1. Eheeni apaale yaakhumelenle ekwaha mwapatxenraanyu olaleera?

NYUWO munnuupuwela ekwaha yoopatxera monelelaanyu weera moophwaya ekhaikhai? Sooxuttiha sa Biblya, nasomaahu saari sootepa wiiwanyeyaxa—ni seekhaikhai! Nyuwo muupuwela weera atthu ootheene yaahereke otthuna oxuttera soororomela sanyu. Mwaakhalano nroromelo weera mitthenka sa mBiblyani saamwakhavihera atthu okhala oohakalala ni okhalano yooweherera ya muhoolo. (Nsal. 119:105) Moohakalala mwaalakela waaleela asinthamwene anyu ni amusi anyu ele muxuttenraanyu. Nto yaakhumelenle eheeni? Mootutuxereya, antxipale khayaakhulenle ele mwahimaanyu.

2-3. Atthu a mahiku a Yesu yaamonela hayi?

² Ootheene aahu nihituthuweke vaavo atthu akina ahinaakhulelaaya mitthenka ninlaleyaahu. Mwaha wooweera atthu tho a ehuhu ya Yesu, khayakhulenle mittheka Yesu aalaleyaawe. Nkoonani naamwi awo yoona miirira saathonyihera weera owo anakhaviheriha ni Muluku. Mwa ntakihero, Yesu anvinyereriha Lazaro—mwiirira amwiittanaawe yahaaweraaya okhotta. Nto ahooleli aYuda khayaatthunne waakhulela weera owo aari Mesiya. Mpaka awo yannatthuna omwiiva Yesu ni Lazaro.—Yoh. 11:47, 48, 53; 12:9-11.

³ Yesu aasuwela weera atthu antxipale khayaarowa omusuwela weera aari Mesiya. (Yoh. 5:39-44) Owo ahaleela atthareli a Yohani mBatiza weera: “Vano òreriwa yole ohinakwattuliwa ni miyo.” (Math. 11:2, 3, 6) Heeni atthu antxipale ehalaka omuramusa Yesu?

4. Ti heeni ninrowaahu oxuttera mwa yoosomeene yeela?

⁴ Mwa yoosoma ela ni enttharelana, ninrowa woona mathowa makina yaaweerinhe atthu akina mahiku a Yesu ohimuroromela Yesu. Ni-tho ninrowa woona mwaha wa heeni antxipale olelo va ankwattuliwaaya mwaha wa mitthenka ninlayeyaahu  naari neere okhootta ele ninlaleyaahu. Etthu yootthuneya, nnoorowa oxuttera mwaha wa heeni nintthuneyaahu okhalano nroromelo noolipa mwa Yesu weera nihikwattuliwe.

5. Apaale eheeni yaaweeriha atthu wuupuwela weera Yesu khahiyene Mesiya

⁵ Atthu antxipale yaakwattuwa mwaha wa nipuro ayariwaawe Yesu. Awo yaasuwela weera Yesu aari muhusiha ootikiniha ni anapaka miirira. Nto atthu, yaamoona Yesu okhala mwana akaripinteiru, yoowo aakhala oNazarethi, ecidade yeeyo yooniwa okhala yooyevaxa. Mpakana Nataniyeli yoowo aakhanle mutthareli a Yesu aphiyeera ohima ha: “Onazarethi ennawereya okhala’wo etthu yorera?” (Yoh. 1:46) Nataniyeli apaale khaheela mwiitti ecidade Yesu ayariwaawe naari pooti weera uupuwela yoolohera ya Mikeya 5:1 [5:2 NM], enhima weera Mesiya aarowa oyariwa oBelem, ohiya oNazarethi.

