1-3. Itthu heeni ninkumanaahuno sikhanle ooneriha wiinla?

EKWAHA eheeni yoomalihera nyuwo mwinlalanyu? Ikwaha ikina hiyo ninnamoriha maithori mwaha wooweera nnoohakalala. Mene ikwaha sintxipale hiyo ninnanla mwaha wooripiwa murima. Mwa ntakihero, ti woovila la ohimoriha maithori naari wiinla, nakhweliwa ole naamusivelaahu. Murokora mmoha oneeriwa Laura onkhala wEstados Unidos, olempe ha: “Ikwaha ikina, miyo kannariipiwa murima mwaha wookhweliwa mwanaka, ni koona weera nkaakela ophwanya nimaaliho. Nave ehuhu ekina tho miyo murima wannatepa okivoreya ni kannuupuwela weera khavareerela oovirelela okhala ni ekumi.” *

² Hiyo ninnanla mwaha wa itthu ikina. Hiromi, murokora mmoha piyoneira onkhala oJapão, ohimme ha: “Ikwaha ikina miyo kinnakhala ookhulumuwa mwaha wa atthu ohitthuna omuxuttera Biblya. Nave ikwaha ikina kinnanla wa Yehova, weera akikhavihere omphwanya mutthu ontthuna oxuttera ikhaikhai sa mBiblyani.”

³ Neereke nyuwo mwaatoko okhalano moonelo ntoko wa Hiromi naari Laura? Antxipale a hiyo naatoko okhalano moonelo owo. (1 Ped. 5:9) Hiyo nintthuna ‘onvarelaka muteko Yehova ni ohakalala’. Mene ikwaha ikina nnanvarela muteko Yehova ninlaka mwaha wa okhweliwa, okhulumuwa ni itthu ikina sineerera nroromelo nahu wa Yehova. (Nsal. 6:6; 100:2) Eheeni eneera enikhavihere oviriha maxupo eene siiyawo?

4. Eheeni ninkelaahu oxuttera yoosomeene yeela?

⁴ Ntakihero na Yesu, pooti onikhavihera. Yesu aaviriha maxupo ‘yaamweerinhe wiinla.’ (Yoh. 11:35; Luka 19:41; 22:44; Aheb. 5:7) Nnorowa oxuttera, ni ikwaha ikina Yesu anlalaawe. Nnorowa woona ikwaha ikina Yesu anlalaawe ni eheeni eyo  ennixuttihaaya voohima sa Yehova ni Yesu. Nnoorowa woona thoni, eheeni ekhanle yoonikhavihera oviriha itthu iya sinneriha wiinla.

5. Eheeni muxuttenraanyu voohima sa Yesu, vaavo mwamusomaanyu Yohani 11:32-36?

⁵ Eyaakha ya 32 E.C., Lazaro nthamwene awe Yesu oosiveleya, aavoreiwa ni ahookhwa. (Yoh. 11:3, 14) Lazaro aakhalano asirokoriye eeli Maria ni Marta, ni Yesu annasiveliwa vantxipale ni emusi ele. Asithiyana ale ooweeli yaaripiwa murima vantxipele mwaha wookhweliwa murokoraya. Lazaro akhwakaru, Yesu ahetta ekwaha arowaka oBetânia, weiwo aakhalaawewo Maria ni Marta. Marta asuwelakaru weera Yesu eera arwaaka, owo aatthimaka anveelaka. Nkererani wuupuwela oripiwa murima wa Marta vaavo owo ahimmaawe: “Pwiya wakhanle vava sano ahakhwiye murokoraka.” (Yoh. 11:21) Voottharelana, Yesu amoonakaru Maria ni atthu akina yinlaka owo-tho “apatxera winla.”—Mmusome Yohani 11:32-36.

6. Mwaha wa heeni Yesu anlalaawe?

⁶ Mwaha wa heeni Yesu anlalaawe ehuhu ele? Ebuukhu Estudo Perspicaz das Escrituras ennakhula nikoho nla: “Okhwa wa nthamwene awe Lázaro, ni oripiwa murima wa asirokoriye waamweeriha Yesu, ‘omoriha maithori.’” * Pooti weeraka Yesu annupuwela moota nthamwene awe ole Lazaro ahanwaawe ni eretta ele ni moota owo wamurimpaya murima akhelakaru mittenka sooweera nthamwene awe ohookhwa. Moohihovela, omoona tho Marta ni Maria ereene oripiwa murima mwaha wa okhweliwa murokoraya, waamweeriha tho Yesu winla. Wakhalaweera nyuwo mookhweliwa nthamwene anyu, naari mmosi anyu, moohihovela nyuwo munnasuwela moota Yesu oonenlaawe. Vano ninrowa woona itthu tthaaru nneraahu nixuttere ni yoowereyeene yela.

