1. Ntakihero heeni Yesu aahiyenraawe atthareli awe, ni awo yoonela hayi? (Nwehe elataratho ya vakaapani)

EMAARA Yesu aarawe elapo ya vathi alaleeraka, aakhalano moonelo wooreera ni aatthuna weera atthareli awe ekhaleno moonelo mmoha. (Yoh. 4:35, 36) Vaavo Yesu aarawe ni atthareli awe, awo yannilipihera olaleera ni nthiti. (Lu. 10:1, 5-11, 17) Yesu atthukiwakaru ni iviwakaru, atthareli awe yaahiyerera olaleera emaara vakhaaneene. (Yoh. 16:32) Nto Yesu avinyererihiwakaru, owo aawooperera weera eheleke nipuro noopatxera muteko woolaleera. Mwa yeeyo, Yesu atthikelakaru wiirimu, atthareli awe yaapatxera olaleera ni nthiti. Amwittani aya yaawerela: “ònani, mòmusariha Yerusalamu ni nihusiho nanyu.”—Mit. 5:28.

2. Moota heeni Yehova oreerihaawe muteko woolaleera?

² Yesu aavaha miruku sa muteko woolaleera. Yoowo waavariwa ni makristu a esekulu yoopatxera ni Yehova ahareeliha. Mwa yeeyo, antxipale yaahakhulela mitthenka salaleeiwa. Mwa ntakihero, Pentekoste a eyaakha ya 33 AEC, atthu ookwana 3.000 yaabatiziwa. (Mit. 2:41) Ni nummero na oxuttera naavirelela waatxerereya mootikiniha. (Mit. 6:7) Mene Yesu aalaihera weera muteko woolaleera waamukumihera itthu sooreera mahiku oomalihera.—Yoh. 14:12; Mit. 1:8.

3-4. Mwaha wa heeni anamalaleera akina anoonaaya ovila olaleera, ni eheeni ninrowaahu woona yoosoma ela?

³ Atthu ootheene ninnilipihera okhalano moonelo wooreera voohima sa muteko ahu woolaleera. Mapuro makina opaka eyo ti wookhweya. Mwaha wa heeni? Mwaha wooweera atthu antxipale annatthuna osomihiwa Biblya. Atthu awo, mpakana annaweherera weera Anamoona a Yehova ekhaleno ehuhu yoorowa  waaxuttiha. Mene mapuro makina, anamalaleera onnaaxupa olaleera. Mwaha wooweera khonikhweya waaphwanya atthu mmawanyaya, ni yaphwanyiwa vale, khantthuna wiiwa mitthenka sa mBiblyani.

⁴ Wakhala weera nyuwo munkhala mapuro ooxupa olaleera, miruku sa yoosoma ela pooti wookhaviherani. Ninrowa woona ele asinna akina anipakaaya weera yaaphwanye atthu antxipale. Ni tho nnimoona mwaha wa heeni nintthuneyaahu okhalano mukhalelo wooreera. Naamwi atthu akina ehitthunaka wiiwa mitthenka ninlaleyaahu.

5. Maxupo heeni anamoona a Yehova ankumanaayano?

⁵ Anamoona a Yehova antxipale onnavila waaphwanya atthu mmawanyaya ni opatxeriha otthekulano. Anamalaleera akina ankhala mapuro ooxupa naari a iprediyu soorakama ni sookhalano makwaarta. Apaale kwaarta onnamukhoottihera ovolowa mutthu ori poothe ohiwoompwale ni axineene a vaate. Anamalaleera akina mpakana annawera olaleera vaate ni vaate, mene khaanimphwanya mutthu. Nave anamalaleera akina, annalaleera mapuro oohattiwa atthu, eyo tiiyo mapuro ehilaleeriweru. Awo annetta ekwaha yoorakama weera emphanye mutthu mmoha paahi,—naamwi ehisuwelaka weera animwaaphwanya atthu! Nyuwo mwaavirihihaka maxupo mamoha-moharu muhikhulumuwe. Eheeni muneeraanyu mpake weera nvirihe maxupo awo, weera muteko anyu woolaleera okhumele nnene?

