1-2. Eheeni ninkelaahu woona mwa yoosomeene yeela?

MUNOONELA hayi mwaawehereraka muritti onapisa ophiya naari khoophiñye ehuhu mwaawehereraanyu? Neereke munkhala oonyoonyiweene? Pooti weera nyuwo munnoona ele ehimmwale va Miruku 13:12 eneera: “ororomela wonttiha.” Ankha waakhala weera mohoonelela weera muritti anyu waapinseene ophiya aakhala mathowa apisinhe muritti owo? Mwaha woosuwela eyo, enooweerihani opixa murima ni onweherera.

² Mwa yoosomeene yeela, nnoorowa wuupuxeriwa miruku sa mBiblyani sinkela onikhavihera ‘oweherera ni opixa murima’. (Mik. 7:7) Nave-tho nnimoona itthu piili seiyo nneeraahu hiyo ntthuneyeke opixa murima ni onweherera Yehova weera akwanihere yoolakela awe. Yoomalihera, ninkela osoma itthu sooreera ankelaaya waakhela ale enaavirelele onweherera Yehova.

3. Eheeni Miruku 13:11 onnixuttihaawe?

³ Miruku 13:11 sinnanxuttiha weera nikhaleke oopixa murima. Masu aneera: “Sorera sikhupeliwe ni nvai khasinalekela, sorera sittotteliwe vakhani-vakhani sinnatxerereya.” Yoolepa ela enkixuttiha eheeni? Ennixuttiha weera namiruku ompaka itthu noopixa murima apakaka etthu eri poothe ni ehuhu aya ntoko eyo ennakhumela nnene.

4. Miruku 4:18 onthaliha miruku heeni?

⁴ Miruku 4:18 oneera: “Nto ephiro ya anaxariya ti ekamama y’oxa yùnnuwaka mpaka nsuwa vamuru.” Masu ooweera “ephiro ya anaxariya” annavarihana ni moota Yehova onaakhaviheraawe arumeyi awe wiiwexexa yoolakelaawe—Yehova ompaka eyo vakhaani-vakhaani. Yoolepa ela-tho ennanikhavihera wiiwexexa moota mukristu ompakaawe matxentxo mweekumini mwawe weera amwattamele Yehova. Onnatthuneya oviriha  ehuhu weera mutthu unnuwe moomunepani. Khooneereya moowaakuveya, oneereya vakhaani-vakhaani. Naareene atthu ninvarela muteko miruku sa mBiblyani ni sa mareherero awe, vakhaani-vakhaani nnoowera otakiha mikhalelo sa Kristu. Nave-tho nneereke ovirelela omwaattamela Muluku. Ninkela woona ntakihero na Yesu aapankaawe nintaphulela nnene epontu ene yeela.

5. Niphwanaphwaniho heeni Yesu aapankaawe?

⁵ Yesu aapaka niphwanaphwaniho weera ataphulele mitthenka sa Omwene wa Muluku sinunnuwa mmirimani mwa atthu ansiveliwa ni ikhaikhai, owo enre: “Ole onokona ni onovinya, ohiyu ni othana, mmiso ole onnamela ni onnùnnuwa, mwanene ole ahisuwelaka. Ni ikuru sawayaru etthaya ennìmiha: muropo toko, vaholo vaya nikala, nomalá etrigu yokhomalene munikalani.” (Mar. 4:27, 28) Yesu aatthuna ohima eheeni ni masu ala? Yesu aatthuna ohima weera wunnuwa woomunepani wa mutthu onnaakhulela mitthenka sooreera onkhala vakhaani-vakhani. Mwa ntakihero, emaara namasoma a Biblya ompatxeraawe omwaattamela Yehova opaka vakhaani-vakhaani onnawera opaka matxentxo mweekumini mwawe. (Aef. 4:22-24) Vanooneya weera khanintthuneya ottiwala weera Yehova onunnuwiha.—1 Akor. 3:7.

6-7. Ninxuttera heeni ni moota Yehova opankaawe elapo?

⁶ Yehova ompaka sootheene noopixa murima. Mwa yeeyo, owo onnavarela muteko ehuhu, uupuwelaka onvuwiha nsina nawe ni waakhavihera atthu akina. Mwa ntakihero, moone moota owo opankaawe elapo vakhaani-vakhaani weera ekhaliweke ni atthu.