7. Maithori Yesu amoorihaawe mwaha wa asinthamwene awe, ennixuttiha eheeni voohima sa Yehova?

⁷Yehova onnasuwela minyuupuwelo sanyu. Biblya onhima weera Yesu “ethonyero ya  makhalelo a Muluku”. (Aheb. 1:3) Nto winla wa Yesu moohihovela onnanoonihera weera, Atithawe yaaripiwa murima. (Yoh. 14:9) Wakhala weera nyuwo munnaviriha maxupo ene yaala okhweliwa ole mwaamusivelaanyu, musuwele weera Yehova onnasuwela minyupuwelo sanyu, ni owotho ori oripiwa murima ntoko nyuwo. Owo onnatthuna vantxipale wookosopani ni okurunuxa ovoreya nyuwo munoonanyu.—Nsal. 34:18; 147:3.

8. Mwaha wa heeni nintthuneyaahu oororomela weera Yesu onoorowa waattikihera ekumi atthu ale ekhwiiye?

⁸Yesu onnatthuna vantxipale wavinyereriha amusi anyu ni asinthamwene anyu ekhwiiye. Yesu ahinakuve winla, owo amuroromeliha Marta weera Lazaro murokora ‘anavinyerere’ ni Marta aasuwela weera Yesu aahima ekhaikhai. (Yoh. 11:23-27) Marta aari murumeyi a Yehova ororomeleya, mwaha wa yeeyo, owo aasuwela weera mprofeti Eliya ni Eliseu yahavinyereriha atthu ehuhu yakhalayi. (1 Mam. 17:17-24; 2 Mam. 4:32-37) Ni owo ahiwa weera Yesu, annavinyereriha atthu. (Luka 7:11-15; 8:41, 42, 49-56) Nyuwo muroromeleke ntoko Marta. Mweera hawo, nyuwo munoorowa owona amusi anyu ni asinthamwene anyu ekhwiye. Maithori Yesu amorihawe weera aamalihe asinthamwene awe oosiveleya, anoonihera weera owo onnatthuna weera ahokoloxere ekumi atthu ale ekhwiiye ni tiyeeyo onrowaawe opaka!

9. Nimutakihaka Yesu ninkela waakhavihera hayi ale ekhwelinwe? Nvahe ntakihero.

⁹Nyuwo munoowera wakhavihera ale akhweliwe. Yesu ahinla variyari va Marta ni Maria; owo ahahiya wuuluma ni ahuuluma masu oolipiha. Hiyo tho, ontthuneya otthara ntakihero na Yesu. Dan, munna mmoha mutokweene a mmulokoni onkhala wAustrália, ohimme ha: “Miyo kannatthuna nikhavihero vantxipale, kikhweliwakaru amwaaraka. Nto itthoko sintxipele sa asinna saari soolikanasene weera ikiiweke ehuhu eri pothe ya vanihikuni mpakana ohiyu. Awo yannakihiya wuuluma itthu sootheene miyo kuupuwelaka ni yannakimaliha ehuhu kaapatxeraaka winla. Opwaha wa yeeyo, awo yannakikhavihera ni miteko. Mahiku makina miyo nkawera opaka etthu, mene awo yanatxapa ekaro aka, yannathuma soothuma-thuma ni yannakaapela. Ni awo yannavekela vamoha ni miyo. Awo yaahoonihera weera tthiri asinthamwene eekhaikhai ni asinna yaari oolikaneene weera ekikhavihere ‘ehuhu yooxupa.’”—Mir. 17:17.

10. Muthalihe etthu yaakhumelenle Yesu aphiyakaru oYerusalemu elempwale va Luka 19:36-40.

¹⁰ Nihiku na 9 a Nisani eyaakha ya 33 E.C., Yesu aarowa oYerusalemu. Ariki ovolowa mmuttettheni, atthu antxipale yaathukumana weera emwaakhelele. Atthu awo yaahatala ikuwo saya mphironi weera Yesu aviremo ni atthu ale yamuthokorora Yesu ntoko mwenaaya. Mweekhaikhai nihuku nne naari nihuku noohakalaliha. (Mmusome Luka 19:36-40.) Mwaha wa yeeyo, atthareli a Yesu, yatikiniheya moota Yesu oonenlawe emaara avolonwawe mmuttettheni: “Yesu attamelaka ni onaka muttetthe wa oYerusalemu, ahikhupanyera.” Anlaka Yesu aahima etthu yeera ekhumelele ni atthu.—Luka 19:41-44.

