1. Ninkela oviriha hayi ehuhu ni Yehova?

OOTHEENE ahu onisivela oviriha ehuhu yintxipale ni atthu nnasivelaahu. Mwa ntakihero, anamathelana oosivelana onnaareera oviriha ehuhu yintxipale ereene vamoha. Amiravo onnaasivela okhala vamoha ni asinthamwene aya ni hiyo tho onnansivela oviriha ehuhu ni asinnihu a mmulokoni. Mene opwaha mwa yeeyo, hiyo onnanisivela oviriha ehuhu ni Muluku ahu. Ninkela opaka hayi eyo? Ninvekelaka, nimusomaka Biblya, nuupuwelelaka soolaihera sawe ni osuwela makhalelo awe ooreera. Khamunaakhulela weera oviriha ehuhu ni Yehova eri etthu yootepa ootthuneya!—Nsal. 139:17.

2. Heeni emaara ekina ohinkhweyaya oviriha ehuhu ni Yehova?

² Ekhaikhai weera onninisivela oviriha ehuhu ni Yehova, mene eyo khenkweya. Hiyo nookhalano ekumi yoowattheliwa nave pooti okhala wooxupa okhalano ehuhu weera nithokorore itthu soomunepani. Ntoko muteko, emusi ni miritti mikina sinnaniiyera ehuhu ahu yintxipale. Tivawonto, pooti okhala wooxupa okhalano ehuhu yoovekela, osoma ni ophimelela.

3. Nahitxentxere ni matthekulelo ahu, eheeni eneera ekhumelele?

³ Hiyo tho onnatthuneya weera nitxentxere ni muraakho mukina, pooti weereka hiyo ninkela ovirihaka ehuhu nivaraka miteko mikina apaale sihikhanle soonanara. Mene sinootxelihaka omwattamela Yehova. Nkupuwelani matthekulelo. Hiyo onnitthuneya weera niitthuwe ni nitthekule. Wakhala weera matthekulelo ahu tooreera ni nnaviriha ehuhu yintxipale ni matthekulelo awo, pooti ohikhalano ehuhu yoothokorora itthu sa omunepani. Tivawonto, onnitthuneyaaya ohela nipuro nooreerela matthekulelo ahu.—Mir. 25:27; 1 Tim. 4:8.

4. Eheeni ninkelaahu oxuttera yoosomeene yeela?

 ⁴ Yoosoma ela ninkela woona mwaha wa heeni oraaya wootthuneya, ohela nipuro noopatxera itthu soomwene. Nave-tho ninkela woona moota nneeraahu nivariheleke muteko ehuhu ninvirihaahu ni Yehova mophwanelela. Mwaha wa heeni oraya wootthuneya opaka eyo.

5. Moota heeni yoolepa ya Aefeso 5:15-17 eneeraaya emukhavihere mmiravo opaka yoothanla yooreera mweekumini mwawe?

⁵Mpake soothanla sooreera mweekumini mwanyu. Amiravo mweekhaikhai annaxupeya, wa ele aneeraaya epake mweekumini mwaya. Emaara ekina mapurusore ni amusi aya yaawo ahikhanle Anamoona a Yehova annawooperera ompaka oniversidade naari ophwanya muteko woovuwa. Ekhaikhai weera eyo yaakela waayehiha ehuhu aya yintxipale. Emaara ekina asitiithi ni asinthamwene a mmulokoni pooti owooperera amiravo ovarihela muteko ekumi aya envarelaka Yehova. Vano eheeni eneera emukhavihere mmiravo yoole onamusivela Yehova opaka yoothanla yooreera? Owo pooti omusoma Aefeso 5:15-17. (Mmusome.) Voottharana, owo pooti ophimelela ni makoho ala: ‘Eheeni “eri yootthuna ya Yehova”? Yoothanla heeni enamuhakalaliha yoowo? Yoothanla heeni eneera ekikhavihere ovarihela nnene ehuhu aka?’ ntoko enahimaaya yoolepa ya Aefeso “mahiku toxupa,” ni elapo ela enlamuleliwa ni Satana enoovira mwa yeeyo, waakela okhala wa miruku ovarihela nnenesene ehuhu ahu weera nimuhakalalihe Yehova.

