Asimwali eeli yeetta nipuro naapakiwa nakoso esidade ya oBaguio, oFilipina. Awosa yaahoona ekarinya envariheliwa muteko woolaleera, nto yaahaattamela vakarinyani vale. Helena, yoowo aalaleera ni ekarinya nihuku nne, owo ahaatheela vantxipale. Awo yaavinyavo vakarinyani vale mene yaatikinihiwa moota yaatheeliwaaya ni murokora ole.

Othana-thanaru, asimwali ale eeli, etthikelaka owaani yaahoona epalaka ereene empa ya Omwene silempwaleene itthu imohamoharu yoonnaaya vakarinyani: jw.org. Mwa yeeyo, asimwali ale yaamukhuruwa karera yanwenlaaya, enakela woona iwoora sa mithukumano miloko saathukumanaya Empa yoOmwene yaari muttetthe ole.

Evirakaru ehuhu, asimwali ale yaarowela mithukumano, munootthoma taani yamphwannyaaya evolowakaru Empa yo Omwene ele? Aari murokora Helena! Emoonakaru yaamuupuwelela, nave aari muthiyaneene yoole oonihenre waatheela. Helena onnihima eeraka: “Ekaattamelakaru, miyo kaatikhina vantxipale ni okhala ooxupeya. Waari ntoko weera kaaroopahula etthu.” Asimwali ale eeli yaamuleela mwaha wa heeni asimwali ale eeli yaaraaya nipuro nne.

Asimwali ale wahaasivela vantxipale muthukumano ole ni waasuwela asinna, awo yaahoona okhala owaani. Asimwali ale ewoonakaru asinna elimpariki empa ya Omwene okhwipi wa mithukumano, awosa yaahivaherera-tho okhaviherano muteko. Mwali mukinoowo oFilipina oothaama, mene mukinoowo oovirelela woonela mithukumano nave-itho oovirelela omusoma Biblya—sootheene mwaha wootheya.