1. Antxipale anipaka eheeni weera emurumeele Yehova?

 VAAVO nnaattamelaahu okhwipi wa elapo ela, ninnakhalano miteko sintxipale soovara. (Math. 24:14; Lu. 10:2; 1 Ped. 5:2) Ootheene hiyo ninnatthuna onvarela muteko Yehova ninwerelaahuvo. Atthu antxipale annavara muteko woolaleera. Akina annavara muteko wa opiyoneiru ni akina tho annavara muteko oBetheli ni muteko wooteka. Asinna antxipale anniilipihra weera ekhale arumeyi oorumeela, ni asitokweene a mmulokoni. (1 Tim. 3:1, 8) Yehova onnahakalala aawoonaka arumeyi awe yiivahereraka onvarela yoowo!—Nsal. 110:3; Yes. 6:8.

2. Eheeni ekhanle Yookhumelela naahiphwanya miritti naahawelaahu sa omunepani?

² Ehuhu ekina hiyo khaninwera itthu naahawelaahu moowakuveya. Mwaha wa yeeyo, hiyo ninnanyoonyiheya. Nave-tho ninnakhulumuwa mwaha wa wunnuwa ni nihinwera okhalano miritti naahawelaahu. (Mir. 13:12) Mene tiyeeyo yaamweerenle murokora Melissa *. Owo annatthuna vantxipale ovara muteko oBetheli, naari orowa exikola yaanamalaleera a Omwene Vano owo onahima ha “vano miyo kohunnuwa nkimphwanelela opaka epetisau mene miritti iyo khaahawelaaka khonkweya ottiwala. Nto ehuhu ekina sinnakiriipiha murima.”

3. Mikhalelo heeni mikina atthu antthuneyaaya oreherera ehinakuve waakhela miritti?

³ Wa amiravo pooti okhalano maxupo oovirikana. Akina a yaawo mwaha wooweera toosuwela, annaakuva opaka soothanla, aasareya ikuru etthunaka orumeela. Mene onnatthuneya oxuttera okhala oopixa murima, okhala ni ephoole ni okhala oottittimiha. Wakhala weera nyuwo munamwiilipihera owehexexa makhalelo ala, munamunnuwihera mikhalelo sootthuneya. Nave  miritti sinrowa owa ehuhu nyuwo mwahawehereraanyu. Moone ntakihero na Nick, emaara aaraweno iyaakha 20 owo aaripiwa murima mwaha woohithanliwa okhala murumeyi oorumeela. Owo onahima ha: “Miyo kuupuwela weera yookhala yaahaakhanle nnene ni miyo.” Mene owo khaakhulumunwe, annilipihera ni miritti owo aakhalannaawe. Olelo va, owo onvara ntoko mmoha a ekomisau ya eFiliyaale.

4. Eheeni ninrowaahu othokorora mwa yoosomeene yeela?

⁴ Neereke nyuwo mooripiwa murima mwaha wooweera khanwenre ophwanya sooluluwanya sanyu sa omunepani? Wakhala weera ti hiiho mmuleleke Yehova moota munoonelaanyu. (Nsal. 37:5-7) Opwaha wa yeeyo mwaavekeleke miruku asinna arinono sookumanano sintxipale mmutekoni mwa Yehova. Mwapaka eyo apaale munoovahimwa miritti mmulokoni naari ophwanya ele mwaahawelaanyu. Avinyaka mwiilipihereke otthara miruku sene seiyo, mwapaka eyo, apaale munoovahiwa miritti mmulokoni naari munoophwanya ele mwaahawelaanyu. Ntoko yeereñyaya ni murokora Melissa oromoliwe woopatxerani, pooti weera miritti mikina nyuwo khamunwera ophwanya. Vano nto eheeni eneera yookhavihereni ovirelela okhala oohakalala? Weera naakhule nikoho nna, yoosomeele neela nnoorowa othokorora itthu iya: (1) eheeni enrowa onivaha ohakalala, (2) moota heeni nneeraahu naatxerere ohakalala ni (3) sooluluwanya heeni soomunepani sikhanle owatxerera ohakalala.

5. Weera niphwanye ohakalala eheeni nintthuneyaahu owehexexaka? (Koheleti 6:9)

⁵ Koheleti 6:9, onnahima etthu ekhanle yooniphwanyiha ohakalala. (Mmusome) Mutthu onhakalalela ele “onoonaawe,” onnahela mwiitti ele oraaweno ni onnahakalalela. Nto ophwaha mwa yeeyo, mutthu onttarattara “minlelo,” onnasaasa itthu ihinrowaawe ophwanya. Ninxuttera eheeni? Ninnaxuttera weera, nikhale oohakalala ontthuneya owehexexa itthu iye hiyo ninweraahu ophwanya.

