1. Yoothanla heeni mutthu ti mutthu ontthuneyaawe opaka?

 MUTTHU TI MUTTHU onnatthuneya opaka yoothanla yootthuneya. Omukhavihera Yehova Muluku ntoko mutokweene a elapo, naari okhala eparte ya mwiittani a Yehova Satana Diabo. Iri paahi soothanla iya piili, nto mutthu ti mutthu onnatthuneya othanla eparte ontthunaawe okhavihera. Ni yoothanla eyo, pooti okumihera okhalano ekumi yoohimala naari okhwa. (Math. 25:31-33, 46) Mpuwa wa “yoohoxa etokotoko,” atthu anrowa omwalamwaxiwa, akina erowaka ovuluxiwa mene akina erowaka onyaanyiwa.—Apok. 7:14; 14:9-11; Ez. 9:4, 6.

2. (a) Eheeni yoolepa ya Aheberi 10:35-39, enoopereraaya opaka? (b) Eliivuru ya Apokalise enkela onikhavihera hayi?

² Mmusome Aheberi 10:35-39. Mwathanlaleene okhavihera omwene wa Muluku, nyuwo moopaka yoothanla yooreera. Ni nyuwo munnatthuna wakhavihera atthu akina opaka yoothanla yooreera. Nto nyuwo pooti ovarela muteko ele enhimaaya eliivuru ya Apokalise weera mwaakhavihere atthu. Eliivuru eyo yootikiniha ennahima itthu sinrowa waakhumelela amwiittani a Yehova, eyo tho ennuuluma sa mareeliho mantxipale anrowaaya waakhela ale ari oororomeleya wa Muluku. Iyo itthu sootthuneya hiyo nintthuneyaahu osoma, mwaha wooweera napaka eyo, nnoowera olipiha onthamwene ahu ni Yehova. Mwa yeeyo, hiyo pooti ovarela muteko itthu nxutenraahu weera nakhavihere atthu akina ovirelela onvarela muteko Yehova.

3. Ninkela woona eheeni mwa ninrowaahu yoosoma ela?

³ Mpuwa mwa yoosoma ela, ninkela woona waakhuliwa wa makoho ala: Nlivo heeni anrowaaya ophwanya ale ankhavihera  Omwene wa Muluku? Eheeni enrowa waakhumelela ale ankhavihera enama yooxera enhimmwa eliivuru ya Apokalise?

4. Yohani awoonnawe taani yemenleene wiirimu vamoha ni Yesu?

⁴ Murummwa Yohani, ahooniheriwa igrupu piili sinkhavihera Omwene wa Muluku ni sinrowa waakhela ekumi yoohimala. Egurupu yoopatxera ti yaatthu ookwana 144.000. (Apok. 7:4) Awo athanliwe weera yakhaleke wiirimu yeerelaka empari olamulelo wa Yesu. Ereene wiirimu, awo anrowa olamulelaka elapo ya vathi. (Apok. 5:9, 10; 14:3, 4) Mwa yoowonihiwa ya Yohani, aawoona atthu 144.000 yemenleene wiirimu vamoha ni Yesu wa mwaako Siyoni.—Apok. 14:1.

5. Eheeni enrowa okhumelela ni atthu 144.000 oothanliwa ni atthu anrowa okhala elapo ela ya vathi mahuku oomalihera?

⁵ Okhuma etempu ya arummwa mpaka mahiku ahu ala, atthu annavirelela othanliwa weera yeereleke empari ya 144.000. (Luka 12:32; Arom. 8:17) Mpuwa wa yoowoniheriwa awe, Yohani onnasuwela weera atthu vakhaaniini a 144.000 yaarowa okhala valaponi mahuku omalihera. Atthu awo “vakhaaniini” anoorowa wakhela ‘ethonyero’ enoonihera waakhuleliwa wa Yehova, ehinakuve opatxera mahooxo matokweene. (Apok. 7:2, 3; 12:17) Avinyaka mpuwa mwa yoohoxa etokweene, anookuxiwa erowaka wiirimu weera yakhale vamoha ni a 144.000, oothanliwa yaari ororomeleya mpaka okhwa waya. Wiirimu enkela olamulelaka ni Yesu moomweneni mwa Muluku.—Math. 24:31; Apok. 5:9, 10.

6-7. (a) Egrupu heeni ekina Yohani onnaawe oonakaru ya atthu oothanliwa, ni hiyo ninsuwela eheeni woohima sa ekhurupu eyo? (b) Mwaha wa heeni ale oothanliwa ni “muloko mutokotoko” entthuneyaaya opwatthela ekapiitulu 7 ya Apokalise?

