1-2. Moota heeni masu a Yehova ari va Yesaya 65:16, 17 annilipiheraaya okhala oovilela?

“MUHIKHULUMUWE!”. Ola waari muru wa kongressu a muttetthe a 2017. Mwa eprograma ene yeela, naaxuttera moota woovilela naamwi eniphwanyaka maxupo. Nxutterakaru eyo soovira iyaakha ixexe. Nto hiyo ninnavirelela ovilela elapo ela enlamuleliwa ni Satana.

² Muupuwele maxupo yaawo munvirinhaanyu vaanaano. Apaale eyo yoheereya mwaha woomulusa mmusi anyu naari nthamwene anyu mookhwaani. Naari ekumi anyu enoopopiheya mwaha wa eretta. Neereke munviriha maxupo oowuuluvala? Neereke mwaananto opakeliwa etthu yoonanara, osondiwa naari mwannaphwanyiwe epheyo ya ephattu? Neereke eretta ela ya koronaviru yohookumiherani maxupo? Hiyo ninnoona opisa omala wa itthu iya. Nave hiyo ninnahaawela ophiya wa nihuku nneeraahu nihuupuweleke itthu iya!—Yesaya 65:16, 17.

3. Nipakeke eheeni vaanano va, ni mwaha wa heeni?

³ Elapo ela nraahu ekumi tiyooxupa, nave muhoolo ninkela okumanakano maxupo matokweene opwaha yaala. (Math. 24:21) Eyo ennaneeriha weera nivireleleke olipiha ovilela wahu. Mwaha wa heeni? Mwaha wooweera Yesu enre: “Movilelani mwanyu muni nvuluxe ekum’anyu.” (Lu. 21:19) Wuupuwela moota atthu akina enkhumelelaaya nnene yaavirihaka maxupo anlikana ni awihu onoonikhavihera ovilela.

4. Mwaha wa heeni nneeraahu Yehova ntakihero nooreera na ovilela?

⁴ Taani akhalanne ntakihero nooreera na ovilela? Yehova Muluku. Eyo ennootikhinihani? Mweemele ni muupuwelele ela. Elapo ela enlamuleliwa ni Satana ni yoosareya maxupo. Yehova ookhalano owera woomaliha maxupo ala okaphila ni oweha. Mene nto owo, onweherera nihuku nooreerela aneeraawe apake eyo. (Arom. 9:22) Nihinaakuveene ophiya nihuku nno, owo ompaka heeni? Nlelo onoovilela. Ninkela woona maxupo 9 yaawo Yehova onvilelaawe.

5. Ojardim wEden nsina na Yehova naanyemulinwe moota heeni? Eyo enawuupuwelihani eheeni?

⁵ Wootheriwa wa nsina nawe. Yehova ninnamusivela nsina nawe nave ontthuna weera atthu ettittimiheke. (Yes. 42:8) Mene naamwi vareene hiiho soovira iyaakha 6 mil nsina nawe nnyemuliwaka. (Nsal. 74:10, 18, 23) Eyo epatxereñye ojardim wEden emaara Diabo (ontaphulela “namootha”) amootheraawe Muluku weera khaavaha adamu ni Heva itthu sooreera weera ekhale oohakalala. (Eph. 3:1-5) Okhuma emaareene yeeyo, Yehova onnootheriwa mwaha woohavaha atthu ele anhaawelaaya. Yesu aaxupeya mwaha woowoona nsina na Atithawe nnyemuliwaka. Opwaha mwa yeeyo, owo aahaaxuttiha atthareli awe ovekela: “Tithi, ori wirimu, nsina ná nttelihiwe.”—Math. 6:9.

6. Mwaha wa heeni Yehova onhiyaawe ehuhu ahinaaye omaliha maxupo a olamulela awe?

⁶ Ovanyihiwa wa olamulelo awe. Yehova ookhalano otokweene woolamula wiirimu ni elapo ela ya vathi, ni tiyoowo paahi onwera olamula nnene. (Apok. 4:11) Mene Diabo aaheerera woototha malaika ni atthu weera yuupuweleke weera Muluku khaanono otokweene woolamula. Opittukuweliwa wa otokweene, naari neere, okhalano otokweene woolamula, khawaakela oreheriwa leleelo. Waatthuneya ovira ehuhu weera atthu esuwele weera aatthu khanwera olamulelana ehimwiiwelelaka mpattuxa. (Yer. 10:23) Muluku aahoonihera ookhalano miruku ahiyaka ovira ehuhu weera awoonihere atthu. Mwaha woopixa wawe murima, maxupo ala anoomalihiwa ekwaha emoha khuluyi. Khaavo aneera ahoveleke weera Muluku ookhalano edireitu yoolamula ni weera oosuwela moota woopaka itthu. Atthu ootheene anoosuwela weera Omwene wa Muluku onoowiha murettele ni ovareleleya elapo yootheene ya vathi.