6. Etthu heeni yeera yakhavihere atthu a mahiku a Yesu omusuwela weera aari Mesiya?

⁶ Soolepa sinhima heeni? Mprofeeti Yesaya aahima weera amwiittani a Yesu khayaarowa otthuna osuwela ‘erukulu oyariwaawewo [Mesiya]’. (Yes. 53:8) Itthu sintxipale sakhumelenle saahimmwa khalayi. Waakhanle weera atthu yanniivaha ehuhu weera ethokorore soohima sootheene, yamusuwela weera Yesu aayariwe oBelem ni aari mwana Davidi. (Lu. 2:4-7) Nipuro Yesu ayariwaawe, nannavarihana ni yoolohera ya Mikeya 5:1 [5:2 NM]. Vano yaaxupa eheeni? Etthu yaaxupa yaari weera awo yaapaka itthu moohupuwela. Awo khayasuwenle itthu sootheene. Mwaha wa yeeyo yakwattuleya.

7. Eheeni enweeriha atthu akina olelo va, waaramusa Anamoona a Yehova?

⁷ Neereke nookhalano maxupo mamoharu olelo va? Aani. Arumeyi a Yehova antxipale ankhuma mapuro ohisuwanyeya. Mwaha wa yeeyo, anoniwa okhala atthu ‘oohisuwanyeya ni oohisoma.’ (Mit. 4:13) Atthu akina anoona weera atthu a Yehova khontthuneya waaxuttiha atthu akina Biblya mwaha wooweera khayaanono Certificado onthonyera weera awo aasoma exikola ensommwa sa Muluku (teologia). Atthu akina anhima weera Anamoona Yehova “ettiini yaakunya naari neere enkhuma wAmerica,” mene mweekhaikhai mwa Anamoona 7 mmoha onkhala wEstados Unidos. Ni atthu akina ahiiwa ehimmwaka weera Anamoona a Yehova khamuroromela Yesu. Iyaakha sa muttuli arumeyi a Yehova ahootheriwa okhala atthu antthuna “wiilamulela,” “anamahottela a wAmerica” ni “atthu anwooperera atthu akina waakhulela soororomela saya” atthu antheteya maaru aya yiiwaka soowootha iyo, ni ehisuwenle ekhaikhai voohima sa Anamoona a Yehova anakwattuwa naari neere ennanramusa.

8. Moovarihana ni Miteko 17:11 atthu epakeke eheeni weera yaasuwele arumeyi a Muluku olelo va?

⁸ Eheeni kintthuneyaaka opaka weera kihikwattuliwe? Atthu antthuneya osuwela itthu soothesene sinvoleihera mpuwa. Ti yeeyo namalepa a Evanjelyo ya Luka apankaawe. Owo aalakela waasaasa ni “okoha-koha orattene sothesene, okhuma wopatxerani.” Owo aatthuna weera anamasoma awe “esuwele etthwitthu ya masu” yaawo yiiwalaaaya ni Yesu. (Lu. 1:1-4) Ayuda akhalayi yaakhala ecidade yoBereya yaari ntoko Luka. Yiiwakaru mitthenka sooreera voohima sa Yesu, awo yaatokosa soolempwa nihiku ti nihiku weera yoone waari weera iye yaaxutteraaya saari seekhaikhai. (Mmusume Miteko 17:11.) Etthu emoha-moharu, atthu mahikwaano, antthuneya othokororaka soowereya sootheene. Ontthuneya olikanxeraka ni itthu  anthalihaya atthu a Muluku ni iye soolepa sinhimaaya. Awo tho ontthuneya osoma soowereya sa atthu a Yehova amahikwaahu ala. Yaathokororaka “itthu” atthu a Muluku anhimaaya, nthalu ni iye atthu anuulumaaya soowothera atthu a Muluku, khasinrowa waapwexa maitho.

