1. Mwaha wa heeni Yesu anvekenlaawe Yehova weera aawehaweheke atthareli awe?

 OHIIYU Yesu ahinaakuve okhwa, owo aapaka nivekelo noothanleya wa Yehova. Yesu anvekela Yehova weera aawehawehe atthareli awe. (Yoh. 17:15, 20) Mweekhaikhai, Yehova onnawehexexa atthu awe, naari neere ha, onnathokorora ni owaakiha. Mene Yesu aasuwela weera atthareli awe, yaakela osonttiwa vantxipale ni Satana. Nave Yesu aasuwela weera awere oviriha osonttiwa iwo, waatthuneya nikhavihero na Yehova.

2. Moovarihana ni Nsalmu 33:18-20, mwaha wa heeni nihintthuneyaahu woova?

² Elapo ela enlamuleliwa ni Satana, ennakumihera maxupo makristu. Hiyo ninnaviriha maxupo yaawo annikhulumula mpaka weerera nroromelo nahu wa Yehova. Mene hiyo ninkela wiiwa mpuwa mwa yoosoma ela weera khanintthuneya woova, Yehova onnanithokorora—owo oosuwela maxupo ninvirihaahu ni ori oolikaneene weera anikhavihere. Nrowe noone matakihero meeli a mBiblyani anoonihera weera “Nitho na Yahvèh nri va yale anamòva.”—Mmusome Nsalmu 33:18-20.

3. Wa mukhalelo heeni ninkelaahu wiisoonaka okhala meekhihu?

³ Mweekhaikhai hiyo ninnereerela eparte emusi etokotoko ya omunepani. Nnamweera vaareene hiiho, ekwaha ekina pooti wiisoonaka okhala meekhaahu. Mwa ntakihero, amiravo pooti wiisonaka okhala meekhaaya vaavo anihimaaya soororomela saya oxikola naari yatxentxa muloko. Atthu akina anwanano nyuupuwelo sa oripiha murima ni okhulumuwa. Nto pooti wuupuwela weera anoowera omaliha meekhaaya muupuwelo owo. Nave awo pooti ohaaleela atthu akina yuupuwelaka weera khanrowa owiiwa. Ekwaha ekina awo pooti wuupuwelela weera khaavo onkipwattha  —vaavo ninvirihaahu omekha nihiwehaka nthowa naya—hiyo pooti woona weera khanimpwatthiwa ni okhala ooxupeya. Mene Yehova khantthuna weera nuupuweleke hiiho. Ninkela oromela moota heeni eyo?

4. Mwaha wa heeni mprofeti Eliya aahimmawe: “Miyo pahi kihanle”?

⁴ Nwehe ntakihero na murumeyi ororomeleya a Yehova, Eliya. Pwiyamwene Yezabeli annatthuna omwiiva Eliya mpuwa wa mahiku 40. (1 Mam. 19:1-9) Okhwipi waya, Eliya ipintheene munikhukuni, aamuleela Yehova weera: “Yomi pahi kihanle mekhaka.” (1 Mam. 19:10) Nlelo yaakhala maprofeti, Obadiya aawera omuhiiha pwiyamwene Yazabeli owiiva maprofeti 100. (1 Mam. 18:7, 13) Mwaha wa heeni Eliya aaisoonawe okhala meekhawe? Owo uupuwela weera maprofeti yaakhottihinwe wiiviwa ni Obadiya ahookhwa. Apaale owo annaisoona okhala meekhawe mwaha wooweera, khaakhanle mutthu mukina anvarela muteko Yehova vamoha nuuwo Yehova ahimakaru va mwaako Karmelo weera owo ori Muluku eekhaikhai. Apaale le-tho pooti weera owo uupuwela weera khaavo asuwenle maxupo aavirihaawe, ni pooti weera owo annuupuwela weera khaavo aampwattha. Mweekhaikhai khaninwera wuupuwelela moota Eliya oonenlaawe. Mene hiyo pooti ororomela weera: Yehova annasuwela moota Eliya aisoonawe okhala meekhaawe ni aasuwela nnene sene moota eraawe amukhavihere.

