mutthu avirelele okhala oomaala otepaxa wene vaavo onvirihaawe maxupo. Opixa murima mukhalelo onhela mpuwa “sowima sa Munepa.” (Agal. 5:22, 23) Masu eegregu woohima sa opixa murima, ennavariheliwa muteko weera iiwanyeihiwe kavalu mmoha oowali yoowo aavaraxa muteko ni ohasuliwa. Nnaamweera aahasuliwa ni ovaraxa muteko, kavalu ole onnavirelela okhala oomaaleleya ni okhala a ikuru. Menento hiyo ninrowa owera hayi opaka eyo? Moota heeni ninrowaahu okhala oopixa murima ni mwa etempu ene yeeyo okhala a ikuru? Hiyo khaninrowa owera opaka eyo meekhiihu, hiyo nintthuneya ovekela munepa wootteela weera onikhavihere okhalano mukhalelo owo wooreera. Ni aakhala matakihero mantxipale enoonihera weera onnawereya oxuttera okhalano mukhalelo owo. Asinna ni asirokora antxipale ennavirelela okhala oomaaleleya nnaamweera etannyiwaka, ni awo ennavaha ntakihero nooreera wa atthu akina. (Mmusome 2 Timotheyo 2:24, 25.) Moota heeni nyuwo munrowaanyu wunnuwihera mukhalelo woopixa murima?

4. Eheeni yaamukhavihenre Isakhi okhala oopixa murima?

⁴ MBiblyani sookhalamo itthu sintxipale sinoonihera weera opixa murima mukhalelo wootepa otthuneya. Moone ntakihero na Isakhi. Emaara yeeyo aaronwaawe okhala o Gerari, Afilisti yaawo aawaattamannaaweno, yannamukhalela ehatxe ni yaawala iluusi soothesene arumeyi aatithawe yaathimpaaya. Ohiya owanela iluusi iye saawalinwe, Isakhi ni amusi awe yaathaama ni yaarowa waasa nipuro elapo ekina, iwe tho yaahithipa iluusi sikina. (Eph. 26:12-18) Nnaamweera vareene hiiho, Afilisti yaamutthara-tthara emweerelaka weera maahi a iluusi aathimpaawe, yaari awaya. Menento Isakhi aavirelela okhala oomaaleleya. (Eph. 26:19-25) Menento Isakhi, aawenre moota heeni okhala oomaaleleya nnaamweera aatannyiwa? Moohihovela, owo aaxuttera ntakihero na asitithawe Abrahamu ni Sara. Abrahamu aari amurettele ni Sara aari ‘woomaala ni woopixa murima.’ — 1 Ped. 3:4-6; Eph. 21:22-34.

5. Matakihero heeni enoonihera weera asitiithi pooti waaxuttiha anamwane aya okhala oopixa murima?

⁵ Nyuwo pooti waaxuttiha anamwane anyu okhala oopixa murima. Moone ntakihero na Maxence orinono iyaakha 17. Oxikola naari mmutekoni moolaleera, owo annaaphwanya atthu ootthuna waakhulana. Mene asitithawe toopixa murima ni aamuxuttiha woonihera mukhalelo woopixa murima. Asitiithi a Maxence ehimme ha, “Maxence ohoonelela weera ti wookhweya wuupuwela moohireerela vaavo nintannyiwaahu, mene mutthu oolipa mweekhaikhai, onnakhala oomaaleleya.” Moohakalaliha, Maxence ohuunnuwihera mukhalelo wa opixa murima.

6. Moota heeni nivekelo ninrowaaya onikhavihera okhala atthu oopixa murima?

⁶ Etthu heeni nintthuneyaahu opaka wakhala weera mutthu onnahima itthu soohireera woohima sa Yehova naari Biblya? Hiyo nintthuneya onvekela Yehova munepa wootteela ni miruku weera nikhale oomaaleleya. Menento, nintthuneya opaka eheeni noonelela weera noopaka etthu yoohireerela? Hiyo pooti onvekela tho Yehova miruku weera naakhule mooreerela ekwaha ekina. Napaka eyo, Yehova onoonivaha munepaawe wootteela ni onoonikhavihera hiyo wiiwexexa ni okhala oomaaleleya emaara nintannyiwaahu.