⁷ Biblya athalihaka moota Yehova oohelaawe iphimelo ni ootikithera “mathipelo” ni “alipiha mathipelo aya”. (Yobi 38:5, 6) Mpaka aahiitthuwa weera oone sootheene aapankaawe. (Eph. 1:10, 12) Munnawera wuupuwela moota malaika yoonenlaaya vaavo yaamonnaaya Yehova apakaka itthu valaponi? Awo yaatthapa! Tiyeeyo nto Biblya onhimaawe weera awo yaatthapa “envuwihaka Muluku”. (Yobi 38:7)  Eyo ennixuttiha eheeni? Yehova aaviriha iyaakha sintxipale weera amalihe itthu aapatxenraawe opaka mene sootheene iyo aapatxera vakhaani-vakhaani ni okosoopa mwaha woopaka aakhumela nnene. Aahiitthuwa weera oone sootheene aapankaawe ni aahoona weera sootheene “sari sorera”.—Eph. 1:31.

8. Ninkela woona heeni vaanano va?

⁸ Ntoko yoonihenraaya matakihero a muttuli, miruku sintxipale sa mBiblyani soonixuttiha ontthuneya waaya opixa murima. Vano ninkela woona itthu piili seiyo nneeraahu hiyo ntthuneyeke opixa murima ni onweherera Yehova.

9. Emaara heeni hiyo nintthuneyaahu onweherera Yehova waakhula mavekelo ahu?

⁹ Pooti weera hiyo ninnaweherera Yehova weera aakhule mavekelo ahu. Emaara ekina hiyo ninnanvekela Yehova weera anivahe ikuru naari anikhavihere ovilela maxupo anniphwanya naari anikhavihere okhala oolipa. Nto hiyo pooti woonaka weera Yehova onnapisa waakhula mavekelo ahu. Mwaha wa heeni Yehova ompisaawe waakhula mavekelo ahu?

10. Naavekelaka mwaha wa heeni nintthuneyaahu opixa murima?

¹⁰ Yehova onnaniiwa vaavo hiyo nninvekelaahu. (Nsal. 65:2) Hiyo vaavo nninvekelaahu, ninnoonihera weera nookhalano nroromelo. (Aheb. 11:6) Naavekelaka Yehova onnaniiwa moomaaleleya weera oone waakhala weera hiyo ninnanvekela ni murima wootheene. Owo onnoona waakhala weera hiyo nnimwiilipihera waasa ele hiyo nivenkaahu. (1 Yoh. 3:22) Nto emaara hiyo nninvekelaahu weera niwine yookhovelela yoonanara naari yootteettheya, pooti weera nneereke otthuneya opixa murima ni wiilipihera weera nipake matxentxo mweekumini mwahu. Yesu aathaliha weera mavekelo ahu khayaakela waakhuliwa moowaakuveya. Owo aanooperera weera: “Vekani ni muni nvahiwe. Àsani ni muni mphwanye. Manani nsele ni muni muhuleliwe. Ekhaikhai othene ole onaveka, onnàkhela; ni ole onàsa, onnaphwanya; ni ole ommana nsele, onnahuleliwa.” (Math. 7:7, 8) Vaavo ninttharaahu miruku iya ‘soolipihera ovekela’, nroromeleke weera Tiithiihu a wiirimu onooniiwa ni onimwaakhula mavekeelo ahu.—Akol. 4:2.

11. Wakhala weera waakhuliwa wa mavekelo ahu onnapisa moota heeni Aheberi 4:16 onkelaawe onikhavihera?

¹¹ Wakhala weera ninnoona weera Yehova onoopisa waakhula mavekelo ahu, nuupuweleke weera Yehova oolaihera waakhula mavekelo ahu “mwa ehuhu yophwanelela”. (Mmusome Aheberi 4:16.) Wakhala weera waakhuliwa wa mavekelo ahu onoopisa nuhuupuweleke weera Yehova oronttiwala. Mwa ntakihero, atthu antxipale apatxenre ovekela ovinyera khalayi weera Omwene wa Muluku orwe omalihe maxupo ala ankumiheriwa ni Satana. Yesu muneene anxuttiha ovekela eyo. (Math. 6:10) Waakela okhala woolosowa ohiya omuroromela Yehova nuupuwelaka weera omala wa elapo ela onoopisa. (Aheb. 2:3; Math. 24:44) Etthu yooreera opaka ori onweherera Yehova ni ovekela nroromelo weera Yehova onkela waakhula mavekelo ahu. Emaliheero enoophiya mwa ehuhu yooreerela ni enimwaaphwanya atthu ootheene ankhala valaponi, mwaha wooweera Yehova othanlale “nihiku ni ehuhu” enkelaaya okhumelela eyo.—Math. 24:36; 2 Ped. 3:15.

