1-2. Maxupo heeni anna antxipale anvirihaaya?

MURUMMWA Paulo aamooperera Timotheyo—weera: ‘ovare muteko woolaleera.’ (2 Tim. 4:5) Ootheene hiyo khaninkuxera matheela ele Paulo ohimmaawe. Mene aakhala maxupo. Weera asinnihu antxipale ewere olaleera ontthuneya olipa murima. (2 Tim. 4:2) Nwuupuweleke asinna ankhala elapo muteko ahu woolaleera onkhottihiwaaya. Mene awo, naamwi esuwelaka weera anootthukeliwa annavirelela olaleya!

² Asinna antxipale annakumanano maxupo mantxipale eneera yaapakiheke okhulumuwa. Mwa ntakihero, antxipale annavara muteko nihiku ntero weera etxiheke etthoko aya. Awo yannatthuna ovara vantxipale muteko woolaleera, mene woophiyani okhwipi wa esemana ankhala oveleene. Akina ennaavoreya eretta ehinlammwa ni akina mwaha woowuuluvala. Emaara ekina khanwera okhuma owaani mwa yeeyo, khaaniwera opaka ele yaatthunaaya mmutekoni woolaleera. Ni aakhala-tho ale anoopopihiwa ni muupuwelo woohirerela awo anuupuwela weera Yehova khanaahela mwiitti. Maria, * murokora onkhala wa Oriente Médio, oneera: “Ontthuneya wiilipihera weera kiwaneno muupuwelo aka woohireerela, yoowo ohinkhweya okikhulumula. Voottharelana kinnixoopa mulattu, mwaha wooviriha ehuhu yintxipale ni ikuru saka seiyo keeraka kivirihe woolaleerani.”

3. Eheeni ninrowwaahu oxuttera mwa yoosoma ela?

³ Khontthuneya opwattha itthu sinnixupa Yehova onnalaihera onivaha ikuru. Owo khannikhavihera paahi ovilela maxupo ahu mene ovara ele ninwera ahu ovara mmutekoni mwahu. Mwa yoosoma ela, nnoorowa woona moota Yehova onipakaawe eyo. Nihinaakuve ninrowa woona moota Yehova amukhavihenraawe Paulo ni Timotheyo ovilela maxupo aya, no moota yaavirelelaaya ovara muteko woolaleera.

4. Maxupo heeni Paulo aavirihaawe?

⁴ Paulo aaviriha maxupo mantxipale. Owo wannitthuneya weera  akhalene ikuru vantxipalexa vaavo oopopihiwaawe, aavonyiwaawe maluku ni aawaleliwaawe okalipooso. (2 Akor. 11:23-25) Moowiiyeviha Paulo ohuuluma weera anniwanana muupuwelo woohireera. (Arom. 7:18, 19, 24) Opwaha mwa yeeyo, annivilela ni “miiwa sa mwerutthuni.” Emaara emoha, mpakana owo anvekela Muluku moowiikhupanyera weera amukhavihere ni miiwa iye.—2 Akor. 12:7,8.

5. Naamwi Paulo aaviriha maxupo, itthu heeni aaweraawe opaka?

⁵ Naamwi Paulo aaviriha maxupo ale, owo aavahiwa ikuru ni Yehova weera awere ovara muteko awe woolaleera. Moone itthu Paulo aawenraawe opaka. Mwa ntakihero, Paulo khaawereya okhuma mpaani,—eera awaleliweeni—mukalipooso ya oRoma. Nto naamwi vareene hiiho, owo aawera wuuluma ni anamalamulela. (Mit. 28:17; Afil 4:21, 22) Owo tho annawera waalaleera maguarda yanweherera ni ale yaarowa omuxekura.” (Mit. 28:30, 31; Afil. 1:13) Yaari ehuhu ene yeeyo Paulo aalepenlaawe ipaphelo sootthuneyaxa makristu eekhaikhai. Opwaha mwa yeeyo, Paulo aavaha ntakihero nooreera wa miloko sa akristu a oRoma. Biblya onihima weera makritu a muloko ole yaaphwanya “wìleva ni ikuru sitokotoko olaleya nsu, ehovaka etthu.” (Afil. 1:14) Ekhaikhai weera Paulo itthu ikinasene khaawera opaka, mene owo anniilipihera weera apake ele aweraawe. Yookhumelelaaya yaari teevi? Muneene Paulo enre: “Vano kintthuna wosuwelihani wi milattu saka sikhumelenle, wera yokhavihereni opwahiheriwa masu oreeraxa a Muluku.”—Afil 1:12

6. Moovarihana ni 2 Akorinto 12:9, 10, mwaha wa heeni Paulo aawenraawe ovara muteko awe?

⁶ Paulo annisuwela weera ahaakhala okhaviheriwa ni Yehova, khaawera opaka ele aawenraawe opaka. Owo aahoona weera mwaha wa ikuru sa Muluku “wona wi owerya waya wannamaleliha solosowa sawe.” (Mmusome 2 Akorinto 12:9, 10.) Yehova aavarihela munepa awe wootteela weera anvahe ikuru Paulo. Vaavo, murummwa ole oororomeleya anwera olaleya naamwi—aattharatthariwa, aawaleliwa mukaliposo naari maxupo makina.