6. Yoothanla heeni Maria aapankaawe ni heeni yootanla eyo yaaraaya yooreeraxa?

⁶Muheleke nipuro noopatxera itthu sa omunepani. Emaara ekina weera nivarihele muteko ehuhu ahu onnitthuneya, othanla etthu emoha. Ohele nipuro noopatxera itthu sa omunepani naari itthu ikina. Itthu seiyo sihikhanle sootthekeya. Mwa ntakihero, muupuwele emaara Yesu aaronwaawe omuxekura Marta ni Maria. Moohihovela, Marta waamusivela omwakhelela Yesu owannyawe nave aatthuna oreherera yootxa yootepa osiva. Vahera nto munneiye Maria avarihela muteko ehuhu awe nnene, vaavo akilanthaawe mukhiviru mwa Yesu ni awiriyanaka ele owo aaxuttihaawe. Marta aakhalano yootthuna yooreera mene Maria “athanla empai yotepa orera.” (Luka 10:38-42, enoota.) Noovira ehuhu, Maria araaya amuttiwala etthu aatxiyaawe nihuku nne, mene moohihovela khaakela ottiwala etthu aaxuttenraawe ni Yesu. Wa Maria, ehuhu avirinhaawe ni Yesu, yaari yootepa otthuneya, hiyo tho, onnatthuneya weera niheleke mwiiti ehuhu ninvirihahu ni Yehova. Vano ninkela ovarihela hayi nnene ehuhu eyo?

7. Mwaha wa heeni oraaya wootthuneya ovekela, omusoma Biblya ni ophimelela ele hiyo ninsomaahu?

⁷Muhittiwale ovekela, omusoma Biblya ni ophimelela ele ninsomaahu okokhorela wahu. Vaavo hiyo ninvekelaahu nnuuluma ni tiithiihu a wiirimu yoowo onnisivelaxa vantxipale. (Nsal. 5:7) Vaavo hiyo nnamusomaahu Biblya, hiyo ninnaphwanya, “osuwela wa Muluku,” mutthu yoowo ori ootepa otthuneya a elapo yootheene. (Mir. 2:1-5) Vaavo hiyo nimphimelelaahu mikhalelo sooreera sa Yehova ni soolaihera sootikiniha olaihenraawe sa muhoolo. Moohihovela, owo mukhalelo wooreera woovarela muteko ehuhu ahu, munoonela hayi? Nto mwaha wooweera ekumi ahu ti yoowaatteliwa, ninkela ovarihela hayi muteko ehuhu ahu?

8. Yesu avarihelenle hayi ennene ehuhu awe ni eyo ennixuttiha eheeni?

 ⁸Waawereyaka muthanle nipuro noomaleleya. Muupuwele ntakihero na Yesu. Ahinaakuve opatxeriha muteko awe woolaleera, Yesu aaviriha mahuku 40 areene woothakoni. (Luka 4:1, 2) Nipuro nne noomaleeleya Yesu aawera onvekela Yehova ni wuupuwelela yootthuna ya Atithawe emurumihaka elapo ela ya vathi. Mene opaka eyo, yaamukhavihera Yesu oviriha itthu sooweha seiyo seera simukhumelele muhoolo. Eheeni ninxutteraahu ni ntakihero na Yesu? Wakhala weera munkhala etthoko yoowaattiwa, pooti okhala wooxupa okhalano ehuhu yoomaleleya owannyinyu. Nto wakhala hiihaawo, onnitthuneya orowa nipuro noomaaleleya. Nave tiyeeyo murokora Julie aapankaawe weera anvekele Yehova. Owo ni aiyawe enkhala empa ekhanini oFrança, ni Julie khanwera ophwanya nipuro noomaleleya, owo onnahima. “Mwaha wa yeeyo, miyo kinnarowa oparque kaphiya wu, miyo kinnawera okhala meekhaaka ni owera otthekula ni Yehova.”

