1. Maxupo heeni aavirihaawe Davidi?

DAVIDI annitthawatthawa weera aakihe ekumi awe. Sawuli, mwene ooweraxa a wIsraeli, annamwaasaasa omwiiva Davidi. Mene nto woottharana Davidi aatthawela ecidade ya Nobi. Iwe aanvekela namakeya Ahimeleki iphawu weera atxe. (1 Sam. 21:1, 3) Voottharana Davidi ni anakhotto awe, yaatthawela munikhukuni. (1 Sam. 22:1) Eheeni yaakhumelenle weera Davidi atthawatthaweke?

2. Itthu heeni soonanara Sawuli aapankaawe? (1 Samuweli 23:16, 17)

² Sawuli aakhalano nrima ntokotoko. Owo annamukhalela nrima Davidi mwaha woovuwa ni mwaha wootthuniwa ni atthu antxipale. Ni Sawuli aasuwela weera aakhoottiwa ni Yehova okhala mwene mwaha wa ohiiwelela ni aasuwela weera Davidi eera akhale mwene oottharelana a wIsraeli. (Mmusome 1 Samuweli 23:16, 17.) Mene Sawuli eera areene mwene a wIsraeli, mwaha wa yeeyo, owo aakhalano anakhotto ni annikhaviheriwa ni atthu antxipale. Nto Davidi khaakhanleno yoothanla ekina ohikhanle otthawa. Neereke Sawuli uupuwela weera anwera owana ni okhoottihera weera Davidi okhala mwene? (Yes. 55:11) Mene Biblya khanaakhula nikoho nna. Mene etthu ninroromelaahu tiila: Sawuli annatheeliha mooro. Khaavo onwana ni Yehova anakhumelela nnene!

3. Nnaamweera Davidi aaviriha maxupo mantxipale a mweekumini, owo oonela hayi?

³ Davidi aari mutthu oowiiyeviha. Owo khiithanliye okhala mwene a Ana Israeli. Mene aari Yehova aamuthanliye okhala mwene. (1 Sam. 16:1, 12, 13) Sawuli annimoona Davidi okhala  mwiittani awe oomalihera. Mene Davidi khaamukhupanya Yehova mwaha wa itthu sootheene iye saamukhumelela, naari khaakhupanya mwaha woohikhalano yootxa kapena okhala munikhukuni. Mweekhaikhai, pooti weera ehuhu ene yeele Davidi iipinthaawe munikhukuni emaara aalepaawe yoolepa ela: “Yale anamwàsa Yahvéh, khanrowa othoiwa etthu.”—Nsal. 34:11 [34:10, NM].

4. Makoho heeni nneeraahu naakhule mpuwa mwa yoosoma ela ni mwaha wa heeni eraaya ootepa otthuneya?

⁴ Arumeyi a Yehova mahuku ahu ala, khiyaanono yootxa yookwana naari tho itthu ikinasene sa weerutthuni. * Otepaxawene eretta ela, ennitepa oxupiha itthu. Vaavo hiyo nnaattamelaahu “yoohooxa etokotoko,” itthu sinnavirelela oxupa. (Math. 24:21) Nuupuwelaka eyo, ninkela waakhula makoho maxexe mpuwa mwa yoosoma ahu ela: Moota heeni Davidi “yahaamuthowaaya etthu”? Mwaha wa heeni nintthuneyaahu ohakalalela itthu nikhalannaahu? Mwaha wa heeni nintthuneyaahu onroromelaka weera Yehova onoonikosoopa? Nave ninkela wiireherera hayi weera niwere wiireherera ni maxupo a muhoolo?

5-6. Nsalmu 23:1-6, ninnikhavihera hayi wiiwexexa ele Davidi onhimmaawe weera arumeyi a Muluku “khenaathowa etthu yooreera”?

⁵ Davidi enre khiyaavo yeera emuthowe yoole onamwaasaasa Yehova. Davidi aatthuna ohimaheeni ni masu “kiyaavo yeera emuthowe”? Owo aavarihela masu mamoha-moharu emaara aamulepaawe Nsalmu 23. Mwa yeeyo, Nsalmu na nnoonikhavihera wiiwexexa ele Davidi aatthunaawe ohima. (Mmusome Nsalmu 23:1-6.) Nsalmu nna Davidi aapatxerinhe olepa ni masu aneera: “Yahvéh ti mukukhuli aka. Nkinrowa othoiwa etthu.” Voottharelana Davidi aavirelela wuuluma itthu seiyo saakhalanne mwiiti mweekumini mwawe—ntoko mareeliho oomunepani yaawo aakhulenlaawe wa Yehova ntoko mukukhuli. Yehova annamukukhula Davidi “mphironi mwa exariya” nave aanvirelela okhala ni Davidi ihuhu sooreera ni sooxupa. Wa  Davidi onvarela Yehova yaari ntoko wiisaatalela “wamunyepuni woorimpelela.” Mene owo aasuwela weera nnaamweera vareene hiiho, owo aasuwela weera aamukhalano maxupo a mweekumini ni aamukhalano amwiittani. Emaara ekina owo annikhulumuwa, ntoko weetta mweepiphini. Mene tho aasuwela weera, akhaviheriwaka ni Yehova ntoko mukukhuli awe, owo ‘khaakela woova etthu.’