11. Mwaha wa heeni Yesu anlalaawe mwaha wa atthu a oYerusalemu?

¹¹ Yesu aaripiwa murima mwaha woosuwela weera naari atthu akina yamwakhelenle nnene, atthu antxipale aYuda khayarowa waakhulela mitthenka owo alaleyaawe. Mwaha wa mukhalelo owo, Yerusalemu amurowa onyanyiwa ni aYuda yeera ekhale akumi yaamukuxiwa eroihiwaka wookaporoni. (Luka 21:20-24) Masu a Yesu a yahereya. Mooripiha murima, atthu  antxipale yaakhotta mitthenka iye sa Yesu. Atthu a muttetthe anyu, annakhulela mitthenka munlaleyanyu? Wakhala weera atthu antxipale khantthuna owiiwani, eheeni nyuwo mukhanlaanyu ooxuttera ni ntakihero na Yesu? Nnookela woona itthu tthaaru nikhanlaahu oxuttera.

12. Maithori Yesu amorinhaawe oYerusaleemu ennixuttiha eheeni voohima sa Yehova?

¹²Yehova onnaaphwattha atthu. Maithori a Yesu annanuupuxera weera Yehova onnaapwattha atthu. Biblya onnahima weera: “Niwoko khantthuna wi akina eriheye, mene othene erukunuxe murima.” (2 Ped. 3:9) Nnamonihera weera ninnasivela akhwiihu ni wiilipihera waavara murima ni mitthenka ninlaleyaahu.—Math. 22:39. *

13-14. Yesu onihenre hayi weera onnamorela atthu ikharari ni hiyo ninkela omutakiha hayi?

¹³Yesu annapaka ele aweeraawe mmutekoni moolaleera. Yesu annasivela atthu, mwaha wa yeeyo, annaasaasa moota woowaalaleera. (Luka 19:47, 48) Heeni Yesu aapakaawe etthu eyo? Mwaha wooweera Yesu annasivela atthu. Ni ikwaha ikina, yannakhala atthu antxipale yaatthuna nikhavihero nawe ni yaatthuna omwiiwa Yesu, owo ni oxutteraawe mpakana “khaawera otxa etthu.” (Mar. 3:20) Yesu aaphiyera mpaka olaleera ohiyu, vaavo mulopwana mmoha aatthunaawe wiiwa mitthenka alaleyaawe. (Yoh. 3:1, 2) Ekhaikhai weera atthu antxipale khayaiwelela itthu Yesu alaleyaawe naari khayakhanle atthareli a Yesu. Mene nroromeleke weera atthu awo yaakhalano onamoona woooreera. Hiyo-tho, nintthuna weera naavahe eparakha atthu ootheene wiiwa mitthenka hiyo ninnaleleyaahu. (Mit. 10:42) Nto weera niwere opaka eyo, onnatthuneya opaka matxentxo moota hiyo ninnaleyaahu.

¹⁴Mwiikhoveleliheke makhalelo manyowani. Wakhala weera hiyo ninnalaleera ehuhu emoharu pooti ohaphwanya atthu antthuna oxuttera ekhaikhai. Piyoneira mmoha oneeriwa Matilda enre: “Miyo ni aiyaka ninneerera walaleera atthu ehuhu yoovirikana. Oxeexelo hiyo ninnalaleya omercado. Emeedia ehuhu yeeyo atthu ankhalaaya mmuseweni hiyo ninneemela mmuseweni ni ekarinyu. Ehuhu ya oxekuwa ninnawera wuuluma ni atthu ammawanyaya.”  Ohiya olaleya paahi ehuhu nnoonaahu okhala yooreerela, onnatthuneya wiikhoveleliha olaleya ehuhu yoovirikana weera naaphwanye atthu. Napaka eyo, nroromeleke weera Yehova onoohakalala vantxipale.

15. Moovariha ni Luka 22:39-44, eheeni yaakhumelenle ohiyu woomalihera wa Yesu elapo ya vathi?

¹⁵ Oyaaka nooxa nihuku na 14 a Nisani E.C., Yesu aarowa ojardim oJethesemani. Ti weiiwo, anvekenlaawe Yehova. (Mmusome Luka 22:39-44.) Yaari ehuhu ene yeele Yesu “nookhuwela otokotoko ni maithori aweliha, mavekelo ni sowikhupanyera.” (Aheb. 5:7) Vano Yesu avekenle eheeni ohiyu ole woomalihera ahinaakuve okhwa? Owo aavekela ikuru weera avirelele okhala oororomeleya ni opaka yootthuna ya Yehova. Mene nto, Yehova ahakhula mavekelo a Yesu ni owo aarumiha nlaika weera nimulipihe.