6. Niphwanaphwaniho heeni Yesu aapankaawe ni ninnixuttiha eheeni?

⁶ Neereke onoowereya ohakalala ni itthu nikhalannahu? Atthu antxipale anoona weera hooye, mwaha wooweera atthu ootheene waasivela oxuttera itthu inyowani. Ntoko noonnaahu, hiyo khontthuneya waakhulela itthu “maitho ahu anoonaaya” paahi mene nihakalaleleke itthu nraahuno vaanaano. Mwaha wa heeni ninhimaahu hiiho? Weera niphwanye waakhuliwa, nnoorowa othokorora niphwanaphwaniho Yesu aahimmaawe voohima sa italento nri va Matheyo 25:14-30. Avinyaka ninkela oxuttera itthu sinkela waatxerera ohakalala wahu ni itthu nikhalannaahu viinaano.

7. Neereke onoowereya ohakalala ni itthu nikhalannaahu?

⁷ Yesu aathaliha niphwanaphwaniho na italanto, sa mulophwana aatthuna weetta ekwaha. Ahinaakuve weetta mukwaha awe, owo aawiitthana akaporo awe weera avahe italento emweeteke nakoso. * Mulopwana ole aasuwela mikhalelo soovirikana sa akaporo awe. Mwaha wa yeeyo, anvaha kaporo oopatxera italento ithanu, kaporo anaaveli anvaha italento piili ni kaporo anaararu anvaha etalento emoha. Akaporo eeli oopatxera, yaavara muteko moowiilipihera wa pwiyaya, nto kaporo anaararu khaavanre etthu ni etalento avahiwaawe, mwaha wa yeeyo, pwiyawe aamwiikara.

8. Mwaha wa heeni kaporo ole a niphwanaphwaniho oopatxera aahakalanlaawe?

 ⁸ Kaporo oopatxera, aahakalala vantxipale mwaha woowakhela italento 5 weera ampakeleke nakoso. Italento iye aakhenlawe 5 waari musurukhu mwintxi, nave eyo yaahoonihera weera pwiyawe annamuroromela. Ankha kaporo anaaveeli? Waari yookhweya kaporo ole ooripiwa murima mwaha woowaakhela italento soovirikana ni kaporo oopatxera. Nto kaporo ole onenle hayi?

9. Eheeni Yesu ahaahimmaawe wa kaporo anaaveli? (Matheyo 25:22, 23)

⁹ Mmusome Matheyo 25:22, 23. Niphwanaphwaniho na Yesu, owo khaahimme moota kaporo anaaveli aanyoonyinwawe mwaha woowakhela italento piili, nave Yesu khahimme moota kaporo ole aakhupannyaawe eraka: ‘Nkiroromela weera apwiyaka akivanhe italento piili, miyo kaporo ooreera omphwa ole aakhenle 5. Okhala weera apwiyaka khankiroromela, ni khankoonela vatthu, kinoonaaka yooreera opaka ori ohiya italento iya, kapakeke itthu saka.’

10. Namuteko anaaveli aapanke eheeni ni italento ahiyeriwaawe?

¹⁰ Ntoko hiihaale namuteko oopatxera, namuteko anaaveli khaakuxenre mathela muteko avahiwaawe ni pwiyawe. Yookhumelelaaya yaari yooweera owo, aawera waatxerera musurukhu ahiyeriwaawe. Pwiyawe amuttottopela mwaha wa muteko ole owo aavanraawe. Pwiyawe khaiyene aarimweera ohakalala paahi mwaha wa muteko avareliwaawe, mene amuroromela amuhiyeraka miritti mikina!