⁶ Yohani oonakaru egrupu ele yoopatxera, owo aahoona tho “muloko mutokotoko.” Moovirikana ni a 144.000, Biblya khanhima atthu akavi opakela eparte muloko mutokotoko. (Apok. 7:9, 10) Eheeni hiyo ninsuwelaahu sa muloko mutokotoko? Hiyo ninnasoma masu ala va Apokalise 7:14: “Ala ti yale arwenle wa osondiwa otokotoko ni yàtxapa malaya aya ni yàtteliha mwa ephome ya Mwaputtiputthi.” Atthu a “muloko mutokotoko” anrowa okhalano ekumi yavira yoohoxa etokotoko ni anrowa okhalaka elapo yeela ya vathi ni anookhalano mareeliho mantxipale.—Nsal. 37:9-11, 27-29; Mir. 2:21, 22; Apok. 7:16, 17.

⁷ Naari muthanliweene weera mwakhaleke wiirimu kapena okhala elapo yeela ya vathi, munnawera wuupuwelela ni woona mareeliho munrowaanyu waakhela alempwale va eliivuru ya Apokalise ekapiitulu 7? Enrowa okhala yoohakalaliha. Mwa ikhurupu iya piili sinanvarela muteko Yehova! Moohihovela, enrowa okhala etempu yoohakalaliha mwaha hiyo woothanla okhavihera Omwene wa Yehova. Itthu heeni ikina Apokalise onthalihaawe woohima sa yoohoxa etokotoko?—Math. 24:21.

8. Eheeni enrowa otannyera yoohoxa etokotoko, ni atthu antxipale anrowa opaka eheeni?

⁸ Ntoko noonnahu yoosoma evinre, anamahoolela a ipoliitika a elapo ela, anoorowa omutuphela Babionia Mutokweene yoowo onthonyera ittiini sootheene soowotha. (Apok. 17:16, 17) Otupheliwa iwo onrowa weeriha opatxeriha yoohoxa etokotoko. Neereke eyo enooweriha atthu otthunaka onvarela muteko Yehova? Hooye. Mwaha wooweera, eliivuru ya Apokalise ekapiitulu 6, enoonihera weera atthu ahimmukokhorela Yehova, anrowa waasaka nikhavihero ni mareherero a epolitika ni a nakoso a elapo ela anlikanxeriwa ni mwaako. Mwaha woohikhavihera Omwene wa Muluku, atthu  awo anrowa okhala amwiittani a Muluku.—Luka 11:23; Apok. 6:15-17.

9. Mwaha wa heeni arumeyi a Yehova anrowaaya okhala owooneya mpuwa mwa yoohoxa etokotoko, ni eheeni enrowa okhumelela?

⁹ Ehuhu ya yoohoxa etokotoko, arumeyi a Yehova anoorowa wooneya. Ni awo, anrowa okhala ekhurupu emoha enanvarela muteko Yehova, ni enakhotta “okhavihera enama.” (Apok. 13:14-17) Ororomeleya waya wa Yehova, onooweriha amwiittani aya okhala oonyoonyiwa. Mwaha wa yeeyo, maloko ootheene a mulaponi, anoorowa othukumana weera ekhale ekhurupu emoha eneera yaatuphele arumeyi a Yehova elapo yootheene. Biblya onnitthana yooweereya eyo okhala Gogi a Magogi.—Ez. 38:14-16.

10. Moovarihana ni Apokalise 19:19-21, Yehova onkela opaka eheeni awoonaka atthu awe etupheliwaka?

¹⁰ Yehova onkela opaka eheeni aawoonaka arumeyi awe etupheliwaka? Owo onnileela ha: “Esar’aka eneluttuwe.” (Ez. 38:18, 21-23) Ni ekapiitulu ya  19 ya Apokalise, ennahima etthu enrowa weereya moottharelana. Yehova onoomurumiha mwanawe weera aakosoope atthu awe ni wanyaanya amwiittani awe. Malaika oororomeleya ni empakela eparte ya “anakhotto a wiirimu”—ni a 144.000, anoorowa yakhale vamoha ni Yesu weera yawane ni Gogi a Magogi. (Apok. 17:14; 19:11-15) Eheeni enrowa okhumelela wa ekhotto eyo? Atthu ootheene ni mareherero oothene ahimmurumeela Yehova anoorowa onyanyiwa!—Mmusome Apokalise 19:19-21.