5. Yehova amukhavihenre hayi Eliya, woona weera khaakhanle meekhawe?

⁵ Yehova aapaka itthu sintxipale weera amukhavihere Eliya. Owo amuhiya Eliya okhala ootaphuwa weera ahime itthu sootheene saamuxupa. Yehova aamukoha mwa ikhwaha piili: “eheeni mumpakanyu va?” (1 Mam. 19:9, 13) Mwa ikwaha soopiiliya, Yehova amwiiwelela Eliya vaavo amuhulenlaawe murima. Yehova aamwakhula Eliya amooniheraka weera ori vakhiviru vawe ni weera owo Muluku a ikuru. Yehova aamuleela Eliya weera yaakhala ana a israeli antxipale ororomeleya. (1 Mam. 19:11, 12, 18) Mweekhaikhai Eliya, ahoona owiitho kwee, amuhulelakaru murima awe Yehova ni aiwakaru etthu Yehova aahimmaawe. Mwa yeeyo, Yehova anvaha Eliya soothanleliwa sootepa otthuneya.  Yehova tho anvekela Eliya weera amuttikitthele Hazayeli weera akhale mwene w’Arami [Asiria], Yehu weera akhale mwene a Israeli ni omuttikitthele Eliseyo ntoko mprofeti. (1 Mam. 19:15, 16) Yehova anvahaka soothanleliwa iya Eliya, aamukhavihera owehexexa itthu sooreera. Yehova anvaha tho Eliseyo weera akhale nthamwene a Eliya. Wa moonelo anyu eheeni enkela wookhaviherani waakhela nikhavihero na Yehova vaavo munvirihaanyu omweekha?

6. Eheeni nyuwo munkelaanyu ovekela mwaaisonaka okhala meekhanyu? (Nsalmu 62:8)

⁶ Yehova onnowopani weera mutthekule nuuwo munivekeloni. Owo oosuwela maxupo nyuwo munvirihaanyu, ni oororomeliha weera onimwaakhula mavekelo anyu mwa etempu yootheene nyuwo munanvekelaanyu. (1 Ates. 5:17) Yehova onnamusivela wiiwa mavekelo aarumeyi awe. (Mir. 15:8) Itthu heeni ninkelaahu onvekela Yehova vaavo ninvirihaahu omeekha? Mpake ntoko hiihaale enraawe Eliya, mmuhulele murima anyu Yehova. (Mmusome Nsalmu 62:8.) Mmuleele owo itthu sinooxupani ni moota sinoovoreyayani. Munvekele Yehova weera ookhavihereni oviriha muupuwelo owo. Mwa ntakihero, waari weera nyuwo munnanyoonyiwa naari oxupeya ni makoleka anyu oxikola vaavo anookohaayani woohima sa Biblya, munvekele Yehova weera oovaheeni olipa murima. Nave-tho nyuwo pooti onvekela owo weera oovaheeni osuwela weera muhime soororomela sanyu. (Luka 21:14, 15) Waari weera nyuwo munviriha maxupo a muupuwelo woonanara, munvekele Yehova weera muulume ni munna naari murokora oolipa omunepani. Nyuwo pooti onvekela Yehova weera, amweerihe mutthu owo owiiwexexani. Mmuhuleleke murima anyu Yehova ni mooneke moota owo onaakhulaawe mavekelo anyu ni mwakhulele nikhavihero na asinna. Mwapaka eyo, munimoona weera khamukhanle meekhanyu.

