1-2. (a) Makoho heeni ninrowahu waakhula? (b) Eheeni enoonihera weera Yehova ontthuna Onikhavihera?

 YEHOVA pooti onikhavihera oviriha maxupo ninkumanaahuno mweekumini mwahu ni okhalano ohakalala mmutekoni mwawe. Yehova onnikhavihera moota heeni? Nnattottele hayi mureerelo ninkhavihero owo onnivahaawe? Yoosoma ela, enoorowa onnikhavihera waakhula makoho ala. Mene nihiinaye, ninrowa waakhula nikoho nna: Neereke Yehova onnathuna onikhavihera?

² Ekaarta murummwa Paulo alepenlaawe aHeberi, owo avarela muteko masu annikhavihera waakhula nikoho nna. Owo alempe ha: “Yehova ti ekhavihero aka nkinòva etthu anèraiye akèrele mutthu.” (Aheb. 13:6) Anamasoma akina a Biblya aahimme weera masu ala evarelinwe muteko va eversu ela, weera “ekhavihero aka” emmuhima mutthu ontthimaka arooka omukhavihera mutthu mukina ontthuna nikhavihero. Nkuupuwelani Yehova atthimakaka weera amukhavihera mutthu ori va erisani. Mweekhaikhai, muupuwelo ola waanamasoma onnavarihana nneene ni makhalelo a Yehova. Owo onnatthunaxa okhala ekhavihero ahu. Ni nikhavihero na Yehova, nnoowera ovilela maxupo moohakalala.

3. Mikhalelo heeni miraru Yehova onnikhavihera awe weera niwere oviriha maxupo ahu moohakalala?

³ Moota heeni Yehova onnikhavihera awe oviriha maxupo moohakalala? Weera naakhule nikoho nna, ninrowa othokorora iparte ikina sa eliivuru ya Yesaya. Mwaha wa heeni? Iprofesiya sintxipale Yesaya upuxerinwa awe olepa sinnavareleya muteko wa hiyo mahukwaano. Opwaha mwa yeeyo, Yesaya ikwaha sintxipale annamuuluma Yehova wookhweya  wiwanyeya. Mwa ntakihero, moone ekapiitulu ya 30 ya Yesaya. Ekapiitulu ela, Yesaya ovarela muteko malikanyiho ennikhavihera wiiwexexa moota Yehova akosompaawe muloko awe. Owo onnapaka eyo. (1) Iwaaka mavekelo ahu ni waakhula, (2) onivahaka miruku (3) onivahaka mareeliho vaanano ni muhoolo. Vano, ninrowa othokorora makhavihero mararu yaawo Yehova onnivahawe.

4. (a) Yehova ahimme heeni woohima sa aYuda a etempu ya Yesaya, ni eheeni Yehova akhulenla awe weera yakhumelele? (b) Yooweherera heeni Yehova avanhaawe aYuda ororomeleya? (Yesaya 30:18, 19)

⁴ Omapatxeroni wa ekapiitulu 30 ya Yesaya, Yehova onnaahima aYuda okhala “atthu ottiya maru.” . . . ‘Ya tukumanya soottheka ni soottheka’ owo tho ohimme ha: “Vekhaikhai yawo ari muloko wosivela ovanya, . . . anakhotta wiwelela ikano sa Yahvéh.” (Yes. 30:1, 9) Yesaya ahima weera Yehova amwakhulela weera muloko awe ottaruxiwe mwaha woohiwelela nsu nawe. (Yes. 30:5, 17; Yer. 25:8-11) Ni tiyeeyo yaakhumelele, muloko waakuxiwa oronhiwaka wookaporoni oBanilonia. Mene nto aYuda akina yaari ororomeleya wa Yehova, ni Yesaya akhalano mitthenka sooreera wa yaawo. Owo aahima weera Yehova amwaakhulela nihiku nikina aYuda okhala tho veeli oYerusalemu. (Mmusome Yesaya 30:18, 19.) Yoolaihera ela yakwaniheriwe vaavo Yehova aataphunla awe muloko awe wokaporoni oBabilonia. Eyo khaayereñye moowakuveya, masu oweera “Yahvéh onnavilela weera ophwanyiheni mahala awe” yathonyihera weera Yehova amwataphula atthu awe wookaporoni sivinrene iyaakha sintxipale. Ana Israeli yaakhala wookaporoni iyaakha 70 ehinakuve otaphuliwa weera ethikele oYerusalemu. (Yes. 10:21; Yer. 29:10) Winla wootheene yinlaaya mwaha wa maxupo yaakumanayaano wookaporoni oBabilonia, waathatuwa wiinla wa ohakalala.