9. Yesu oonihenre hayi weera annihela mwiitti onthamwene awe ni Yehova?

⁹ Yesu aakhalano ekumi yoowaatteliwa. Emaara aaraawe elapo ya vathi ahaalaleera atthu antxipale ni yannamutthara mapuro ootheene owo aarowaawe nave yannahaawela weera owo aathokororeke. Ekwaha emoha, “Muttetthe wothene wàthukumana vamulako” weera omoone. Nnaamweera vareene hiihaawo, Yesu anniisunkera ehuhu weera anvekele Yehova. Vahinaakuveene oxa owo annapaka ele aaweraawe weera arowe “nipuro noomaaleleya” weera avirihe ehuhu ni Atithawe.—Mar. 1:32-35.

10-11. Miruku heeni Yesu aavanhaawe oohuseraawe siri va Matheyo 26:40, 41, nto yaakhumelenle eheeni?

¹⁰ Okhwipi wa muteko awe woolaleera elapo ya vathi, Yesu aahaasaasa nipuro noomaaleleya weera avekele ni ophimelela. Owo aarowa mpaka ojardim ya oJethesemani. (Math. 26:36) Ohiyu ene yoole, Yesu ahaatxentxeriha oohuseraawe weera evireleleke ovekela.

¹¹ Muupuwele etthu yaakhumelenle ohiyu ole. Vaavo Yesu ni oohuseraawe yaaphiyalaaya oJethesemani, wiisa wiilaleene araaya ohiyu eriyari. Ahaaleela oohuseraawe “txentxerani,” ni ahaarakamela vakhaaniini weera avekele. (Math. 26:37-39) Mene nto avekelaka hiihaale oohuseraawe yaakona. Vaavo Yesu aatthinkaawe ni aaphwannyaawe ekonaka, owo ahaaleela “lipelelani ni vekelani.” (Mmusome Matheyo 26:40, 41.) Yesu aasuwela weera oohuseraawe yaakhulumuwa nave yaariipiwa murima. Yesu ahaapixera murima asuwelaka weera “erutthu ti yoolosowa.” Vano eheeni yaakhumelenle vahoolo vaya? Yesu tho aarowa ovekela wanaaveeli, nave vaavo aatthinkaawe, ahaaphwanya oohuseraawe eriki mukona.—Math. 26:42-45.

12. Eheeni nneeraahu nipakeke wakhala weera nri oovalavela nihinwera ovekela?

 ¹²Muthanle ehuhu yooreerela. Emaara ekina pooti woona weera hiyo nri ooxupeya naari okhulumuwa nihinwera ovekela. Yanninte woophwanyani eyo, wakhala weera tihiiho khamukhanle meekhiinyu. Vano eheeni muneeraanyu mpake? Atthu akina yaawo yaakhovelenle ovekela ehinaakuveene orowa okona, ahoonelela weera onnreerela orowa ovekela sihinaakuveene waaphwanya ikhove. Nave akina ahoona weera moota woovekela onnahiyaniheyavo. Vano wakhala weera munniisoona weera mookhulumuwa muhinwera ovekela? Mmuleele etthu enoophwanyani ni mororomele weera Tiithiinyu Yehova onnasuwela eyo.—Nsal. 139:4.

