MWAHA ONTHOKORORIWA 18
Mukhaleno ni mukwanihere sooluluwanya sanyu soomunepani
“Otthokelele [ophimelele] seiya, okhale’mo, wera wunnuwa wá wòneye vamaithoni va atthu othene.”—1 TIM. 4:15.
ETXIPO 84 Nivikanihe Waaphavela Atthu
ELE NINKELA AHU OXUTTERA *
1. Itthu heeni soomunepani nintthuneyaahu olepa?
NTOKO makristu eekhaikhai, hiyo, ninnamusivela vantxipale Yehova. Nave nintthuna weera muteko nnanvarelaahu owo, okhaleke woorehereya. Mwa yeeyo, wakhala weera nintthuna okwanihera sootthuna sahu, nintthuneya olepa sooluluwanya soomunepani ni okhalano mikhalelo sa ekristu ni oxuttera itthu soovareleya muteko, nave waasaasera itthu soowaakhavihera atthu akina. *
2. Mwaha wa heeni nintthuneyaahu opwatthela opaka itthu soomunepani?
2 Mwaha wa heeni nintthuneyaahu opwatthela opaka itthu soomunepani? Etthu yoopatxera, ori weera nintthuna omuhakalaliha tiithaahu oosivela a wiirimu. Yehova onnahakalala vaavo onnoonaawe nivarelaka muteko itthu sahu ni itthu ninweraahu weera ninvarele muteko. Opwaha mwa yeeyo, nintthuna weera mukhalelo ahu woomunepani waakhavihereke asinna ni asirokora. (1 Ates. 4:9, 10) Nihipwatthaka ehuhu nivirinhaahu nreene mweekhaikhaini, ootheene hiyo nnoowera opaka etthu weera nunnuwe moomunepani. Ninkela woona moota woopaka eyo.
3. Moovarihana ni 1 Timotheyo 4:12-16, eheeni murummwa Paulo amooperenraawe Timotheyo opaka?
3 Ehuhu murummwa Paulo aamulepenlaawe Timotheyo epaphelo yoopatxera, owo era areene mmiravo ni mutokweene oororomeleya. Nnamweera vaareene hiiho, Paulo aamulipihera weera avireleliheke mukhalelo awe woomunepani. (Mmusome 1 Timotheyo 4:12-16.) Muupuwela masu a murummwa Paulo, nyuwo munimoonelela weera owo aatthuna omuleela itthu piili. Etthu yoopatxera, okhaleno mikhalelo sa ekristu ntoko: Nsivelo, nroromelo ni ikharari. Arehereraka mikhalelo sawe ntoko: Omusoma Biblya ni oxuttiha. Nuupuwelaka ntakihero na Timotheyo, ninrowa woona moota woolepa sootthuna sahu sa omunepani ni oreherera mikhalelo sahu soomunepani, nave-tho nnimoona mikhalelo mikina soowantxeerera muteko woolaleera.
MUNNUWIHEREKE MIKHALELO SEEKRISTU
4. Moovarihana ni Afilipi 2:19-22, eheeni aapakaawe Timotheyo weera akhale murumeyi oovareleya muteko wamaithoni va Yehova?
4 Eheeni yaamweerihe Timotheyo okhala murumeyi oovareleya muteko wa Yehova? Saari mikhelelo sawe soowooneya sa ekristu. (Mmusome Afilipi 2:19-22.) Moovarihana ni ele murummwa Paulo amulepenlaawe Timotheyo, hiyo, ninnawera woona weera Timotheyo aari oowiiyeviha, oororomeleya ni oovara muteko. Owo annaasivela vantxipale asinna ni annaapwattha yaawo. Yookhumelela aya yaari yooweera, murummwa Paulo annamusivela Timotheyo nave khaahiyerera omuroromela anvahaka soothanleliwa sooxupa. (1 Akor. 4:17) Etthu emoha-moharu, hiyo-tho, tootthuneya wamaithoni va Yehova nave ninnavareliwa muteko mmulokoni vaavo ninkhalahuno mikhalelo seiyo simmusivela Yehova.—Nsal. 25:9; 138:6.