11. Munaawere hayi waatxeerera oohakalala?

¹¹ Naavaraka muteko niwiivaherera waakhulela yoothanleliwa eri poothe ninvahiwahu ni  mareherero a Yehova nnoohakalala. ‘Mwaatteliweke’ mmutekoni woolaleera ni mukhavihereke miteko sa mmulokoni. (Mit. 18:5; Aheb. 10:24, 25) Muroweke omithukumanoni mwiirehenre weera mwavahe ikomentariyu sooreera. Mwihikuxereke matheela yoothanleliwa munvahiwaanyu mmithukumanoni sa variyari va esemana. Wakhala weera asitokweene a mmulokoni ahoovekelani ovara muteko wa mmulokoni, muhipiseke ophiya ni mukhaleke oororomeleya. Muhuupuweleke weera muñyeeha ehuhu anyu murehereraka yoothanleliwaanyu. Muttottele mureerelo murehereraka yoothanleliwanyu. (Mit. 22:29) Emaara nyuwo muniivahereraanyu opaka eyo, munookela vahoolo moowaakuveya nave munoohakalala. (Agal. 6:4) Nave-tho onookhweya okhala oohakalala vaavo atthu akina anaakhelaaya iparakha seiyo nyuwo mwaatthunaanyu.—Arom. 12:15; Agal. 5:26.

12. Melissa ni Nick yaapanke heeni weera ehiyeleele oohakalala?

¹² Munnamuupuwela Melissa yoowo aatthuna ovara oBethel ni orowa exikola yaanamalaleera a Omwene? Owo khaawenre okwanihera yoolakelaawe mene moone ele owo ohimmaawe “Miyo kinniilipihera opaka ele kinweraaka mmutekoni mwaka wa opioneiru ni opaka ele kinweraaka weera kilaleere, ni eyo ennakihakalaliha.” Nick oonenle hayi ahithanliwakaru okhala murumeyi oorumela? Owo onhima há: “Miyo kannahakalala ni iparakha kaaraakano ntoko muteko woolaleera ni ovaha ikomentariyu sooreera mmithukumanoni. Nave kaapiriyenxeri epetisau ya muteko wooBetheli mene eyaakha yaattharelana kaahiitthaniwa.”

13. Eneekhumelele eheeni wakhala weera munniilipihera okwanihera yoothanleliwaanyu? (Koheleti 2:24.)

¹³ Wakhala weera nyuwo munniivaherera ovara ni murimaanyu wootheene iparakha muraanyuno olelo va, neereke munimwaakhela miritti muhoolo? Pooti weera aani, ntoko yeereñyaaya ni Nick. Naamwi etthu enookhumelelani elikanaka ni Melissa, nyuwo pooti ohakalala mwaha wookwanihera etthu mwaatthunaanyu. (Mmusome Koheleti 2:24.) Etthu eneera etepe woohakalalihano tho ori osuwela weera Apwiya Yesu kristu aahakalala mwaha woowiilipihera wanyu.

14. Neereke ti woonanara wiilipihera okhalano sooluluwanya soomunepani? Muthalihe

¹⁴ Wakhala weera ninniilipihera onvarela muteko Yehova olelo va neereke eyo entaphulela weera khanintthuneya wiilipihera tho? Hooye! Onnatthuneya okhalano sooluluwanya soomunepani. Sooluluwanya iyo, inoonikhavihera mmutekoni woolaleera ni waareerela murima asinna. Mene weera niwere sooluluwanya iyo nintthuneya okhala oosuwela ni amiruku nihiisupuwelelaka meekhihu, nto nuupuwelaka waarumela atthu akina.—Mir. 11:2; Mit. 20:35.

15. Sooluluwanya heeni soomunepani sinkela waatxeerera oohakalala wahu?

¹⁵ Munvekeleke Yehova weera ookhavihereni okhalano sooluluwanya muneeraanyu nwere. (Mir. 16:3; Yak. 1:5) Neereke nyuwo pooti ovara  ntoko piyoneiru okhavihera naari ookilaatheya, ovara oBetheli naari muteko wooteka impa? Nyuwo pooti waatxeerera muteko anyu woolaleera muxutteraka nuulumo nikina naari othaamela elapo ekina yoothowa anamalaleera? Weera musuwele itthu sootheene sinhela mpuwa, musome ekapiitulu 10 ya ebuukhu eneera Mutthenkeso Onipaka otthuna wa Yehova naari mutthekule ni asitokweene a mmulokoni mwanyu. * Vaavo muneeraanyu  mwiilipihereke okwanihera soothanleliwa sanyu, atthu ootheene eneereke woona munnuwelo anyu woomunepani ni nyuwo munoohakalala.

16. Munaapake heeni wakhala weera khamunwera ophwanya iparakha iyo sithalihiwe?

¹⁶ Ankha wakhala weera khamunwera ophwanya iparakha iyo sithalihiwe? Etthu muntthuneyaanyu opaka eri yooweera ori okhalano yooluluwanya ekina yeyo muneeraanyu nwere. Nwehe miruku sinhimmwa.