9. Eheeni yaakhumelenle Yesu akhoottakaru owoonihera enenero ya wiirimu?

⁹ Sooxuttiha sa Yesu saari sootikiniha. Naamwi vareene hiiho, atthu akina a mahiku awe, khasaakwanelela iye aaxuttihaawe. Awo yaatthuna soopwaha vaavo. Awo yaamunyeserera weera aalele mwaneene weera owo aari Mesiya awooniheraka “enenero ya wirimu.” (Math. 16:1) Apaale yamunyeserera mwaha wooweera khaiwexexa nnenesene, masu ari va Daniyeli 7:13, 14. Mene khayakwanenle ehuhu weera Yehova akwanihere yoolohera ela. Sooxutthiha sa Yesu, saaphwanela owiiwanyeiha atthu ale weera owo aari Mesiya. Mene emaara Yesu aakhonttawe owoonihera enenero atthu awo yaatthunaaya, awo yaakattuliwa.—Math. 16:4.

10. Moota heeni Yesu akwanihenraawe ele Yesaya alempaawe voohima sa Mesiya?

¹⁰ Soolepa sinhima heeni? Mprofeeti Yesaya olempe há voohima sa Mesiya. “kharowa okhuwela nari oweliha mmilo awe nnakhala osuwanyeiha nsu nawe vanlakani.” (Yes. 42:1, 2) Yesu aavara muteko awe woolaleera ahittottopaka mwaneene. Owo khatenke ipewe itokweene khaawara ikuwo sa ittiini. Naari khaawooperera atthu weera emwiitthaneleke maitthaneliwo a ittiini. Naamwi ekumi awe yaareene mmatatani mwa mwene Herodi, Yesu aakhootta opaka miiriira weera ahittottope. (Lu. 23:8-11) Ekhaikhai weera Yesu annapaka miirira, mene etthu yootthuneya waari olaleya mitthenka sooreera. Owo aweerela ohusera awe: “niwoko ti mwa yeyo kikhumenlak’awo.”—Mar. 1:38.

11. Itthu heeni soonanara atthu anuupuwelaya olelo va?

¹¹ Neereke nookhalano maxupo mamoharu olelo va? Aani. Etthu enaasivela ahooleli a  ittiini olelo va, iri igreja itokweene ni sooreeraxa soopakiwa ni itthu soorika. Nave-tho ni maitthaneliwo a vamekhaya ni ifesta sihinsuweliwa sikhummayawo. Mwa itthu sootheene iyo anipakaaya, anxuttera eheeni voohima sa Muluku ni yoolakela awe? Mene wa ale anoonela mithumano sahu, annaxuttera ele Yehova onnivekelaawe. Impa sahu sa Omwene mapuro ooratteliwa ni ohattiheriwa itthu. Ale anihoolela, khaniwara ikuwo soothanleya naari neere soottittimiheya ni khaanitthaneliwa maitthaneliwo a vamekhaaya. Mathipelo a sooxuttiha ni soororomela sahu masu a Muluku. Naamwi vareene hiiho, atthu antxipale annakwattuliwa yoonaka weera omukokhorela wahu Muluku ti wootepa okhweya. Nave tho mwaha wooweera itthu ninxuttihaahu khaiyene ti seiyo awo antthunaaya wiiwa.

12. Moovarihana ni Aheberi 11:1, 6, nroromrelo nahu nikhumeke woowi?

¹² Nipakeke eheeni weera nihikwattuliwe? Murummwa Paulo ahaalela makristu oRoma: “mwa yeeyo wiwelela onakhuma wa wiwa, ni tho wiwa onakhuma wa nsu na Kristu.” (Arom. 10:17) Ifesta sa ittiini sihinvarihana ni soolepa naamwi sikhalaka ntoko sooreera ni sootxeya, khasinlipiha nroromelo nahu. Etthu ennikhavihera watxerera nroromelo nahu ori osoma masu a Muluku. “Mene ohikhanle wiwelela, khonawereya omusiveliha Muluku.” Mwaha wa yeeyo, nintthuneya watxerera nroromelo ninkhuma mwa osuwela wa ekhaikhai. (Mmusome Aheberi 11:1, 6.) Vano weera nisuwele weera noophwanya ekhaikhi, khoontthuneya woona eneneero ya wiirimu. Oxuttera sooxuttiha sa mBiblyani sinoonikhavihera olipiha nroromelo nahu ni ohikhalano ohovela.

