MWAHA ONTHOKORORIWA 23
Asitiithi—mwaakhavihere anamwane anyu omusivela Yehova
“Weyo onahala wàtthuna Apwiya Muluku á murim’á wothene, ni munep’á wothene, ni mupuwelo á wothene.”—MATH. 22:37.
ETXIPO 134 Anamwane ti Yoovaha Enikhuma wa Muluku
ELE NINKELA AHU OXUTTERA *
1-2. Mwaha wa heeni ikwaha ikina nneeraahu nooneleke moota mukina miruku sa mBiblyani? Muthalihe.
NIHUKU na ekasamentu, ale ethelanne ennareya maaru weera yiiwexexe mwaha onkhuma mBiblyani woohima sa ekasamentu. Miruku seiyo anvahiwaaya sinkhuma mBiblyani khahiyono anoopatxera wiiwa. Mene, okhuma nihuku nno, awo annoona ovareleya waya muteko miruku iyo. Mwaha wa heeni? Mwaha wooweera awo eneereke ovarela mutekomoothelani mwaya.
2 Etthu emoha-moharu, enneereya vaavo anamathelana anayaraaya anamwane. Pooti weeraka ehinaaye waayara anamwane, yanniiwa naari neere aatoko wiiwa nyaha sintxipale voohima sa moota woowaahuwa anamwane. Mene vaavo anayaraaya anamwane eneereke woona moota sinvareleyaaya muteko miruku iyo. Mene nto awo, aakhalano muritti woowaahuwa anamwane. Nto owo muritti mutokotoko! Moohihovela, matxentxo makina a mBiblyani pooti oneeriha woona moota mukina miruku sa mBiblyani. Mweekhaikhai, ela etthu enneeriha hiyo nri arumeyi a Muluku osoma masu awe ni, opaka ele Yehova aalenlaawe mamwene a wisrayeli. Niphimelelaka ‘mahuku ootheene’ mweekumini a ekumi ahu.—Ola. 17:19.
3. Eheeni ninkelaahu woona mpuwa mwa yoosomeene yeela?
3 Asitiithi, nyuwo mookhalano eparakha etokotoko yeeyo makristu antxipale akhalannaaya. Yoowaaxuttiha anamwane anyu woohima sa Yehova. Mene nto nyuwo muntthuneya opaka etthu. Ohiya paahi waaxuttiharu, muntthuneya waaxuttiha anamwane anyu omusivela Yehova ni murima wootheene. Nyuwo munkela opaka hayi eyo? Mpuwa mwa yoosomeene yeela, ninkela woona miruku mixexe seiyo sinkela waakhavihera asitiithi waahuwa anamwane aya. (2 Tim. 3:16) Nave-tho, nnimoona moota otthara miruku iyo, saakhaviheraaya asitiithi akina.
MIRUKU MIXEXE SEIYO SINKELA WAAKHAVIHERA ASITIITHI
Mwaha wa heeni oneeraaya okhale wooreera wa mwaninyu mwiilipiheraka omukhavihera omukokhorela Yehova? (Nwehe eparagrafu 4, 8)
4. Miruku heeni asitiithi antthuneyaya otthara weera yaakhavihere anamwane aya omusivela Yehova? (Yakobe 1:5)
4 Miruku soopatxera [1]: Mwaasaase nikhavihero na Yehova. Munvekele Yehova weera oovaheeni miruku soowaaxuttiha anamwane anyu woohima sa omusivela yoowo. (Mmusome Yakobe 1:5.) Khaavo tiithi orinono sookumanano ompwaha Yehova. Mwa yeeyo, onnatthuneya otthara miruku sawe. Khaavo mutthu onkela wookhaviherani ompwaha Yehova. Ninnahima eyo, mwaha wa itthu piili. Etthu yoopatxera, Yehova ookhalano sookumanano sintxipale ntoko tiithi. (Nsal. 36:9) Etthu yanaaveeli, miruku owo onvahaawe tisooreera.—Yes. 48:17.
