SOOWERAYA SA MWEEKUMINI
“Miyo kaatthuna onvarela muteko Yehova”
NEERA nlaxeranaka ni egrupu emoha ekhaanene ya asinna namanlaahu oxekura waattamela muttetthe wa Granbori, muttetthe yoowo waarakamelanne ocidade naari neere yoowo waari variyari va ntuphi na oSuriname. Avinyaka vaavo naapatxera weetta ekwaha mmoolokoni Tapanahoni niwenleene nikula. Neettaka hiihaale naphiya eparte emoha yoowopiha ya mooloko ole ni mutoro wa nikula nahu waamana vanlukuni. Nikula nahu nimanakaru nluku nne, hiyo naamorela mmaahini. Yeereyakaru eyo, kamoona nookhwa vakhiviru vene. Mwa iyaakha sintxipale vaavo kaavaraka muteko wa esirkwiitu kanneetta ikwaha saka mmoolokoni, mene nkasuwenle orapela!
Kihinaaye opatxera ohima etthu yeereñye, wamukisivela toko ohima moota miyo kipatxenraaka ovara muteko wa ehuhu yootheene.
Miyo kiyarinwe eyaakha ya 1942, oCuraçau va etxurupa yooreera yeeyo ya oCaribe. Apapaka eyarinwe oSuriname, mene awo yaathamenle oCuraçau mwaha wa muteko. Miva kihinaaye oyariwa, apapaka yaakhala mmoha aatthu oopatxera okhala Namoona a Yehova oCuraçau. a Apapaka yannasomiha Biblya anamwane aya athanu isemana sootheene, mene hiyo khanakhweihera. Kirinoneene iyaakha 14 hiyo naathamela oSuriname mwaha wooweera apapa waatthuneya waathokorora avovo, apaale keere ha ameyaya apapa yaawo yaari oowuuluvala.
ASINTHAMWENE AKA YAAKIKHAVIHERA OKHALANO MIKHALELO SOOREERA
Niphiyakaru oSuriname, miyo kaapatxera otthekula ni asithamwene yaawo waasivela ovara muteko woolaleera. Awo yaari owunnuwa okipwaha miyo ni yaavara muteko wa piyoneiru wa nthiti. Emaara awo yahimaaya sookumanano saya sa mmutekoni woolaleera, miyo kannawera woona moota awo yaaraaya oohakalala. Savira vale mithukumano, miyo ni asithamweneka nannavirelela otthekula nuulumaka nyaha sa mBiblyani—ikwaha ikina naatthekula ohiyu ithenyeri sikhummeene. Yaari asinthameneene yaala yaakikhavihenre opaka yoothala ya mweekumini mwaka ni miyo kaatthuna onvarela muteko Yehova. Nto kaabatiziwa kireeneno iyaakha 16. Avinyaka kireeneno iyaakha 18, kaapatxera ovara muteko wa opiyoneiru wa nthiti.
ITTHU SOOREERA KIXUTTENRAAKA
Kivaraka ntoko piyoneiru oParamaribo
Miyo kooxuttera itthu sintxipale emaara kaaraaka piyoneiru, saari itthu sene seiya, kaxuttenraka saakikhavihenre etempu yootheene kavaraaka muteko wa ehuhu yootheene. Mwa ntakihero, miyo kaaxuttera otthuneya waya waaxuttiha atthu akina. Kiriki opatxera ovara muteko wa opiyoneiru, misionariyu mmoha oneeriwa Willem van Seijl amalenle okikuxa. b Owo aakixuttiha moota woothokorora miritti sa mmulokoni. Etempu ele, miyo nkoona moota oxuttihiwa iwe weeraaya okikhavihere. Eyaakha yaatharelana, miyo kaathanliwa okhala piyoneiru especial kinarowa ovara mittetthe sa igrupu ikhaanene variyari va ntuphi na oSuriname woorakamelana miloko mikina. Miyo kinnaxukurela vantxipale mwaha wooxuttihiwa ni asinna ale! Ovinyera vaavo miyo kinnilipihera otthara ntakihero naya nowaaxuttiha atthu akina.