7. Taani yahaamwiiwelenle Yehova, ni owo onkela opaka eheeni?

⁷ Mwaha woohimwiiwelela malaika makina. Yehova aapaka malaika ni atthu ookwanela. Muhoolo mwaya, nlaika nimoha nampittukuwela nnathatuwa Satana, nintaphulela “mwiittani”. Mene nto Satana, aawoototha atthu ookwanela Adamu ni Heva enamurukunuwela Muluku. Malaika makina ni atthu, yatakanserana ehinamwiiwelela Muluku. (Yuda 6) Muhoolo mwaya, mpakana ana a Israeli akina yaamuramusa Yehova enaakokhorela amuluku eethiru. (Yes. 63:8, 10) Yehova aakhalano mathowa mwaha woorukunuweliwa. Naamwi vareene hiiho, Yehova onnavilela opittikuweliwa iwo mpakana vaavo aneeraawe awiive atthu oohiiwelela. Eyo enimwaamaaliha ale eri oororomeleya vamoha ni Yehova mwaha woovilela maxupo a elapo ela ya Satana.

8-9. Soowootha heeni ikina sa Satana, ni nooneleke hayi soowootha iyo?

⁸ Diabo onnavirelela wootha. Satana aamoothera Yobi ni arumeyi akina a Yehova weera aninvarela muteko mwaha wootthuna waakhela mareeliho. (Yobi 1:8-11; 2:3-5) Mpaka olelo, Satana khahiyerenre owoothera atthu weera ananvarela muteko Yehova mwaha wootthuna waakhela mareeliho. (Apok. 12:10) Hiyo pooti opaka ele ninweraahu weera noonihere weera Satana namootha. Nimpaka eyo emaara ninvilelaahu maxupo moopixa murima, nivirelelaka okhala oororomeleya wa Yehova nave nooniheraka nsivelo nahu wa yoowo. Nalikanxa ntakihero na opixa murima wa Yobi, hiyo nnooreelihiwa.—Yak. 5:11.

⁹ Satana onnaavarihela muteko ahooleli a ittiini soowootha weera ehimeke weera Yehova toonanara murima ni onaakumihera atthu maxupo. Vaavo mwaana onkhwaawe, ahooleli akina anhima weera Muluku omukunxe, weera iipankele nlaika nikhaanene wiirimu. Eyo enoonihera ohimuttittimiha Yehova! Hiyo  noomusuwela nnene Yehova. Emaara ekwerere ennivoreya, ennitepelaaya naari akhwa ole nimmusivelaahu, khannanvaha mathowa Muluku ahu. Ohiya onvaha mathowa, hiyo nookhalano nroromelo weera muhoolo onoorowa omaliha iretta ni okhwa. Naaleeleke atthu ootheene ale antthuna oniwiriyana weera Yehova Muluku a nsivelo. Napaka eyo, nnomukhavihera Yehova owera omwaakhula ole onamuruwana.—Mir. 27:11.

10. Eheeni Nsalmu 22:24, 25, onixuttihaawe voohima sa Yehova?

¹⁰ Ohaawa wa arumeyi awe onaasivelaawe. Yehova onnoona ikharari wa arumeyi awe. Owo khommusivela aanoonaka nivirihaka maxupo mwaha woosonttiwa, iretta naari mwaha woohimalela wahu. (Mmusome Nsalmu 22:24, 25 [22:23, 24.Tradução do Novo Mundo]) Yehova onnoona ovoreya mwaha woohaawa wahu, owo ontthuna omaliha ohaawa wahu, ni onoopola (Mulikanxere ni Ottimula 3:7, 8; Yesaya 63:9) Moohipisa, “anapuputthe maithori othene a mmaithoni mwaya. Ni okhwa khorwa okhala veli nari winla nari wikhupanyera nari ovoreya.”—Apok. 21:4.