5. (a) Mareherero a Yehova, anaavaha nikhavihero heeni asitiithi? (b) Ntoko enooniheraaya iviidiyu, eheeni nyuwo munxutteraanyu ni ntakihero na murokora ni na munna Amorim? Moota heeni Amorim aahuuwaawe anamwane awe?
5 Yehova avarelaka muteko mareherero awe, onnavaha miruku seiyo sinaakhavihera asitiithi waahuwa anamwane. Biblya onnavaha miruku seiyo sinaakhavihera asitiithi waxuttiha anamwane aya omusivela Yehova. (Math. 24:45) Mwa ntakihero, nyuwo pooti ophwanya nyaha simphwanyeya musaittini “Ajuda para a família.” Woopatxerani seiyo sakumiheriwa mwa erevista Nvenye! Vano sinnaphwanyeya musaittini. Nave-tho, iviidiyu sintxipale siri musaittini pooti wakhaviehra asitiithi waahuwa anamwane aya. *—Mir. 2:4-6.
6. Joe ni amwaariye, anoonela hayi nikhavihero nenno anakhelaaya mmareheroni mwa Yehova?
6 Asitiithi annahela mwiitti miruku Yehova onaavahaawe avarelaka muteko mareherero awe. Mwa ntakihero, tiithi mmoha ooneriwa Joe, ohimme ha: “Waahuwa anamwane araru mweekhaikhai khoiyo ti wookhweya. Ikwaha sintxipale ninnanvekela Yehova weera onikhavihere. Hiyo ninnoona eyo vaavo ninvirihaahu maxupo. Eviidiyu yaakumiheriwe yaanikhavihera ni naahoona weera yoophiya ehuhu yoophwanelela. Hiyo khaninwera waahuwa anamwane nihikhaviheriwaka ni Yehova.” Joe ni amwaariye ahoona weera iviidiyu iyo sihakhavihera awo ni anamwane aya omwattamela Yehova.
7. Eheeni asitiithi antthuneyaaya opaka weera yaavahe anamwane aya ntakihero nooreera? (Aroma 2:21)
7 Miruku sa naveeli [2]: Mwaavahe anamwane anyu ntakihero nooreera. Anamwane anwehexexa ele asitithaya ampakaaya ni annerera otakiha ele anoonaaya. Ekhaikhai weera khaawo tiithi oyarinwe oohikhala ni yoottheka. (Arom. 3:23) Nto asitiithi ennatthuneya wilipihera weera evahe ntakihero nooreera. (Mmusome Aroma 2:21.) Moone etthu tiithi mmoha aathalinhaawe woohima sa anamwane. Owo aahimme weera: “Anamwane anlikana ni esponja annuula ele anoonaaya.” “Awo yoonaka etthu nimpakaahu eneereke onitakiha.” Nsivelo nahu ni Yehova nintthuneya weera nooneyeke ni miteko.
8-9. Eheeni nyuwo munxutteraanyu ni ele ahimmaawe Andre ni Emma?
8 Asitiithi pooti woonihera weera annamusivela Yehova ni mikhalelo soovirikana. Moone etthu munna mmoha a iyaakha 17 oneeriwa Andre ohimmaawe. Owo enre: “Asitithaka akixuttiha moota woovekela. Mahuku ootheene kihakunve okona, atithaka yaanawa anapaka avekelo ni miyo nnamwera kiipankene nivekelo naka. Menento mwaha wa yeeyo, apapaka yankerela ‘munvekeleke Yehova iwoora sootheene mutthunaanyu.’ Ni olelo nkikhulumuwa onvekela Yehova ni kinnamoona okhala tiithi ansivelo.” Asitiithi, musuweleke weera nsivelo nanyu ni Yehova nimmwaakhavihera anmwane anyu.