7. Eheeni muxuttenraanyu ni ntakihero na munna Maurício?

⁷ Yehova oonivaha muteko wootepa otthuneya weera nivare. Muroromeleke weera Yehova onnoona muteko owo ni onnahela mwiitti itthu sootheene nyuwo munpakaanyu woolaleerani ni mmulokoni. (Nsal. 110:3) Ovara muteko owo onimookhaviherani owina omeekha. Nwehe ntakihero na munna oneeriwa Maurício. * Abatiziwakaru asinthamwene awe yaapatxera ohiya ekhaikhai vakhaani-vakhaani. Maurício oneera: “owona asinthamwene aka emuhiyaka Yehova etthu ele yaatepa okiripiha murima ni okikhulumula. Miyo kannaihovela vantxipale waari weera kanvirelela omukokhorela Yehova ni weerela eparte emusi awe. Miyo kannaisoona okhala mekhaaka ni kuupuwela weera khaavo arowa wiiwexexa etthu ele miyo kaavirihaaka.” Eheeni yamukhavihenre munna Maurício? Owo onnaiwanyeiha eeraka: “Miyo kannailipihera  ovara muteko woolaleera, eyo yaakikhavihera ohisupuwelela meekhaaka ni ovenxa minyuupuwelo soonanara. Miyo nkaisoona okhala meekhaaka vaavo kaavaraaka muteko woolaleera ni asinna.” Nnamweera hiyo nihiweraka olaleera ni asinna noonanaka, mene nlelo hiyo pooti olaleera naawo ninvarelaka muteko telefoni ni ikaarta. Eheeni yaamukhavihenre munna Maurício? Owo onnathaliha: “Miyo kaapatxera wiisattameliha ni muloko ni oreherera nnene iparte kaavahiwaaka mmithukumanoni. Iparte iyo saakikhavihera woona weera, kaakhalano mwiitti wa Yehova ni asinna.”

8. Maxupo ankela oneeriha eheeni?

⁸ Hiyo ninkhala mahiku oomalihera, mwa wa yeeyo tho, niweherereke oviriha maxupo. (2 Tim. 3:1) Mene nnamweera nsuwelaka weera nnookumana ni maxupo, maxupo awo pooti oniphwanya nihiireherenre. Mwa ntakihero, hiyo pooti oniphwanya maxupo oothoiwa musurukhu, eretta etokotoko naari okhweliwa ole naamusivelaahu. Maxupo moota ala pooti onivalaveliha, otepaxa wene wakhala weera maxupo ootheene ala eneereya ehuhu emoharu. Mene nuupuweleke weera Yehova onnasuwela maxupo hiyo ninvirihaahu ni owo pooti onikhavihera ovilela maxupo ootheene moolipa murima.

9. Maxupo heeni Yobi aviriñyaawe?

⁹ Nkuupuwelani moota Yehova amukhavihenraawe Yobi. Yobi aaviriha maxupo mantxipale mweekumini mwawe emaara emoha. Nihuku nimoha Yobi aaviriha irisa soovirikana. Woopatxerani, owo ayeleela muhuwo awe moottharana arumeyi awe yaahokhwa opwaha mwa yeeyo, anamwane awe ootheene yaakhwa. (Yobi 1:13-19) Inlaka malatta ale, Yobi yaamphwanya eretta yeeyo yamuhiñye oohilipa-lipa. (Yobi 2:7) Yobi axupeñyeene vantxipale aahera: “Nkinattahura [nkintthuna] ekumi aka.”—Yobi 7:16.