12. Emaara hiyo nnoonaahu okhala woovila opixa murima?

¹² Pooti weera ninnatthuneya okhala oopixa murima ninwehereraka Yehova opaka exariya. Elapo ela ninkhalaahu enlamuleliwa ni Satana tivookhweya owoona atthu akina yaahasulaka atthu a makhalelo makina, a ikoore  soovirikana, a sookhovelela soovirikana, oovirikana mene arinono sookhovelela imoharu. Atthu akina annahasuliwa mwaha woorakala naari ohikwanela mmuru. Anamoona a Yehova annahasuliwa mwaha wa soororomela saya siri mBiblyani. Emaara ninhaawaahu mwaha woohixariya, nuupuweleke miruku Yesu aathalinhaawe sineera: “Yole anavilele mpakano womaliheroni anavuluwe.” (Math. 24:13) Munaapake heeni waakhala weera nyuwo moosuwela weera mmulokoni aakhala epanke yoottheka etokotoko? Wakhala weera asitokweene aasuwela yoottheka eyo, neereke nyuwo munoohiya sootheene mmatatani mwaya? Neereke munooweherera weera sootheene inimuulummwa ntoko Yehova ontthunaawe? Itthu ntoko iya, asitokweene anoovaha miruku sootthara. Ninkela woona miruku heeni.

13. Yehova ontthuna weera asitokweene a mmulokoni emuthokororeke hayi namattheka?

¹³ Emaara asitokwene a mmulokoni ansuweelaaya weera aakhala apanke yoottheka mmulokoni awo annavekela “miruku sa osulu” weera yuulume mulattu owo ntoko Yehova ontthunaawe. (Yak. 3:17) Yoolakelaaya ori omukhavihera namattheka “othwelenle ephiro awe”. (Yak. 5:19, 20) Awo-tho yootthunaaya ori opaka sootheene weera ethokorore muloko ni waamaaliha yaale anhawa mwaha wa ohixariya. (2 Akor. 1:3, 4) Ehinaakuve wuuluma mulattu wa mutthu opanke yoottheka etokweene, asitokweene antthuneya opatxera toko osuwela itthu moota senttaaya ni sooweereya sootheene eyo pooti oviriha ehuhu yintxipale. Mene nto muhoolo mwaya annavekela ni wikosoopa, weera evahe miruku sinkhuma mBiblyani ni weera emuttaruxe namattheka “mwa exariya”. (Yer. 30:11) Ekhaikhai weera asitokweene khantthuneya opisa weera epake yoothanla, mene awo-tho khampaka soothanla moowaakuveya. Vaavo asitokweene anaathokororaaya asinna mmulokoni mwa nsivelo muloko wootheene onkhala woohakalala. Naamwii asitokweene epakaka sootheene mooreera murima, mutthu ole otthekeliwe pooti ovirelela onyoonyiwa. Ankha waakhala weera ti nyuwo, eheeni enkela woomaalihani?

14. Wakhala weera nyuwo moonyoonyihiwa ni munna ntakihero heeni na mBiblyani ninkela wookhaviherani?

¹⁴ Neereke mootoko othokororiwa moohixariya, naari ni munna mmulokoni? Mene nto,  Biblya pooti wookhaviherani. Masu a Muluku aakhalano matakihero ooreera yaawo annixuttiha opixa murima ninwehereraka Yehova oreherera itthu. Mwa ntakihero, Yosefe aathokororiwa moohixariya ni asinnawe. Mene nto owo khaahiñye soottheka saya simunyoonyihaka. Opwaha mwa yeeyo Yosefe khaatthikenle ottuli aavirelela ororomeleya wa Yehova, aavilela ni aapixa murima. Mwa yeyo, Yehova aamureeliha vantxipale. (Eph. 39:21) Ehuhu yaavira ni Yosefe aahaalevelela asinnawe. (Eph. 45:5) Ntoko yeereñyaaya ni Yosefe, ninnalipa vaavo nninvekelaahu Yehova ni nihiyaahu sootheene mmatatani mwa Yehova.—Nsal. 7:17 [7:18 NM]; 73:28.