13. Mwaha wa heeni atthu antxipale yaamuramunsaaya Yesu?

¹³ Mahuku a Yesu, oohusera a Yohani mBatiza yaatikhina mwaha wa oohusera a Yesu ohimutthuka ramasaani. Yesu aathaliha weera khuwaatthunya omutthuka ramasaani owo areene mukumi. (Math. 9:14-17) Naamwi vareene hiiho, Yesu anniramusiwa ni afarisi  ni amwiittani awe akina mwaha woohitthara sookhovelela saya. Atthu ale yaananariwa vantxipale mwaha wa Yesu woowalamiha aretta nihuku na esaabado. (Mar. 3:1-6; Yoh. 9:16) Vano wakhala weera awo yanniiteexa mwaha wa woottittimiha esaabado, empari ekina awo khayoona okhala yoonanara ompaka nakoso mpeweni. Awosa yaanninyoonyiwa mwaha wa Yesu woowaaxulula ni etthu yaapakaaya. (Math. 21:12, 13, 15) Ni atthu yanwiriyanne Yesu alaleyaka oNazarethi, yaatikhina mwaha wa Yesu woopaka nlikanyiho na ana Israeli vaavo aawooniheraawe weera awo yaari atthu yaatthuna mureerelo aya. (Lu. 4:16, 25-30) Mukhalelo wa Yasu waahaakwattuliha atthu antxipale.—Math. 11:16-19.

14. Mwaha wa heeni Yesu aaxuxulaawe atthu yaatthara sookhovelela saya sahaavarihana ni soolepa?

¹⁴ Soolepa sinhima heeni? Moorweela mwa mprofeti Yesaya Yehova enre: “Niwoko na xeni muloko ola onakàttamelaya ni nsu pahi ni onakittittimihaya mmwanoni pahi? Khweli murim’aya onnakhala ottaiwene wa miyo ni okòva waya miyo ti wettela ikano ni murima vasulú pahi.” (Yes. 29:13) Yesu khoothiye vaavo aaxuxunlaawwe atthu ale yaatthara sookhovelela saya seiyo sahaavarihana ni masu a Muluku. Atthu yaattittimiha sookhovelela saya okhala sootthuneyaxa opwaha soolepa, yannimuramusa mweekhaikhai Yehova ni ole aamuruminhaawe ntoko Mesiya.

15. Mwaha wa heeni olelo va antxipale ehinaatthunaaya Anamoona a Yehova?

¹⁵ Neereke nookhalano maxupo mamoharu olelo va? Aani. Antxipale enninyoonyiwa mwaha wa Anamoona a Yehova woohitxa ifesta ohitthara sookhovelela seiyo sihinvarihana ni Biblya, ntoko aniversaariyu ni Natale. Akina enninyoonyiwa ni Anamoona a Yehova mwaha woohipakela empari ifesta sa mulaponi ni ehintthara sookhovelela voohima sa moota woovithana sihinvarihana ni Biblya. Mene atthu awo enuupuwela weera enimukokhorela Muluku moovarihana ni yootthunaawe. Mene awo entthara sookhovelela sa mulaponi ohiya otthara sooxuttiha sa mBibyani, khenimusiveliha Yehova.—Mar. 7:7-9.

16. Moovarihana ni Nsalmu 119:97, 113, 163-165, eheeni nneeraahu nipakeke nave eheeni nneeraahu nramuseke?

¹⁶ Nipakeke eheeni weera nihikwattuliwe? Ontthuneya okhalano nsivelo wa malamulo ni sooruma sa Yehova. (Mmusome Nsalmu 119:97, 113, 163-165.) Wakhala weera ninnimusivela Yehova ninkela oramusa sookhovelela sihimmusivela Yehova. Nave khanaakhulela etthu eri poothe eneera ekhale yootthuneyaxa opwaha omusivela wahu Yehova.

