1. Maxupo heeni aavirihaawe Yosefe ni awenre hayi ovilela?

 YOSEFE mwaana a Yakobe aakumanano maxupo yeerenre nroromelo nawe. “Wìmmathi ni miyo” masu erelinwaawe Yosefe mwa ikwaha sintxipale. Muthiyana ola aari mwaariye Potifari pwiyawe Yosefe. Mene Yosefe khatonko waakhulela. Apaale atthu akina a mahikwaano pooti wiikoha, heeni Yosefe ahaakhulelaawe noonaka weera ‘Potifari khaakhanle owaani?’ Opwaha mwa yeeyo, Yosefe aari kaporo. Amwaariye Potifari yaammukumihera maxupo wakhala weera Yosefe aamukhottha opaka ele awo yaatthunaaya. Naari vareene hiiho, Yosefe khaakhulenle okona naawo. Mwaha mwa heeni? Yosefe enre há: “Vano ni miruku xeni kinrwaka opanka yotakhala etokotoko si yela ni siso omutthekela Muluku?”—Eph. 39:7-12.

2. Moota heeni Yosefe asuwenlawe weera oraruwa etthu yoonanara vamaithoni va Muluku?

² Yosefe aasuwenle hayi weera oraruwa “etthu yoonanara” vamaithoni va Yehova? Yehova anvahe malamulo Mose sivinrene iyaakha 200. Malamulo yaawo yeera “ohiraruwe.” (Ott. 20:14) Naari vareene hiiho, Yosefe aamusuwela nnene Yehova ni aasuwela moota Yehova oonelaawe voohima sa oraruwa. Yosefe aasuwela weera Yehova, oopattuxa ntheli weera nikhale n’atthu eeli oothelana mulopwana ni muthiyana. Moohihovela Yosefe aahiwa moota Yehova amuthokoronraawe Sara amatokweene awe mwa imaara piili asaawe okonihiwa. Etthu emoha-moharu yaahereya vaavo Yehova amwakihenraawe Rebeka mwariye Isakhi. (Eph. 2:24; 12:14-20; 20:2-7; 26:6-11) Yosefe aweera ophimelela itthu iye ni aasuwela yooreera ni yoonanara. Owo anaamusivela Yehova mwa yeeyo owo ari olikanene weera apake yootthuna ya Yehova.

3. Eheeni ninkelahu woona yoosoma ela?

³ Nyuwo ennoosivelani exariya ni etthu yooreera vamaithoni va Muluku? Mohihovela, ootheene hiyo naatthu ohimalela wakhala  weera khannikosopa vamaithoni va elapo woohima sa yooreera ni yoonanara, hiyo pooti opaka itthu soonanara. (Yes. 5:20; Arom. 12:2) Mwa yeeyo, yoosoma ela ninkela woona eheeni ontaphulelaya okhala naxariya, ni moota heeni eyo eraaya yootthuneya mwekumini mwahu, avinyaka ninkela woona itthu tthaaru seiyo sinkela waatxerera osiveliwa wahu malamulo a Muluku.

4. Miruku heeni atthu akina anupuwelaya woohima sa okhala naxariya?

⁴ Vaavo atthu anuulumaaya woohima sa exariya animuupuwela mutthu owiisunnuwiha onathoriha atthu akina ni oniisona okhala ootthuneyaxa waapwaha atthu akina. Mene Muluku khammutthuna nnakhala vakhanene mutthu ntoko ola. Yesu emaara araawe valaponi ahaximwela ahooleli a ittiini mwaha woowera awo yanakumihera malamulo woohima sa yooreera ni yoonanara. (Koh. 7:16; Luka 16:15) Naxariya khanisona okhala ootthuneyaxa wapwaha akina ni khampaka malamulo woohima sa yooreera ni yoonanara.

5. Moovarihana ni Biblya, ontaphulela eheeni okhala naxariya? (Nvahe ntakihero)

⁵ Mukhalelo wa exariya ti wootepa otthuneya, weera niwanyeihe naxariya tuule ompaka yooreera vamaithoni va Muluku. Masu oweera exariya onihimmwa mutthu onkhala moovarihana ni malamulo a Yehova. Mwa ntakihero, Yehova ahaaruma ananakoso weera avariheleke muteko “mphimelo wa exariya.” (Ola. 25:15) Masu oweera exariya antaphulela okhala “oororomeleya” masu naari neere yoole ori mukristu onnatthuneya okhala ororomeleya ni “axariya” vamaithoni va Muluku. Nave-tho onnatthuneya okhala oororomeleya namweettaka nakoso ni omutekoni. Mulopwana mmoha onimusivela opaka yooreera onnamunanara owona atthu akina ethokororiwaka moohixariya. Mutthu ori naxariya “onnahela mpuwa moota Yehova ononnelawe” woohima sa soothanla sawe ni onnapaka eyo mwaha wooweera ontthuna omusiveliha Yehova.—Akol. 1:10.