6. Heeni anlikanaaya anamatotha ni anamalaleera?

⁶ Yesu alikanxera muteko woolaleera ni muteko woototha ihopa. (Mar. 1:17) Anamatotha akina pooti oviriha mahiku makina ehimphwannye naari ehopa emoha. Mene awo khankhulumuwa. Nto annatxentxa mavarelo aya muteko, etxentxaka ehuhu, mapuro ni moota woototha. Hiyo tho pooti opaka etthu emohamoharu, nitxentxaka mavarelo ahu muteko woolaleera. Moone miruku mikina.

7. Naaleleyaka iwoora soovirikana, eheeni eneera ekhumelele?

⁷ Mweerereke owasa atthu mwa ewoora soovirikana. Nnowera waaphwanya atthu antxipale wakhala weera ninnalaleya iwoora sookhweya waaphwanya atthu mmawanyaya. Yookhala ehuhu atthu antxipale ankilaatthaya mmawannyaya! Anamalaleera antxipale annawera waaphwanya atthu antxipale elaleyaka othana ni oxekuwa. Mwa yeeyo, iwoora sene seiyo atthu ankhala mmawannyaya ni annatthuna otthekula. Apaale nyuwo pooti woosiveli miruku sa mutokweene oniitthaniwa Davide. Owo ohimme weera avirihakaru ehuhu vakhaaneene alaleeraka muttetthe mmoha, owo ni mukhwaawe yannatthikela mavate yahaaphwannyaya atthu. Owo onahima weera: “waari woohakalaliha emaara naaphwanyaahu atthu mapuro nahaphwannyaahu atthu.” *

8. Ninrowa ovarela muteko hayi ele ohimmawe Koheleti 11:6 naalaleeraka?

⁸ Kontthuneya okhulumuwa. Ti yeeyo yoolepa ya muru wa yoosomaahu ela, enoopereraaya opaka. (Mmusome Koheleti 11:6.) Davide nimuhimmaahu woopatxerani, khakhulumunwe. Atthikelakaru ikhwaha sintxipale woohikhulumuwa, owo ahaphwanya atthu mmawannyaya. Mulopwana mmoha annatthuna osomihiwa Biblya. Mulopwana owo ohimme há: “miyo kinkhala vaava mwa iyaakha 8 nkinaxekuriwe ni anamoona a Yehova.” Davide onathaliha eeraka: “miyo kaahonelela weera emaara namphwanyaahu atthu mmawannyaya, awo annatthuna wiiwa mitthenka ninlaleyaahu.”

9. anamaleleera akina ampaka eheeni yoonaka oxupa waaphwanya atthu?

 ⁹ Mweerereke mapuro oovirikana. Anamalaleera akina yoonaka oxupa waaphwanya atthu owannyaya, awo anneerera olaleera mapuro oovirikana. Mwa ntakihero, awo annakhumela nnene yalaleeraka mmuseweni naari yaavarelaka muteko ekarinya ya ipublikasau. Yeeraka hiiho, Anamoona a Yehova annawera otthekula ni atthu anikhala ipa itokweene. Yaawo yeeraaya ehiwere walaleera yeettaka empa ni empa. Nave-tho anamaleera akina ahoonelela weera atthu antxipale annawera otthekula ni waakhela ibuukhu sahu mapuro aniweliwa ikaaro, nfera ni mapuro anipakiwa anakoso. Floiran mutokweene a esirkwiitu a oBoliviya ohimme há: “hiyo ninnarowa ofera ni mapuro aneettiwa nakoso emaara ya 13 ni 15. Emaareene yeeyo, anamatumiha khanattheliwa makiliyente. Nto ninnatthekula nnene ni awo, mpakana ninnawera opatxeriha yoosoma ya Biblya.”