7. Maxupo heeni Timotheyo aavilelaawe weera awere ovara muteko awe?

⁷ Naamwi Timotheyo aari mmiravo ompwaha Paulo, wannitthuneya-tho ororomela ikuru sa Muluku weera awere ovara muteko awe. Timotheyo aamuhoola Paulo muteko woolaleera. Opwaha mwa yeeyo, Paulo anvekela Timotheyo opaka ikwaha weera axikure ni olipiha miloko. (1 Akor. 4:17) Apaale pooti weera Timotheyo uupuwela weera khuwaareerela opaka  eyo. Apaale nto tiyeeyo yaamweerinhe onvaha miruku: “Ahikhale mutthu anòveha weyo niwoko na omiravo á.” (1 Tim. 4:12) Aani mpuwa mwa ehuhu eyo, Timotheyo anniviriha miiwa sa mwerutthuni—‘owo aakhalano ikwerere sintxipale.’ (1 Tim. 5:23) Mene nto Timotheyo wannitthuneya okhaviheriwa ni munepa wootteela wa Yehova. Akhaviheriwaka nimunepa ene yoowo, aamukhalano ikuru seera simukhavihere olaleya mitthenka sooreera ni waarumeela asinnawe.—2 Tim. 1:7.

8. Yehova onnivaha hayi ikuru mahuku ahu ala?

⁸ Olelo va Yehova onnaavaha atthareli awe “owèrya otokotoko”. (2 Akor. 4:7) Nrowe noone mikhalelo miraru Yehova onnivahaawe ikuru moorweela mwa: nivekelo, Biblya, asinna makristu ni muteko woolaleera.

9. Nivekelo ninkela onikhavihera hayi?

⁹ Elipihiwe moorweela mwa mavekelo. Va Aefeso 6:18, Paulo onninooperera onvekela Muluku “ehuhu eri yothene.” Muluku onkela onaakhula onivahaka ikuru nintthunaahu. Jonnie, onkhala oBolívia, aahoona nikhavihero na Yehova vaavo aavirihaawe maxupo mantxipale. Amwaariye ni asitithawe yaapatxera ovoreiwa iretta itokotoko emaara emoharu. Mene Jonnie waatepa omuxupa waakosoopa atthu ale emaara emoharu. Mooriipiha murima amayawe aarimeela, ni amwaariye vamoha ni atithawe yaaviriha ehuhu yintxipale weera elame. Uupuwelelaka ehuhu ele, Jonnie oneera: “Ehuhu miyo kaakhalaka oowiiniwa murima vantxipale, etthu yaakikhavihera waari opaka nivekelo nooluluwanya.” Yehova anvaha Jonnie ikuru owo aatthuna awe weera awere ovilela. Ronald, mutokweene mmoha a mmulokoni onkhala oBolívia, aasuwela weera amayawe yaakhalano eretta ya Câncer. Mooripiha murima awo yaahookhwa evinreene mweeri mmoha eheeni yaamukhavihenre ovilela eyo? Owo oneera: “Miyo kanvekelaka Yehova, kinnahula murimaaka wootheene ni kinnamuleela etthu enkivoreya vamurimani. Miyo kinniroromela weera Yehova onnoona soohaawela saka opwaha mutthu mukineene. Mweekhaikhai, owo ookisuwela okipwaha mwaneene aka.” Pooti weera ehuhu ekina, ninnoona onilemela maxupo ahu naari tho ohisuwela etthu yoohima munivekeloni. Mene Yehova onniniwopa weera ninvekeleke naamwi noonaka okhala wooxupa ovarela muteko muupuwelo ni ele ennivoreya vamurimani.—Arom. 8:26,27.