11. Mwaha heeni wootepa otthuneya ori eliivuru ya Apokalise?

¹¹ Muupuwele moota arumeyi a Yehova anrowaaya ohakalala, vaavo anrowaaya ovuluwa yaanyanyiwaka amwiittani a Muluku! Moohihovela, eyo enrowa okhala etempu yoohakalaliha! Onyanyiwa wa Babionia Mutokweene onooruha ohakalala wiirimu. (Apok. 19:1-3) “Othela wa Mwaputtiputthi”—ola mwaha wootthuneya mwa eliivuru ya Apokalise.—Apok. 19:6-9.

12. Moovarihana ni Apokalise 21:1, 2, enkela weereya salini othela wa Mwaputtiputthi?

¹² Ntheli nno ninrowa weereya salini? Ekhaikhai weera oothanliwa ootheene 144.000, anoorowa wiirimu ni enahala ohokolowa weera ekhavihere owana ekhotto ya Harmagedoni. Mene eyo kheiyono enrowa okhala etempu yoophwanelela othela Mwaputtiputthi. (Mmusome Apokalise 21:1, 2.) Ntheli nno na Mwaputtiputthi, ninrowa weereya evinreene ekhotto ya Harmagedoni ni amwiittani ootheene a Muluku enyaanyinweene.—Nsal. 45:3, 4, 13-17.

13. Eheeni eneera yeereye ni ntheli na Mwaputtiputthi?

¹³ Eheeni enkela okhumelela ni ntheli na Mwaputtiputthi? Ntheli ninnamwiiraaniha mulopwana ni muthiyana. Emoha-moharu, ntheli na Mwaputtiputthi, ninkela omwiiraniha mwene Yesu Kristu ni “namatheliwa” a 144.000. Yoowereya eyo, enoopatxeriha olamulelo munyowani, yoowo onrowa okosoopa elapo mwa iyaakha 1.000.—Apok. 20:6.

14-15. Ekapiitulu ya 21 ya Apokalise enaalikanxera ni heeni atthu 144.000? (Nwehe efootu ya vakaapani.)

¹⁴ Noomala ntheli, Apokalise ekapiitulu ya 21 onnaalikanxera a 144.000 ntoko ecidade ya “Yerusalemu munyowani.” (Apok. 21:2, 9) Ecidade eyo, yaavareleliwe ni maluku 12 ni maluku awo yaalempwa “masina a arummwa 12 a Mwaputtiputthi.” Mwaha wa heeni yoowonihiwa ele yaaraya yootthuneya wa murummwa Yohani? Mwaha wooweera owo aahona nsina nawe nilempwaleene vanlukuni. Eyo yaari eparakha wa yoowo!—Apok. 21:10-14; Aef. 2:20.

¹⁵ Ecidade eyo ya nthonyero, ti yoovirikana ni icidade sootheene. Eruwa ya ecidade, yaari  ya etxikunku yoorapihiwa, ni ecidade eyo yookhalano milako, 12 sipakiwe ni eperola. Mathipelo aya ni ixiri saya, epakiwe ni Maluku owaara—ni miphimo saya saari sookhwanela. (Apok. 21:15-21) Mene murummwa Yohani aahona weera yookhala etthu yaahalenle! Moone ele owo ohimmaawe: “Ni mmuttettheni mwemmo nkòne Epewe [etemplu], niwoko Epewe aya ti Apwiya [Yehova] òwerya sothesene ni Mwaputtiputthi. Ni muttetthe khonahawela tho nsuwa nari mweri weera omwaleliwe. Khweli ovuwa wa Muluku wànamwalela muttetthe, ni muthuko aya ti Mwaputtiputthi.” (Apok. 21:22, 23) Ale empakela eparte ya Yerusalemu munyowani, anoorowa omoona Yehova. (Aheb. 7:27; Apok. 22:3, 4) Nto Yehova ni Yesu tari epewe ya ecidade ele.