15. Eheeni yaamukhavihenre murokora ohinyoonyiwa mwaha woowuulummwa moohireerela?

¹⁵ Itthu soonanara nimpakeliwaahu pooti olikana ni sa Yosefe. Mene sootheene, othokororiwa moohixariya, onyonyihiwa ni mutthu. Nihipwatthaka maxupo nraahuno ni munna naari mutthu oninvarela muteko Yehova, etthu yoorera opaka ori otthara miruku sa mBiblyani. (Afil. 2:3, 4) Moone etthu yaamweerenle murokora mmoha. Owo aahoonelela weera koleekaawe oomutekoni annamuluma moohireerela aaleelaka atthu akina. Ohiya onyoonyiwa murokora ole, aahuupuwela ntakihero na Yesu. Emaara Yesu aaveehiwaawe khaakhula ni oveeha. (1 Ped. 2:21, 23) Uupuwelaka eyo, aalakela ohipwattha etthu ele yaakhumelenle. Moovira ehuhu aahoonelela weera koleekaawe ole oomutekoni aakhalano maxupo a mweekumini ni annaviriha estresse. Murokora ole aahoona weera koleekaawe ole oomutekoni khañyene aaroolakeela omuuluma moohireerela aaleelaka atthu akina. Mene nto murokora aahakalala mwaha woopixa murima ni aakhalano murettele.

16. Mwaavirihaka maxupo muhinweraanyu omaliha meekhaanyu etthu yooreera opaka ti heeni? (1 Pedru 3:12)

¹⁶ Wakhala weera nyuwo munoohaawa mwaha woothokororiwa moohixariya naari etthu ekina, muhittiwale weera Yehova ori vakhiviru ni yaale “a murima wowuma”. (Nsal. 34:19 [34:18 NM]) Muroromeleke weera Yehova onnoosivelani mwaha woopixa murima ni mwaha woohiya sootheene mmatatani mwa mwawe. (Nsal. 55:23 [55:22 NM]) Owo mphuki a elapo yootheene. Khiyaavo eneereya Yehova  ohinsuwelaawe. (Mmusome 1 Pedru 3:12.) Mene nto mwaavirihaka maxupo muhinweraanyu omaliha meekhaanyu etthu yooreera opaka ori onweherera Yehova owo onimoomaalihani.

17. Moovarihana ni Yesaya 30:18 onlanhenre eheeni?

¹⁷ Tiithiihu a wiirimu onoonreeliha avarelaka muteko Omwene awe. Yesaya 30:18 oneera: “Nari siso, Yahvéh onnavilela, wera ophwanyiheni mahala awe.” Khweli owo ontthuna wemela wera omorelenì ikharari, vawi Yahvéh ti Muluku: “òreriwa ti yale annamuroromela yowo!” Atthu eneevirelele onweherera Yehova animwaakhela mareeliho mantxipale, okhuma vaanano va, mpaka elapo enyowani.

18. Mareeliho heeni ninwehereraahu?

¹⁸ Atthu a Muluku yaavolowaka elapo enyowani, khankela weeteteya ni etthu eri poothe naari tho ni maxupo anvirihaaya olelo va. Itthu sootheene soohixariya sinoovira. (Apok. 21:4) Khaninkela weeteteya niwehereraka itthu ninhaawelaahu. Atthu a elapo yootheene anookhalano itthu sootheene anhaawelaaya ni khiyaavo eneera yaathoweke. (Nsal. 72:16; Yes. 54:13) Ootheene nnooreelihiwa ni Yehova!

19. Mwaha wa heeni Yehova onnirehereraawe mwa ehuhu ela ehanle vakhaaneene?

¹⁹ Ehuhu ela ehanle vakhaaneene, Yehova onnanikhavihera owina sookhovelela soonanara naari okhalano mikhalelo sa makristu, mweekhaikhai ononreherera weera nakhaleke elapo enyowani. Mene nto muhitteettheye naari muhitthikele ottuli. Ninnaweherera itthu sooreera muholo! Nikhaleke oopixa murima ni oolikaneene onweherera Yehova okwanihera yoolakelaawe naari neere muteko awe!