Etthu yanaaveli kixuttenraaka ti yooweera okhalano ekumi yookhweya ni okhala mutthu owiireherera, onnareera. Woopatxerani wa mweeri, miyo ni munna kaavaraakano vamoha muteko wo piyoneiru especial, nannapaka elista ya itthu sootheene neerahu nihaweleke isemana sattharelana. Avinyaka mmoha a hiyo annaviaxari orooka okapitale weera athume itthu sootheene nahawelaahu. Waatthuneya ompaka programa nnene weera musurukhu naavahiwaahu okwanele otxa mweeri wootheene. Hiyo naari variyari va ntuphi, nto wakhala weera yanihalela etthu emoha khaavo eera anikhavihere. Miyo kinnaakhulela weera mwaha wookhalano ekumi yookhweya ni mwaha wooxuttera okhala mutthu owiirehera ovinyera emiravo aka, wookikhavihera onvarela muteko Yehova ekumi aka yootheene.
Etthu yanaararu kixuttenraaka tiila, waaxuttiha atthu nnuulumo naya. Miyo kunnuuwe kuulumaka eholandês, englês, epapiamento ni esranantongo, (nuulumo nna ninnasuweliwa tho okhala Sranan)—nuulumo nneno nnuulummwaxa oSuriname. Vaavo kalaleeraka muttetthe yoowo waari variyari va ntuphi, kivarelaka muteko nuulumo naya atthu awo yannaakhulela mitthenka sooreera sa Omwene. Mene miyo wannakixupa wuuluma muulumo makina amuttetthe ole, ntoko nuulumo na saramacano, nenno nnuulummwa mookhuwela ni vathi-vathi. Mene wiilipihera waka wannavareleya muteko. Moovira iyaakha miyo kaawera waaxuttiha atthu Biblya mwaha wooweera kaaxuttiha nnuulumo naya.
Ekhaikhai weera emaara ekina kannulihiheya muru. Mwa ntakihero, nihuku tinno kaatthuna omukoha namasoma mmoha a Biblya muthiya uuluma esaramacano moota aarawe, wooneya weera owo wamunvoreya mmirimani. Nto ohiya omukoha aalammeene mmirimani, kamukonhe weera muroorupala! Khanamusivenle nikoho nne kaapankaaka. Nnaamweera emaara ekina kuuluma itthu soohikhala seiyo, miyo kannilipihera wuuluma ni atthu nnuulumo naya.
KAAKHULELAKA MIRITTI MINYOWANI
Eyaakha ya 1970, katanliwa weera kavareke muteko wa mutokweene a esirkwiitu. Eyaakha ele kaapaka ithoonyero sa eprograma ya “Visita à Sede Mundial das Testemunhas de Jeová” kaapakelaka atthu a igrupu sa mittetthe soorakamela. Weera niphiye mapuro awo miyo ni asinna akina naavira mmoolokoni niwenleene nikula. Munikulani mmo, nannakuxa exerador, ekantilu ya kasolina, onyarini ni ikaruma ikina saatthuneya weera noonihere ithoonyero iye va projetoreni. Naphiya vale naatthuneya oteexa ikaruma iya nroihaka muttetthe waari variyari va ntuphi, aani, nipuro neeraahu namooniherevo programa owo. Etthu enkisivela vantxipale wuupuwelela, ori woona moota atthu ale waasivelaaya woona iprograma iye. Miyo wannakisivela vantxipale waaxuttiha atthu voohima sa Yehova ni mareherero awe. Wiilipihera wahu iwe waaphura etthu mwaha wooweera nannawoona atthu emusuwelaka Yehova ni emwaattamelaka.
KITHELAKA
Miyo ni Ethel nthelanne mweeri wa Setembro eyaakha ya 1971
Miyo kaasuwela weera ohithela waamukikhavihera onvarela muteko Yehova mootaphuwa, nnaamweera vareene hiiho kannatthuna othela. Miyo kaapatxera onvekela Yehova weera akivahe muthiyana eera awere onvarela Yehova moohakalala nnaamweera nivirihaka maxupo mwa yoothanleliwa ahu. Evirakaru eyaakha emoha, kaapatxera onamorari ni murokora Ethel yoowo aari piyoneira especial oowiilipihera ovara muteko woolaleera. Ovinyera esimwali awe murokora Ethel annatikhiniheya ni miteko aavaraawe murummwa Paulo ni aatthuna omulikanxa. Hiyo nthelanne mweeri wa setembro eyaakha ya 1971 ni naapatxera ovara vamoha muteko wa esirkwiitu.