7. Etthu heeni nraahuno ennikhavihera owehexexa ele nimpakaahu naari nnuulumaahu emaara ninvirihaahu maxupo? (Miruku 15:1, 18)

⁷ Iveersu sintxipale sa mBiblyani sinoorowa onikhavihera okhala oomaaleleya emaara yeeyo ninvirihaahu maxupo. Munepa wootteela pooti onikhavihera wuupuwelela iveersu iyo. (Yoh. 14:26) Mwa ntakihero, miruku nimphwanyaahu mu eliivuru ya miruku, pooti onikhavihera okhala oomaaleleya. (Musome Miruku 15:1, 18.) Eliivuru eyo tho, ennoonihera mwaha wa heeni oraaya wootthuneya okhala oopixa murima  emaara yeeyo ninvirihaahu maxupo matokweene. — Mir. 10:19; 17:27; 21:23; 25:15.

8. Mwaha wa heeni nintthuneyaahu wuupuwelelaka nnene nihinaaye omwaakhula mutthu onnikoha ele ninroromelaahu?

⁸ Nave tho opixa murima pooti onikhavihera. (Mir. 19:11) Mutthu a miruku onnawera wiiwehexexa vaavo mutthu mukina ommukohaawe soororomela sawe. Mwa ntakihero, makoho makina ni soohima sikina sinkhala ntoko nluku na egeelu. Moota heeni? Vaavo mutthu onnikohaawe soororomela sahu, ti wooxupa osuwela yootthuna ya mutthu owo. Mwa yeeyo, ti wooreera nihaakunve omwaakhula mutthu owo, wuupuwelela weera hiyo khanisuwenle etthu emweerinhe opaka nikoho nno. — Mir. 16:23.

9. Moota heeni Gedeyoni oonihenraawe miruku ni opixa murima vaavo asilopwana a wEfrayimi yaamukohaaya moonyoonyiwa?

⁹ Moone etthu Gedeyoni aapankaawe vaavo anakhotto a wEfrayimi yaamunyemenlaaya. Awo yaatthuna osuwela mwaha wa heeni Gedeyoni ahaarummaawe orowa owana ni amwiittani a Israeli. Menento, eheeni yaaweeriha awo wuuluma moota ene yoole? Nnaamweera yuuluma ni onyoonyiwa, Gedeyoni aahoonihera miruku, ni owo aahoonelela mwaha wa heeni awo yuulumaaya moonyoonyiwa, ni aawaakhula moomaaleleya. Yookhumelelaaya yaari eheeni? Biblya onnahima  weera, asilopwana ale “esar’aya yàrirya.” — Aph. 8:1-3.

10. Eheeni enrowa wookhaviherani osuwela moota woomwaakhula mutthu anookohani woohima sa ele munroromelaanyu? (1 Pedru 3:15)

¹⁰ Apaale koleegaahu oomutekoni naari oxikola, pooti onikoha mwaha wa heeni ninroromelaahu miruku sa mBilyani. Emaara nnaakhulaahu hiyo ontthuneya opaka ele ninweraahu weera naakihere ele ninroromelaahu ni emaara emoha-moharu woonihera weera ninnattittimiha moonelo wa atthu akina. (Mmusome 1 Pedru 3:15.) Ohiya oweha makoho awo ntoko mutthu owo ontthuna weera nivaanyihaneke, waamukhala wooreera oweha makoho awo ntoko eparakha yoosuwela etthu eri yootthuneya wa mutthu owo. Nihipwatthaka etthu emweerinhe mutthu owo opaka nikoho, hiyo nintthuneya omwaakhulaka mutthu owo mooreerela ni moomaaleleya. Waakhula wahu pooti omukhavihera mutthu owo otthuna osuwelaxa mwaha owo, naari mutthu owo oreene oowali naari oonyoonyiha, hiyo nintthuneya omwaakhulaka mooreerela. — Arom. 12:17.

11-12. (a) Eheeni nintthuneyaahu wuupuwelela nihinaayee omwaakhula mutthu makoho ooxupa? (Nwehe efootu.) (b) Nvahe ntakihero na moota nikoho nimoha ninrowaaya opatxeriha otthekula ni mutthu.

¹¹ Apaale koleegaanyu mmoha oomutekoni ontthuna osuwela mwaha wa heeni nyuwo muhintthapelaanyu nihiku nooyariwa, muupuwele ha: Neereke owo onuupuwela weera hiyo khanintthuna otthekula? Naari apaale onuupuwela weera okhala weera khanintthapela nihiku nooyariwa nnoorowa onanariha onthamwene wa omutekoni wahu? Hiyo pooti omuxukhurela koleegaahu oomutekoni mwaha woowaapwattha atthu akina, nave omuleela weera hiyo ninnatthuna otthekula ni okhalano asinthamwene ooreera. Neera haawo ninrowa ovukula maxupo a makoleegaahu ni opatxeriha otthekula naawo woohima sa ele Biblya onhimaawe woohima sa mahiku ooyariwa.