16. Eheeni enkela weereya ni atthu mpuwa mwa olamulelo wa iyaakha 1.000?

¹⁶ Moohihovela, yaale ari oothanliwa annihakalala yuupuwelelaka ecidade eyo. Vano ale enkela okhalaka elapo ya vathi, onnatthuneya woona ecidade eyo okhala yootepa otthuneya. Mwaha wa heeni? Mwaha wooweera, mpuwa mwa olamulelo wa iyaakha 1.000, Yerusalemu munyowani onooruha mareeliho mantxipale elapo ya vathi. Yohani aahoona “moloko wa maahi a ekumi” onthonyihera mareeliho awo. ‘Okhopela ni okhopela’ sakhala “miri sintxipale sa ekumi” ni makukhu aya murette “wopenuxa miloko s’atthu.” (Apok. 22:1, 2) Atthu ootheene a elapo ya vathi anookhalano eparakha yoowaakhela mareeliho awo. Vakhaani-vakhaani, atthu enkela okhala oohittheka. Khasinkela okhala iretta, ovoreya, naari wiikhupanyera.—Apok. 21:3-5.

17. Moovarihana ni Apokalise 20:11-13, taani enkela waakhela mareeliho enkelaaya owiiha olamulelo wa iyaakha 1.000?

¹⁷ Taani ankela waakhela mareeliho awo? Ti atthu ootheene yaale enkela ovuluwa ekhotto ya Harmagedoni ni yaale apaale anrowa okhalano anamwane. Mene ekapiitulu 20 ya Apokalise enniroromeliha weera alipa okhwa enkela ovinyererihiwa. (Mmusome Apokalise 20:11-13.) Arumeyi “ororomeleya” anoovinyererihiwa—weera yaakhele ekumi yoohimala elapo ya vathi ni atthu “ohixariya” yaale—yahakhanleno eparakha yooxuttera woohima sa Yehova. (Mit. 24:15; Yoh. 5:28, 29) Neereke eyo entthuna ohima weera atthu ootheene yaale akhwiiye enkela ovinyererihiwa weera ekhaleke elapo ya vathi mpuwa mwa olamulelo wa iyaakha  mil? Hooye. Atthu yaale yaakhanleno eparakha yonvarela muteko Yehova nto ehipaka eyo, khanrowa ovinyererihiwa, ni awo ayeeleela eparakha ya okhalano ekumi yoohimala. Yooniheraka weera khantthuna okhala mparadiso elapo ela ya vathi.—Math. 25:46; 2 Ates. 1:9; Apok. 17:8; 20:15.

18. Atthu enkela okhala hayi okhwipi wa iyaakha 1.000?

¹⁸ Okhwipi wa iyaakha 1.000, atthu ootheene enkela okhala elapo ya vathi, nave-tho enkela okhala oohittheka. Yoottheka yaawenle mwa Adamu, enkela omalihiwa, khaavo aneera ahaawe mwaha wa itthu sinkumiheriwa ni yoottheka. (Arom. 5:12) Savira iyaakha 1.000, atthu ankela okhala elapo ya vathi, “anookhalano ekumi” yoomalela.—Apok. 20:5.

19. Atthu ootheene ankela okhalano eparakha heeni mpuwa mwa weereriwa woomalihera?

¹⁹ Hiyo noosuwela weera Yesu, khaakhulenle soowerera sa Satana. Nnaamweera naari eereriwa, Yesu aari ororomeleya. Neereke atthu ootheene oohittheka yaakela opaka etthu emoha-moharu? Yanvirelela okhala ororomeleya, naamwi yereriwaka ni Satana. Mutthu ti mutthu a hiyo, onookhalano eparakha yoowonihera ororomelaya wawe wa Yehova. Savira vale iyaakha 1.000, Satana onkela ohuleliwa. (Apok. 20:7) Atthu yaale ankela woonihera ororomelaya wa Yehova weereriwa iwo woomalihera, anoophwanya ekumi yoohimala ni anookhala ootaphuwa mweekhaikhai. (Arom. 8:21) Atthu ohiroromeleya, anoonyanyiwa khuluwi wamoha ni Diabo ni mademooniyu.—Apok. 20:8-10.

20. Nyuwo munoonela hayi mwa iprofesia nimpwanyahu eliivuru ya Apokalise?

²⁰ Moonelo heeni mukhalannaahu vaavo nimalinhaahu othokorora ipontu sohiyana-hiyana sa eliivuru ya Apokalise? Khamunoona okhala etthu yoohakalaliha opakela eparte okwanela wa iprofesia iya? Neereke khawaakhala wooreera othanla waakhavihera atthu akina omulapela Yehova? (Apok. 22:17) Moohihovela yoosoma ela, yooniphwanyiha ohakalala, ni wuupuwelela sooweherera sooreera sa muhoolo. Hiihale ntoko yeereñyaaya khalayi, ennaneeriha ohima masu uulummaawe murummwa Yohani, yaawo aneera: “Amen! Nkarwá, Pwiya Yesu.”—Apok. 22:20.