9 Moone ntakihero na murokora oneeriwa Emma. Apapawe yakhuma vatthokoni ni yaahiya ivaale sintxipale weera amamawe elive. “Amamaka yannatthuneya ovara muteko muntxipale weera elive ivaale iyo ni otxiha etthoko.” Owo onnahima weera; “Yehova khanaahiya atthu awe mpaka ehinakhalano itthu sootthuneya. Kaawera woona ntakihero naya ni kanniroromela.” Ninxuttera eheeni ni ntakihero nna? Ntakihero nna, ninnanoonihera weera asitiithi pooti opaka ele anweraaya weera yaakhavihere anamwane aya ehuhu yooxupa.—Agal. 6:9.
10. Asitiithi a w’israel yaakhavihereya hayi weera yaaxuttihe anamwane aya woohima sa Yehova? (Olaleya 6:6, 7)
10 Miruku sa naararu [3]: Mutthekuleke ehuhu yootheene ni anamwanaanyu. (Mmusome Olaleya 6:6, 7.) Emaara ele asitiithi yaanniivaha ehuhu weera etthekule ni anamwane aya ni waaxuttiha yaawo omusivela Yehova. Mwa ntakihero, mmiravo mmoha onnaviriha ehuhu yintxipale ni apapawe avaraka muteko woolima ni woohepha. Vaahera murokoriye onnaviriha ehuhu ni amayawe aakhaviheraka miteko sa vaate. Ehuhu eyo asitiithi yavirihaaya ni anamwane aya yannakhavihereya weera yaaxuttihe anamwane aya woohima sa Yehova. Mwa ntakihero, awo yaannatthekula woohima sa mikhalelo sooreera sa Yehova ni moota onkhaviheraawe etthoko.
11. Asitiithi akristu ettotteleke mureerelo ehuhu heeni weera etthekule ni anamwane aya?
11 Ekhaikhai weera ehuhu yootxenta, nave asitiithi khanwera oviriha ehuhu yintxipale ni anamwene aya. Mene nto, asitiithi annavara muteko woorakamawo ni anamwane annaviriha ehuhu erowaaka oxikola. Mwa yeeyo nto, asitiithi annatthuneya weera yisukereke ehuhu weera atthekuleke ni anamwane aya. (Aef. 5:15, 16; Afil. 1:10) Mene nto, ehuhu emoha asitiithi enkhavihereyaaya ori okokhorela kapena olapela wa vatthokoni. Mmiravo mmoha oneeriwa Alenxandre ohimme ha: “Apapaka khantxompela okokhorela kapena olapela wa vatthokoni. Mene nto, wamala okokhorela kapena olapela iwo yanniihiyera ehuhu weera ntthekule.”
12. Eheeni muhooleli a etthoko oneeraawe uupuweleke aamulapeka Muluku vatthokoni ni anamwane awe?
12 Nyuwo mwaarene muhooleli a vatthokoni, munkela opaka eheeni weera olapela iwo okhale woowaahakalaliha anamwane anyu? Munoonela hayi opatxera osoma vamoha ni anamwane anyu eliivuru, “Mukhaleno ekumi yoohimala!” Muupuwele weera, nyuwo munnaasa okhavihereya weera mutthekule ni anamwane anyu. Ni awo antthuneya weera ekhaleke ootaphuwa weera yoolelekeni itthu sinaaxupa niiye anuupuwelaaya. Mwa yeeyo, mwaamulapelaka Muluku vatthokoni muhaanyemeleke naari owoopopiha anamwane anyu. Wakhala weera anamwane anyu annahima moonelo aya ohinvarihana ni ele Biblya onhimaawe, muhaanyemeleke. Mwaahiyeke anamwane anyu ehimeke ele anuupuwelaaya. Mwapaka eyo, awo eneereke okhala ootaphuwa wooleelani itthu sinaaxupa ni nyuwo munoosuwela itthu sinaaxupa nave munoosuwela moota woowaakhavihera. Nave-tho, ohiya waanyemela, mweereke waaxukurela mwaha wohookhuwani etthu nave nwooperereke woleelani etthu eri poothe. Mwaasuwelaka itthu sinaaxupa anamwane anyu, muneereke owera waakhavihera.