5. Yesaya 30:19 onniroromeliha eheeni?

⁵ Hiyo tho ninkela olipihiwa ni masu ari va Yesaya 30:19. Yaawo eneera: “Onnimophwanyiha mahala, akhulelaka nsu na, okhuwela wa.” Yesaya onnanroromeliha weera Yehova onnakhula mavekelo vaavo nnavekelaahu nikhavihero, ni owo onnaakhula moohipisa mavekelo ahu. Ni Yesaya ahaatxerera ni masu ala: “Iwakaru nsu na onowakhula nananoru.” Masu ala oomaaliha ennonihera weera Tiithi ahu—onnatthuna waakhavihera ale—enanvekela. Osuwela eyo enoonikhavihera ovilela moohakalala.

6. Yoolepa ya Yesaya enonihera hayi weera Yehova onniiwa mavekelo arumeyi awe?

⁶ Yoolepa ya Yesaya 30:19 enniroromeliha eheeni woohima sa mavekelo ahu? Yehova onniiwa mavekelo a mutthu ti mutthu. Mwaha wa heeni ninhimahu hiiho? Iversu soopatxera sa ekapiitulu 30 ya Yesaya, Yehova onnavarela muteko masu oweera nyuwosa aahimaka atthu awe, masu oweera “nyuwosa” onahima atthu awe ntoko egurupu. Mene eversu 19, owo onvarihela masu oweera “nyuwo”, mwaha wooweera owo ontthuna weera aruhele mitthenka sawe wa mutthu ti mutthu wa arumeyi awe. Yesaya olempe há: Nyuwo khamukela wiinla wakhala weera munookhuwela weera mukhaviheriwe, aani, owo onimophwanyiha mahala; nto onnowakhulani. Ntoko Tiithi ansivelo, Yehova khanrowa owaakhula anamwane awe ooxupeya há: “Nyuwo muntthuneya wiilipihera ntoko munninyu naari ntoko murokorinyu”. Aani, opwaha mwa yeeyo, owo onnanipwattha ootheene hiyo ni onniwa mavekelo ahu.—Nsal. 116:1; Yes. 57:15.

7. Yesaya ni Yesu yoonihenre hayi weera ti wootthuneya onyeserera ovekela?

 ⁷ Vaavo nnanvekela ahu Muluku nimuleelaka etthu ennixupa, etthu yoopatxera owo onnivahaawe siri ikuru weera niwere ovilela maxupo awo. Mene nto, nnoona ehiviraka nintthuneya ovirelela onvekela Yehova weera onivahe ikuru soovilela maxupo awo. Mweekhaikhai, Yehova ontthuna weera hiyo ninvekeleke. Tiyeeyo masu a Yesaya entaphulelaya. Owo olempe há: “Muhimwitthuwihe.” (Yes. 62:7) Yoolepa ela entaphulela eheeni? Hiyo nintthuneya onyeserara opaka mavekelo, eyo eri ntoko ohimuhiya Yehova wiitthuwa. Masu a Yesaya ennanuupuxera ele Yesu uulummaawe woohima sa mavekelo ari va Luka 11:8-10, 13. Yesu oonooperera opaka nivekelo “onyeserera ovekela moolipa murima” ni “onyeserara oveka munepa wottela”. Hiyo tho pooti onvekela Yehova weera onivahe miruku weera niipake soothanla sooreera.

8. Masu ari va Yesaya 30:20, 21 yaakwanenle moota heeni khalai?

⁸ Mmusome Yesaya 30:20, 21. Emaara anakhotto oBabilonia yaarukurenraya ecidade ya oYerusalemu mpuwa mwa eyaakha emoha ni emeya, atthu ale yaannaviriha maxupo nenne nxiiye. Moovarihana ni eversu ya 20 ni 21 Yehova alaiheera weera aYuda ale yattharuwa ni weemexera mikhalelo saya soonanara, owo anwoopola. Yesaya amuhima Yehova okhala ‘Namuku aya’. Ni ahaleela aYuda ale weera Yehova amwaxuttiha moota woomukokhorela. Eyo yakwaanela vaavo aYuda yaatthinkaaya wookaporoni oBabilonia. Moohihovela, Yehova Muxuttiha mutokweene “Namuku á” aYuda ettharaka miruku sa Yehova, awo yaawera othikihera okokhorela weekhaikhai. Mwa yeeyo tho, hiyo olelo va ninnakhela mareeliho mwaha wooweera Yehova muxuttiha mutokweene.