17. Moovarihana ni 1 Timotheyo 4:13, 15, eheeni munna aneeraawe apakeke weera ekhale mutthu ooxuttiha nnene?

¹⁷ Mmusome 1 Timotheyo 4:13, 15. Nyuwo mwaareene munna ooBatiziwa, murehereke moota mumpakaanyu mwaha naari onxuttiha. Mwaha wa heeni? Mwaha wooweera wakhala weera nyuwo “munnailipihera” ni murima wootheene omusoma Biblya opaka nyaha ni oxuttiha nyuwo munoowera waakhavihera ale anwiiwani. Mukhaleno yooluluwanya yoomusoma Biblya ni nvareleke muteko miruku sinhimmwa va ebroxura Mwiilipiheryeke Osoma ni Wiixuttiha. Musomeke yoosoma emoha ekwaha eri poothe ni muxuttereke owaani; ohiya eyo, impari munvahiwaanyu mmithukumanoni nvareleke muteko ele munxutteraanyu. Munvekele miruku ole onaavaha miruku asitokweene naari mutokweene mukina “onèttiha phama sene, masu ni mahusiho”. * (1 Tim. 5:17) Mwaasomaka yoolakelaanyu ehikhaleke wiiwexexaru paahi miruku sinvahiwa va ebroxura eyo, mene yoolakelaanyu ekhaleke yoowaakhavihera ale anwiiwani waatxeerera nroromelo naya ni ovarela muteko ele nyuwo munxuttihaanyu. Mwapaka eyo munimwaatxeerera oohakalala wanyu wa ale anwiiwani.

18. Eheeni enkela onikhavihera oreherera muteko ahu woolaleera?

 ¹⁸ Atthu ootheene hiyo nookhalano muritti woolaleera ni waapaka atthareli. (Math. 28:19, 20; Arom. 10:14) Mwannatthuna oreherera ikaruma sa muteko ola wootepa ontthuneya? Mene nto musomeke ni nvareleke yoosoma ya Mwiilipiheryeke Osoma ni Wiixuttiha. Mwapaka eyo, mpakeke ele munweraanyu weera yookhavihereni. Ekadernu ya vamweerini sa ekumi ni muteko ahu ni iviidiyu sa otthekula ni nyaha sa mBiblyani, seiyo sinooniheriwa mmithukumanoni sa eriyari ya esemana, sinnavaha miruku sooreera seiyo sinnikhavihera oreherera muteko ahu woolaleera. Muthanle miruku sinookhumelani nnene. Mwaattharaka miruku iyo, nyuwo munoowera olaleera nnene ni Munoohakalala vantxipale.—2 Tim. 4:5.

19. Moota heeni muneeraanyu munnuhere mikhalelo sa makristu?

¹⁹ Muhittiwale weera yooluluwanya muntthuneyaanyu okhalano—wunnuwihera mikhalelo simmwisivela Yehova. (Agal. 5:22, 23; Akol. 3:12; 2 Ped. 1:5-8) Nyuwo munaapake hayi eyo? Mwa ntakihero, wakhala weera nintthuna okhalano nroromelo noolipa naakela opaka eheeni? Mwa yeyo, vamureera osoma nyaha sa ibuukhu sahu seiyo sirinono miruku soovareleya muteko sa moota woolipiha nroromelo nahu. Va JW Broadcasting^® sookhalavo iviidiyu sintxipale sinthaliha soowereya sa asinna ni asirokora yaawo yoonihenre nroromelo ehuhu yaavirinhaaya maxupo aya. Woona iviidiyu iyo ni weerera otakiha matakihero a asinna awo nroromelo nanyu nnoolipa.

20. Moota heeni nneeraahu niphwanye ohakalala ehinixupaka etthu?

²⁰ Moohihovela, ootheene hiyo ninnatthuna waatxeerera onvarela Yehova. Mene nto elapo enyowani nneeraahu niwere opaka eyo mookwanela. Mene nto ehuhu ela vakhaaneene ehanle, nintthuneya ottottela mureerelo iparakha nraahuno sa onvarela Yehova. Napaka eyo, nnoophwanya ohakalala ehinixupaka etthu. Etthu yootepa otthuneya nnonvuwiha Yehova, yoowo ori “Muluku ohakalala”. (1 Tim. 1:11) Mene nto nneereke ohakalala ni iparakha nraahuno!