1. Uupuwelelaka otheliwa, makoho heeni murokora ontthuneyaawe wiikoha?

AKRISTU ootheene, ari mpuwa mwa nlamulo na Yesu Kristu. Mene muthiyana atheliwa, onnatthara nlamulo na iyawe oohimalela. Nto eyo khaiyene ti yookhweya. Vanonto ahaakuvale ene otheliwa, muthiyana onnatthuneya wiikoha: ‘Ithoonyero heeni kinoonaka wa munna ola, weera onoowera ohoolela etthoko ahu? Itthu heeni sa omunepani onoonaawe okhala sootthuneyaxa? Wakhala weera khaiyene ti hiiho, itthu heeni ikina kinoonaka sooreera wa owo, weera onkela okhala muhooleli a etthoko oreera nathelana vale?’ Emaara emoha-moharu, murokora pooti wiikoha: ‘Mikhalelo heeni kiraakano sineera sakhavihere ntheli naka? Keereke miyo toopixa murima ni toovaha? Kookhalano onthamwene woolipa ni Yehova?’ (Koh. 4:9, 12) Ohakalala muthiyana oneerawe aphwanye vanthelini vawe, onrowa olipa ni soothanla onipakaawe ahinaakuve otheliwa.

2. Mwa yooxuttera ela ninrowa woona eheeni?

² Arokora antxipale onnatthuneya waaxukurela. Mwaha wooweera awo aakhalano matakihero ooreera oowiiwelela asiiyaya. Ti woohakalaliha onvarela muteko Yehova vamoha ni asirokora oororomeleya awo. Mwa yoosoma ahu ela, ninrowa woona waakhuliwa wa makoho mararu ala: (1) Maxupo heeni atthu akina ankumanaayano? (2) Mwaha wa heeni muthiyana ontthuneyaawe omwiiwelela iyawe? (3) Eheeni anamathelana ontthuneyaaya oxuttera okhala oowiwelela ettharaka ntakihero na Yesu, Abigayili, ni Maria, amayawe Yesu yaawo yaari amwaariye Yosefe?

3. Mwaha wa heeni ntheli nihikhanlaaya noomalela?

³ Ntheli yoovaha yooreera ya Muluku, mene atthu toottheka. (1 Yoh. 1:8) Ti vaavonto Biblya anhimaawe weera atthu oothenlana  enaaphwanye “masoso.” (1 Akor. 7:28) Moone maxupo yaawo athiyana anrowaaya oviriha.

4. Eheeni enahaala omweriha muthiyana wuupuwelela weera omwiiwelela iyawe onsikiini?

⁴ Apaale mwaha wa mikhalelo sa elapo aya, athiyana pooti wuupuwelaka weera okhala oowiiwelela, anrowa okhala nsikiini. Marisol, yoowo onkhala w’Estados Unidos enre: “Kunnuwalaakawo athiyana annaiwa weera awo onnatthuneya olikana ni alopwana wa itthu sootheene. Kinnasuwela weera Yehova tovanhe nlamulo na ohoolela, ni owo onvaha muthiyana muritti woowiiyeviha nave-tho ottittimiheya. Mene ori wooxupa okhalano mukhalelo wa variyariru, voohima sa olamulela.”

