1-2. (a) Ehuhu heeni hiyo nimmuupuwelaahuxa vantxipale ole okhwiiye? (b) Ohiyu Yesu ahinaakuve okhwa, eheeni owo aahimmaawe weera atthareli awe epakeke?

NAKHWELIWA ole nimmusivelaahu, naari ovira ehuhu yintxipale ninnamuupuwela. Iyaakha sootheene hiyo ninnuupuwela eyaakha ni nihukunene ole okhwiyaawe nave ninnamuupuwela vantxipale.

² Iyaakha soothesene, nihuku aakhwiiyaawe Yesu, imilhau sintxipale saatthu elapo yootheene sinnathukumana weera suupuwelele yooweereya eyo. (1 Ped. 1:8) Hiyo ninnathukumana mwaha wa yooweherera nraahuno mwaha wa ele Yesu opankaawe—owo oovaha ekumi awe ntoko nlivo weera anoopole mwa yoottheka ni okhwa. (Math. 20:28) Yesu ontthuna weera atthareli awe yuupuweleleke okhwa wawe. Ohiyu owo ahinaakuve okhwa, owo aahiiwanyeiha vaavo enraawe: “Mpakeke iya mukupuwelaka miyo.” *—Luka 22:19.

3. Eheeni ninkelaahu oxuttera yoosomeene yeela?

³ Imilhau sintxipale saatthu anoonela muthukumano Woowuupuwela okhwa wa Kristu iyaakha sootheene, vakhaanini tekhalanne yooweherera ya orowa wiirimu. Mene atthu antxipale anrowela Wuupuwelela ekhalanne yooweherera ya okhala elapo yeela ya vathi. Yoosomeene yeela, ninkela woona mwaha wa heeni hiyo nintthuneyaahu orowela woonela muthukumano ola woowuupuwelela, nihipwatthaka yooweherera ahu wakhala weera ninro wiirimu kapena okhala elapo yeela ya vathi. Nnoorowa tho woona mwaha wa heeni woonela muthukumano Woowuupuwelela oraaya wootthuneya wa hiyo. Woopatxerani, nnoorowa woona mwaha wa heeni ale oothanliwa antthuneyaaya orowela woonela muthukumano ola Woowuupuwelela.

4. Mwaha wa heeni ale eri oothanliwa antxaaya ni owura eviinyu nihuku na Wuupuwelela?

⁴ Ale oothanliwa annoonela muthukumano Woowuupuwelela iyaakha sootheene. Nave annakhuura mukatthe ni owura eviinyu. Mwaha wa heeni anipakaaya hiiho? Weera niiwexexe eyo, nrowe nuupuwelele etthu yaakhumelenle ohiyu woomalihera wa Yesu elapo ela ya vathi. Yesu ni ooxutteraawe yaahootxa eyinlo ya Ayuda eneeriwa mpasika. Muhoolo mwaya, Yesu aapatxeriha yootxa ya mukonelo wa Apwiya, yeeyo eneeriwa olelo va Wuupupuwelela okhwa wa Yesu. Mwa yooweereya ene yeeyo, owo aahaavaha eviinyu ooxutteraawe muloko ni mmoha (11), yaawo yaari oororomeleya ni aaweerela ekhuure mukatthe ni owura eviinyu. Opwaha mwa yeeyo, Yesu aahuuluma sa mavarihano meeli,—nivarihano nnyowani ni nivarihano na Omwene. * (Luka 22:19, 20, 28-30) Mwaha wa mavarihano ene yaala, arummwa ni atthareli a Yesu, eyo-tiiyo, ale ari oothanliwa, anoorowa okhala mamwene ni anamakeya wiirimu. (Apok. 5:10; 14:1) Wa ale eri oothanliwa nlelo eri elapo ya vathi, annatxa mukatthe ni owura eviinyu, nihuku noowuupuwelela * mwaha wooweera anneerela empari mavarihano ale meeli.