10. Yehova amukhavihenre hayi Yobi weera awere oviriha amaxupo ale? (Nwehe efootu ya vakaapani.)

¹⁰ Yehova annona maxupo ootheene Yobi aavirihaawe. Yehova annamusivela Yobi mwa yeeyo, owo annanvaha itthu saatthuneya weera awere owina maxupo ale. Yehova aatthekula ni Yobi amupuxeraka weera owo ookhalano osuwela woohimala, nave-tho annamukosoopa mwa nsivelo wa itthu sootheene ikumi. Yehova tho anvarihela muteko mulopwana mmoha oneeriwa Elihu weera amulipihe ni ommaliha Yobi. Elihu aamuroromeliha Yobi weera Yehova onnatthuvela ororomeleya wa arumeyi awe. Nave-tho Yehova anvarela muteko Elihu weera anvahe miruku Yobi. Elihu aamukhavihera Yobi weera ahisupuweleleke meekhaaweru paahi, ni woonelela weera hiyo tooyevaxa vamaithoni va Yehova Mpattuxa a elapo ni erimu. (Yobi 37:14) Opwaha wa yeeyo, Yehova amuthanlela Yobi muteko weera akhwanihere; muteko wa amutxonttelela Yehova weera asinthamwene awe ale araru owootha, yaatthenke eleveleliwe. (Yobi 42:8-10) Yehova onrowa onikhavihera hayi naavirihaka maxupo?

11. Biblya onnimaliha moota heeni vaavo ninvirihaahu maxupo?

¹¹ Mahukwaano Yehova khanuuluma ni hiyo ntoko hiihaale uulumaawe ni Yobi. Mene onnuuluma ni hiyo moorweela mwa masu awe Biblya. (Arom. 15:4) Yooweherera Yehova onivanhawe ya muhoolo, etthu ennimaaliha vantxipale. Nrowe noone miruku sa Biblyani seiyo sinkela onimaaliha vaavo ninkelaahu ovirihaka maxupo. Mwa ntakihero, Biblya onroromeliha weera kheevo—nnakhala maxupo ari ootheene—‘anikela onimwalanyiha onitthunawewe Muluku’. (Arom. 8:38, 39) Yehova onroromeliha weera ori vakhiviru “ni yale othene anamwitthana”. (Nsal. 145:18) Nave-tho onnanleela weera namuroromela vale, nnowera ophwanya  ohakalala nnamwi nivirihaka maxupo. (1 Akor. 10:13; Yak. 1:2, 12) Ni Biblya onnanuupuxera weera maxupo ari ootheene ninkumanaahuno, anoovira moohipisa nalikanxera ni ekumi yoohimala ninkelahu waakhela muhoolo. (2 Akor. 4:16-18) Yehova oolaihera weera, onkela omaliha maxupo ootheene ankumiheriwa ni—Satana ni ale anamutakiha. (Nsal. 37:10) Munoonela hayi ohela mmuru soolepa seiyo sinkela woomalihani mwaavirihaka maxupo yaawo munkelaanyu okumanano muhoolo?

12. Eheeni Yehova ontthunaawe weera nipakeke weera naakhele nikhavihero nenno Biblya onnivahaawe?

¹² Yehova ontthuna weera hiyo nikhaleno etempu weera nimusomeke Biblya ni ophimelela mahiku ootheene. Emaara yeeyo hiyo ninvarihelaahu muteko ele ninxutteraahu nroromelo nahu ni onthamwene ahu ni Yehova onnatxerereya. Eyo ennanivaha ikuru weera nivilele maxupo. Yehova onnaavaha munepa wootteela ale ammuroromela Biblya. Munepa wootteela onnanivaha ikuru weera nivilele maxupo ari ootheene.—2 Akor. 4:7-10.