Muthanle mukhalelo weekristu yoowo muntthunaanyu wuunuwihera (Nwehe eparagrafu 5-6)
5. (a) Moota heeni woolepa ni okhalano mikhalelo seekristu? (b) Ntoko enooniheraaya efootu moota heeni murorkora munyowani onvaraawe muteko weera oonihere weera toopixa murima ni atthu akina?
5 Muthanle itthu sooreera. Mukhaleno munepa woovekela, moone mikhalelo muntthuneyaanyu oreherera. Muthanle itthu nyuwo muntthuneyaanyu ovarexexa. Mwa ntakihero, neereke nyuwo mwanwera wuunnuwihera opixawanyu murima? Ni ookhalano yootthuna ya waakhavihera asinna? Neereke nyuwo muntthuneya okhalano murettele ni oomoriwa ikharari? Onookhala woowookhweelani wakhala weera munanvekela nthamwene anyu oororomeleya yoowo oneera ookhavihereni oreherera itthu.—Mir. 27:6.
6. Mwiniilipihere hayi okwanihera sootthuna sanyu ni okhalano mikhalelo sooreera?
6 Mwiilipihereke weera mukwanihere sootthuna sanyu. Munkela opaka hayi eyo? Moota woopaka eyo ori osoma ni okosoopa mikhalelo sineera sookhavihereni wiireherera. Nkuupuwelani ela, wakhala weera nyuwo munthanla wiilipihera weera mwaalevelele atthu akina. Nyuwo mwaakela opatxera osoma ni ophimelela woohima sa matakihero a mBiblyani ale yaalevelenle atthu akina ni ale yahaalevelenle. Mphimelele tho ntakihero na Yesu, owo aahaalevelela atthu akina moohinyesereriwa. (Luka 7:47, 48) Owo tho khaaweha paahi soottheka sa atthu, mene aanoona mikhalelo saya sooreera. Moovirikana ni Afarisi amahuku a Yesu, ‘yaawo yaramusa asikhw’aya.’ (Luka 18:9) Mwaphimelela matakihero ala mwiikohe ha: ‘Kinwoonela hayi atthu akina? Mikhalelo heeni miyo kinthanlaaka ovarexexa?’ Wakhala weera nyuwo munwanano weera mmulevelele mutthu mukina, mwerere woona mikhalelo sooreera sa mutthu owo. Moottharelana, mwikoheke ha: ‘Yesu aamoonela hayi mutthu owo? Neereke ammulevelela?’ Opaka yoosoma eyo enimookhaviherani oreherera muupuwelo anyu. Woopatxerani, pooti okhala wooxupa weera mmulevelele mutthu oovenheni. Mene nto, mwiilipihereke weera mpake eyo. Moovira ehuhu monookhala oolikaneene weera mmulevelele.
MUXUTTERE MIKHALELO MINYOWANI
Mwiivaherere oxuttera oreherera impa sa Omwene (Nwehe eparagrafu 7) *
7. Moovarihana ni Miruku 22:29, Yehova onaavarela hayi muteko atthu esuwenle itthu sintxiple olelo va?
7 Yooluluwanya ekina muneeraanyu mulepe. Ori oxuttera itthu ikina. Muupuwele numero ntokweene ninhaaweliwa naatthu weera yateke iBetheli, impa sa assembleya ni impa sa Omwene. Atthu anvara miteko iyo, aakhalano sooluluwanya sooreera weera evareke ni asinna yaawo arinono sookumanano. Ntoko enooniheraaya efootu, asinna ni asirokora eneera exutteraka mikhalelo sootthuna weera ekhavihere orehereriwa wa impa sa assembleya ni impa sa Omwene. Yehova Muluku “Mwene a ehuhu eri yootheene” ni Yesu Kristu “mwene a mamwene” onnaavarela muteko atthu weera epake itthu sootikiniha moorweela wa atthu yaawo anwera oteka. (1 Tim. 1:17; 6:15; mmusome Miruku 22:29.) Nintthuneya ovara muteko vantxipale ni itthu seiye nisuwenlaahu weera ninvuwihe Yehova ohiya wiivuwiha mwaneenaahu.—Yoh. 8:54.