5. Yooweherera heeni ale eri oothanliwa akhalannaaya ni eheeni entthuneyaaya opaka weera ephwanye yoowehereraaya?

⁵ Mene yookhala etthu ekina enaweeriha ale oothanliwa ohela mwiitti Wuupuwelela okhwa wa Yesu: Wuupuwelela, ehuhu yooreerela wa ale eri oothanliwa wuupuwelela yoowehereraaya. Yehova ohaavaha yooweherera ela yootikiniha—awo ankela okhalano ekumi ehinikhwa wiirimu, evaraka vamoha ni Yesu ni oothanliwa akina, 144.000. Ni anookhalano tho eparakha ekina yookhala vakhiviru ni ehitxe ya Yehova Muluku! (1 Akor. 15:51-53; 1 Yoh. 3:2) Ale oothanliwa, aasuwela weera ewere ophwanya yoowehereraaya, ontthuneya okhala oororomeleya mpaka okhwa waya. (2 Tim. 4:7, 8) Oothanliwa annihakalala yuupuwelelaka yoowehereraaya. (Tito 2:13) Vano ankha “iputtiputthi ikina”? (Yoh. 10:16) Mwaha wa heeni awo anoonelaaya muthukumano Woowuupuwelela?

6. Mwaha wa heeni iputtiputthi ikina sinoonelaaya muthukumano Woowuupuwelela iyaakha sootheene?

⁶ Iputtiputthi ikina sinnarowa woonela muthukumano Woowuupuwelela, mene khasintxa mukatthe ni khasinwura eviinyu, mene iyo sinnahakalala mwaha woowoonela muthukumano Woowuupuwelela. Ekwaha yoopatxera atthu arino yooweherera ya okhala elapo ya vathi yaawompwalaaya orowela muthukumano Woowuupuwelela, yaari eyaakha ya 1938. A Sentinela a 1 a Março a 1938, aahimme ha: “Ti waxariya weera iputtiputthi ikina sithukumaneke vamoha weera sooneleke etthu eneereya. . . . Eyo ehuhu yooreerela weera iyo sihakalaleke tho.” Iputtiputthi ikina sinnahakalala soonelaka muthukumano Woowuupuwelela ntoko hiihaale mutthu owompwale orowa woonela esataka ya ekasamentu.

7. Mwaha wa heeni iputtiputthi ikina sinoonaaya okhala wootthuneya wiiwa mwaha onipakiwa nihuku noowuupuwelela?

⁷ Iputtiputthi ikina sinnasiveliwa ophimelela yooweherera araayano. Awo annatthuna vantxipale wiiwa mwaha wa Wuupuwelela. Mwaha owo, onnuuluma sa Yesu ni ale 144.000, yaawo anrowa waapwatthaka atthu mpuwa mwa olamulelo  wa iyaakha 1.000. Yesu Kristu akhaviheriwaka ni ale oothanliwa, anoorowa otatuxa elapo ya vathi weera ekhale eparadiso, ni waavaha atthu okhalano eparakha yookhalano ekumi yoomalela. Imilhau sintxipale sa atthu sinoonela muthukumano Woowuupuwelela, ti wooreera Wuupuwelela moota enkelaaya okhala elapo ya vathi muhoolo sakwanela soolohera siri mBiblyani, nimphwanyaahu va Yesaya 35:5, 6; 65:21-23; ni Apokalise 21:3, 4. Etthu enrowa onikhavihera olipiha nnroromelo nahu ni yoowehereraahu nikhalannaahu muhoolo. Nto yootthunaahu ti yoohihiya onvarela muteko Yehova, ni ninnuupuwelela ni Wuupuwelela moota ekumi ahu elapo enyowani enrowaaya okhala, nikhanleene vamoha naamusi ni asinthamwene ahu.—Math. 24:13; Agal. 6:9.