⁶ Vanonto, moota heeni “yahaamuthowaaya etthu yooreera”? Davidi “aakhalano itthu sootheene” aatthunaawe weera avirelelihe onthamwene awe ni Yehova. Mene Davidi khuwaatthuneya weera akhaleno itthu sintxipale weera akhale oohakalala. Davidi annahakalalela itthu aakhelaawe wa Yehova. Wa yoowo, etthu yootepa otthuneya waari waakhela mareeliho ni othokororiwa ni Muluku.

7. Moovarihana ni Luka 21:20-24, maxupo heeni Makristu yaakhala oYudeya yaavirinhaaya?

⁷ Masu Davidi aalempaawe, ennanikhavihera wiiwexexa otthuneya waya okhalano moonelo wooreera voohima sa itthu sa weerutthuni. Ekhaikhai weera, khoiyono woonanara okhalano itthu sa weerutthuni, nto etokotoko ori osuwela etthu yootepa otthuneya yamweekumini mwahu. Ela yaari etthu yaiwexenxaya makristu a eseekulu yoopatxera yaakhala oYudeya. (Mmusome Luka 21:20-24.) Yesu ahaaleela weera ecidade ya oYerusalemu “yaamuritxiwa ni anakhotto.” Nto yoona weera yannikhumelela eyo, awo “yannitthuneya otthawela onyaakoni.” Nto otthawa ecidade ele yaamoopola ikumi saya, mene awo tho yannitthuneya weera erere etthuli itthu ikina. Iyaakha sivinre otthuli, A Sentinela ohimme weera: “Makristu ale oYudeya, yaarera etthuli imatta saya, impa saya ehikuxaka etthu eri poothe. Nto eroromelaka othokororiwa ni okhaviheriwa ni Yehova, awo yaahela nipuro noopatxera omukokhorela waya Yehova, ohiya itthu ikina sene.”

8. Eheeni ninxutteraahu ni ele yaakhumelenle Makristu yaakhala oYudeya?

⁸ Eheeni ninxutteraahu ni ele yaakhumelenle Makristu a eseekulu yoopatxera yaakhala oYudeya? A Sentinela oromolinwe eparagrafu ya muttuli, ohimme ha: “Eri yooweerera moota hiyo nnoonelaahu itthu sa weerutthuni. Neereke itthu iya ti sootepa otthuneya, ophwaha ovuluxiwa wa atthu ootheene ale eri moono wa Muluku? Tivawo otthawawahu pooti onikhumelela maxupo naari othowiwa itthu ikina. Ni tho onnitthuneya weera nipake ele ninweraahu naatakihaka Makristu a eseekulu yoopatxera yaawo yaatthanwe ecidade ya oYudeya.” *

9. Vaavo ninsomaahu masu a Paulo eri va Aheberi, ontthuneya weera nroromeleke eheeni?

⁹ Nyuwo munnawera wuupuwela moota waaraaya woovila wa Makristu a ehuhu ele orera ettuli itthu sootheene yaakhalannaaya ni orowa opatxeriha ekumi? Awo wannitthuneya weera ekhaleno nroromelo wa Yehova eroromelaka weera owo aamwaakhavihera ni itthu sa weerutthuni. Ni etthu ekina yeera yaakhavihere Makristu ale, yaari yooweera yannitthuneya otthara miruku seiyo Paulo aavanhaawe iyaakha 5 sa muttuli ehinaakuvene Aroma oritxa ecidade ya oYerusalemu: “Ekhalelo anyu ehìnlele musurukhu, muhakalalele ni seiyo muranyuno niwoko Muluku àhèra: ‘Nkirwa wòhiya nari nkirwa wònyanyala.’ Siso n‵ororomeleya ninnèra: ‘Apwiya [Yehova] ti ekhavihero aka, nkinòva etthu anèraiye akèrele mutthu.’” (Aheb. 13:5, 6) Moohihovela waari woovila wa Makristu a ehuhu ele otthara miruku sa Paulo nave okhalano ekumi yookhweya opwaha ekumi yaakhalannaaya ecidade ya oYudeya. Makristu ale wannitthuneya ororomela weera Yehova aamwaavaha itthu seiyo yaahaawelaaya sa weerutthuni. Ni masu a Paulo ennanikhavihera ororomela itthu imoha-moharu—Yehova  onkela onivaha itthu sooteene seiyo sa weerutthuni ninhaawelaahu.