8. Moota heeni muneeraanyu nwere othanla sooluluwanya muntthunaanyu okwanihera?
8 Muthanle yooluluwanya muntthunaanyu okwanihera. Mukhalelo heeni muntthunaanyu wuunnuwihera? Mwaakoheke asitokweene a mmulokoni naari asitokweene a esirkwiitu weera yoone mukhalelo muntthuneyaanyu wunnuwihera. Mwa ntakihero, wakhala weera awo animooleelani weera muntthuneya oreherera masu anyu weera muulumeke nnene ni oxuttiha, mwaavekele yaawo wookhaviherani wuuluma nnene ni orehera mukhalelo anyu. Vootharana mpakevo etthu weera mureherere. Vano nto, munaapake hayi eyo?
9. Nyuwo muniilipihere hayi weera mukwanihere sooluluwanya sanyu muxutteraka moota wooxuttiha?
9 Mwiilipihere weera mukwanihere sooluluwanya sanyu. Waakhanle weera nyuwo muntthuna oreherera mikhalelo sanyu sooxuttiiha, nyuwo mwaarowa opatxeraka osoma ni othokorora ebroxura, Mwiilipiheryeke Osoma ni Wiixuttiha. Wakhala weera munnathanliwa weerela empari mithukumano sa eriyari ya esemana, munvekele munna ookhomaala moomunepani weera iiwe yoowoonihera anyu muhinaaye orowa woonihera ni oovahekeni miruku weera mureherere. Ohiya paahi wiilipihera okhala mutthu oosuwela oxuttiha, mene tho ontthuneya okhala mutthu oororomeleya.—Mir. 21:5; 2 Akor. 8:22.
10. Nvahe ntakihero, na moota woowunuwihera mikhalelo nintthuneyaahu okhalano.
10 Munkela opaka eheeni wakhala weera ti wooxupa okwanihera mukhalelo muthanlalaanyu? Muhitthikele otthuli! Munna mmoha oneeriwa Garry, annawanano maxupo oohiwera osoma. Owo onnuupuwela weera wannamuuliha muru vaavo eereraawe osoma moowiiwanyeya mmithukumanoni sa mmulokoni. Mene owo aavirelelela opaka etthu ele. Mene vaanaano va owo onhima há: Mwaha wa nikhomaaliho kaakhenlaaka, miyo kinnawera opaka nyaha empa ya Omwene, wa assembleya ni va Kongresu a esirkwiitu.
11. Nimutakihaka Timotheyo, eheeni enkela onikhavihera waakhulela miritti nneeraahu naakheleke?
11 Moota heeni Timotheyo awenraawe okhala muxuttiha a nnene? Biblya khanhima. Moohihovela, Timotheyo annavirelela okwanihera miritti sawe attharaka miruku aakhenlaawe ni murummwa Paulo. (2 Tim. 3:10) Etthu emoha-moharu, wakhala weera nnimunnuwihera mikhalelo sahu, ninkela okhala ookwaneleene weera naakhulele miritti nneeraahu naakheleke.
MWAASAASERE MIKHALELO SOOWAKHAVIHERA ATTHU AKINA
12. Asinna akina, yookhavihenreni hayi?
12 Ootheene hiyo, onnanisivela atthu akina yaanikhaviheraka. Mwa ntakihero, vaavo ninkhalaahu otxipattaala ninnahakalala naawonaka asitokweene a mmulokoni anvara muteko onvarihana ni comite de ligação de hospitais ewaaka onixikura ni egrupu yoowaaxekura alipa oovoriiwa. Naavirihaka maxupo mweekumini mwahu ninnahakalala owoona asitokweene a nsivelo ewaaka onxikura ni onilipiha. Nave, emaara hiyo nintthunaahu nikhaviherero weera nipakihe nihusiho, hiyo ninnahakalala vaavo piyoneiru orinono sookumanano sintxipale onnihoolaawe weera napakihe yoosoma ni onnivahaawe miruku weera nreherere mikhalelo sahu sooxuttiha. Asinna ni asirokora awo annahakalala yaanikhaviheraka. Hiyo-tho, pooti ophwanya ohakalala iwo, wakhala weera nnimwakhavihera asinna. Yesu enre: “Ovaha ti etthu yorera opwaha wakhela.” (Mit. 20:35) Wakhala weera nyuwo muntthuna waatxeerara muteko anyu, eheeni enkela wookhaviherani weera mukwanihere sooluluwanya sanyu?