8. Nthowa heeni nikina iputtiputthi ikina siraayano weera sooneleke muthukumno Woowuupuwelela?

⁸ Nthowa nikina nneeriha iputtiputthi ikina woonenla muthukumano Woowupuwela, eri yooweera sintthuna woonihera nsivelo ni waakhavihera waya asinna oothanliwa. Biblya aahima weera ale oothanliwa ni iputtiputthi ikina, saarowa ovaraka vamoha. Moota heeni? Vano nnoorowa woona soolohera tthaaru.

9. Yoolohera ela ya Zakariya 8:23, enoonihera eheeni ale ari a iputtiputthi ikina moota enwoonelaaya asinna ale ari oothanliwa?

⁹ Mmusome Zakariya 8:23. Yoolohera eyo enahima moota iputthiputthi ikina moota sinwonelaaya asinna ni asirokora oothanliwa. Masu ooweera “muYuda” ni “nyuwo” enahimmwa egrupu emoha—asinna oothanliwa ehanle elapo ya vathi. (Arom. 2:28, 29) Ni “amalapo mulokó yùluma nulumo naya” enthonyera iputthiputthi ikina. Mene iputtiputthi iyo “sinnavara mukantxo”—naari neere, annivara vamoha ni ale oothanliwa—amukokhorelaka Yehova. Tiyeeyo enaweeriha opaka ele enweraaya weera ekhale vamoha ohiyu wa Wuupuwelela, yooniheraka waakhavihera waya ale eri oothanliwa.

10. Moota heeni Yehova onkwaniheraawe yoolohera eri va Ezekiyeli 37:15-19, 24, 25?

¹⁰ Mmusome Ezekiyeli 37:15-19, 24, 25. Yehova onnikwanihera yoolohera ela, aweerihaka ale oothanliwa ni iputtiputthi ikina ovara vamoha moowiiraana. Yoolohera ela, yuuluma sa ikopo piili. Ale erino yooweherera ya okhala wiirimu enkhala ntoko ekopo “ya aYuda” (nloko nenno Yehova aathanlalaawe muneene), ni ale erino yooweherera ya okhala elapo ya vathi, ankhala ntoko ekopo “ya Efrayimi.” * Yehova aamweeriha igrupu iya piili waakanyerana “okhala ekopo emoha.” Masu ala entaphulela weera igrupu iya piili saarowa onvarelaka muteko vamoha Yehova emwiiwelelaka mwene aya Yesu Kristu. Etthu emoha enoonihera eyo eri yooweera, asinna ale oothanliwa ni iputtiputthi ikina, sinkhala vamoha soonelaka Wuupuwelela okhwa wa Yesu, ohiya igrupu piili soovirikana mene nto “ekopo emoha” ni ehooleliwaka ni “mukukhuli mmoha.”—Yoh. 10:16.

11. Moota heeni “iputtiputthi ikina” sinrowaaya woonihera weera “sinnaakhavihera” asinnawe Kristu? (Matheyo 25:31-36, 40)

¹¹ Mmusome Matheyo 25:31-36, 40. Taani ala aneeriwa “iputtiputthi ikina” muniphwanaphwanihoni? Ti atthu yaawo yaari a “xariya” yaakela okhala mahuku oomalihera ekhalanne yooweherera ya okhala elapo yeela ya vathi—Yesu aahaahima okhala iputtiputthi ikina. Iputtiputthi iya ikina, sookhalano muritti woowaakhavihera Akristu ale oothanliwa eri elapo yeela. Awo annivaha nikhavihero nno, vantxipalexa vaavo anvaraaya muteko wootepaxa ootthuneya—woolaleera ni waapaka atthareli atthu a elapo yootheene.—Math. 24:14; 28:19, 20.

12-13. Moota heeni tho iputtiputthi ikina sinaakhaviheraaya asinnawe Kristu?