13. Moota heeni ikaruma sahu electrónico sineeraaya sinaakanyerereke naavirihaka ehuhu ni Yehova?

¹³Mwaasomakavale nnenee ni itthu soowaakanyerera. Nivekelo kheiyono etthu emoharu enlipiha onthamwene ahu ni Yehova. Mene tho hiyo pooti olipiha onthamwene ahu ni yoowo moorweela wa omusoma wahu Biblya ni woonela mithukumano. Eheeni muneeraanyu mpake weera mukhavihereye ni ehuhu yeeyo ehanle wa miteko sanyu? Mwiikohe ha: ‘Eheeni enkaakanyerera ehuhu ya mithukumano ni vaavo kinsomaaka?’ Etthu eneera ewaakanyerereni ori oligareliwa, waakhelela i-mail naari imensagem mutelefoonini kapena ekaruma ekina electrónico. Ikaruma iyo ti sootthuneya nave ibilhau sintxipale sa atthu sookhalano. Mene tho anamatholathola nyaha ahoonelela weera waasa oruma telefooni ori mukhiviru mwahu pooti onaakanyerera. Prusoore mmoha a psicologia ohimme weera: “mutthu khanwera okilaathiha iseru sawe” onoolikana “othaamiha iseru sawe aronhaka nipuro nikina.” Etthu emoha-moharu hiyo naapakaka mithukumano sa Assembleya naari Kongresso ninnavahiwa miruku sooweera atelefooni ahu naahiyeke vasilenciyuni naari waawala weera ehiwaakanyerere atthu akina. Neereke onoowereya opaka etthu emoha-moharu ni atelefooni nikhalannaahu weera ehinaakanyerere ni oneemexiha emaara ninvirihaanyu ni Yehova?

14. Moovarihana ni Afilipi 4:6, 7, Yehova onkela okilaathiha hayi nyuupuwelo sahu?

¹⁴Munvekele Yehova weera akilaathihe nyupuwelo sanyu. Emaara ekina hiyo pooti wuupuwela itthu ikina nimusoka Biblya naari noonelaka mithukumano sa mmulokoni. Mene eyo yeereyaka ni nyuwo nvekele nikhavihero wa  Yehova. Ekhaikhai weera emaara ekina pooti okhala wooxupa okilaathiha nyupuwelo sahu ni itthu soomunepani naavirihaka maxupo. Nto onvekela Yehova weera akilaathihe iseru sahu eri etthu yootthuneya. Tivawo nto munvekeleke Muluku weera aakihereke murimaanyuru nave tho “myupuwelo sanyu.”—Mmusome Afilipi 4:6, 7.

15. Mwaha wa heeni nintthuneyaahu oviriha ehuhu yintxipale ni Yehova?

¹⁵ Onnitthuneya wiisunkera ehuhu weera nuulume ni Yehova, onwiriyana ni wuupuweleliha mikhalelo sawe. Mwaha wa heeni ontthuneyaawe opaka eyo? Yoopatxera, mwaha wooweera munkela opakaka soothanla sooreera. Biblya onnaroromeliha eeraka: “Watthara asuweli, onokhale musuweli tho.” (Mir. 13:20) Vano wakhala weera munnaviriha ehuhu yintxipale ni Yehova mutthu oosuwelaxa a elapo yootheene, muroromeleke weera nyuwo munookhala musuweli. Nyuwo tho munkela osuwela moota muneeraanyu mpakeke soothanla sooreera nave moota muneeraanyu muhakalalihe murima awe.

16. Mwaha wa heeni oviriha ehuhu ni Yehova enkelaaya onikhavihera okhala anamahusiha ookhumelela nnene?

¹⁶ Yanaveeli, nyuwo munookhala namahusiha ookhumelela nnene. Nto etthu yootthunaahuxa eri yooweera naamusomaka Biblya ni mutthu, ori omukhavihera weera akhalaneke nsivelo ni Yehova. Naavirihaka ehuhu ni mpattuxa ahu a wiirimu, nsivelo nahu ni yoowo nneereke wunnuwa. Voottharana onkela okhalaka wookhweya anamasoma ahu a Biblya omusivela thooni Yehova ni tiyeeyo yeereya ni Yesu. Owo annuuluma mikhalelo sooreera sa Atithawe nave mwaha woopaka eyo, yaahaavaha ikuru oohuseraawe woonihera nsivelo wa Yehova.—Yoh. 17:25, 26.