13. Mwaalepaka yooluluwanya, yoomeekha heeni muneeraanyu muupuweleke?
13 Mwiikosoope vaavo munlepaanyu yooluluwanya anyu. Mwa ntakihero, nyuwo pooti wuupuwela: ‘Miyo waamukisivela okhavihera mmulokoni.’ Mene pooti okhala wooxupa osuwela moota woopaka yooluluwanya eyo, nyuwo tho pooti woona okhala woohiwereya osuwela liini muneeraanyu mukwanihere. Mwa yeeyo, muthanle yooluluwanya munweraanyu. Nyuwo pooti olepa ni onpaka palano anyu weera mukwanihere.
14. Mwaha wa heeni nintthuneyaahu wiisaakuviha naapakaka sooluluwanya?
14 Hiyo-tho ontthuneya opaka moowaakuveye sooluluwanya sahu. Mwaha wa heeni? Mwaha wooweera hiyo khaninsuwela itthu sineera sinikhumelele muhoolo. Mwa ntakihero, murummwa Paulo aakhavihera opaka muloko wa ecidade ya oTesalonika. Moohihovela, owo aakhalano yootthuna yookhala ecidade ele weera akhavihere muloko ole munyowani. Mene atthu yaamusontta yaamunyeserera weera akhume ecidade ele. (Mit. 17:1-5, 10) Wakhanle weera Paulo aawa, amwaakumihera maxupo asinna. Mene Paulo khaatthikenle ottuli, opwaha mwa yeeyo, owo aahiireherera mwa itthu inyowani. Muhoolo mwaya, owo aamuruma Timotheyo weera akosoope sootthuna sa omunepani sa akristu a muloko munyowani oTesalonika. (1 Ates. 3:1-3) Asinna oTesalonika yaahakalala mwaha woowiivaherera wa Timotheyo weera akhavihere nipuro naahaawela anamalaleera.
15. Itthu nihinweraahu owehexexa, sinvoleela hayi sooluluwanya sahu? Mutakihere.
15 Hiyo pooti oxuttera etthu ni yookumanano ya murummwa Paulo oTesalonika. Nave hiyo pooti otthuna waakhela eparakha mmutekoni nnanvarelaahu Yehova. Mene, makhalelo ahu pooti ohinaakhulela waakhela iparakha iyo. (Koh. 9:11) Wakhala weera nyuwo munnakumanano maxupo mamoharu, muthanleke sooluluwanya soovirikana seiyo muntthuneyaanyu okwanihera. Ntheli nimoha nneeriwa Ted ni Hiedi naapaka eyo. Mwaha wookhalano maxupo a mweekumini, awo yaahiya muteko yaavaraaya oBetheli enarowa owaani. Mene mwaha wa nsivelo ekhalannaaya ni Yehova naaweeriha waasaasera makhalelo owaatxeerera muteko aya woolaleera. Etthu yoopatxera awo yaapankaaya yaari ovara muteko ntoko pioneiru a nthiti [regular]. Moovira ehuhu, yaathanliwa weera ekhale mapioneiru oothanleya. Ted ahaakhela nikhomaaliho weera akhale mutokweene a esirkwitu ookhavihera. Mene ehuhu ele, khayaakhuleliwa tho asitokweene a esirkwiitu yaarino iyaakha sintxipale. Nto mwaha wa yeeyo, Ted ni Hiedi yaahoonelela weera khiyaakela ovareliwa veeli muteko ntoko mutokweene a esirkwiitu. Nto, nnaamweera itthu sahaaweettela nnene, awo yaasuwela weera yampaka etthu weera envarele Yehova. Ted ohimme ha: “Naaxuttera ohihiyerera ovara muteko woolaleera.”