10. Moovarihana ni Aheberi 4:12, heeni oraaya wootepa otthuneya omusoma Biblya?

¹⁰ Elipihiwe moorweela mwa Biblya. Paulo aahaakhela ikuru moorweela mwa soolepa. Emoha-moharu enimweereya nihiyo. (Arom. 15:4) Onnitthuneya weera veeli-veeli osoma masu a Muluku ni wuupuwelela ele ninsomaahu. Naapakaka eyo, Yehova onkela ovarihela munepa awe wootteela weera anoonihere moota Biblya onkelaawe onikhavihera naavirihaka maxupo. (Mmusome Aheberi 4:12) Ronald oromoliwe muttuli mu, oni: “Waari wookhavihera ni yookhovelela osoma eversu emoha ya mBiblyani ohiyu wootheene. Miyo kinnuupuwelela mikhalelo sa Yehova, moota owo onaavilelaawe arumeyi awe. Eyo ennakikhavihera okhalano ikuru.”

11. Moota heeni Biblya aamukhavihenraawe murokora ovilela emaara aariipinwaawe murima?

¹¹ Otthokelela ele ninsomaahu enkela onikhavihera okhalano moonelo wooreera naavirihaka maxupo. Moone etthu yaakhumelenle ni murokora mmoha. Owo aari ooripiwa murima mwaha wa okhweliwa iyawe. Nto mutokweene mmoha a mmulokoni anvaha moonelo mmoha aamweerelakaru weera: amusome buukhu a Yobi. Murokora ole aahiithanlela ovarihela muteko moonelo wa mutokweene ole. Vaavo ampatxerihaawe  osoma, moonelo woopatxera waari ole onuuluma Yobi mwaha wa muupuwelo awe. Owo annuuluma mmirimani-mmirimani: “Yobi! Ohikhalekeno moonelo woonanara mooteene yoola.” Tiyeeyo yampakinhe wuupuwela: Owo aakhalano mukhalelo mmoha-moharu wa Yobi. Omusoma buukhu ole a mBiblyani, waamukhavihera murokora ole otxentxa muupuwelo ole woonanara ni okhalano ikuru weera avilele okhweliwa iyawe.

12. Yehova onaavarihela hayi muteko asinna oororomela weera enivahe ikuru?

¹² Elipihiwe moorweela mwa asinna akristu. Moota mukina Yehova onnivahaawe ikuru ori moorweela mwa asinna oororomela. Paulo ahaalepela asinnawe a moororomelani. “Vekhaikhai kinìnlelaxa owònani, wera nilipihaneke.” (Arom. 1:11, 12) Maria oromoliwe woopatxerani, onnoona weera okhala vamoha ni asinna ti wootepa ontthuneya. Owo oneera: “Yehova aahaavarihela muteko asinna ni a arokora yaawo yaahasuwenle muteko aka. Awo yaahuuluma etthu yaakilipinhe ni yaakivaha ni yaakirumihela ekartawu ni eyo yaari etthu kaawehereraaka ehuhu ele. Nave etthu ekina yaakikhavihenre waari waaleela maxupo aka asinna yaawo yaavirinhe maxupo mamoha-moharu, mwaha wooweera kinooxutta ni sookumanano saya. Ni asitokweene a mmulokoni anapaka ele anweraaya ekileelaka weera, miyo tootthuneyaxa mmulokoni.”

13. Moota heeni nneeraahu naalipiheke akina mahukwaano?

¹³ Ehuhu ekina ninlipihanaahu mukina ni mukhwaawe siri mithukumano. Moonelaka mithukumano munoonela hayi waalipiha akina? Mmweerele munna naari murokora: “Miyo kinnoosivelani.” Naari “asantte mwaha wa sootheene mumpakaanyu.” Mwa ntakihero, sihinaakuveene mithukumano, mutokweene mmoha oneeriwa Peter enre wa murokora mmoha aiyawe ehisuwenle ekhaikhai: “nyuwo khamunuupuwela moota kinlipaaka mwaha woowoonani, ni nyuwo munnaawiiha anamwanaanyu athanu namosa nave awo enwa oowiirehereene weera evahe ikomentaariyu.” Maitho a murokora yaasareya maithori. Mooxukurela owo aakhunle: Mene nyuwo khamwaasuwela weera olelo kannihaawela masu oolipiha ntoko awo.