16. Mwaha wa heeni Yesu axupeñyawe vaavo aavekenlaawe ojardim yoJethesemani?

¹⁶ Nivekelo Yesu aapankaawe ojardim ya oJethesemani, owo ahinla mwaha aari ooxupeya ni ele atthu yaarowaaya wuupuwelaka weera khattittimiha nsina na Muluku. Owo aasuwela weera aakhalano muritti mutokotoko—ovirelela okhala oororomeleya ni okhavihera olamulelo wa Yehova. Wakhala weera nyuwo munnaviriha maxupo oovila, aneerera ororomeleya wanyu wa Yehova, eheeni muneeraanyu muxuttere ni maithori a Yesu? Moone sooxuttiha tthaaru sinrowa wookhavihera.

17. Eheeni ninxutteraahu ni Yehova moota aakhunlaawe nivekelo na Yesu?

¹⁷Yehova onnaiwa mavekelo ahu oowikhupanyera. Yehova aahiwa nivekelo Yesu aapankaawe. Mwaha wa heeni? Mwaha wooweera yootthuna ya Yesu yaari ovirelela okhala oororomeleya ni ovuwiha nsina Naatithawe. Hiyo naakhalano moonelo mmoharu wa Yesu, Yehova onimwaakhula mavekelo ahu oowiikhupanyera.—Nsal. 145:18, 19.

18. Mwa mukhalelo heeni Yesu oraawe ntoko nthamwene onnisuwela nnene?

¹⁸Yesu oosuwela moonelo ahu. Naavirihaka maxupo ti wooreera wuuluma ni nthamwene ahu onnisuwela nnene, otepaxa wene wakhala weera otoko oviriha maxupo ntoko hiyo ninvirihaahu. Yesu ori ntoko nthamwene owo.  Owo oosuwela okhala oottetteya, ni otthuna nikhavihero. Owo oosuwela soottettheya sahu ni onnatthuna oonivaha nikhavihero “ehuhu yooreerela.” (Aheb. 4:15, 16) Yesu ahaakhulela nikhavihero aavahiwaawe ni nlaika ojardim oJethesemani. Hiyo tho ninatthuneya waakhulela nikhavihero na Yehova moorwela mwa ibuukhu, iviidiyu nyaha simpakiwa mmulokoni, nthamwene ahu oowunnuwela omunepani naari mutokweene a mmulokoni.

19. Eheeni enrowa onikhavihera navirihaka maxupo aneerera ororomeleya wahu wa Yehova? Nvahe ntakihero.

¹⁹Nyuwo munimwaakhela “murettele wa Muluku”. Nanvekelaka Yehova, owo onoonivaha ikuru hiyo nintthunaahu. Nave nnimoonaka “murettele mwa Muluku onapwaha nyuupuwelo sothene.” (Afil. 4:6, 7) Murettele owo, onnomaaliha murimaahu ni onoonikhavihera ohela minyupuwelo sahu mmapuroni. Ti yeeyo yeereñye ni murokora oneeriwa Luz. Owo ohimme ha: “Miyo kaisoonaka okhala meekhaaka, kinnihaawa vantxipale. Emaara yeeyo kinxupeyaka, kinnoona weera Yehova khansiveliwa ni miyo. Mene ehuhu kinkhalaakano nyuupuwelo iyo, kinneemela ti ehuhu ene yeeyo kinamuleela Yehova moota miyo kinoonelaaka. Nivekelo ninnakikhavihera ohela mmapuroni minyupuwelo saka.” Masu a murokora Luz anoonihera weera nivekelo nnowera oonivaha murettele.

20. Maithori a Yesu ennixuttiha eheeni?

²⁰ Osoma maithori a Yesu woonimaaliha vantxipale ni nooxuttera itthu sootthuneya mwa yoosomeene yeela, nohoona weera onnatthuneya waakhavihera ale yaayelenle amusi aya naari asinthamwene aya mokhwaani ni onnatthuneya omuroromela Yehova ni Yesu weera onoonikhavihera naavirihaka maxupo ahu. Nave nooxuttera weera, onnatthuneya waalaleera atthu ni owoonihera nsivelo mwaha wooweera Yehova ni Yesu anxuttiha weera nipakeke eyo. Ni mwaha woosuwela weera Yehova ni Yesu annasuwela moonelo ahu ni ootteettheya wahu, onnanimaaliha ni onnatthuna onikhavihera ovilela. Vano ninrowa oovirelela ovarihela muteko iya nixuttenrahu wa yoosoma ela, mpaka vaavo Yehova onrowaawe okwanihera soolaihera sawe sooweera: “anapuputthe maithori othene a mmaithoni mwaya”!—Apok. 21:4.