9. Yehova onnivaha moota heeni miruku olelo va?

⁹ Va Yesaya 30:20, 21, ninnalikanxeriwa ni anamasoma enxuttihiwa ni Yehova. Yehova onnanixuttiha wa mikhalelo miili. Yesaya onnahima mukhalelo woopatxera eraka: “Nyuwo munoomona muxuttiha mutokweene ni maitho anyu.” Moota Yesaya olikanxeraawe va, ori ntoko muxuttiha owo ori ohoolo wa anamasoma awe. Hiyo nri ntoko anamasoma awo mwaha wooweera nokhalano eparakha yooxuttihiwa ni Yehova. Moota heeni Yehova onnixuttiha awe? Anni, owo onnixuttiha moorweela wa mareherero awe, hiyo ninnaxukurela mwaha wa miruku ninvahiwaahu  mmarehereroni mwa Yehova; moorweela, omuthukumanoni, iliivuru sahu, kongresu, JW Broadcasting® ni itthu ikina. Itthu iyo sinnanikhavihera oviriha maxupo nihiyeleelaka ohakalala.

10. Nniwa moota heeni nsu na “Yehova ottuli wahu”?

¹⁰ Yesaya onnanleela moota mukina Yehova onnixutiha awe. Owo enre: “Maru á anahala wiiwa nsu nulumaka ottuli wa neraka: Ephiro t’ila, otthareke!” Nahiyeene olelo va ninniwa nsu na Muluku ottuli wahu. Moota heeni? Mwaha wooweera masu owupuxeriwa a Muluku ennaphwanyaneya mBiblyani okhuma khalayi. Nto namusomaka Biblya onkhala ntoko nniwa nsu na Yehova ottuli wahu.—Yes. 51:4.

11. Weera nivilele moohakalala mmutekoni mwa Yehova, itthu heeni piili nintthuneya ahu opaka, ni mwaha wa heeni?

¹¹ Ninrowa ottottela hayi murerelo miruku sa Yehova nnakhela ahu moorweela mBiblyani ni mmarehereroni? Nereke nyuwo mohoonelela weera Yesaya uulumme itthu piili? Yoopatxera: “Ephiro t’ila”; Yaanaveli: “Otthareke”! (Yes. 30:21) Osuwela “iphiro” paahi khonphiyera. Mene ontthuneya “otthara masu a Yehova” ni miruku nnaakhela ahu mmarehereroni mwawe, hiyo ninnawera opaka ele Yehova onnivekela awe. Ni Yehova onnanixuttiha moota woovarela muteko ele ninxuttera ahu. Weera nivilele moohakalala mmutekoni mwa Yehova ninnitthuneya osuwela mphiro owo ni otthara. Neera há, nroromeleke weera Yehova ononreeliha.

12. Moovarihana ni Yesaya 30:23-26, Yehova aakela waareeliha moota heeni atthu awe?

¹² Mmusome Yesaya 30:23-26. Eprofesiya ela ekwaanenle moota heeni wa aYuda ale yatthikenle wIsraeli etempu yintxipale ewaleliweene oBabilonia? Awo yahaakhela mareeliho mantxipale—oomunepani ni aweerutthuni. Ni mareeliho a Yehova, atthu ale yaakhalano eyotxa yiintxipale. Opwaha mwa yeeyo, Yehova ahaareeliha atthu awe ni eyootxa yoomunepani, nto eyo yaahaakhavihera atthu ale omukokhorela Yehova moota ontthunaawe. Atthu a Muluku a mahuku ale yaareelihiwa, mareeliho yaakhenlaaya atthu ale, yaapwaha itthu sootheene yonnaaya ehinaaye waakhela mareeliho ale. Eversu ya 26 ennonihera moota Yehova antxerenrawe waara woomunepani akhaviheraka atthu ale wiiwexexa masu awe. (Yes. 60:2) Mareeliho ale a Yehova yaahaakhavihera atthu awe ovirelela omukhokhorela moohihiyerera “mwaha wooreera murima.”—Yes. 65:14.

13. Eprofesiya yootthikihera okokhorela weekhaikhai enkwanela hayi mahuku ahu ala?

 ¹³ Neereke eprofesiya ya otthikihera okokhorela weekhaikhai ennavareleya muteko mahukwaano? Aani ennavareleya muteko! Moota heeni? Ovinyera eyaakha ya 1919, atthu antxipale yaataphuliwa mwa sooxuttiha sa ittiini sowootha naari neere, Babilonia mutokweene, awo yaaroihiwa elapo yootepa oreera opwaha elapo yoolaiheriwa ya ana Israeli. Awo yaaroihiwa eparadiso yoomunepani. (Yes. 51:3; 66:8) Eparadiso yoomunepani ti heeni?

14. Eparadiso yoomunepani ti eheeni, ni taani okhala mwemmo? (Nwehe masu owiiwanyeihiwa.)

¹⁴ Ovinyera eyaaka 1919, atthu oothanliwa yaapatxera okhala oparadiso yoomunepani. b Evirakaru etempu, “yaale yaakhalanne yooweherera yookhala mparadiso elapo ele ya vathi,” yaapatxera okhala mparadiso yoomunepani ni ennaakhela mareeliho mantxipale a Yehova.—Yoh. 10:16; Yes. 25:6; 65:13.