6. Mwaha wa heeni nintthuneyaahu ororomela weera Yehova tophwanenle ohima yooreera ni yoonanara? (Yesaya 55:8, 9)

⁶ Biblya onnahima weera Yehova naapwipwi eekhaikahai a exariya, mwa yeeyo tivawonto oneeriwaawe “naxariya.” (Yer. 50:7) Yehova topanke itthu sootheene sooreera, mwa yeeyo owo tophwanenle opaka malamulo. Ekhaikhai, mwaha woohimalela emaara ekina ti wooxupa wiiwexexa. Mwaha wa heeni Yehova onihimaawe weera ela ti yoonanara ni ela ti yooreera, mene hiyo onnatthuneya ororomela weera Yehova toomalela owo osuwela nnene etthu yooreera wa hiyo. (Mir. 14:12; mmusome Yesaya 55:8, 9.) Nnamwera hiyo nreene ohimalela nipakiwe nilikanxeriwaka ni ekhove ya Muluku. (Eph. 1:27) Hiyo niniilipihera vantxipale weera nipake yootthuna ya Muluku mwaha wooweera ninnasiveliwa ni Yehova. (Aef. 5:1) Opwaha mwa yeeyo, ninkhala moovarihana ni malamulo axariya a Yehova yaawo ennikhavihera okhala nnene.

7. Mwaha wa heeni nintthuneyahu otthara malamulo a Yehova anihima yooreera ni yoonanara? Nvahe ntakihero.

⁷ Otthara malamulo Yehova ohimmaawe weera tooreera eri etthu yootthuneya wa hiyo. Nyuwo munnawera wiiwexexa mwaha wa heeni? Nkupuwelani ntakihero nna, waari weera yeele eri empresa yooteka ennathanla okumihera malamulo a miphimelo, itthu sootheene khasakela weettaka nnene. Ni wakhala weera mediku onnalakela moota woomukosoopa yoole ori muretta moovirikana. Ni eyo yaakela okumihera okhwa wa atthu antxipale. Matakihero awo anninikhavihera wiiwexexa mwaha wa heeni nintthuneyahu otthara malamulo a Muluku ni moota ennakiheraya. Emoha-moharu, otthara malamulo a Yehova anihima yooreera ni yoonanara annanikhavihera.

8. Mareeliho heeni ankelaaya waakhela muhoolo ale ampaka yooreera?

 ⁸ Yehova oolaihera waavaha mareeliho ale ankhala moovarihana ni malamulo awe. Ni owo oolaihera weera “anaxariya anohiyeriwa elapo okhala mwa mahiku ootheene.” (Nsal. 37:29) Nyuwo munnuupuwela moota wookhalano murettele wiiwanana ni ohakalala emaara yeeyo munkhalanyu moovarihana ni malamulo axariya a Yehova! Yehova ontthuna weera nyuwo muhakalaleke, nto nroromeleke weera nookhalano mathowa otheene anneriha ohakalala ni exariya ya Yehova. Vanonto ninkela waatxerera moota heeni nsivelo nahu wa Yehova nipakaka yooreera? Nrowe noone itthu tthaaru.

9. Eheeni enkela onikhavihera osiveliwa ni malamulo?

⁹ Yoopatxera (1): Mmusivele ole opanke malamulo a yooreera ni yoonanara. Mwatthunaka osiveliwa ni malamulo a Yehova, yoopatxera ontthuneya ovirelela waatxerera nroromelo nahu wa yowo. Vaavo ninvirelelahu omusivela Yehova onkela okhala wookhweya okhala moovarihana ni exariya ni malamulo awe. Mwa ntakihero, waari weera Adamu ni Heva yaanamusivela Yehova khiyarowa ohimwiwelela.—Eph. 3:1-6, 16-19.