11. Yehova onoona hayi yaakhwaaka asinthamwene awe yaale oororomeleya?

¹¹ Okhwa wa asinthamwene awe. Yehova onoona hayi yaakhwaaka asinthamwene awe yaale oororomeleya? Owo ontthuna owoona veeli! (Yobi 14:15) Munnuupuwela moota Yehova inkheliwaawe ni nthamwene awe Abrahamu? (Yak. 2:23) Naari ni Mose yoowo uulumaaweno “nitho ni nnitho.” (Ott. 33:11) Munnoona moota owo inkheliwaawe ni Davidi ni ale yaamwiipela itxipo soonvuwiha! (Nsal. 104:33) Nnaamweera arumeyi awo oororomeleya ekhwiiyeene, Yehova khaattiwanle. (Yes. 49:15) Owo onnuupuwelela mikhalelo soothesene sa asinthamwenaawe. Nave mwa moota mukina “othene annamukhalela yowo ni okumi.” (Lu. 20:38, enoota) Moohilekela, Yehova  onimwaattikihera okumi aya ni tho onrowa otthikela owiriyana mavekelo aya ni waakhulela okokhorela waya. Wakhala weera ohookhwa ole mummusivelaanyu, wuupuwela ipontu iya sinoomaaliha murimaanyu.

12. Mahuku ahu ala, etthu heeni emmuriipiha murima Yehova?

¹² Alopwana owuuma murima annaahasula atthu akina. Ohiiwelela opatxerakaru wEden, Yehova aasuwela weera sihinaakuve oreera itthu, khiyaavo yeera ereereke. Yehova khonamusivela oonaka elapo esareñyeene itthu soonanara, ohixariya ni owali. Ovinyera khalayi, Yehova onnaapwattha atthu ohilipa ni ohivareleleya, ntoko ikwaasuni ni asinaamukhweli. (Zak. 7:9, 10) Mahuku ahu ala, etthu emmuriipiha murima Yehova, ori woona ohaawa wa arumeyi awe oororomeleya yaawo enhasuliwa ni otthukiwa. Muroromeleke weera, Yehova onnoosivelani ootheene anyu mwaha woovirelela ovilela ntoko owo.

13. Maxupo heeni anaaphwanya atthu olelo va ni Yehova onkela opaka eheeni weera amalihe itthu iyo?

¹³ Atthu mwaha woohiiwelela malamulo awe. Satana oosuwela weera atthu epattuxiwe ni ethoonyero ya Muluku. Tiyeeyo ommusivelaaya waapakiha atthu ohiiwelela malamulo awe. Emaara yakhalayi “Yahvéh àhòna wi mutthu onanara wawe murima wàtepa watta mulaponi”, mahuku a Nowa, owo “attharuwa ompanka mutthu mulaponi, anyi, murim’awe wànvoreyaxa”. (Eph. 6:5, 6, enoota, 11) Neereke itthu sooreera? Naari vakhaanene! Satana onnahakalala vaavo onwonaawe atthu yaaphwanyaka maxupo olelo va. Oraruwa wootheene otawanle olelo va, ntoko okonihana alopwana naari athiyanaru. (Aef. 4:18, 19) Ni onnatepa omusivela amweeriha murumeyi oororomeleya a Yehova opaka yoottheka. Opixa murima wa Yehova wookhalano okhwipi waya. Moowaakuveya onkela woonihera moota onamunanaraaya oraruwa, awiivaka atthu ootheene yaale ampaka soonanara yaawo ahintthuna otxentxa mukhalelo aya.

14. Etthu heeni atthu ampakaaya elapo ya vathi ni axinama?

¹⁴ Ohononiwa wa itthu opattunxaawe. Yehova ohaavaha muritti atthu wookosoopa itthu opattunxaawe. (Eph. 1:28) Ekhaikhai ti yooweera “mutthu onamulamulelaiye mukhw’awe wera amuhoxe” ni weera ananarihe elapo yootheene ni axinama. (Koh. 8:9) Masiyentista makina anhima weera, mwaha wa atthu, itiipu * sintxipale sa axinama pooti omalihiwa naatthu iyaakha sinttharelana. Eyo ennooneya moota atthu araaya ooxakhamiheya mwaha wa makhalelo a mulaponi. Etthu yooreera tiyooweera Yehova olaihera ‘wathoriha ehuhu yophwanela yale annanariha elapo’ ni otatuxa elapo ela okhala eparadiso!—Apok. 11:18; Yes. 35:1.

15-16. Eheeni ennikhavihera ovilela vamoha ni Yehova? Mulikanyihere.