¹² Hiyo pooti opaka etthu emoha-moharu vaavo sinkhumelelaaya nyaha sa manyaku-nyaku. Mwa ntakihero, apaale koleegaanyu ooxikola, onnahima weera Anamoona a Yehova entthuneya otxentxa moonelo eraayano woohima sa okonihana alopwanaru naari athiyanaru. Neereke mutthu owo onuuluma eyo mwaha wooweera khaanono soohimmwa sooreera woohima sa Anamoona a Yehova? Naari apaale onuuluma eyo mwaha wooweera ookhalano mmusi awe naari nthamwene awe onkonihana alopwanaru naari athiyanaru? Naari onuupuwela weera hiyo ninnawiitta ale enkonihana alopwanaru naari athiyanaru? Apaale waamukhala wooreera omuleela mutthu owo weera hiyo ninnaapwattha atthu ootheene, nave tho noosuwela weera mutthu ori poothe ookhalano eparakha yoopaka soothanla mwaneenaawe. b (1 Ped. 2:17) Pooti hiyo okhalano eparakha yoomoonihera mutthu owo moota otthara miruku sa mBiblyani onnihakalalihaaya.

13. Moota heeni nyuwo munrowaanyu omukhavihera mutthu onuupuwela weera khonreerela omuroromela Muluku?

¹³ Vaavo hiyo nintthekulaahu ni mukhwiihu orinono mukhalelo woolipa woohima sa mwaha owo, hiyo khontthuneya wuupuwelelaka weera noosuwela etthu emmweerriha wuuluma eyo. (Tito 3:2) Mwa ntakihero, mwaarowa opaka eheeni wakhala weera koleegaanyu oxikola onnahima weera khonreerela omuroromela Muluku? Neereke mwaarowa wuupuwela weera mutthu owo onaakhulela weera itthu iroothatuwa mwaha yoowo osuwenlaawexa? Apaale owo onnuuluma eyo, mwaha wooweera ohiiwa yuulummwaka aheemela weera uupuwele. Ohiya ovaanyihanaka woohima sa soopattuxiwa, mweerere onvaha koleegaanyu ooxikola etthu eneera emweerihe wuupuwelela emaara ekina. Apaale nyuwo pooti omoonihera soohimmwa woohima sa soopattuxiwa va site jw.org. Nave nihiku nikina nyuwo pooti otthekula ni mukhwiinyu owo woohima  sa mwaha naari eviidiyu aphwannyaawe. Aani, vaavo nnooniheraahu nttittimiho mwa mukhalelo ola, onnakhala wookhweya atthu otthuna oxuttera woohima sa ele Biblya onhimaawe.

14. Niall aavarihenle moota heeni esite jw.org weera amukhavihere kolegaawe weera amwiiwanyeihe yoohimmwa yoowootha woohima sa Anamoona a Yehova?

¹⁴ Mmiravo mmoha oniitthaniwa Niall, owo aavarihela muteko esite jw.org weera awoonihere atthu weera itthu sinhimmwa woohima sa Anamoona a Yehova ti soowootha. Owo ohimme ha, “Koleegaaka mmoha aahima weera miyo nkaakhulela sooxuttiha sa siyensiya mwaha wooweera kaaroromela eliivuru elepinwe ni alopwana ohiya itthu sinhimmwa ni masiyentiista.” Okhala weera ole khaatthuna wiiwa etthu Niall aatthunaawe ohima, owo aamweerela paahi weera axekure esite ahu ya jw.org, ni avolowe va mwaha oneera “Siyensiya ni Biblya.” Evinreene etempu vakhaaneene, Niall aahoonelela weera koleegaawe ole aaxekura esite ni annoonihera ntthuno nootthekula woohima sa soopattuxiwa. Moohihovela, etthu ntoko ela pooti weereya ni hiyo.

15. Asitiithi enrowa waakhavihera hayi anamwane aya waakhula moopixa murima vaavo enkohiwaaya woohima sa ele enroromelaaya?