10. “Esiiri” heeni yaamweeriha Paulo ohakalala?

¹⁰ Murummwa Paulo anvaha miruku Timotheyo nave miruku iyo sinnavareleya muteko ehuhu ahu ela. Owo aamulepenle ha: “Vano nakhalano yotxa ni sowikhunela, nihakalalele seiyo.” (1 Tim. 6:8) Neereke eyo entaphulela weera hiyo khontthuneya weera nikhaleno musukhu weera nithumele yootxa, empa yookhala naari othumano ikuwo? Naari, Paulo khaatthuna ohima eyo. Paulo aatthuna ohima weera hiyo nihakalaleleke itthu seiyo nikhalannaahu. (Afil. 4:12) Eyo yaari “esiiri” yaamweeriha Paulo okhala oohakalala. Tivawo nto etthu eri yootthuneyaxa mweekumini mwahu ori okhalano onthamwene ni Yehova Muluku ahu, ohiya itthu neeraahu nikhalane.—Hab. 3:17, 18.

11. Ninxuttera eheeni ni ohakalalela itthu nikhalannaahu moorweela ni masu a Mose wa Ana Israeli?

¹¹ Pooti weera hiyo ninnatthuna okhalano itthu ikina, neereke nto Yehova onnoona okhala wootthuneyaxa okhalano itthu iyu. Muupuwele ele Mose aalenlaawe Ana a Israeli evirihakaru iyaakha miloko mixexe (40) mweeheweheweni, owo enre: “Vekhaikhai Yahvéh Muluku á òhòtthara mukwaha á onvirawe weheweheweni nno worakama. Yahvéh Muluku á òkhala ni weyo iyakha seiya milokó mixexe ni khweli khayavo yòthonwe.” (Ola. 2:7) Yehova mweekhakhai ahaathokorora Ana Israeli ehuhu yootheene ele. Mpuwa mwa iyaakha miloko mixexe (40), awo yaakhalano yootxa. Opwaha mwa yeeyo, ikuwo seiyo yaakhumannaaya—oXipitu, khasathaanle  mpuwa mwa iyaakha miloko mixexe. (Ola. 8:3, 4) Atthu akina yaakela woona weera itthu iye khasaakwana. Mene Mose aawuupuxera Ana a Israeli weera, awo yaakhalano itthu sootheene yaahaawelaaya. Emoha-moharu, hiyo ontthuneya olikana ni Mose ni ohakalalela itthu nikhalannaahu—wakhala weera hiyo ninnahela mwiitti itthu seiyo Yehova onnivahaawe ni woona ntoko mareeliho, ninkela omuhakalaliha Muluku ahu.

12. Eheeni enoonihera weera Davidi annimuroromela Yehova, ohiya wa mikhalelo sawe?

¹² Davidi aasuwela weera Yehova Muluku oororomeleya ni onnaathokororo yaale anemoova. Emaara Davidi aavirihaawe maxupo aalepa Nsalmu 34, owo annaroromela weera “ntxelo a Yahvéh” aateka ekwikhwi “okhwipi” wawe. (Nsal. 34:7) Araaya Davidi annalikanxera nlaika na Yehova ni nakhotto aari oolikaneene anwehereraka mwiittani. Mene Davidi aari nakhotto oolipa murima ni Yehova, aamulaihera weera owo aarowa okhala mwene oottharelana. Nnaamweera vareene hiiho, Davidi khaaroromela mikhalelo sawe naari osuwela wawe woovonya maluku moorweela mwa efisga naari osuwelaxa ovarela muteko ekatana weera aawere amwiittanaawe. (1 Sam. 16:13; 24:12) Davidi aamuroromela Yehova. Owo aasuwela weera, nlaika na Yehova ‘ninnaavuluxa ale anamoova Muluku.’ Ekhaikhai weera hiyo khaninweherera weera Yehova apake miiriira weera anikosoope wa maxupo ninkumanaahuno. Mene, nintthuneya ororomela weera ootheene yaale anamuroromela Yehova khanrowa waaphwanya maxupo eneera ehimale.

13. Gogi Amagogi apatxera onituphela, heeni ninkelaahu okhala ntoko atthu oohivareleleya ni mwaha wa heeni nihintthuneyaahu woova? (Nwehe elataratho ya vakaapani.)