10. Eheeni yamukhavihenre Abrahamu wiiwexexa nnene moota Yehova onuupuwelawe?

¹⁰ Ekhaikhai weera hiyo khanintthuna weera nipake yoottheka emoha-moharu ntoko yaapamkaya Adamu ni Heva. Nnamweera eyo ehereyaka hiyo ontthuneya ovirelela oxuttera woohima sa Yehova niilipiheraka wiiwexexa moota owo onoonelaawe woohima sa mwaha owo. Opaka etthu ela enonikhavihera waatxeerera nsivelo nahu wa Yehova. Mupuweleke ntakihero na Abrahamu owo annamusivela Yehova ni murima awe wootheene, mene emaara owo ahiwexexawe woohima sa soothanla sa Yehova owo khakhalano mukhalelo wa ohiwelela ni aniilipihera omwiiwexexa nnene Yehova. Ni vanoneya weera vaavo Yehova atthunaawe onyaanya oSodoma ni oGomora. Abrahamu asuwelakaru woopatxerani annova vantxipale weera “mphuki a elapo” yootheene onimwaanyanya atthu axariya vamoha ni ohixariya. Abrahamu khasuwela etthu yamweriha Yehova opaka eyo, mwa yeeyo moowiyeviha owo ampakela makoho mantxipale Yehova. Ni moopixa murima Yehova aamwakhula makoho awe ootheene. Woomaliherani Abrahamu awera wiiwexexa moota Yehova onimoonelaawe mutthu ti mutthu ni weera owo kharowa omuhoxa vamoha mutthu ottheka ni ohittheka.—Eph. 18:20-32.

11. Abrahamu oonihenre moota heeni weera annamuroromela Yehova ni omusivela?

¹¹ Moota Yehova aatthekunlaawe woohima sa esidade ya oSodoma ni oGomora, yaamweriha okhala Murumeyi oowiyeviha. Mwa emaarene yeeyo, owo aavirelela omuttittimiha ni omusivela Yehova. Sivinreene iyaakha sintxipale, nroromelo na Abrahamu naahereriwa. Yehova anvekela Abrahamu weera anvahe ntoko makeya mwanawe mmoha yoowo aamusivelaawe, Isakhi. Mene Abrahamu aasuwela etthu yaari yooreera wa Muluku mwa ekwaheene yeeyo, owo khaapanke nikoho. Mohihovela Abrahamu aavinya arowaka opaka ele Yehova anvekenlaawe. Mene nnamweera vaareene hiiho, annawera wuupuwelela moota Abrahamu aakelaawe okhala ooxupeya. Abrahamu annupuwela itthu axuttenraawe woohima sa Yehova. Owo aasuwela weera Yehova khanrowa opaka itthu yoohixariya ni yoohisivela. Biblya oneera Abrahamu annupuwelela weera Yehova onoonvinyereriha mwanawe yoowo aamusivelaawe Isakhi. (Aheb. 11:17-19) Owo aapaka eyo mwaha wooweera aalaihera weera Isakhi aakela okhala tiithi a maloko. Nto mwa emaareene yeele Isakhi khaakhanleno mwaana. Ni Abrahamu annamusivela vantxipale Yehova mwa yeeyo,  annaroromela weera ampaka etthu yooreera. Nnamweera waari wooxupa, Abrahamu aahiwelela.—Eph. 22:1-12.

12. Ninkela omutakiha moota heeni Abrahamu? (Nsalmu 73:28)

¹² Ninkela omutakiha moota heeni Abrahamu? Ntoko hiihale Abrahamu, hiyo onnatthuneya ovirelela oxuttera woohima sa Yehova. Napaka eyo ninkela omwattamela Yehova ni omusivela wahu onimwaatxerereya. (Mmusome Nsalmu 73:28.) Yoosuweliha ahu ya murima yootxentxerihiwa weera enuupuxere moota Yehova onuupuwelaawe woohima sa mwaha owo. (Aheb. 5:14) Emoha-moharu, emaara hiyo nnereeriwaahu weera nipake etthu yoohireerela, hiyo nnoowera okhootta. Hiyo ninkela okhoottaka miruku seiyo sa opaka etthu yeeyo enkela omunanara Yehova, ni seiyo sinkela onanariha onthamwene ahu nuuwo. Vanonto eheeni ninkelaahu opakaka weera noonihere weera ninnasiveliwa ni exariya ya Yehova?