17. Heeni nivekelo ni omusoma Biblya onlipihaaya nroromelo nahu?

¹⁷ Yanaararu, nroromelo nanyu nnoolipa. Muupuwele ele eneereya waakhala weera nyuwo munnavekela miruku wa Yehova, nimaaliho ni nikhavihero. Emaara yootheene owo onaakhulaawe nivekele nayu, nroromelo nyuwo ninnalipa. (1 Yoh. 5:15) Etthu ekina eneera yuunnuwihe nroromelo nanyu ori omusoma Biblya. Ti vaavonto Biblya oneeraawe “wiwelela onakhuma wa wiwa.” (Arom. 10:17) Nto emaara hiyo nnamusomaahu Biblya onkhala ntoko omwiiwa Yehova uulumaka, mene weera nikhaleno nroromelo noolipa, khontthuneya paahi ooxuttera sa Yehova. Vano eheeni tho entthuneya weera nipake?

18. Nsalmu 77 enoonihera hayi otthuneya waya ophimelela ele ninsomaahu?

¹⁸ Onnatthuneya ophimelela itthu ninxutteraahu, muupuwele ele yaakhumelenle ni namalepa a Nsalmu 77. Owo waamuripa murima,  nave Nasalmu ola, uupuwela weera Yehova aahaanyanyala ana a Israeli. Nasalmu annixupeya vantxipale nave khaaphwanya ikhove (Eversu 2-8) Eheeninto aapankaawe woottharelana? Owo aamweerela Yehova: “Kinnaphimelela sopanka sovuwa sa Yahvéh, kinnaphimelela sotikiniha sanyu okhuma opatxera waya.” (Eversu 12) Ekhaikhai weera Nasalmu annisuwela weera Yehova aakhavihera muttetthe awe ihuhu sakhalayi, nnamweera vaareene hiiho, owo annaxupeya ni annakoha: “Apale ikharari sawe sòmala wa mahiku othene, watana wawe ni erukulu yothene wòmala?” (Eversu 9) Voottharana Nasalmu aaphimelela miteko sa Yahvéh nave tho moota oonihenraawe ikharari wa muttetthe awe ihuhu sakhalayi. (Eversu 11) Eheeninto yaakhumelenle? Nasalmu aakhalano ehakhi weera Yehova, khaarowa onyanyala emusi awe. (Eversu 15) Emoha-moharu, waakhala weera nyuwo munnaphimelela ele Yehova ompakaawe wa muloko awe ni woomeekhiinyu nroromelo nanyu nnoolipa.

19. Etthu heeni ekina ennipakiha weera niviriheke ehuhu ni Yehova?

¹⁹ Yanaaxexe ni yootepa otthuneya, omusivela wanyu Yehova onimwantxeerereya. Ophawa mwa mikhalelo sootheene, nsivelo nayu ninkela woopakihani omwiiwelela Yehova ni wiilipihera weera mmuhakalalihe ni ovilela maxupo mootheene enoophwanyani. (Math. 22:37-39; 1 Akor. 13:4, 7; 1 Yoh. 5:3) Opwaha mwa yeeyo, khiyaavo tho etthu yootepa oreera ohikhanle omusivela wahu ni opaka onthamwene ni Yoowo!—Nsal. 63:1-8.

20. Eheeni mwiithanlenlaanyu opaka weera nvarihele nnene ehuhu anyu ni Yehova?

²⁰ Muhittiwale weera ovekela, omusoma Biblya ni ophimelela ele munsomaanyu, empakela empari okokhorela mwanyu. Ntoko Yesu, mwaasaasere ehuhu yoomaaleleya muneeraanyu nnivirihe ni Yehova. Nave musempe itthu sowaakanyerera. Mootxelaka munvekele nikhavihero Yehova weera akhilaathihe iseru sanyu muthokororaka itthu soomunepani. Nto wakhala weera munnavarihela nnene ehuhu anyu, mareeliho a Yehova ankela okhala oowaatta. Nto mwaha woowiilipihera mwanyu, yookhumelela aya eri yooweera, Yehova onkela wovahani elapo enyowani yeeyo owo olaihenraawe.—Mar. 4:24.