5. Miruku heeni soonanara, alopwana akina araayano voohima sa asaaraaya?

⁵ Emaara ekina muthiyana pooti otheliwa ni mulopwana yoole onuupuwela weera, muthiyana mutthu ohikhanleno masu. Murokora mmoha onitthaniwa Ivoni yoowo onkhala w’America do Sul enre: “Muttetthe ahu, alopwana tampatxera otxa ehinakuve ene athiyana. Atthu anuupuwela weera muteko woowapeya ni wookwesa ti waasimwali, mene amiravo muteko aya oruheliwa exima ni asimamaya naari asirokoraya. Nto eyo ennaweriha wuupuwelaka weera awo anamalamulela a vaate.” Murokora mmoha onneriwa Yingling, yoowo onkhala wAsia, enre: “Mu nuulumo naka nookhala nxiripulo nnera, muthiyana khantthuneya okhala amiruku. Muteko awe ori ovara miteko sa vaate. Nave owo khoontthuneya onvaha miruku iyawe.” Mooripiha murima miruku iyo, khaiyene sa nsivelo ni khasinkhuma mBiblyani. Mulopwana ontthara miruku iyo, onnaxupiha okumi wa amwaarawe, khanwera otthara ntakihero na Yesu Kristu nave-tho khasinamuhakalaliha Yehova.—Aef. 5:28, 29; 1 Ped. 3:7.

6. Ti eheeni athiyana antthuneyaaya opaka weera elipihe onthamwenaaya ni Yehova?

⁶ Ntoko niwalaahu yoosoma evinre, Yehova onweherera weera alopwana, ethokororeke sootthuna sa asaraya ni sa emusi aya. (1 Tim. 5:8) Mene asithiyana ootheliwa, onnatthuneya waasasera ehuhu weera emusomeke Biblya, yuupuweleleke iye ansomaya, ni opaka mavekelo wa Yehova ookhuma vathi va murima. Mene eyo pooti okhala yooxupa. Vekhaikhai muthiyana pooti waatteliwa, anaphiyera woona weera khaanono ehuhu naari ikuru weera apake yoosoma awe. Naamwi vareene hiiho, onnatthuneya vantxipale opaka eyo. Mwaha wa heeni? Mwaha wooweera Yehova, ontthuna weera mutthu ti mutthu ahiyo, avirelele opaka onthamwene woolipa ni owo.—Mit. 17:27.

7. Eheeni enrowa omukhweihera muthiyana okhala owiiwelela?

⁷ Ekhaikhai weera, omwiiwelela mulopwana ohimalela, onnatthuneya weera muthiyana ailipihereke. Mene Biblya okhalano mathowa oweera muthiyana apakeke eyo. Wakhala weera muthiyana ohiiwexexa ni onnakhulela mathowa awo, onrowa okhala wookhweya okwanihera miritti ovahiwaawe ni Yehova.

8. Moovarihana ni Aefeso 5:22-24, heeni muthiyana mukristu onthanlawe omwiiwelela iyawe?

⁸ Muthiyana mukristu onnatthuneya omwiiwelela iyawe, mwaha wooweera tiyeeyo Yehova onanvekelaawe. (Mmusome Aefeso 5:22-24.) Owo onnamuroromela Tiithi awe a wiirimu ni onnasuwela weera, owo onnamusivela, ni antthuna mureerelo awe.—Ola. 6:24; 1 Yoh. 5:3.

9. Eheeni eneera yeereye murokora attittimihaka ohoolela wa aiyawe?

⁹ Atthu anahima weera athiyana, khontthuneya wiiwelela masu a Muluku. Yaaiwelelaka  vale, khankhalano otaphuwa. Atthu anahima miruku iyo khammusuwela Muluku ahu ansivelo. Yehova khaarowa waavaha anamwanaawe onaasivelaawe, nlamulo noohavaha otaphuwa. Murokora oniilipihera vantxipale okwanihera miritti ovahiwaawe ni Yehova, onnaruha murettele vatthokoni vawe. (Nsal. 119:165) Eyo ti yooreera wa emusi yootheene: mwa mulopwana, wa anamwane, ni wamuneene muthiyana.

10. Ninxuttera eheeni ni yoohima ya Carol?

¹⁰ Khavankhweya omwiiwelela mulopwana ohimalela. Athiyana annasuwela weera Yehova tovanhe nlamulo na ohoolela. Nave owo onnasuwela weera, akhala owiiwelela, onnamusivela ni omwiiwelela Yehova. Carol yoowo onkhala wAmerica do Sul ohimme há: “Miyo koosuwela weera aiyaka eneereke okitthekela” ni “mi-tho koosuwela weera moota kinoonelaka soottheka sawe, kinnoonihera moota kinttittimihaaka onthamwene aka ni Yehova. Tiyeeyo enkeriha miyo ovirelela okhala oowiiwelela. Mwaha wooweera miyo kintthuna omuhakalaliha Tiithaaka a wiirimu.”