16. Ninxuttera eheeni ni Agalata 6:4?
16 Hiyo khanninwera owehexexa itthu sineera sinikhumelele mweekumini mwaha muhoolo. Mwa yeyo, khontthuneya wuupuwela weera hiyo nri ootthunya mwaha wa iparakha nraahuno naari wiilikanxera ni atthu akina moovarihana ni iparakha nraahuno. Hiedi onthaliha ha: “Wakhala weera nyuwo munniilikanxera ni atthu akina, murettele anyu onnavukuwa moovira ehuhu.” (Mmusome Agalata 6:4.) Ti vawonto oraaya wootthuneya waasaasera mikhalelelo hiyo ninvareleyaahu muteko. *
17. Munkela opaka eheeni weera mwaakhuleliwe okhalano miritti mmulokoni?
17 Mukhaleke oolikaneene weera mwaakhele iparakha sa mmutekoni mwa Yehova. Mukweiheraka ekumi anyu musepaka okopha. Mulepeke sooluluwanya sanyu seiyo sineera sookhavihereni okwanihera sooluluwanya ikina yavira ehuhu. Mwa ntakihero, wakhala weera yooluluwanya anyu muntthuna okhala pioneiru anthithi, neereke munuupuwela opatxera ovara ntoko pioneiru ookhavihera? Ankhanto wakhala weera nyuwo muntthuna okhala murumeyi oorumeela, munoonela hayi wiivaha ehuhu yintxipale weera mulaleereke ni mwaaxekureke asinna ni ale oowuuluvala mmulokoni mwanyu. Sookumanano mumphwanyaanyu vaanano va, sinoohula mulako weera mwaakhele iparakha muhoolo. Mukhaleke oolikaneene weera mwaakhulele yoothanleliwa eri yootheene muneeraanyu mwaakhele.—Arom. 12:11.
Muthanle yooluluwanya munweraanyu okwanihera (Nwehe eparagrafu 18) *
18. Moovarihana ni efootu nnoonaahu, ninxuttera eheeni ni ntakihero na Beverley?
18 Muteko ola wookwanihera sooluluwanya soomunepani khonunnuweliwa. Moone ntakihero na murokora orinono iyaakha 75 oneeriwa Beverley. Owo aakhalano maxupo amweekumini ni wannamuxupa weetta. Mene owo annatthuna weerela empari ekampanya yoowuupuwelela okhwa wApwiya, vanonto owo aapaka yooluluwanya yoophwanelela. Ehuhu murokora Beverley akwanihenraawe yooluluwanya awe ya ekampanya ele, owo aahakalala. Wiilipihera wawe waweeriha atthu akina omorela muteko woolaleera. Yehova onnahela mwiitti muteko asinna ni asirokora oowuuluva ampakaaya, nnamweera makhalelo aya evirikanneene.—Nsal. 71:17, 18.
19. Itthu heeni sinkela onikhaviihera okwanihera sooluluwanya sahu soomunepani?
19 Mulepeke sooluluwanya seiyo munrowaanyu owera okwanihera. Mukhaleno mikhalelo seiyo sineera sookhaliheni okhala ootthuneya wamaithoni va Yehova. Muxuttere sootthuna seiyo sineera siweemihereni onvarela muteko Yehova Muluku ahu. Mwaaseke mukhalelo woowaakhavihera asinna. * Ntoko Timotheyo, munooreelihiwa ni Yehova ‘weera wunnuwawanyu wooneye va maithoni va atthu ootheene.’—1 Tim. 4:15.
ETXIPO 38 Yehova Onimoovahani Ikuru
^ Timotheyo aari mutthu oolaleya nnene mitthenka sooreera, nnamweera vareene hiiho, murummwa Paulo aamooperera ovirelela opwatthela itthu soomunepani. Mwaha wootthara miruku sa murummwa Paulo, Timotheyo aakela onvarelaka muteko Yehova wamoha ni asinna ni asirokora. Neereke nyuwo muri ntoko Timotheyo mutthunaka onvarela muteko Yehova wamoha ni asinna? Woohihovela nyuwo tthiri muri ntoko yoowo. Itthu heeni sineera sookhavihereni? Eheeni enhela mpuwa ompaka palano owo ni okwanihera sootthuna sene seiyo?
^ MASU OWIIWANYEIHIWA: Sooluluwanya sa omunepani sinhela mpuwa itthu sootheene nniilipiheraahu weera niphwanye weera niwere onvarela muteko nnene Yehova ni omuhakalaliha.
^ Nwehe “Orumeela mapuro oothowa anamaraleerya” liivuru Mutthenkeso Onipaka Otthuna wa Yehova, ekapiitulu 10, eparag. 6-9.
^ Moone yoosoma ya 60 ya eliivuru, Mukhaleno ekumi yoohimala! yeeyo eneera: “Nvirelele olipiha onthamwene anyu ni Yehova.”