¹⁵ Muupuwele itthu sootheene Tiithi ahu a wiirimu ovilenlaawe mwa iyaakha sintxipale. (Moone ekwaadru eneera “ Eheeni Yehova onvilelaawe mpaka vano”.) Yehova anwera omaliha elapo ela enlamuleliwa ni Satana ehuhu eri poothe eeraawe atthune. Mene owo onoovilela, ni awo mareeliho nnaakhelaahu. Nuupuwele weera ntheli nimoha ninnanweherera mwaana yoowo orupaliwe, mene ennaakhela mitthenka sooripiha murima wa mediku aya sineera: “Mwaninyu a mmatatani ookhalano mahooxo mweekumini. Nave ekumi awe khenkela okhala ya mpuha ni khankela okhala mahuku mantxipale.” Omuthokorora mwaana owo waakela okhala woovila. Nnaamweera vareene hiiho, asitiithi awe mwaana owo,  annamwaakhela ni nsivelo. Mwaha wa nsivelo yaavilela weera emukhavihere mwanaya weera akhaleno okumi wooreera.

¹⁶ Moolikana ni mwaana ole, anamwane Adamu ni Heva aavala yoottheka. Nnaamweera vareene hiiho, Yehova onnaakosoopa ni nsivelo. (1 Yoh. 4:19) Mene wookhala ohiyana eriyari ya asitiithi a mwaana ni ntakihero na Yehova. Mene nto, owo onoowera omaliha maxupo aanamwane awe nave-tho, moorweela mwa nsivelo, owo oothanla nihuku aneeraawe apake eyo. (Math. 24:36) Nsivelo na Yehova khalakhanle noonova ikuru weera nivilele vaavo enatthuneyaaya opaka eyo?

17. Moota heeno ovilela wa Yesu olempwe va Aheberi 12:2, 3, weera nivirelele okhala oovilela?

¹⁷ Yehova ntakihero nookwanela na ovilela, nave Yesu aamutakiha Thiithaawe. Mwaha woonisivela, Yesu aavilela oruwaniwa, wulihiheya muru ni okhwa wa mwirini wa nihaaxero emaara aaraawe elapo ya vathi. (Mmusome Aheberi 12:2, 3.) Moohihovela, ovilela wa Yehova wanvaha ikuru Yesu weera avilele. Etthu emoharu pooti weereya ni hiyo.

18. Moovarihana ni 2 Pedru 3:9, maareeliho heeni enkhumelela mwaha wa ovilela wa Yehova?

¹⁸ Mmusome 2 Pedru 3:9. Yehova oosuwela ehuhu aneeraawe amalihe maxupo a elapo ela. Opixa murima wa Tiithaahu a wiirimu, atthu antxipale aakhalano eparakha ya oyariwa, ooxuttera ni wiivaherera wa yoowo. Atthu awo ennapakela empari ya muloko mutoko-toko wa atthu nave ennamuxukurela Muluku evirelelaka ovilela. Muhoolo, Yehova onkela woonihera weera ovilela yaari yoothanla yooreera vaavo oneeraawe aareelihe atthu antxipale eneera evirelele ovilela mpaka okhwipi wa elapo.

19. Eheeni nneeraahu niithanlele opaka, ni mareeliho heeni nneeraahu naakhele?

¹⁹ Ntakihero na Yehova, ninnanixuttiha ovilela ni ohakala. Nnaamweera eniphwanyaka mahooxo enkumiheriwa ni Satana, Yehova onnavirelela okhala ‘Muluku oohakalala’. (1 Tim. 1:11) Vamoharu, hiyo ninnaweherera moopixa murima nihuku na Yehova aneeraawe atteelihe nsina nawe, aneeraawe aakihere otokweene awe, omaliha muxupo ootheene yaawo ninviriha ahu mahuku ala. Mene nto, niwehereraka hiiho, hiyo pooti ovirelela okhala oohakalala. Mwiithanlele okhala oovilela nave muhittiwale weera, Tiithihu tho onnavirelela okhala oovilela. Napaka eyo, ootheene a hiyo ninkela waakhulela weera teekhaikhai masu a Yakobe 1:12. Yaawo eneera: “Òreriwa mulopwana onavilela mowereriwani niwoko, opwahalaiye wereriwa iwe, anamwàkhele nampurutxi a ekumi, Muluku aroromelihalaiye yale anamutthuna.”