11. Eheeni emukhavihera murokora Aneese okhala oolevelela ni ninrowa oxuttera eheeni ni ele ohimmaiye?

¹¹ Apaale muthiyana pooti wuupuwela weera, aiyawe khampwatthela soovalaveliha sawe. Mwa yeeyo, owo pooti woonaka ovila owiiwelela aiyawe. Moone ele murokora ootheliwa onitthaniwa Aneese onipakaawe yeereya etthu ntoko eyo. Owo enre: “Miyo kinneerera ohikaathi vamurimani soopahula sa aiyaka, miyo kinnuupuwela weera ootheene hiyo ninnattheka nto yootthunaaka ori olevelela moomalela. Ntoko hiiho Yehova oneeraawe, kalevelela, muupuwelo aka onnakhala woomaleleya.” (Nsal. 86:5) Muthiyana oolevelela, onoorowa woonaka okhweya okhala oowiiwelela.

12. Matakihero heeni Biblya onnivahaawe?

¹² Atthu akina anuupuwela weera mutthu oowiiwelela toolosowa, mene eyo khaiyene ekhaikhai. Nto Biblya onnavaha matakihero aatthu yaari owiiwelela, ni awo yaari a ikuru. Ninrowa woona ele ninrowaahu oxuttera ni ntakihero na Yesu, Abigayili ni Maria.

13. Nthowa heeni nimweeriha Yesu omwiiwelela Yehova? Muthalihe

 ¹³ Yesu onnamwiiwelela Yehova. Neereke eyo entthuna ohima weera, Yesu khaanono owera naari osuwela? Ekhaikhai ti yoowera hooye. Mutthu paahi osuwelaxa opwaha, tiyoowo eera awere oxuttiha mookhweya ni moowiiwanyeya ntoko Yesu Kristu apankaawe. (Yoh. 7:45, 46) Yesu aakhalano osuwela, mpaka Yehova omwaakhulela weera amukhavihere opattuxa itthu sa elapo. (Mir. 8:30; Aheb. 1:2-4) Yehova anvinyererihakaru Yesu, anvaha owera wiirimu ni elapo ya vathi. (Math. 28:18) Naamwi arinono ene miruku ni osuwela, moohihiyerera Yesu onnavekela miruku wa Yehova. Mwaha wa heeni? Mwaha wooweera owo onnamusivela Tiithi awe.—Yoh. 14:31.

14. Eheeni alopwana anxutteraaya (a) moota Yehova oniwoonelaawe athiyana? (b) ni miruku silempwe va ebuukhu ya Miruku 31?

¹⁴ Ele alopwana anrowaaya oxuttera. Yehova aavekelaka asithiyana owiiwelela asiyaya, khaiyene weera arokhala oyevela miruku. Tiyeeyo nto onaathanlawe athiyana ni alopwana weera yalamuleleke vamoha ni Yesu. (Agal. 3:26-29) Yehova ohoonihera weera onnamuroromela mwanawe, mwaha woonvaha olamulelo. Mulopwana a miruku, onnavaha amwarawe miritti vakhaani. Biblya onnahima itthu seiyo muthiyana oowera okhanlawe oopaka. Mwa ntakihero, owo pooti weettelelaka miteko simpakiwa vaate vawe, omwetta nakoso, ni owehaweha musurukhu. (Mmusome Miruku 31:15, 16, 18.) Owo kaiyono kaporo ohimphwanela ovaha miruku, moovirikana ni yeeyo, mulopwana amuroromeleke mwaariye ni awiiweleleke miruku sawe. (Mmusome Miruku 31:11, 26, 27.) Mulopwana amuttittimihaka mwaariye ni mukhalelo ola, owo onrowa okhala owiiwelela.