¹² Iyaakha sootheene, isumana vakhaaniini nihinaakuveene ophiya nihuku na Wuupuwelela,  ennakhumelela etthu yoothanleya. Iputtiputthi ikina, sinnaakhavihera Akristu oothanliwa weera evare muteko eCampanha yoolaleera elapo yootheene. Yootthuna ya eCampanha eyo ori waawopa atthu antthuna woonela muthukumano Woowuupuwelela. (Nwehe ekwaadru “ Nyuwo munniireherera ehinaakuveene ophiya ehuhu ya Wuupuwelela?”) Iputtiputthi ikina tho sinnakhavihera oreherera muthukumano wa Wuupuwelela muloko aya nnaamweera ahikhanle mutthu oothanliwa muloko aya. Iputtiputthi iyo sookhalano eparakha yoowaakhavihera asinnawe Kristu moota ene yoowo. Iputtiputthi ikina soosuwela weera, nikhavihero nootheene enaavahaaya asinna oothanliwa, onikhala ntoko enimukhavihera Yesu.—Math. 25:37-40.

¹³ Mathowa heeni hiyo ootheene annipakiha woonela muthukumano Woowuupuwelela nihipwatthaka yoowehereraahu?

14. Moota heeni Yehova ni Yesu enoonihenraaya onisivela?

¹⁴Woonela muthukumano Woowuupuwelela ori moota mmoha nnooniheraahu otthapela nsivelo Yehova ni Yesu enipakenlaaya. Yehova ohoonihera weera onnanisivela wa mikhalelo soohiyana-hiyana, ni mukhalelo mmoha ti woothanleya. Mwa nsivelo, Muluku aamurumiha mwanawe oosiveelya weera ahaawe ni anikhwele hiyo. (Yoh. 3:16) Opwaha mwa yeeyo, hiyo tho ninneera asantte wa Yesu. Khaavo aamunyeserenre Yesu ovaha ekumi awe wa hiyo, mene owo, mwa nsivelo orootthuna opaka eyo. (Yoh. 15:13) Hiyo khaninwera oliva yoovaha Yehova ni Yesu yoonihenraaya. Mene nnoowereya woonihera weera asantte ni moota ninkhalaahu nihuku ti nihuku. (Akol. 3:15) Mwaheene ti yoowo nnoonelaahu muthukumano Woowupuwelela. Va muthukumani owo, hiyo nnoowereyaa ophimelela nsivelo nooniheriwaahu ni hiyo tho woonihera nsivelo nraahuno ni yaawo.

15. Mwaha wa heeni yoowoopola eraaya yootthuneya wa ale ari oothanliwa ni iputtiputthi ikina?

¹⁵Ninnahela mwiitti yoowoopola. (Math. 20:28) Wa ale athanliiwe, yoowoopola tiyootthuneya mwaha wooweera ennawera okwanihera yoowehereraaya yoorowa okhala wiirimu. Mwaha wookhalano nroromelo wa yoowopola ya Yesu, asinna oothanliwa annahimmwa okhala anaxariya vamaithoni va Yehova ni enneeriwa okhala anaxariya anamwane vamaithoni va Muluku. (Arom. 5:1; 8:15-17, 23) Yoowoopola tho tiyootthuneya vamaithoni va iputtiputthi ikina. Mwaha wookhalano nroromelo, awo anoowera okhala ootteela vamaithoni va Yehova. Ni okhalano eparakha yoonvarela muteko ni waakhuleliwa ni yoowo, nave-tho okhalano nroromelo weera anoorowa ovuluxiwa mwa “yoohooxa etokotoko.” (Apok. 7:13-15) Nihipwatthaka yoowehereraahu wakhala weera yoowehereraahu okhala wiirimu naari elapo ya vathi, ninnatthuneya woonihera nttittimiho yoowoopola vaavo nnoonelaahu muthukumano Woowuupuwelela iyaakha sootheene.

