Yehova ontthuna mweekhaikhai onnimusivela wa ale enthelana ekhale oohakalala ni othela waya okhale woohakalaliha ni woolipa. (Math. 19:4-6) Wakhala weera eyo muntthunaanyu, munkela omphwanya woowi ole muntthunaanyu othelanano? Yehova mwaha wookhala mpattuxaahu, oosuwela weera hiyo nintthuna weera nikhaleno nttomero naari ntheli noohakalala. Vano wakhala weera ninnatthara miruku owo onivanhaawe, nnoohakalala mweekhaikhai. Nrowe noone miruku vakhaani.

Yoopatxera, ontthuneya osuwela sa asinneenaahu etthu ela: “Murima wa mutthu ti wowotha opwaha sothene, khonlakeya, ni tani onawerya osuwela?” (Yer. 17:9) Vaavo atthu eeli entthunaaya othelana ennipatxera osuwelana ni ennipatxera oleelana itthu seesiiri ni otthunana iwo moowaakuveya onnitepa olipa, nto etthu eyo yapatxera onnivila wuupuwela mwa miruku. Mutthu oniithanlela othela attharaka onvavawawe murima, okhwipiwawe ori wiipwexa meekhaawe. (Mir. 28:26) Mwa yeeyo, khuwaakela okhala wa miruku mutthu opatxera otthekula moovirelela naari oleelana itthu seesiiri seemutthu mutthu ahinaakuveene omusuwela nnenesene mutthu owo. Nave-tho, waakela okhala wa miruku atthu awo ehiinaakuveene okuxa muritti owo osuwelana nnenesene mukina ni mukhwaawe.

Buukhu a Miruku 22:3 oneera: “Namiruku sinnamwètta isimu ni onnìpitha, mulolo onnapwaha, amorelaka mmurakhoni.” Erisa heeni yeera ekhumelele wakhala weera ninvarihela isaite naari aplicativo weera nthelane ni mutthu mukina? Mooriipiha murima, akina aamorela mmuraakhoni mwene mwemmo nave ahaaphwanya maxupo mantxipale mwaha woothelana moorweela mwinternetini. Opwaha mwa yeeyo, otthu oohimoriwa ikharari aavarihela muteko ithoni saakina weera ewiiyere musurukhu atthu oolosowa. Ni anamootha awo aaphiyera ohima weera awo Anamoona a Yehova.

Moone erisa ekina. Isaiti soothelana sinnavarihela muteko ikontha sa matemática weera ethanle waari weera ennaphwanelelana ni mutthu mukina. Mene khiyaavo enoonihera weera etthu eyo ennakhumelela nnene. Muupuwele weera ntheli etthu yootepa otthuneya. Munuupuwela weera, mwaatthunaka wiithanlele othela ontthuneya ororomela iprograama sa mucomputadoreni siheliwe ni atthu? Munuupuwela weera ikontha seiyo simpakiwa  naatthu pooti olikanxera ni masu eri mBiblyani?—Mir. 1:7; 3:5-7.

Va Miruku 14: ninnaphwanya miruku sootepa otthuneya, masu eneera: “Nsikini ninnìwelela sothene nnahimeriwaya, namiruku onnaphima mavalo awe othene.” Weera mwiithanlele wa ole munkelaanyu othelanano okenla okhala iyinyu naari mwaarinyu oophwanelela, woopatxerani ontthuneya omusuwela nnene mutthu owo. Tiyooxupa opaka eyo mwinterneetini. Nyuwo onoowereya winviyarelana imensagem sintxipale naari orumihelana ifootu soowaatta, vano munniroromela weera moomusuwela nnene mutthu owo? Akina yiixootonthe moota owo, yaatutuxereya vaavo yaakumanenlaaya owiitho ni owiitho.

Nasalmu mmoha enre: “Nkinakilathi vamosá ni alolo nari nkinàtana ni atthu a mirima mili.” (Nsal. 26:4) Atthu akina weera yoothe ennahela ithoni sootepa oreera musitini mwaya naari aplicativo enaavarelaaya weera ethelane. Awo ennivitha mapuro ekhoromannaaya weera emootothe mukina yiinviyarelanaka vale imensagem. Onnitthuneya omwaleya itthu iya: naari mutthu eeraka Namoona a Yehova, neereke mweekhaikhai mukristu ooBatiziwa? Mutthu ookhomaala moomunepani? Ookhalano onthamwene woolipa ni Yehova? Mutthu onttittimihiwa mmolokoni, naari mutthu orino mikhalelo sooxupa naari akhalanne “onthamwene woonanara”? (1 Akor. 15:33; 2 Tim. 2:20, 21) Neereke khaano mathowa emmukhoottihera othela wanaaveeli moovarihana ni sooruma sa mBiblyani? Weera nwere waakhula makoho ala, apaale onnitthuneya weera mutthekule ni Namoona a Yehova omusuwenle mutthu owo oosivenleni. (Mir. 15:22) Nave khuwaarowa ohoveleya ole onanvarela Yehova moororomeleya aahikhala a miruku otexa muritti vamosà mutthu “òhiwelela”—2 Akor. 6:14; 1 Akor. 7:39.

Ntoko noonnaahu, ovarihela muteko isaiti naari aplicativo weera muthelane ni mutthu tiwoowoopiha, mene tho wookhala moota mukina woomusuwela mutthu muntthunaanyu othelanano. Woowini mweeraanyu mumphwanye mutthu muneeraanyu muheere keerelani? Waahikhala okhoottiheriwa opaka mithukumano sa Anamoona a Yehova, atthu ennoonana moorweela mwa mithukumano sa mmulokoni, sa assembleya naari sa congresso.

Wakhala weera sinnootxeeleya mwaha woohipakiwa mithukumano, ntoko ehuhu ela ya eretta ya COVID-19, hiyo ninnithukumana moorweela mwa internet. Moorweela mwa mithukumano moota owo, asinna naari asirokora attiye aakhalano eparakha yoosuwelana mukina ni mukhwaawe. Nave pooti woona moota empakaaya nyaha yakhalano vale empari ni wiiwa moota enooniheraaya nroromelo naya moorweela mwa ikommentaariyu saya. (1 Tim. 6:11, 12) Ohiya tho eyo, onoowereya otthekula ni asinna akina okhwipi wa mithukumano. Emaara ya mithukumano sa Anamoona a Yehova moorweela mwa internet, nyuwo munookhalano eparakha yoonweha mutthu oosivenleni moota onaathokororaawe akina, eyo enimookhaviherani omusuwela mweekhaikhai ene. (1 Ped. 3:4) Moovira ehuhu, mwasuwelana nnenesene, onookhweya woonelela waari weera sootthuna sa omunepani sanyu, sootthuna saari sooreera.

Attiye yaahiyaka masu a mBiblyani oweettiha ni waakhavihera opaka soothanla sooreera voohima sa ntheli, eyo pooti waaphwanyiha ohakalala weekhaikhai. Eri ntoko ele Miruku 18:22 enahimaaya: “Wamphwanyá mwar’á, wòreriwa ni wòphwanya mahala a Yahvéh.”—Mir. 18:22.