Ohuuwale ni atthu yahaakhanleno itthu sintxipale sa weerutthuni, nto okhala weera naavara muteko wa esirkwiitu muttetthe waari variyari va ntuphi, Ethel wannamukhwela wiikhoveleliha ekumi ele naarahuno. Mwa ntakihero vaavo nairehereraahu weera naxekure mittetthe saari variyari va ntuphi naakuxa itthu vakhaaneene. Hiyo naatxapa itthu sahu ni naarapa mmoolokoni. Naahikhoveleliha atxa etthu yootheene naavahiwaahu—hala, ihopa sookhalano maino naari etthu eri yootheene yaaphwanyiwa wootothani. Sahikhala vale iparatho naatxela makukhu anka. Sahikhala vale ikulheri, naatxa ni matata. Miyo ni Ethel nohoona weera wiilipihera wahu iwe weera ninvarele muteko Yehova woolipiha ntheli nahu. Aani wooheeriha ntheli nahu okhalano miritho miraru. (Koh. 4:12) Etempu yaatthikihiwa, hiyo namutthikela opaka yoothanla ela veeli!
Ntthikaka naaxekura ahu muttetthe waari variyari va ntuphi, etthu yeereñye tiyeele kihimmaaka woopatxerani niviraka nipuro noowoopiha na mooloko, nikula nahu ohoolo waya naaneela moowakuveya avinyaka naakhuma, moohakalaliha hiyo khanattantte mwaha wooweera naawara ikoleti soowoopola ekumi. Nnaamweera vaari hiiho, yaavolowa maahi mantxipale munikulani. Hiyo naavarela muteko iparatho naahenlaahumo yootxa weera nuuve maahi ale yaari munikulani, nto weera niwere opaka eyo, hiyo naariha yootxa yootheene nakunxaahu.
Woona weera naariha yotxa ahu yootheene, naalakela omesera nriki weetta hiihaale munikulani, mene khanawenre omesera etthu. Nto nanvekela Yehova weera anivahe yotxa ya nihiku nene nenne. Nipakakaru nivekelo nne munna aari nihiyo, aavonyera nimeso nawe mmaahini ni aawarula ehopa. Ehopeele yaari etokotoko mpaka yaaphiyera otxa atthu athanu mpaka ovona.
KAAKHALANO MIRITTI MIRARU OTHELA, OTIITHI NI MUTEKO WA ESIRKWIITU
Nivanreene iyaakha ithanu muteko wa esirkwiitu, miyo naamwaaraka nahakhela mareeliho yaawo nahawehereraahu—a okhalano mwaana. Mitthenka sa okhalano mwaana sakisivela mene nkasuwela moota ekumi ahu yeeraaya ekhale. Miyo ni Ethel nannatthuna ovirelela ovara muteko wa etempu yootheene wakhala weera wanwereya. Mwanihu oopatxera Ethniël oyarinwe eyaakha ya 1976, ayarinweene mwanihu oopatxera saavira iyaakha piili ni emeya anayariwa mwanihu a naaveeli Giovanni.
Koonelaka obatizo wapakiwa mooloko wa Tapanahoni, waattamela Godo Holo, oSuriname—1983
Etempu ele oSuriname yannatthuneya anamalaleera, nto mwaha wa yeeyo eFiliyaale yaalakela weera miyo kitthikeleke ovara muteko wa esirkwiitu kiriki waahuwa anamwane aka hiihaale. Anamwane ahu ekhalakaru amiravo, miyo kannathanleliwa ovara muteko esirkwiitu saarino miloko vakhaanene. Eyo yakeeriha miyo ovara muteko wa e esirkwiitu isemana ikina ni mahiku makina yaahalela va mweerini kaavara ntoko piyoneiru muloko naathanleliwaahu. Muloko kaakelaaka oxekura wakhala weera wohattamela owaani, amwaaraka ni anamwane aka yannakihoola karowa oxekura vale. Mene miyo kaakela oxekura meekhaaka miloko saakhala variyari va ntuphi naari kakelaka ompaka assembleya weiwo.