15. Ninkela ophwanya woowiini eparadiso yoomunepani?

¹⁵ Eparadiso eyo mahukwaahu ala ninkela ophwanya woowiini? Atthu a Muluku ennaphwanyeya elapo yootheene. Tiyeeyo nto nneraahu eparadiso eri elapo yootheene. Nihipwatthaka ninkhalaahuwo, hiyo nnowera okhala mparadiso yoomunepani waakhala weera ninnakhavihera okokhorela weekhaikhai ni murima ahu wootheene.

16. Nintthuneya ohiwehexexaka eheeni weera noone eparadiso yoomunepani?

¹⁶ Weera nivirelele okhala mparadiso yoomunepani, nintthuneya oohela mwiitti eparakha nrahuuno yookhalano asinna. Ninkela opaka moota heeni eyo? Nnoopaka eyo nihiwehexexeka soottheka sa asinna, mene niwehexexaka itthu sooreera enpakaaya. (Yoh. 17:20, 21) Mwaha wa heeni etthu eyo eraaya yootthuneya? Mupuwele niphwanaphwaniho nna, vaavo hiyo ninkela ahu ojardim ninnaroromela weera hiyo nnoophwanya ifilori sooreera ni soovirikana, vamoha-moharu olelo  va tho, mmulokoni hiyo ninnaphwanya asinna ni asirokora oovirikana ntoko ifilore iye so jardim. (Yes. 44:4; 61:3) Mene hiyo nintthuneya owehexexa oreera wa “ejardim,” nihiwehexexeke onanara wa “ifilori” ikina ninkela ahu ophwanya ojardim iwe, nihihiyeeke soottheka sahu naari sa atthu akina sinanarihaka oreera ni wiiraana wa atthu a Muluku.

17. Mutthu ti mutthu a hiyo ontthueneya opaka eheeni weera aruuhele murettele mmulokoni?

¹⁷ Mutthu ti mutthu a hiyo onrowa opakaka eheeni weera avirelelihe wiirana iwo? Nikhaleke atthu owaasasa murettele. (Math. 5:9; Arom. 12:18) Ikwaha sootheene nnilipihera ahu weera nruhe murettele mmulokoni, naapakaka eyo, hiyo ninnakhavihera oreeriha eparadiso yoomunepani. Nintthuneya wupuwelaka weera mutthu ti mutthu ori mparadiso yoomunepani opurulelinwe ni Yehova weera omukokhoreleke ntoko owo ontthuna awe. (Yoh. 6:44) Nkuupuwelani moota Yehova onhakalala awe vaavo onnoona awe niilipiheraka weera nikhale owiraana ni a murettele ni atthu awe, yaawo onwoona awe ookhala ootepaxa—otthuneya!—Yes. 26:3; Hag. 2:7.

18. Nintthuneya ophimelelaka eheeni, ni mwaha wa heeni?

¹⁸ Ninkela ottottela hayi mureerelo mareeliho Yehova onnivaha awe? Nintthuna wiivahaaka etempu weera niphimelele ele ninsoma ahu mBiblyani ni iliivuru sahu. Eyo enooneeriha okhalano mikhalelo sa ekristu seiyo ‘sinkela oneeriha waaphwattha asinna mmulokoni.’ (Arom. 12:10) Naaphimelalaka mareeliho nnakhela ahu, onthamwene ahu ni Yehova onookhala woolipa. Nuupuwelaka mareeliho Yehova onkela awe onivaha muhoolo, yooweherera ahu ennalipa. Mareeliho ootheene ala nraahuno olelo va ni yaawo ninkela ahu waakhela muhoolo, ennaneeriha ovirelela onvarela muteko Yehova moohakalala.

19. (a) Moovarihana ni Yesaya 30:18, eheeni nintthuneya ahu ororomela? (b) Etthu heeni enroowa onikhavihera ovilela moohakalala?

¹⁹ Yehova onoorowa “onivuluxa” vaavo onrowaawe omaliha elapo ela yoonanara. (Yes. 30:18) Nto hiyo khaninhovela weera—Yehova “Muluku—a exariya” khankela ohiya elapo ela ya Satana evirelelaka okhala, owo onoonyaanya moohipisa. (Yes. 25:9) Mene nihinaaye ophiya nihiku nno, hiyo noolakela ovaha mwiitti eparakha nrahuno ya ovekela, osoma ni ophimelela mareeliho ninkela ahu waakhela. Nto napaka eyo Yehova onoonikhavihera ovilela ni ohakalala vaavo nimmukokhorela ahu.