15. Eheeni athiyana anxutteraya ni ntakihero na Yesu?

¹⁵ Ele athiyana anrowaaya oxuttera. Yesu naamwi arinono miruku ni osuwela, khoona weera ti woowuliha muru omwiiwelela Yehova. (1 Akor. 15:28; Afil. 2:5, 6) Vamoharu, athiyana antthara ntakihero na Yesu, khanrowa wiisoonaka okhala oyevela miruku yaawiiwelelaka aiyaya. Opwaha mwa yeeyo, awo anrowa okhaviheraka miruku saiyaya, khaiyene paahi mwaha wooweera onnamusivela. Mene mwaha wooweera onnamusivela Yehova ni omuttittimiha.

16. Moovarihana ni 1 Samuweli 25:3, 23-28, maxupo eheeni Abigayili akumannaweno? (Nwehe efootu ya vakaapani)

¹⁶ Abigayili aatheliwe ni mulopwana iitthaniwa Nabali. Owo ari nanrima, owiikuxerera ni oheera asantte. Naamwi vareene hiiho, Abigayili khaasaasa mukhalelo woomwalana ni aiyawe. Owo anwera okhala oomala, omuhiya Davidi ni anakhotto awe weera emwiive Nabali. Opwaha mwa yeeyo, aathanla omwakihera Nabali, ni owakihera atthu ootheene a vaate vawe. Nkupuwelani olipa murima Abigayili aatthuneyaawe okhalano, weera akumane ni anakhotto ale 400, ni olokolola ni Davidi mwa nttittimiho. Ophiyera wiivaherera weera nthowa na aiyawe nimmorele owo. (Mmusome 1 Samuweli 25:3, 23-28.) Davidi aahoona weera Yehova onvarihenle muteko muthiyana ole olipa murima, weera amukhavihere. Miruku sa Abigayili saamootxeliha Davidi opaka etthu yoonanara.

17. Eheeni alopwana anxutteraaya ni yooweereya ya Davidi ni Abigayili?

¹⁷ Ele alopwana anrowaaya oxuttera. Abigayili ari muthiyana a mukhalelo wooreera. Davidi ahoonihera okhala a miruku wiiwelela miruku sa Abigayili. Mwaha woopaka eyo, owo khaakhanleno nthowa na ephome. Vamoharu,  mwaatthunaka opaka yoothanla yootthuneyaxa, mulopwana a miruku onnatthuneya ovarihela muteko muupuwelo wa amwaarawe. Nave pooti weera miruku sa amwaarawe sinoomukhavihera opaka yoothanla yooreera.

18. Eheeni athiyana anxutteraaya ni ntakihero na Abigayili?

¹⁸ Ele athiyana anrowaaya oxuttera. Naamwi mulopwana ahinvarelaka muteko Yehova, muthiyana ommusivela ni omuttittimiha Yehova, onookhala ntakihero nooreera na etthoko. Owo khankhalela waasaasera moota woomwalana ni aiyawe. Opwaha mwa yeeyo, onrowa ovirelela woonihera nttittimiho ni omwiiwelela. Apaale eyo enoomukhavihera iyawe oxuttera sa Yehova. (1 Ped. 3:1, 2) Pooti weera, muthiyana aailipiheraka ovaha ntakihero nooreera, pooti mulopwana owo ohitthuna oxuttera ekhaikhai. Naamwi vareene hiiho, Yehova onnahakalala vantxipale aawoonaka athiyana, ettharaka nlamulo nawe noowiiwelela asiiyaya.