Emaara kaavaraka muteko wa esirkwiitu ikwaha sintxipale keetta nnikula weera kiwere oxekura miloko soorakamela
Weera kiwere okwanihera miritti sootheene karaakano wannatthuneya miyo ompaka programa annene. Miyo kanniilipihera omusoma Biblya vatthokoni isemana sootheene mene emaara miyo kakelaaka oxekura mittetthe soorakamela, amwaaraka yannahala owaani ehoolelaka yoosoma ya vatthokoni ni anamwane. Nnaamweera vaari hiiho, hiyo nanniilipihera opaka itthu vamoha. Miyo naamwaaraka nannatthekula naanamwane ahu—nimweettaka xooku naari weettakasa pahi naanamwane. Ikwaha sintxipale kannapisa okona, mwaha woowiireherera weera kikwanihere soothanleliwa saka. Ethel aari muthiyana a miteko sawe ntoko yoole ohimmwale va Miruku 31:15, Ethel aavinya nsuwa nihikhumme weera areherere itthu sootheene ni yootthuna weera nthokorore yoolepa ya vanihikuni ntoko emusi. Ni otxa yootxa ya weixelo vamoha ni anamwane ahu ehinaaye orowa oskola. Miyo kinnamuxukurela Yehova mwaha wookivaha muthiyana ola oolipa moomunepani onkikhavihera okwanihera soothanleliwa saka soomunepani!
Hiyo ninniilipihera waakhavihera anamwane ahu omusivela Yehova ni muteko woolaleera. Hiyo naatthuna weera anamwane ahu evare muteko wa etempu yootheene ni okhala ntoko muteko aya, khaiyene wooweera wanyesereriha, mene ekhaleke yoothanla ayasa. Hiyo nannuuluma naawo moota yeeraaya ekhale oohakalala wakhala weera yamuthanla ovara muteko wa etempu yootheene. Nnaamweera naaviriha maxupo, Yehova annanikhavihera ni annareeliha emusi ahu. Hiyo nannaakhavihera anamwane ahu weera epakeke onthamwene nasinna yaawo yaamuhela Yehova nipuro noopatxera mweekumini mwaya.
Yehova annanivaha hiyo itthu sootheene sa weerutthuni naahawelaahu. Ekaikhai tho weera miyo kannapaka eparte aka. Emaara miyo kaavaraaka ntoko piyoneiru especial kaaxuttera wiiyaathi musurukhu weera kivarele muteko kahaawela vale etthu. Nnaamweera niilipihera, ikwaha ikina khanaakhalano musurukhu weera nthume itthu naahawelaahu. Etempu ene yeeyo miyo kinnaakhulelela weera Yehova annanikhavihera. Mwa ntakihero, eyaakha ya 1986 mpaka 1992 yaakhumelela ekhotto oSuriname. Nto iyaakha sene seiya khavaakhweya okhalano yootxa. Mene Yehova annanivaha ele nahaawelaahu.—Math. 6:32.
KUUPUWELELAKA MOOTA KIVARENLAAKA MUTEKO EKUMI AKA
Moono aka woolopwana kireene naamwara aka Ethel ni woothiyana anamwana aka naasaraya
Mwanihu ompatxera omuyara Ethniël areenenaamwarawe Natalie
Mwanihu anaaveli Giovanni areene naamwarawe Christal
Ekumi ahu yootheene ninnoona weera Yehova onnanikhavihera ni onnaniphwanyiha ohakalala. Anamwane ahu mareeliho wa hiyo ni waahuwa weera envareleke muteko Yehova eparakha etokeene. Ninnahakalala osuwela weera awo aathanla ovara muteko etempu yootheene ntoko muteko aya. Ethniël ni Giovanni, aasoma iskola sa mareherero a Yehova ni olelo va anvara muteko eFiliyaale ya oSuriname naasaraya.
Vano miyo ni amwaraka Ethel nohuuluvala, niniilipihera ovara muteko woolaleera ntoko mapiyoneiru especial. Waatteliwa iwo wookeeriha mpaka vano ohixuttera orapela! Mene nkineera keerelani kuupuwelaka moota kivarenlaka muteko ekumi aka, kinnoona weera kaapaka yoothanla yooreera othanla onvarela muteko Yehova etempu yootheene ovinyera kireene mmiravo.
b Moone yoowereya ya mweekumini ya munna Willem van Seijl’s, “Realidades que superaram minhas expectativas” va Despertai! a 8 a outubro a 1999.