13. Moota heeni yootxa ya omunepani “kaporo ororomeleya ni amiruku” onnivahaawe ennikhaviheraaya ovilela maxupo?

¹³ Akhaviheriwaka ni Yehova “kaporo ororomeleya ni a miruku” onnakumihera nyaha ni iviidiyu ni itxipo seiyo sinnikhavihera okhalano nroromelo noolipa ni ovirelela okhala oowehaweha. (Math. 24:45) Nintthuneya weera nikhavihereyeke ni eyootxa ya omunepani Yehova onnivahaawe. Murokora mmoha a wEstados Unidos ohimme ha: moohipisa, kinnaxukurela mwaha wa yootxa ya omunepani: “Soovira iyaakha 40 kinvarelaka muteko Yehova, etempu ene yeele nroromelo naka noheereriwa ikwaha sintxipale.” Owo aaviriha maxupo mantxipale. Mwa ntakihero, annaawe yaahiviwa ni motorista ni asitithawe yaahokhwa mwaha wa eretta etokotoko yaarayano, ni owo aaphwanyaniwa eretta ya câncer ikwaha piili. Eheeni yaamukhavihenre oviriha maxupo awo? Owo eenre: “Yehova aavirelela okithokorora akivahaka yootxa ya omunepani moorweela mwa kaporo ororomeleya ni a miruku, mene eyo yaakikhavihera oviriha maxupo ale. Mwa yeeyo, kinniisoona ntoko Yobi yoowo enre: ‘Mpaka okhwa waka kinnakiha ohittheka waka!’”—Yobi 27:5.

14. Yehova onaavarihela hayi muteko asinna weera enikhavihere naavirihaka maxupo? (1 Atesalonika 4:9)

¹⁴ Yehova onnaxuttiha atthu awe weera yooniheraneke nsivelo ni okhaviherana mukina ni mukhwaawe etempu yooxupa. (2 Akor. 1:3, 4; Mmusome 1 Atesalonika 4:9.) Nttharaka ntakihero na Elihu, asinna ni asirokora  annatthuna vantxipale onikhavihera weera niwine maxupo. (Mit. 14:22) Moone etthu yaamukhumelenle Diane, aiyawe yaaphwanyiwa ni eretta etokotoko ni muloko waapaka mareherero weera emukhavihere ovirelela okhala oolipa omunepani. Owo ohimme ha: “Mpuwa mwa minyeri iye miyo kaahoona moota Yehova aanikhaviheraawe. Asinna a mmulokoni yaapaka ele yaaweraaya weera enikhavihere. Asinna antxipale yannanixekura, yananilikarela, ni onikhupaarela; eyo yaanivaha ikuru hiyo nahawelaahu. Okhala weera miyo nkinwera weettiha ekaaro, asinna a mmulokoni yaapaka mareherero weera ekiweeleke owaani vamoha ni aiyaka weera nirowe omuthukumanoni ni muteko woolaleera.” Mweekhaikhai, eparakha etokweene weerela eparte emusi yoomunepani ya nsivelo!

15. Mwaha wa heeni nintthuneyaahu ororomelaka weera nnoowera oviriha maxupo?

¹⁵ Otheene hiyo nnoviriha maxupo oohiyana-hiyana. Ntoko noonnahu yoosoma ela, hiyo khaninwera ovilela maxupo meekhiihu. Yehova Tithiihu, ni owo onnawehexexa maxupo ninkumanahuno. Owo ori vakhiviru nihiyo ni onniwa mavekelo ahu ni ontthuna onikhavihera vantxipale. (Yes. 43:2) Hiyo ninnaroromela weera ninnawera oviriha maxupo, mwaha wooweera Yehova onnanivaha itthu nihawelaahu, weera nivilele: nivekelo, Biblya, eyotxa ya omunepani ni asinna.

16. Nipakeke eheeni weera Yehova anthokorore?

¹⁶ Hiyo ninnaxukurela mwaha wookhalano Muluku ootikiniha ni onniphwattha! “Vano murim’ahu onnattakala [onnahakalala] mwa yowo.” (Nsal. 33:21) Hiyo pooti woonihera weera ninnamuxukurela Yehova vaavo nimpakaahu ele ninweraahu weera nikhavihereye niitthu owo onnivahaawe. Nave-tho hiyo onnatthuneya opaka eparte ahu, naari neere ha wiilipihera weera nimwiiwelele Yehova ni opaka yooreera vamaithoni vawe. Napaka eyo, nroromeleke weera onoonikosoopa mpaka khalayi!—1 Ped. 3:12.