13. Ninkela waasa moota heeni exariya? (Miruku 15:9)

¹³ Yanaaveli (2): Mwiilipihereke osiveliwa exariya. Wakhala weera muntthuna olipiha misempha sanyu, onnatthuneya otthimaka mahuku ootheene. Emoha-moharu, mwaatthunaka olipiha osiveliwa wanyu malamulo a exariya a Yehova, ontthuneya wiilipihera vantxipale, ni ontthuneya wiiilipihera mahuku ootheene. Ti voowoneya weera Yehova Muluku tookhweya yoowo onnivekela itthu hiyo ninweraahu opaka. (Nsal. 103:14) Owo onroromeliha weera onnamutthuna “yole onetthela exariya”. (Mmusome Miruku 15:9.) Emaara yeeyo hiyo ninkhalanaahu yooluluwanya ya mmutekoni mwa Yehova, hiyo ninnapaka ele ninweraahu weera nikwanihere. Weera eyo yeereye, hiyo ontthuneya waasa exariya. Yehova moopixa murima onoonikhavihera opwaherera orowa vahoolo.—Nsal. 84:5, 7.

14. “Nipattakala na exariya” ti heeni? Mwaha wa heeni nintthuneyaahu okhalano?

¹⁴ Yehova mwa nsivelo onnuupuwela weera itthu onnivekelaawe khaiyono soolemela. (1 Yoh. 5:3) Moovirikana niiyo, itthu owo onnivekelaawe sinnanikhavihera. Hiyo noosuwela weera nintthuneya okhaviheriwa mahuku ootheene. Muupuwele ekaruma ya nakhotto murummwa Paulo amuhimmawe. (Aef. 6:14-18) Eparte heeni ya ekaruma yaakihera murima wa  nakhotto? Naari “nipattakala na exariya,” nenno nintaphulela malamulo a exariya a Yehova. Emoha-moharu nipattakala ninnakihera murima ahu, malamulo a exariya a Yehova ennanakiha nave ennakihera murima ahu naari neere há, mukhalelo ahu wa mpuwa. Mwa yeeyo, mpake ele munweraanyu weera nipattakala na exariya, neerele eparte ya ekaruma anyu ya omunepani!—Mir. 4:23.

15. Moota heeni nyuwo munkelaanyu owara nipattakala na exariya?

¹⁵ Ninkela owara moota heeni nipattakala na exariya? Nyuwo pooti owara nipattakala na exariya emaara yeeyo munttharaanyu malamulo a Yehova mwaapakaka soothanla sanyu nenne nxiye. Vaavo nimpakaahu soothanla sa ele ninkelaahu wuuluma, itxipo heeni nneeraahu niiweleleke, ni eprograma heeni ninkelaahu woonelaka ni iliivuru heeni ninkelaahu osomaka, ti wooreera wiikoha há: ‘Kintxiha eheeni murimaaka? Eheeni Yehova onuupuwelaawe woohima sa mwaha ola? Neereke enooperera okonihana, owali, ohisumaliha—wiitthuna, itthu seiyo Yehova ohintthunaawe?’ (Afil. 4:8) Wakhala weera moopaka yoothanla envarihana ni yootthuna ya Yehova muroromeleke weera murimaanyu, onkela okhala woowaakihereya.

16-17. Moota heeni Yesaya 48:18, onnikhaviheraawe ovirelela weetta moovarihana ni malamulo a Yehova mahuku ootheene?

¹⁶ Ikwaha ikina pooti nyuwo okhala ooxupeya muupuwelaka weera khamunrowa oweera otthara malamulo a Yehova nenne nxiye mwekumini mwanyu. Nwehe niphwanaphwaniho Yehova aapankaawe va Yesaya 48:18. (Mmusome.) Yehova olaihera weera exariya ahu, “enkela okhala ntoko mawimpi.” Moota heeni? Nkuupuwelani weera nyuwo murimweemela opraiya nwehaka maahi naari nwehaka mawimpi ewaaka eheemelaka. Mwa etthu ela neereke nyuwo mwaakela okhala oomaleleya paahi? Waakhula ti wooweera hooye! Nyuwo moosuwela weera aakhala mawimpi epraiya ni awo anrowa ovirelelaka okhala mwemmwe.

¹⁷ Emoha-moharu, exariya eri ntoko mawimpi mphareya! Wa moota heeni? Emaara yeeyo nyuwo mumpakaanyu yoothanla, yoopatxera muupuweleke, Yehova enoomusivela kapaka ela. Avinyaka mpakeke itthu moovarihana ni yoothanla anyu. Naari oxupaka opaka yoothanla, mene Tiithi anyu a nsivelo a wiirimu, ori eparte anyu weera okhavihereni ovirelela okhala oolipa, woovahani ikuru weera nwere opaka yooreera mahuku ootheene.—Yes. 40:29-31.