10. Etthu eheeni muneeraanyu nvarele muteko weera mwaphwanye atthu?

¹⁰ Mweerereke moota mukina. Nkuupuwelani weera nyuwo moheerera wuuluma ni atthu ikwaha sintxipale. Pooti weera nyuwo moheerera ophiya mmawanyaya iwoora soovirikana, muhinaaphwanya atthu. Neereke wookhala moota mukina woowaaphwanya atthu? Murokora mmoha onitthaniwa katarina ohimme há: “miyo kinnalepela ikaratta atthu kihinaphwanyaaka mmawanyaya. Kinnalepa ele kaatthunaaka wuuluma ni awo kaaphwanye owannyaya.” Ninxuttera eheeni ni ntakihero nna? Emaara mulaleeranyu, mweerere wuuluma ni atthu ootheene a muttetthe anyu. Mwahiwera wuuluma ni awo mweerere tho moota mukina.

11. Mwaha wa heeni atthu ahintthunaaya wiiwa mitthenka ninlaleyaahu?

¹¹ Atthu akina khantthuna wiiwa mitthenka ninlaleyaahu. Awo khaaniwexexa mwaha wa heeni ontthuneyaaya oxuttera sa Muluku ni itthu sa Biblya. Mwaha wooweera annoona ohaawa otepaka mulaponi, ni awo khammuroromela Muluku. Naari tho awo khantthuna omusoma Biblya, mwaha wooweera annawoona anamahoolela a ittiini ehimaka weera ntthareke ele eri mBiblyani, nto ahooleli awo epakaka itthu soonanara. Akina anaxupeya ni miteko saya, amosi aya naari maxupo a mwekumini mwaya, nikhaanoona weera Biblya pooti waakhavihera. Nipakeke eheeni weera nivirelele ohakalala, naamwi atthu ehitthunaka wiiwa mitthenka ninlaleyaahu?

12. Ninrowa ovarela hayi muteko naalaleeraka miruku iri va Afilipi 2:4?

¹² Moonihere weera munnaphwattha atthu. Atthu akina woopatxerani khayaatthuna wiiwa mitthenka sooreera, vano atxentxa yoonelelakaru weera ninnaapwattha. (Mmusome Afilipi 2:4.) Mwa ntakihero, Davide, ohimwale woopatxerani ohimme há: “emaara mutthu nimmulaleerahu anahima weera khantthuna osoma, hiyo ninnanwala Biblya ni ibuukhu sahu ni ninnamwerela: ‘naatthuna osuwela mwaha wa heeni muneeraanyu hiiho.’” Naakohaka haawo atthu annawera woona weera ninnaapwattha. Awo pooti ehuupuwelaka nalaleenrahu, vanooneya weera anuupuwela moota nnaapwantthaahu. Naamwi munneene vaate ahinaakhulelaka wuuluma, nnoowera woonihera weera ninnampwattha ni mukhalelo ahu ni moota enkhalaaya ethoni ahu.

13. Ninrowa wasaasera hayi moota woolaleera moovarihana ni ele enhawelaaya atthu?

¹³ Mukhalelo mmoha woowoonihera waapwattha atthu, ori waasasera waalaleera ni itthu anhawelaaya. Mwa ntakihero, nyuwo pooti wiikoha, neereke etthoko ele kinrowaaka akhalawo anamwane? Neereke tiithi naari maaye sinoomusivela miruku sa mBiblyani voohima sa moota woowahuwa anamwane, ni moota wookhalano etthoko yoohakalala? Wakhala weera moomoona katiyato mutokotoko vamulako? Wakhala weera ti hiiho, nyuwo pooti opatxeriha wuuluma nyaha sa anakirime ni moota awo aniwoopopihaya atthu. Mene munnene vaate pooti omusivela wiiwa weera itthu iyo sinoorowa omala muhoolo. Imaara sootheesene munamphwanyaanyu mutthu ontthuna oxuttera, mweerere omoonihera miruku sa mBiblyani moota sineeraaya simukhavihere. Katarina yoole ohimmwale woopatxerani, ohimme há: “miyo kinuupuwela moota ekhaikhai etxentxalaaya ekumi aka weera kikhaleno ekumi yooreera.” Mwa yeeyo,  Katarina onnawera ohima ni murimaawe wootheene, ni atthu anamwiiwa annoona eyo.