Moota heeni asitiithi eneeraaya evarele muteko soopattuxiwa weera yaaxuttihe anamwane aya woohima sa mikhalelo sa Yehova? (Nwehe eparagrafu 13)
13. Neereke asitiithi onnatthuneya oweherera ehuhu ammulapelaaya Muluku vatthokoni weera yaaxuttihe anamwane aya woohima sa Yehova?
13 Asitiithi, mukhavihereye naari mwasaasereke mahuku ootheene weera mwaakhavihere anamwane anyu omusivela Yehova. Nyuwo muhiweherereke ehuhu paahi yoomulapela Muluku vaatthokoni weera mwaaxuttihe anamwane anyu woohima sa Yehova. Moone ele maaye mmoha oneeriwa Lisa ohimmaawe: “Hiyo ninnavarela muteko soopattuxiwa weera naaxuttihe anamwane ahu woohima sa Yehova. Mwa ntakihero, vaavo mwalapwa ahu ompakaawe etthu yootheiha, hiyo ninnavarela muteko etthu eyo, weera naaxuttihe anamwane ahu woohima sa mikhalelo sa Yehova. Naaleelaka weera, Yehova ookhalano nsivelo mwaha wa itthu opattunxaawe ntoko hiyo.”
Asitiithi, neereke mohaasuwela asinthamwene aanamwane anyu? (Nwehe eparagrafu 14) *
14. Mwaha wa heeni oraaya wootthuneya asitiithi waakhavihera anamwane aya okhalano asinthamwene ooreera? (Miruku 13:20)
14 Miruku sa naaxexe [4]: Mwaakhavihereke anamwane anyu okhalano asinthamwene ooreera. Biblya onnanleela weera asinthamwene ahu pooti oneeriha opaka—itthu sooreera naari soonanara. (Mmusome Miruku 13:20.) Asitiithi, neereke munnaasuwela asinthamwene a anamwane anyu? Nyuwo mohaasuwela ni munnaviriha ehuhu ni asinthamwene a anamwene anyu? Munaapake heeni weera mwaakhavihere anamwane anyu okhalano asinthamwene ammusivela Yehova? (1 Akor. 15:33) Nyuwo pooti waakhavihera waathanla asinthamwene ooreera, mwaawopaka asinna akina okhomaala moomunepani weera nvare wamoha itthu ikina sa vatthokoni.—Nsal. 119:63.
15. Asitiithi ankela waakhavihera hayi anamwane aya okhalano asinthamwene ooreera?
15 Moone yooweereya ya Tiithi mmoha oneeriwa Tony. Owo onnathaliha etthu aapankaawe weera aakhavihere anamwane awe okhalano asinthamwene ooreera. Owo ohimme ha: “Iyaakha sa muttuli, miyo ni amwaaraka naakhovelela waawoopa asinna a munnuwelo oovirikana owaani weera nipake itthu wamoha ntoko oreherera yootxa ni otxela vamoha. Nave-tho, opaka wamoha yoolapela ya vatthokoni. Vaavo naapakaahu eyo nannaasuwela nnene asinna awo. Nave-tho, naakhalano eparakha yoowaakhela asitokweene a esirkuitu, mamissionaariyu ni atthu akina owannyihu. Sokumanano saya ni wiilipihera waya, wahaakhavihera anamwane ahu omwaattamela Yehova.” Asitiithi, nvireleleke waakhavihera anamwane anyu okhalano asinthamwene ooreera.
MUHIYELEELE YOOWEHERERA ANYU!
