Olipela ontaphuleliwa okhala ntoko “olaihera etthu yeeyo mutthu othanliyaawe opaka muhoolo, naari olaleeya etthu mutthu yeeyo ontthunaawe okwanihera muhoolo. Mene ikina atthu annalipela onvuwiha Muluku . . . Ntoko onamoona.” Pooti wuuluma naari olepa.

Atthu akina anuupuwela weera ti woonanara olipela, mwaha wooweera Yesu ohimme weera: “ohilipeleru nari vakhanene [ohilipele tho] . . . Nto masu anyu ekhale “Anyi, anyi, Hoye, hoye” vano sikina simpwaha seiya sinkhuma wa mutakhali.” (Math. 5:33-37) Moohihovela, Yesu aasuwela weera nlamulo na Mose nannooperera olipela. (Eph. 14:22, 23; Ott. 22:10, 11) Nave-tho, aasuwela weera Yehova annalipela. (Aheb. 6:13-17) Mwa yeeyo, Yesu khaiyono aatthuna ohima weera khanaarowa olipela-tho. Opwaha mwa yeeyo, owo antxetxeriha weera nihilipeleke mohireerela. Ninnatthuneya okwanihera itthu nlipenlaahu, mwaha wooweera etthu nlipelaahu ti yootteela. Nipakaka ele nuulummaahu.

“Eheeni nyuwo munkelaanyu opaka wakhala weera muntthuna opaka nivekelo? Etthu yoopatxera, moone weera munkela opaka ele mulipenlaanyu. Wakhala weera nyuwo khamuniroromela, ti wooreera ohilipela. Masu a Muluku ennantxetxeriha weera: “Ohihiye mmwano mwá wòtthekihaka nari ohihime oholo wa namutthenka weera Muluku ahinyonyiwe nthowa na masu á.” (Koh. 5:5) Avinyaka, moone miruku sa mBiblyani sinvarihana ni olipela wanyu, nave-tho, mpakeke moovarihana ni yoowuupuxeraanyu ya murima yooreera. Vano, miruku sene seiya sa mBiblyani sinvarihana ni olipela tiivi?

Atthu akina annalipela moovarihana ni yootthuna ya Muluku. Mwa ntakihero, Anamoona a Yehova annimmana natiri emaara yeeyo anthelanaaya. Mene natiri owo onneerela empari ya olipela. Ohoolo wa Muluku ni wa Anamoona, mulopwana ni muthiyana ennalaiherana osivelana ni ottittimihana mukina ni mukhwaawe “mwekumini mwaya”. (Matheli makina khampaka ele yaalipenlaaya, mene nnamwera vareene hiiho, emaara awo anthelanaaya annimana natiri wamaithoni va Muluku). Mene emaara eyo, ennahimwa weera ari mulopwana ni muthiyana athelanne, nto ntheli nno nikhaleke nooreera ni noohakalala. (Eph. 2:24; 1 Akor. 7:39) Vanonto mukhaleke moovarihana ni yootthuna ya Muluku.

Anatiri akina anivirikana ni yootthuna ya Muluku. Mukristu eekhaikhai khanrowa olipela naari ommana natiri weera aakihere elapo anvarelaka kapwitthi naari olaleya nroromelo naawe. Opaka eyo, enootupha malamulo a Muluku. Makristu  khontthuneya “werela empari elapo” mwa yeeyo, khontthuneya wiivoloihera mukhottoni.—Yoh. 15:19; Yes. 2:4; Yak. 1:27.

Anatiri akina ankhala makoho a yoosuweliha ya murima. Ikwaha ikina, nyuwo onnatthuneya onwehexexa moomaaleleya natiri anyu muupuwelaka miruku sa Yesu “munvaheke Sesari eri ya Sesari, ni Muluku seiyo sa Muluku.”—Luka 20:25.

Mwa ntakihero, wakhala weera mukristu ontthuna otxentxa elapo oyarinwaawe naari passaporte, apakaka hiihaale anoonelela weera elapo eyo, owo ontthuneya oolipela naari ommana natiri ontaphulela opaka etthu yeeyo envirikanya malamulo a Muluku, yoowuupuxerawe ya murima yotxentxerihiwa ni Biblya, khiyaarowa omwaakhulela opaka eyo. Anamalamulela, pooti omwaakhulela weera natiri awe ovarihaneke ni yowupuxerawe ya murima.

Ommana natiri onnaruuhela murettele moovarihana ni miruku siri va Aroma 13:1, seiyo sineera: “Mutthu ori othene awìwelele atthu anlamula.” Opwaha mwa yeeyo, makristu ari oolikaneene weera khaawowo natiri Muluku onninyesereraawe ommana.

Yoowupuxera anyu ya murima enimookhaviherani wakhala weera vaavo munlipelanyu, onnatthuneya ovarihela muteko etthu naari matata weera mulipele. Aroma akhalayi, yannavarela ekatana mmatatani evuwihaka owera wa amuluku aanakhotto ni waroromela atthu. Magregu yannateexera matata wiirimu vaavo yaalipelaaya. Hiihale, awosa yannasuwela weera, sookhala ikuru wiirimu seiyo soona itthu saapakiwa ni owiriyana itthu saahimmwa nave ororomela weera aakhala atthu yaakhalanne owera.

Mohihovela, Anamoona a Yehova khenkela ommana natiri yoowo onvarihana ni ottittimiha elapo naari olapela woowootha. Vano, ninkha wakhala weera nyuwo munavekeliwa wiiyathi vasulu va Biblya matata anyu weera nvahe onamoona weekhaikhai mulipelaka? Mwa yeeyo, nyuwo mwaamwaakhulela moona weera solempwa suulummwe ti soororomeleya nto nyuwo pooti ommana natiri owo. (Eph. 24:2, 3, 9; 47:29-31) Nave-tho, ti wootthuneya wuupuwelela weera, ommana natiri owo, nyuwo munimmana ohoolo wa Yehova muhimaka weera ekhaikhai. Nyuwo onnatthuneya wiirehera weera mwaakhule makoho ootheene aneera epakiwe.

Mwaha wooweera ninnahela mwiitti onthamwene ahu ni Yehova, hiyo onnatthuneya wuupuwela nihinaayeene olipela moorweela munivekeloni. Noonaka weera khaninkela ovulaliha yoowuupuxera ahu ya murima naari miruku siri sa mBiblyani. Wakhala weera nyuwo munnalipela onnatthuneya okwanihera.—1 Ped. 2:12.