14. Moovarihana ni Miruku 27:17 moota eheeni nneeraahu nikhaviiheraneke mukina ni mukhwaawe naalaleeraka?

¹⁴ Muttottele mureerelo nikhavihero naatthu akina. Murummwa Paulo amuxuttiha Timotheyo moota woolaleera ni oxuttiha. Owo amooperara ovarela muteko miruku iyo weera aakhavihere atthu akina. (1 Akor. 4:17) Ntoko Timotheyo, nintthuneya oxuttera ni itthu iwereenle asinna mmulokoni mwahu. (Mmusome Miruku 27:17.) Moone ntakihero na munna onitthaniwa Shawn. Owo oovara muteko wa opiyoneiru muttetthe atthu antxipale yaasiveliwaaya ni ettiini aya. Nto owo aawenre hayi ohakalala ni muteko awe woolaleera? Owo onnathaliha: “vawereya, miyo kannavara muteko woolaleera ni mukhwaaka. Hiyo nannavarela muteko ehuhu ele weera nikhaviherane oreherera mikhalelo sahu sa moota wooxuttiha. Mwa ntakihero, hiyo nannuuluma sa mwaha wa otthekula nivirinhahu ni mwaneene vaate. Eyo yannanikhavihera moota neeraahu nuulume otthekula waattharelana.”

15. Mwaha wa heeni nivekelo nraaya nootthuneya naalaleeraka?

¹⁵ Munvekele Yehova nikhavihero. Imaara soothesene munlaleeraanyu, nvekeleke miruku wa Yehova. Khaavo a hiyo eera awere olaleera ahikhaviheriwaka ni munepa woottela wa Muluku. (Nsal. 127:1; Lu. 11:13) Mwavekelaka muhimeeke etthu muntthunaanyu. Munvekeleke Yehova weera mumphwanye mutthu ontthuna wiiwa mitthenka sahu ni oxuttera voohima sa Yehova. Mpakeke ele munweraanyu ni mwiilipihereke wuuluma ni atthu ootheene munaaphwanyaanyu.

16. Mwaha wa heeni opaka yoosomaanyu oneeraaya okhavihere muteko anyu woolaleera?

¹⁶ Mwiivaheke ehuhu weera mpake yoosomaanyu. Masu a Muluku annahima weera nyuwo makristu “mòne’mo otthuna wa Muluku yeeyo eri yooreera ni yomusivela ni yomalela”. (Arom. 12:2) Naamusomaka Biblya ninnavirelela omusuwela nnene Yehova. Nto emaara nilaleyaahu, atthu annawera woona ele hiyo ninroromelaahu voohima sa iye ninxuttihaahu. Katarina ohimmwale woopatxerani, ohimme há: “ehuhu vaakhaaneene ya muttuli, miyo kaahona weera wannatthuneya waatxerera nroromelo naka ni sooxuttiha soopatxea sa mBiblyani. Mene miyo, khannamusoma Biblya moomaleleya kisomaka itthu soonihera weera ookhala mpattuxa, ni saahima weera Biblya masu a Muluku ni weera Muluku ookhalano mareherero awe olelo va.” Katarina onnathaliha eeraka: mwaha woopaka yoosoma ele yoolipiha nroromelo naka ni yohaatxerera ohakalala waka mmutekoni woolaleera.