14. Eheeni eneera yeereye naalaleyaka vale?

¹⁴ Elipihiwe moorweela mwa olaleya. Vaavo nnuulumaahu sa Biblya wa atthu akina, hiyo ninnaphwanya ikuru, waakhulela naari ohaakhulela. (Mir. 11:25) Murokora mmoha oneeriwa Stacy aahoona nimaitho awe moota olaleya onvahaaya ikuru. Mmusi awe mmoha aakumihiwa mmulokoni nave eyo yaamuriipiha murima. Owo anniikoha: “Keereke miyo kaanwera opaka etthu weera kimukhavihere?” Stacy khaawera wuupuwelela etthu ekina. Eheeni yaamukhavihenre oviriha maxupo ale? Olaleya! Vaavo aarowaawe woolaleyani, owo anniilipihera owuupuwelela atthu aalaleeraawe. Owo onii: “mpuwa mwa ehuhu ele, Yehova aakikhavihera ni aakivaha namasoma a Biblya aakuva wunnuwa moomunepani. Eyo yaakilipiha vantxipale. Etthu enkivaha ikuru ori olaleya.”

15. Eheeni muxuttenraanyu ni masu a Mary?

¹⁵ Asinna akina anoona weera, mwaha wa maxupo aya, khuvanwereya opaka ele enweraaya weera elaleere. Neereke munoonela hiiho? Vano muupuweleke weera Yehova onnihakalala vaavo aniwoonaaweni mwiilipiheraka. Moone ntakihero nikina na murokora Mary. Athaamelakaru muloko wuulummwa nuulumo nookhopela wa nuulumo nawe, owo aari ootthukeyeene. Mary onhima: “Moovira ehuhu, omithukumanoni naari weera kipake ekomentaariyo waari wa vakhaaniini, aani waari osoma yoolepa ya mBiblyani ni woolaleerani waari ovaha efolhetu paahi.” Voottharana Mary aatxentxa muupuwelo awe. Owo ahoona weera  naamwi aaviriha maxupo ale, Yehova amunvarihela muteko naamwi ahaawera wuuluma nnenesene nuulumo nne. Mary oni: Ekhaikhai ya mBiblyani tiyootepa okhweya ni pooti otxentxa ekumi yaatthu.”

16. Naamwi muhikhumaka vaate, eheeni eneera yookhavihereni okhalano ikuru?

¹⁶ Apaale nyuwo mwannitthuna olaleera, mene khamunwera ovinya vaate. Muroromele weera Yehova onnoona nave onnawera osuwela maxupo anyu, Owo pooti woovahani ebarakha yookwana waalaleera atthu ntoko ale enaasamara atthu, manfrimeero naari mameediku. Opwaha mwa yeeyo, muhilikanxereke ele mwaapakaanyu khalai ni ele mumpakaanyu viinaano, eyo pooti wookhulumulani. Mweerere wuupuwelela ele Yehova ompakaawe weera ookhavihereni. Mwapaka eyo, nyuwo munkela okhalano ikuru weera nvilele maxupo ni ohoomalelani ohakalala.

17. Moovarihana ni Koheleti 11:6, mwaha wa heeni ohintthuneyaaya okhulumuwela muteko woolaleera?

¹⁷ Hiyo ninniilipihera weera naale mmiso weekhaikhai. Mene khaninsuwela mmiso heeni oneera okhaleno mikwakwaari ni oneera wunnuwe. (Mmusome Koheleti 11:6.) Muupuwele ntakihero na Barbara. Owo aakhalano iyaakha soopwahaka 80 ni onnivirelela olaleya moorweela mwa telefooni ni ipaphelo. Mwa epaphelo aaruminhaawe, owo aamuhela A Sentinela 1 a Março a 2014, aarino muru oneera, “O que Deus tem feito por você”. Barbara khaasuwela weera epaphelo ele yaakela waakhela anamathelana amoha yahaakhanle-tho Anamoona a Yehova. Mene anamathelana ale yaasoma erevista ele ikwaha sintxipale. Amulopwana aahoona weera waakhala ntoko Yehova aamuuluma ni yoowo. Nto yookhumelela eri yooweera anamathelana ale yaapatxera woonela mithukumano muhoolo mwaya—yaatthikela okhala Anamoona a Yehova—sivinreene iyaakha 27. Munnuupuwela moota eyo yaamuhakalalinhaaya ni omulipiha Barbara mwaha wookhumelela nnene epaphelo aalempaawe!

18. Eheeni nneeraahu nipakeke weera naakhele owera wa Muluku?

¹⁸ Yehova onninivaha eparakha yoowaakhela ikuuru sawe. Ntoko noonnaahu, owo onninivaha nivekelo, Biblya, asinna makristau ni olaleya. Moone okhala wa parakha soovaha sene seiya. Neera haawo, ninkela woonihera weera ninnimuroromela Yehova ohiya weera owo onoowera, mene owo onnitthuna onikhavihera. Mmuroromeleke Tiithiinyu a wiirimu, ni muroromeleke weera owo onnitthuna awoonihera owera wawe “yale anammuroromela ni murim’aya wothene.”—2 Sow. 16:9.