¹⁵ Asitiithi pooti waakhavihera anamwane aya waakhula moopixa murima vaavo enkohiwaaya woohima sa ele enroromelaaya. (Yak. 3:13) Asitiithi akina ennaaxuttiha anamwane aya emaara yeeyo empakaaya okokhorela wa veemusini. Awo ennasoma nyaha sikina sinrowa okhumelelaka oxikola, nave tho ennaaxuttiha anamwane aya moota woowaakhula ni woowuuluma moopixa murima ni ottittimiha moonelo wa atthu akina. — Nwehe ekwaadru enneera “ Wiireherera onimwaakhavihera amusi anyu.”

16-17. Mwaha wa heeni wiireherera nihinaaye waakhula onrowaaya waakhavihera amiravo?

¹⁶ Waaxuttiha amiravo pooti waakhavihera wiiwanyeeiha nnene wa atthu akina ele enroromelaaya  ni okhala oolikaneene weera yoonihere mathowa heeni enweeriha ororomela itthu Biblya onhimaawe. Eliivuru “Os Jovens Perguntam” sookhalano nyaha sinaakhavihera amiravo. Nyaha iyo, epakelinwe amiravo weera saakhavihereke okhala oolipa ni weera saakhavihere waakhula makoho empakeliwaaya ni akhwaaya. Emaara yeeyo imusi sinsomaaya nyaha iya vamoha, ootheene aya pooti oxuttera moota woowaakihera nroromelo naya moopixa murima, waakhula weiwo onrowa oweeriha atthu otthuna oxuttera woohima sa ele enroromelaaya.

¹⁷ Mmiravo mmoha oniitthaniwa Matthew onnathaliha mwaha wa heeni waaraaya wootthuneya treinamentu aamwaakhenlaawe. Emaara yaapakaaya okokhorela wa veemusini, Matthew ni asitiithi awe yannapaka ipesquisa woohima sa nyaha saarowa okhumelela. Owo ohimme ha: “Hiyo nannuupuwelela makoho yaawo makoleegaaka yaarowaaya okipakela, ni avinyaka nannapaka ipesquisa weera noone moota woowaakhula. Emaara yeeyo miyo koonelenlaaka waakhuliwa wa nikoho mwaha wa heeni kimmuroromelaaka Biblya, miyo kanniisoona okhala oolikaneene ni kannoona okhala wookhweya waakhula moopixa murima makoho kimpakeliwaaka ni atthu akina.”

18. Akolosi 4:6, onnixuttiha eheeni?

¹⁸ Ekhaikhai weera wiiwanyeeiha nnene itthu iye ninroromelaahu pooti ohaakhavihera atthu. Mene wuuluma mooreerela ni moopixa murima pooti waakhavihera. (Mmusome Akolosi 4:6.) Wuuluma woohima sa ele ninroromelaahu onoolikana ni onvonya boola ninvonyeraka mutthu mukina. Hiyo pooti onvonya boola owo vakhaaneene naari ni ikuru. Wakhala weera khannanvonya boola owo ni ikuru, onookhala wookhweya mutthu mukina omukuxa ni ovirelela onvonya boola owo. Emoha-moharu vaavo nnuulumaahu mooreerela ni moopixa murima, onnaweeriha atthu okhalano ntthuno nootthuna oniiwelela ni ovirelela otthekula, ekhaikhai weera, wakhala weera mutthu onnatthuna weera nivaanyihaneke, naari onnuuluma moohireerela woohima sa ele ninroromelaahu, hiyo khaninnyesereriwa ovirelela otthekula ni mutthu owo. (Mir. 26:4) Mene atthu antxipale khenrowa okhala hiihaawo; mweekhaikhai antxipale enoorowa oniiwelela.

19. Etthu heeni enrowa oneeriha okhala oopixa murima vaavo nnaakiheraahu nroromelo nahu?

¹⁹ Moohihovela, okhalano mukhalelo woopixa murima, ti wooreera. Nto munvekeleke Yehova ikuru weera nvirelele okhala oopixa murima otepaxa wene, vaavo munaakhulaanyu makoho a atthu envaanyiha soororomela sanyu. Muupuweleleke weera, waakhula moopixa murima pooti ohikumihera onyakulihana. Waakhula moopixa murima ni nttittimiho, pooti waakhavihera atthu akina okhalano ntthuno noowiiwa ele munxuttihaanyu woohima sa Biblya. Mukhaleke “òlikanela omwàkhula othene ole onokohani nthowa na ororomela wanyu,” mene mpakaka eyo moopixa murima ni nttittimiho. (1 Ped. 3:15) Ni mulakeleke ikwaha sootheene opaka itthu moopixa murima ni mooniheraka weera nyuwo mutthu oolipa!