17. Mwaha wa heeni Yesu akhalannawe moonelo wooreera emaara alaleyaawe?

¹⁷ Atthu akina khayaakhulenle mitthenka alaleyaawe Yesu. Naari vareene hiiho owo aakhalano mukhalelo wooreera voohima sa muteko awe woolaleera. Mwaha wa heeni? Mwaha wooweera owo aasuwela weera atthu yannatthuna oxuttera ekhaikhai ni annatthuna waakhavihera atthu antxipale waakhulela mitthenka sa Omwene. Owo tho aasuwela weera, atthu yaale yaahatthuna wiiwa woopatxerani, muhoolo yamutxentxa mukhalelo aya. Moone ele yaakhumelenle ni amusi awe Yesu. Yesu alaleya iyaakha 3 ni emeya, nto khaavo munnawe aatthuna okhala oxutteraawe. (Yoh. 7:5) Mene Yesu avinyererihiwakaru, awo yaakhala makristu.—Mit. 1:14.

18. Mwaha wa heeni ninvirelelaahu olaleera?

¹⁸ Khaninwera omusuwela ole aneera akhale murumeyi a Yehova. Atthu akina annaviriha ehuhu yintxipale weera exuttere ekhaikhai.  Ni atthu yaale ahintthuna wiiwa mitthenka sahu okhuma khalayi, pooti opatxera ‘onvuwiha Muluku’ nihiku nnaxekuraahu, yoonaka mikhalelo sahu sooreera.—1 Ped. 2:12.

19. Moovarihana ni 1 Akorinto 3:6, 7 eheeni nintthuneyaahu osuwela?

¹⁹ Hiyo ninnala ni niinnahelela, mene ninnasuwela weera Yehova tonkhavihera muteko ahu woolaleera. (Mmusome 1 Akorinto 3:6, 7.) Getahun, munna onvara muteko wEtiopiya ohimme há: “moovira iyaakha 20 kaari meekhaaka kaari Namoona a Yehova muttetthe woothowa anamalaleera. Vano nri anamalaleera 14, ni 13 aabatiziwa waahela mpuwa amwaaraka ni anamwane aka 3. Atthu aniphiyera 32 annoonela mithukumano sahu.” Getahun owo oohakalala mwaha woopixa murima anwehereraka Yehova waakhavihera atthu akina weerela empari mareherero awe!—Yoh. 6:44.

20. Mwaha wa heeni ninhimaahu weera hiyo na ekhurupu enwoopola atthu?

²⁰ Vamaithoni va Yehova, atthu ootheene tootthuneya. Owo onivaha eparakha yoovara vamoha ni mwanawe weera naathukumanye atthu a maloko ootheene ehinaaye omala elapo ela enlamuleliwa ni Satana. (Hag. 2:7) Muteko ahu woolaleera onlikana ni muteko wa ekhurupu enwoopola atthu. Hiyo nri ntoko ekhurupu nneerela empari ya atthu arummwale owoopola atthu attiyeleliwe mulittini ninthimpwa maluku. Pooti weera mutthu mmoha paahi tonwera omoopola mutthu, mene eyo, enkhumelela mwaha wa wiilipihera wa atthu ootheene. Nto muteko wa atthu ootheene ti wootthuneya. Nlikanxereke tho etthu emoharu ni muteko ahu woolaleera. Khaninsuwela taani anaamoopole mutthu mmoha elapo ela ya Satana. Ninsuwelaahu ti yooweera Yehova ononvarela muteko mutthu ori poothe a hiyo. Andreas, yoowo okhanle oBolívia, oneera: “Wa miyo, mutthu ori poothe onxuttera ekhaikhai ni anaBatiziwa wiilipihera wa atthu ootheene.” Nintthuneya okhalano moonelo mmoha wooreera voohima sa muteko woolaleera. Napaka eyo, Yehova onoonireeliha vantxipale ootheene ahu ni muteko woolaleera, onoorowa onihakalaliha.