17. Atthu akina a mahiku a Yesu, yaaweherera weera Mesiya arowa opaka eheeni?

¹⁷ Atthu akina a mahuku a Yesu yannaweherera otxentxiwa wa epoliitika moowakuveya. Awo yannahasuliwa ni olamulelo wa oRoma ni yaatthuna weera Mesiya awoopole mwa ohasuliwa iwe. Mene emaara yaatthunaaya onvara Yesu okhala mwene aya, owo aakhootta. (Yoh. 6:14, 15) Atthu akina—waahela mpuwa anamakeya—yannavahiwa miruku sa oRoma soowera ni sa otokweene. Mwa yeeyo, yannamoova Yesu weera amuruuhela olamulela waavirikana ni ole wa oRoma. Nto mwaha wa itthu iyo sa epoliitika saaweriha aYuda antxipale okattuliwa.

18. Yoolohera heeni yaahima weera Mesiya aarowa oramusiwa?

¹⁸ Soolepa sinhima heeni? Soolohera sintxipale samuhima Mesiya, saahima weera owo aarowa okhala nakhotto oowera, ni ikina soonihera weera owo aarowa opatxera okhwa  mwaha wa soottheka sahu. (Yes. 53:9, 12) Vano, mwaha wa heeni aYuda yarayano moonelo woohireerela voohima sa Mesiya? Mwaha wooweera atthu antxipale yaatthuna omalihiwa maxupo aya emaareene yeele. Mwa yeeyo, awo yannaramusa soolohera soothesene sahaahima itthu iyo.—Yoh. 6:26, 27.

19. Itthu heeni sinaakwattuliha atthu olelo va?

¹⁹ Neereke nookhalano maxupo mamoharu olelo va? Aani. Atthu antxipale olelo va annakattuliwa mwaha wooweera khanneerela empari epoliitika. Nto anoona weera wannatthuneya hiyo weera ninvotariki presidente ehuhu ya muthanle. Mene hiyo noosuwela weera namuthanla mutthu okhala namalamulela ahu, ninrowa oramusaka olamuleliwa ni Yehova. (1 Sam. 8:4-7) Apaale atthu pooti wuupuwela weera ole anaathanliwe aneereke opaka ixikola, itxipattala ni miteko mikina sa ikharari. Awo annakwattuliwa yaanoonaka niilipiheraka ovara muteko woolaleera, ohiya opwattha omalihiwa maxupo ahu vaanano vaava.

20. Ntoko ehimmwalaya ni Yesu va Matheyo 7:21-23, eheeni eneera ekhaleke yootthuneya wa hiyo?

²⁰ Nipakeke eheeni weera nihikwattuliwe? (Mmusome Matheyo 7:21-23.) Etthu yootthuneya nintthuneyaahu opakaka, ori muteko woolaleera yoowo Yesu onivanhaawe. (Math. 28:19, 20) Nihihiye muteko ahu mwaha wa itthu sa epoliitika naari itthu ikina sene sa elapo ela. Hiyo mwaha woowasivela, ninnaxupeya ni atthu awo yaavirihaka maxupo. Nave noosuwela weera moota woowakhavihera asikwiihu ori: waxuttiha voohima sa Omwene wa Muluku ni waakhavihera okhala nthamwene a Yehova.

21. Niilipihereke opaka eheeni?

²¹ Mwa yoosomeene yeela nohoona itthu ixexe saawerinhe atthu okwattuliwa ni omukhootta Yesu. Ni etthu eneeriha okhoottiwa atthareli a Yesu olelo va. Vano nto neereke ontthuneya wiikosoopa ni itthu sene seiyo paahi? Hooye. Mwa yoosoma enttharelana, noorowa woona itthu ixexe ikina sineeriha okwattuliwa. Mwiilipihe weera muhikwattuliwe, ni mulipihe nroromelo nanyu!