¹³ Moohipisa omuroromela wahu Yehova onkela weereriwa. Vaavo Gogi Amagogi, egrupu yaatthu enrowaaya waatuphela atthu a Muluku, anrowa woonaka weera hiyo khanivareleleñye. Onnatthuneya ororomelela weera Yehova onoonithokorora. Egrupu yaatthu enkela onoonaka ntoko iputthiputthi soohithokororeya ntoko khanaanono mutthu ooniikosoopa. (Ez. 38:10-12) Egrupu ya atthu enrowa woonaka weera tiwookhweya onituphela, mwaha wooweera khanaanono akapwitthi ni khantonko oxuttera ekhotto. Mwaha woohikhalano nroromelo wa Yehova, awo khanrowa woonaka ele maitho ahu a nroromelo arowaaya woonaka—malaika erukurenreene muloko wa Muluku weera yaathokorore. Nkuupuwelani moota awo anrowaaya woonela emaara anrowaaya woonelela weera anakhotto a Muluku a wiirimu ari oowiireherereene weera enikosoope!—Apok. 19:11, 14, 15.

14. Eheeni nitthuneyaahu opaka vaanaano vaava weera niireherere wa itthu sinriwa okhumelelea muhoolo?

¹⁴ Eheeni ninrowaahu opaka weera niireherere wa itthu sinrowa okhumelela muhoolo? Etthu yoopatxera, khontthuneya ohela nipuro noopatxera itthu sa weerutthuni mwaha wooweera vanihukuni, nnoorowa ohiya itthu sootheene. Nave tho ontthuneya ohakalalelaka itthu seiyo nikhalannaahu. Otepaxawene etthu yootepaxa otthuneya ori onthamwene ahu ni Yehova. Namusuwela vale Muluku ahu nroromeleke weera, ehuhu Gogi Amagogi onrowaawe onituphela, Yehova onoonikosoopa.

15. Mwaha wa Davidi aatthuneyaawe ororomela weera Yehova aammukhavihera?

¹⁵ Ninrowa woona etthu yaamukhavihenre Davidi oviriha maxupo nave etthu eneera enikhavihere. Davidi ohimme ha: “Mulawihe ni mone orera murima Yahvéh oneraiye oreriwa mulopwana onatthawela wa yowo.” (Nsal. 34:8) Ni masu ala ennoonihera weera Davidi aasuwela  weera Yehova ammukhavihera. Davidi ehuhu yootheene owo annamuroromela Yehova ni weera ammukhavihera. Emaara Davidi aaraawe mmiravo owo aawana ni nFilisti Goliyathi ni owo aahimme ha: “Nihiku nla Yahvéh onrowa okinnyerera mmatatani mwaka.” (1 Sam. 17:46) Muhoolo mwaya mwene Sawuli aaheerera omwiiva Davidi. Mene “Yahvéh ari ni” Davidi. (1 Sam. 18:12) David aasuwela weera ehuhu yootheene Yehova aarowa okhala moono awe weera awere oviriha maxupo awe.

16. Ehuhu heeni onnoonaahu weera Yehova “tooreera” murima?

¹⁶ Namuroromela Yehova vaanaano vaava, nnookhalano nroromelo weera onoorowa onikhavihera muhoolo. Mwa ntakihero onnatthuneya omuroromela Yehova weera niwere wuuluma nipatarau ahu weera ninvekela nihuku weera noonele mithukumano ntoko: Assembleya naari muthukumano wa kongresso. Nave tho ninnatthuneya okhalano nroromelo naarowaka wuuluma ni patarau ahu weera avukule iwoora sa muteko ahu weera niwereke okhalano ehuhu yoorowela mithukumano ni muteko woolaleera. Vano nkuupuwelani weera patarau anyu khanaakhulela yoovekelaanyu nto owo onnawiikarani muteko. Neereke munoovirelela okhalano nroromelo wa Yehova weera owo khanrowa woonyanyalani ni onimoovahani itthu sootheene nyu munhaawelaanyu? (Aheb. 13:5) Asinna antxipale anvara muteko wa ehuhu yootheene, aakhalano sooweereya sinoonihera weera Yehova onnaathokorora awo yaahaawelaka etthu. Yehova toororomeleya.

17. Yoolepa heeni eri ya eyaakha ya 2022, ni mwaha wa heeni ethanliwaaya yoolepa ela?

¹⁷ Yehova areene moono ahu, khontthuneya woova itthu sinrowa okhumelela muhoolo. Namuhela nipuro noopatxera mweekumini mwahu, owo khanrowa oninyanyala. Weera anikhavihere ontthuneya weera niireherere vaanaano weera nawere oviriha maxupo ninrowaahu oviriha muhoolo, ni ontthuneya omuroromela Yehova, Mukutthula Woolamulela, woothanla yoolepa ya Nsalmu 34:11 [34:10 NM] weera ekhale yoolepa ya eyaakha ya 2022: “Yale anamwàsa Yahvéh, khanrowa othoiwa etthu.”