19. Mwa mikhalelo heeni muthiyana ohintthuneyaawe omwiiwelela iyawe?

¹⁹ Mulopwana ohimmukokhorela Yehova, pooti waavekelaka amwaarawe opaka etthu Biblya onahimaawe weera ti yoonanara. Mwa ntakihero, wootha, wiiya ni itthu ikina simmunanara Yehova. Ti heeni muthiyana ontthuneyaawe opaka? Muupuweleke weera akristu ootheene, waahela mpuwa arokora ootheliwa, onnatthuneya opatxera omwiiwelela Yehova. Mwa yeeyo, wakhala weera mulopwana onnavekela mwaariye opaka etthu ehinaakhuleliwa ni Biblya, owo onnatthuneya okhootta. Amuleeleke iyawe ni nttittimiho ni moolipa murima, mwaha wa heeni ohintthuneyaawe opaka ele onvekelaawe.—Miteko 5:29.

20. Ninsuwela hayi weera Maria aakhalano onthamwene woolipa ni Yehova?

²⁰ Maria aakhalano onthamwene woolipa ni Yehova. Moorwela wa osuwela aaraiyeno wa soolepa. Ovaanela araaweno ni Elizabethi amannye Yohani mbatiza, Maria aathaliha soolepa sa eHeberi ikwaha sopwahaka 20. (Lu. 1:46-55) Vano nkupuwelani ela, Maria eera attomeriweene ni Yosefe. Mene nlaika khanaapatxenre omphwanya Yosefe, nlaika naamuleela Maria weera aarowa okhala ameyawe Yesu. (Lu. 1:26-33) Yehova annamusuwela nnene sene Maria, owo annaroromela weera ammuhuwa nnene mwanawe. Ni Yesu  tho akhwiyeene ni ovinyererihiwa, moohihovela Maria aavirelela okhalano onthamwene woolipa ni Yehova.—Miteko 1:14.

21. Ti heeni alopwana anxutteraaya ni ntakihero na Maria?

²¹ Ele alopwana anrowaaya oxuttera. Mulopwana a miruku, onnahakalala amwaarawe yaamusuwelaka nnene Biblya. Khanoopopiheya ni osuwela wa amwariye. Opwaha mwa yeeyo, owo onnoona weera okhala ni muthiyana ommusuwela nnene Biblya, ni malamulo a mBiblyani onnaruha murettele vatthokoni. Wa mikhalelo mikina, muthiyana pooti osoma vantxipale ompwaha iyawe. Naamwi vareene hiiho, muritti wa mulopwana, ohoolela yoosoma ya vatthokoni, ni miteko mikina sa omunepani.—Aef. 6:4.

22. Athiyana anrowa oxuttera eheeni ni ntakihero na Maria?

²² Ele athiyana anrowaaya oxuttera. Ekhaikhai weera muthiyana onnatthuneya omwiiwelela iyawe. Mene owo tho onnatthuneya othokorera ekumi awe ya omunepani. (Agal. 6:5) Mwa yeeyo tivonto, onnatthuneya wiivaha ehuhu weera apake yoosomaawe ya Biblya ni wuupuwelela ele onsomaawe. Eyo khaiyono enrowa paahi omukhavihera omusivela ni omuttittimiha Yehova, nave enrowa omukhavihera okhala oohakalala aawiiwelelaka aiyawe.

23. Mareeliho heeni muthiyana owiiwelela, oniiruhelaawe, onaaruuhelaawe amusi awe ni muloko?

²³ Okhala omwiiwelela mulopwana onnaruhela mareeliho mantxipale. Muthiyana onttittimiha ohoolela wa mulopwana, onookhalano ohakalala otokotoko waapwaha ale ahinttittimiha. Owo onookhala ntakihero nooreera na amiravo a mmulokoni, alopwana ni athiyana. Owo onookhavihera oruuha murettele, ohiya paahi veemusini, mene tho mmulokoni. (Tito 2:3-5) Olelo va Anamoona antxipale a Yehova, athiyana. (Nsal. 68:12, [68:11 Tradução do Novo Mundo]) Ootheene hiyo alopwana ni athiyana, nookhalano muritti wootthuneyaxa mmulokoni. Yoosoma enttharelana ninrowa oxuttera moota mutthu ti mutthu a hiyo onrowaawe okwanihera muritti owo.