16. Nthowa heeni nikina ninneeriwa orowela muthukumano Woowuupuwelela?

¹⁶ Ntowa nikina ninneeriha orowela muthukumano Woowuupuwela mwaha wooweera hiyo nintthuna omwiiwelela Yesu. Ootheene hiyo onnitthuneya wiiwelela miruku sa Yesu ovanhaawe nihipwatthaka yoowehereraahu. Ohiyu Yesu ahinaakuve okhwa, owo aahimme ha: “Mpakeke iya mukùpuwelaka miyo.”—1 Akor. 11:23, 24.

17. Moota heeni tho orowela muthukumano Woowuupuwelela onnikhaviheraaya omwaattamela Yehova?

¹⁷Ninnatepa omwaattamela Yehova. (Yak. 4:8) Muthukumano Woowuupuwelela ehuhu yooreerela wuupuwelela ele Yehova onivanhaawe  ni ophimelela nsivelo Yehova onoonihenraawe. (Yer. 29:11; 1 Yoh. 4:8-10) Hiyo naapakaka eyo, omusivela wahu Yehova onootepa olipa ni hiyo nnootepa olipa.—Arom. 8:38, 39.

18. Ophimelela ntakihero na Yesu enrowa onikhavihera wiithanlelaopaka eheeni?

¹⁸Hiyo ninniithanlela otthara ntakihero na Yesu. (1 Ped. 2:21) Weera nreherere murima ahu ehalaka mahuku vakhaaniini orowela muthukumano Woowuupuwelela, hiyo ninnasoma sooweereya sa mahuku oomalihera a Yesu areene elapo ela ya vathi. Nto ohiyu Woowuupuwelela, mwaha onipakiwa onninikhavihera wuupuwelela moota Yesu oonihenraawe nsivelo wa hiyo. (Aef. 5:2; 1 Yoh. 3:16) Naasomaka ni ophimelela ekumi ya Yesu, ninnatthuna wiithanlela weetta “ntoko owo entthaawe.”—1 Yoh. 2:6.

19. Onthamwene ahu ni Yehova onkela ovirelela okhala woolipa naapakaka eheeni?

¹⁹Hiyo ninniithanlela ovirelela okhala asinthamwene a Yehova. (Yuda 20, 21) Onthamwene ahu ni Yehova onoovirelela okhala woolipa wakhala weera ninnavirelela omwiiwelela yoowo ni ninnapaka ele ninweraahu weera ntteelihe nsina nawe ni ohakalaliha murimaawe. (Mir. 27:11; Math. 6:9; 1 Yoh. 5:3) Woonela muthukumanao Woowuupuwelela, onnanikhavihera okhala oowiithanlela ovirelela okhala ntoko Yehova ontthunaawe. Naapakaka eyo onkhala ntoko ninhima weera ‘Miyo kinnatthuna ovirelela woovarelani muteko Apwiya mpaka khalai!’

20. Mathowa heeni makina anneeriha woonela muthukumano Woowuupuwelela?

²⁰ Nihipwatthaka yoowehereraahu wakhala weera ninkela okhalaka wiirimu naari elapo ya vathi, ootheene hiyo nookhalano mathowa woowoonela muthukumano ola Woowuupuwelela. Nihuku nno, hiyo ninnuupuwelela okhwa wa ole nimmusivelaahu, Yesu Kristu. Opwaha mwa yeeyo, wuupuwelela nsivelo Yehova oonihenraawe wa hiyo, mwaha wa omurumiha mwanawe ntoko yoowoopola—eyo yaari yoowoonihera nsivelo wa mutthu, mutthu mukina eeraawe ahoonihere. Eyaakha ela muthukumano Woowuupuwelela okhwa wa Yesu, onrowa okhala ohiyu, wa Namathanu, 15 a Abril a 2022. Hiyo ninnamusivela Yehova ni Yesu. Mwaha wa yeeyo, khekhanle etthu ekina nnoonaahu okhala yootepa otthuneya ohikhanle okhala vamoha nihuku noowuupuwelela okhwa wa Yesu.