16. Munaapake heeni wakhala weera mwaninyu oohima weera khantthuna onvarela Yehova?
16 Ikwaha ikina nnaamweera asitiithi akina yiilipiheraka waaxuttiha anamwane aya, pooti okhala wooxupa. Anka wakhala weera anamwanaaya khentthuna omukokhorela kapena omulapela Yehova? Asitiithi, wakhala weera eyo yohookhumelelani muhiisipa mulattu. Mwaha wooweera Yehova, ohaavaha atthu ootheene otaphuwa woothanla omulapela Yehova kapena hooye—waahela mpuwa anamwene anyu. Asitiithi, anamwane anyu yathanla vale ohiya omulapela Yehova, ehiwootxeeliheni okhano yooweherera, mwaha wooweera nihukunno owo pooti otthika. Muupuweleke ntakihero na mwaana oomwareya. (Luka 15:11-19, 22-24) Niphwanaphwaniho nna na mwaana oomwareya aakunxe ekumi yohuureya muhoolo mwaya aatthikela owaani. Nyuwo pooti wuupuwela há: aaah nno naari “niphwanaphwaniho” paahi. “Neereke eyo etthu eneereya olelova?” Mweekhaikhai eyo enneereya! Moone ntakihero ni yooweereya ya mmiravo oneeriwa Elie.
17. Yooweereya ya mmiravo Elie, enaalipiha hayi asipapa?
17 Elie othalinhe ha woohima sa asipapawe: “Asipapaka yaapaka ele enweraaya weera ekikhavihere omusivela Yehova ni masu awe, ori Biblya. Mene, kunnuwakaru kaapatxera ohiwiiwelela.” Elie aapatxera okuxa ekumi yoohuureya nnaamweera asipapawe yiilipihenre omukhavihera moomunepani. Muhoolo mwaya, owo aakhuma owaani ni anapatxera opaka itthu soohuureya. Nnaamweera owo aakunxe ekumi yoohuureya, annaaleela itthu sa mBiblyani asithamwene awe. Elie aahoona weera: “Vaavo aleelaawe asinthamwene awe woohima sa Yehova annuupuwelaxa vantxipale itthu sa Yehova. Owo ohimme há: “Mene nto, vakhaani-vakhani ni moovareleleya mimiso sa ikhaikhai sa mBiblyani seiyo kaakhittelenlaaka mmurimani mwaka—ni seiye asipapaka yeerenraaya waala moowiilipihera—saapatxera omela.” Evirakaru ehuhu, Elie aatthikela mweekhaikhaini. * Muupuwele moota asitithaawe yaahakalanlaya mwaha woowiilipihera omuxuttiha mwanaya okhuma enamwanaawe weera amusiveleke Yehova!—2 Tim. 3:14, 15.
18. Nyuwo munoonela hayi mwiiwaka matakihero aasitiithi yaawo yiilipihenre waakhavihera anamwane aya omusivela Yehova?
18 Asitiithi, nyuwo mookhalano eparakha ni muritti mutokweene wowaakhavihera anamwane anyu omukokhorela kapena omulapela Yehova. (Nsal. 78:4-6) Mene muritti ola mukhalannaanyu khoiyono ti wookhweya. Opwaha mwa yeeyo hiyo ninneera asantte vantxipale mwaha wowiilipihera wanyu waakhavihera anamwane anyu! Wakhala weera nyuwo munoovirelela waahuwa anamwane anyu mweekhaikhaini ni waakhavihera omulapela Yehova, muroromeleke weera, Yehova onoohakalala ni wiilipihera wanyu.—Aef. 6:4.
ETXIPO 135 Mukhale a Miruku Mwanaka
^ Asitiithi ari makristu annaasivela vantxipale anamwane aya. Awo anniilipihera vantxipale weera ekosoope makhalelo a weerutthuni ni oomunepani aanamwane aya. Mene etthu yootepa ontthuneya, tiyooweera ennapaka ele enweraaya weera yaakhavihere anamwane aya omusivela Yehova. Mpuwa mwa yoosomeene yeela, nnoorowa ooxuttera miruku mixexe seiyo sinkela waakhavihera asitiithi waaxuttiha anamwane aya omusivela Yehova.
^ Moone iviidiyu va jw.org yeeyo eneera Ensinado por Jeová para criar nossa família.
^ Moone mwaha oneera “Biblya onnatxentxa ikumi saatthu” va A Sentinela a 1° a Abril a 2012.
^ YOOTAPHUELA YA EFOOTU: Atthunaka waasuwela nnene asinthamwene a anamwane awe, tiithi mmoha onnammana Boola ni mwanawe wamoha ni nthamwene amwanawe.