18. Mwaha wa heeni nihintthuneyaahu waathoriha atthu akina moovarihana ni malamulo ahu?

¹⁸ Yanaararu (3): Mmuhiye Yehova athorihaka itthu. Hiyo ninniilipihera vantxipale weera neette moovarihana ni malamulo a exariya ya Yehova. Mene hiyo nintthuneya wiikosoopa weera nihipatxere olikanxera etthu nimpakaahu ni atthu akina, ni wuupuwela weera nri atthu ootthuneyaxa waapwaha akina. Hiyo khontthuneya waathoriha atthu akina ni malamulu ahu. Nintthuneya wuupuwelelaka weera Yehova “namathoriha a elapo yothene.” (Eph. 18:25) Yehova khanivañhe edireitu yoowathoriha atthu akina. Tivawonto Yesu enraawe: “muhithoriheke wera muhithorihiwe.”—Math. 7:1. *

19. Yosefe onihenre hayi weera onnaroromela othoriha wa Yehova?

¹⁹ Moone ntakihero na Yosefe. Owo khathoriñhe atthu akina naari owo aahasulinwe. Yosefe aahasuliwa ni asinneewe emutumihaka ntoko kaporo ni waalela apapawe weera mwaninyu  Yosefe ohookhwa. Ivinreene iyaakha, Yosefe aatthikela okumana ni amusi awe. Mene Yosefe aakhalano olamula ni anwera waathoriha asinneewe, moonanara. Nave-tho owo aakhalano eparakha yoowatthikihera isikula; ti vawonto asinneewe Yosefe yannova opakeliwa etthu emoharu yampakenlaaya munnaya, naari awo yaattharunwe wa etthu ele yapankaaya. Yosefe ahaamaliha asinnawe eraka: “Hoye muhove niwoko apale miyo kinnakilathela ehitxe ya Muluku?” (Eph. 37:18-20, 27, 28, 31-35; 50:15-21) Yosefe aasuwela weera othoriha ti wa Yehova.

20-21. Eheeni nihintthuneyaahu opaka ni mwaha wa heeni?

²⁰ Hiihale ntoko Yosefe, hiyo tho nintthuneya omuhiya Yehova athorihaka nyaha sahu. Hiyo khaninwera osuwela mirima, mwa yeeyo, khaninwera osuwela etthu heeni emweerinhe munna naari murokora opaka etthu moota ole. Yehova paahi ‘t’onatokosa [tonsuwela] murima’. (Mir. 16:2) Owo onnaasivela atthu a elapo yootheene. Yehova onnanooperera weera “nimuhulele murima [ahu]”. (2 Akor. 6:13) Hiyo ninnailipihera waasivela asinna ootheene ni osepa waathoriha.

²¹ Nave-tho khanintthuna waathoriha ale ahikhanle asinna. (1 Tim. 2:3, 4) Apaale nyuwo pooti omuthoriha mmusi anyu mweeraka: “Ala khanrowa-tho waakhulela ekhaikhai”? Hooye, khontthuneya opaka eyo, mwaha wooweera khenrowa woonihera weera nyuwo tooreera murima. Yehova onnaavaha eparakha atthu “othene a mothemwene”, weera ettharuwe. (Mit. 17:30) Muupuweleke ela: va maithoni va Yehova ale aniisoona okhala axariya mweekhaikhai khaanono exariya.

22. Mwaha wa heeni nyuwo mulakenlaanyu osiveliwa ni itthu sooreera?

²² Nsivelo nraahuno ni malamulo a axariya a Yehova, ennaniphwanyiha ohakalala wa hiyo ni wa atthu akina. Mwaha wooweera ninnamwaattamela Yehova ni ninnakhavihera atthu akina opaka eyo. Hiyo khanintthuna ohiya okhalano “etala ni ntthona na exariya”. (Math. 5:6) Nyuwo muroromeleke weera wiilipihera wanyu wootheene weera mmuhakalalihe Yehova ni opaka itthu sooreera, Yehova khanttiwala. Atthu amulaponi aarakamela naari khansiveliwa ni malamulo a exariya a Yehova. Moohihovela nyuwo muroromeleke weera: “Yahvéh onàtthuna anaxariya”.—Nsal. 146:8.